Tiaikid a Kot el Ungil el Rolel a Klengar

Ke mekerang e sebechem el mo kmeed er a Dios? Kede mla smaod a bebil el tekoi el sebechem el meruul. E aikang a:

1. Mo medengelii a ngklel a Dios el Jehovah e ousbech er ngii.

2. Blechoel el mengedecheduch er ngii el okiu a nglunguuch e orrenges er ngii el okiu sel mosuub er a Tekingel el Biblia.

3. Blechoel el meruul a tekoi el odeuir a rengul a Jehovah.

Me kau ke meruul aika el tekoi me bo el sebechem el mo kmeed er a Dios? Ngar er ngii a tekoi el dirk kirem el oureor el kirel? Me alta e ngdiak lebeot el doruul el uaisei, engdi ka di molatk a klungiaol el sebechem el ngmai.

A Jennifer er a beluu er a Merikel a dmu el kmo: “Ngkmal diak bo mouuchel er a rengum a lsekum ngmo blak a rengum el olekes er a deleuill er kau me a Dios. Tiang a mo uchul a betok el klengeltengat. Ngdochelii a klaumerang me a klemedengei er kau er a Dios, engdi sel kot el ngaruchei er ngii el rokui a mo uchul a klou el bltikerreng er kau el mo er a Jehovah. Tiaikid a kot el ungil el rolel a klengar!”

Me a lsekum ngsoam a lebo er ngii a kmes el deleuill er kau me a Dios, e a Resioning er a Jehovah a kmal dmeu a rengrir el ngosukau. Ngsebechir el mesuub er a Biblia el obengkem el diak locheraol. Te dirrek el kmal mengemedaol er kau el mo er aike el miting el ngar er a Blil a Ongdibel er tir. Ngmo dmeu a rengum el teloi er tirka el chad el tir a mera el mengreos er a deleuill er tir el obengkel a Dios.a A lsekum ke kongei el meruul er tiang e ngsebechem el mo ua uldesuel a ta er a milluches er a psalm el dilu el kmo: “Ngdi kuk le ngak e ng bai ungil a dekeed er a Dios!”​—Psalm 73:28.