Kau Ke Blechoel el Mengedecheduch er a Dios?

A rechad el kmal kausechelei a blechoel el chadecheduch el okiu a dengua, e-mail, video me a lechub e te meluches a babier. Me ngdi osisiu, a bo dekeed er a Dios, e ngkired el blechoel el mengedecheduch er ngii. Me ngmekerang a doruul er tia el tekoi?

Ngsebeched el mengedecheduch er a Jehovah el okiu a nglunguuch. Engdi a nglunguched a diak losisiu ngii me sel dongedecheduch er a chad el ua klunged. Ngkired el mo medengei el kmo sel doluluuch, e kede mengedecheduch er ngike el Ulemeob e Kot el Ngarbab er a eanged me a chutem. Tiang a kirel el rullid me kede meluluuch el oba dmolech el omengull. Ngdirrek el ngar er ngii a lmuut el bebil er a tekoi el kired el meruul er ngii me bo lemorenges a nglunguched. Me bo dosaod a edei er ngii.

A kot, a nglunguched a kirel mo er a di ta el Jehovah el Dios el diak el Jesus, me tirke el leko te santo, me a lechub a bleob. (Exodus 20:4, 5) A Biblia a bleketakl el melekoi el kmo: “Lak el sebek a rengmiu ra ngiidi le ngerang, e di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit.” (Filipi 4:6, BT) A ongerung, ngkired el meluluuch el okiu a ngklel a Ngelekel a Dios el Jesus Kristus. A Jesus a milsaod el kmo: “Ng diak a chad el mor a Chedam, a lak lokiu ngak.” (Johanes 14:⁠6) A ongedei, a nglunguched a kirel el oltirakl er a soal a Dios. Me a Biblia a melekoi el kmo: “Ng rongesid a dolengit a ngii di le ngerang er ngii el ultuil er a ikel tekoi el ungilbesul er a rengul.”a​—1 Johanes 5:14.

Me ngklemerang, a deleongel er a reteru el chad a diak el sebechel el melemolem a lsekum ngdi ta er tir a mengedecheduch e merekong. Me ngdi ua rolel a cheldecheduch er a delongelir a reteru el chad, kid a kired el msang a techellel a Dios me ngmengedecheduch, e kede orrenges er ngii. Ke medengei el kmo ngmekerang a Dios a longedecheduch er kid?

Chelecha el sils e a Jehovah el Dios a ua longedecheduch er kid el okiu a Tekingel el Biblia. (2 Timothy 3:16, 17) E ngera me kede melekoi el uaisei? El ua tiang, oleko ke ngiluu a babier el mla er a kmeed el sechelim. A uriul er a omchiuii, e ke kmal dmeu a rengum el ouchais er a chad el kmo, “A sechelik a dirk uluuchais er ngak a bebil el tekoi!” Engdi a mera er ngii a sechelim a dimlak el mera el mengedecheduch er kau, ngbai milluches er a babilengel el eko er kau. Me ngdi osisiu, sel monguiu er a Biblia, e ke msa techellel a Jehovah me ngmengedecheduch er kau. Me tiaikid a uchul me a Gina el dulsaod er ngii er sel kot el suobel a dmu el kmo, “A lsekum ngsoak a Dios a bo lomes er ngak el uai a sechelil e ngkirek el menguiu er a Biblia, el ngii a ua babilengel el me er ngak.” Ngdilechelii el kmo, “A omengiuek er a Biblia er a bek el sils a mla lmuut el okesengii a deleuill er ngak me a Dios.” Me kau ke msa techellel a Jehovah me ngmengedecheduch er kau el okiu a omengiuem er a Tekingel el Biblia er a bek el sils? A omerellem el uaisei a rullau el mo kmeed er a Dios.