A Re Sister el Mla Mo Odos er Kid

Felisa: A telungalek er ngak a kmal mle mesisiich el Katolik. Me a re 13 el chedak a mle badre me a ruluureor el mo er a ikelesia. A ta el chedal a delak a mle badre e dirrek el mle sensei er a skuul er a Katolik. Me a uriul er a lemad, e a Pope John Paul II a mle soal el rullii el mo ta er a “santo.” Kemam el telungalek a kiliei er a beluu er a Sebangiol, e a demak a uluureor el merot a deel, e a delak a uluureor er a sers. Aki mle teai el ochad, e ngak a mle kot el klou.

Sera le 12 a rekik, e ngulemuchel a mekemad er a beluu er a Sebangiol. Me a uriul er a mekemad e a rechad er a kabelment a kilebsengii a demak e le ngkuk mle ngodech a uldesuel el kirel a balatiks. Ngkmal mle meringel er a delak el omekang er kemam el rokui, me nguldureklterir a retedei el merrengek el Araceli, me a Lauri, me a Ramoni, el mo kiei el obengterir a re sister el ngar er a kanbent er a beluu er a Bilbao.

Araceli: Sel taem e ngmle 14 a rekik, e a Lauri a mle 12 a rekil, e a Ramoni a mle 10 a rekil. Me aki mera el di uluureng er a rechad er a blimam. Ngar er a Bilbao e aki uluureor el mengetmokl er a kanbent. E a eru el rak er a uriul, e a re sister a uleldurech er kemam el mo kiei er a klou el kanbent er a beluu er a Zaragoza, el mo oureor el omekerreu er a remechudelang el chad. Aki kmal mle meringel el oureor me ngkmal mo mesaul a bedengam.

Felisa: Tirka el merrengek er a lebo er a kanbent er a Zaragoza, e a delak me a ochedal el mle badre, a uldureklak el mo kiei el obengterir. Ngmle sorir a bo kcheroid er a buik el mla mo kora semeriar er ngak. Seikid el taem e ak mlo er a ikelesia er a bek el sils, e le ngmle soak el mo ta er a missionari er a Katolik el di ua cousin er ngak el mle missionari el ngar er a Africa. Me ngmle soak el mo er a kanbent, e le ngkmal mle betik a renguk er a Dios.

Engdi sera kbo er a kanbent, e ngmlo diak el sebechek el remuul a betok el tekoi el mle soak el meruul. Me a re sister a dimlak lolisiich er ngak el mo mesiou er a Dios er a kuk ta er a beluu. Me a uriul er a ta el rak e ak mlo remei, e ullengeseu er a okdemelek el mle badre. Ak milengetmokl er a blil, e aki dilak el meluluuch el ousbech er a Rosario er a bek el kesus. Ak dirrek el milengetmokl a bung er a chelsel a ikelesia e omesiich aike el bleob el okesiul a Maria me a re “santo.”

Araceli: Sera kngar er a Zaragoza, e ak riruul aike el kot el telbilek el mo ta er a sister. Engdi seikid el taem, e te tilbir el mo omii er kemam el odos. Me ak mlo er a kanbent el ngar er a Madrid, e a Lauri a mlo er a Valencia, e a Ramoni a di kiliei er a Zaragoza. Sera kngar er a Madrid, e ak riruul aike el ongeru el telbilek el mo sister. A rebetok el ngalek er a skuul me a remechudelang el chad me a relmuut el bebil a kiliei er tia el kanbent. Me ngkmal mle imis el betok a ureram, e ngak a uluureor el omekerreu er tirke el silecher.

Ngkmal mle soak el mo sister, me a kulemdasu el kmo aki mo blechoel el menguiu er a Biblia e mesuub er ngii. Engdi ngdimlak a ta el ki mosuub er a Biblia me a lechub e ki mosaod er a Dios me a Jesus. Aki bai milsuub el kirel a klengar er a re “santo” me a bebil el tekoi er a Latin, e dirrek el milluluuch el mo er a Maria. Engdi a oumesingd el taem, e aki di mle meringel el oureor.

Cherengel a taem e ngmlo suebek a renguk e rrau a renguk. Tia el urerek a bai rirelleterir a rebebil el kmal mo ungilbesrir, e a telungalek er ngak a kmal mle chebuul. Me ak mlo omdasu el kmo ngbai kirek el oureor el olengeseu er tir. Ak milengedecheduch er ngike el ngarbab el merreder er a re sister el kirel tia el tekoi, e silbedii el kmo ngsoak el mo remei. Engdi ngchilsechesak er a kekerei el delmerab e le ngulemdasu el kmo tiang a rullak el mo kongei el di kiei.

A re sister a ultebedak er tia el delmerab, engdi sera bo lodengei el kmo ngdirk soak el mo remei, e te liluut el osisebak er a chelsel. Ngmlo edei el taem el longesimer er ngak e dilu el kmo, ngsebechek el tuobed er a kanbent a lsekum ak meluches el kmo: “Ak merolang e le ngsoak el mesiou er a Satan er a bai kusiou er a Dios.” Tiang a kmal chilsir a renguk. Ngkmal mle soak el mo remei, engdi ngkmal diak bo kuluches aike el tekoi. Me ak mlo mengedecheduch er a badre, e silbedii er a rokui el tekoi el dilubech. Me a badre a mlo nguu a kengei er a bisop e liluut el olutak el mo er a kanbent el ngar er a Zaragoza. Me a sesei el buil er a uriul e te kilengei me ak tilobed er a kanbent. Ngdi mle telkib, e a Lauri me a Ramoni a dirrek el tilobed er a kanbent.

A BABIER EL ULEMII ER KEMAM

Felisa: Telkib el taem er a uriul e ak mlo bechiil, e millukl el mo kiei er a Cantabria el ta er a province er a beluu er a Sebangiol. Ak millemolem el omais el mo er a ikelesia, me a ta er a sandei e a badre a mle klou a ngerel el dmu el kmo, “Ka mesa tia el babier!” Ngulechotii er kemam a babier el A Klemerang el Choitikikid el Mora Klengar, e dilu el kmo, “A lsekum a chad a mla meskemiu tia el babier, e mnguu el me meskak, me a lechub e mnguu el choitii!”

Me sera kisa tia el babier e ngkmal mlo soak el menguiu er ngii. Sesei el klebesei er a uriul e a reteru el Sioning er a Jehovah a mle er a blik, e ulechotii tia el babier er ngak. Me ak ngiluu e chiliuii er seikid el kesus. Me sera lluut el mei tirka el odos, e te silebedak el kirel a omesubel a Biblia, me ak kilengei el mo mesuub.

Ngkmal mle soak el odeuir a rengul a Dios. Me sera bo kudengelii a klemerang el kirel a Jehovah e ngliluut el smisichii a bltkil a renguk el mo er ngii. Ngkmal mle soak el ouchais el kirel a Jehovah el mo er a rokui el chad. Me sera 1973 e ak miltecholb. Ak mle blechoel el melasem el mesaod er a klemerang el mo er a rechad er a blik, engdi tir el rokui el ileakl a merrengek el Araceli a kmal ulemtok er ngak.

Araceli: A mekngit el omerellir tirke el ngar er a kanbent a uchul me ngkmal mle kesib a renguk. Engdi ak millemolem el ngar er a ikelesia er a bek el sandei e dirrek el uluusbech er a Rosario el meluluuch er a bek el sils. Ngdirk mle soak el mo medengelii a Biblia me ak ulengit er a Dios me lengesukak. Seikid e a Felisa a silebedak er a tekoi el bla lesuub. Ngkmal mle semeriar el ouchais el kirel a beches el klaumerang er ngii, me ak ulemdasu el kmo ngmla mo kebelung, e dimlak kengei aike el tekoi el ledilung.

A uriul e ak liluut el mo kiei er a Madrid e mlo bechiil. Me a cherengel a taem e ak miltebengii el kmo, a rechad el mle blechoel el mo er a ikelesia a dimlak loltirakl a osisecheklel a Jesus er a klengar er tir. Me seikid e ngmlo diak kbo er a ikelesia, e dikea kuumerang er a re “santo” me a beluu er a ngau, e mlo diak kuumerang el kmo a re badre a sebechir el ousubes a klengit. Ak dirrek el ngilai el chemoit aike el rokui el bleob el chelid el mla er a blik. Ngdimlak kudengei el kmo tia el tekoi el kurruul er ngii ngmelemalt me a lechub ngdiak, me ak di milluluuch el mo er a Dios el kmo: “Ngkmal soak el mo medengelkau. Mngesukak!” A Resioning er a Jehovah a mle betok el taem el lemei er a blik, engdi ngdimlak knguu a chesimer. Ngdimlak el soak el mo chedal a ngii di el klechelid.

A merrengek el Lauri a kiliei er a beluu er a France, me a Ramoni a kiliei er a beluu er a Sebangiol. Me sera 1980 e te mlo mesuub er a Biblia el obengterir a Resioning er a Jehovah. Ngkmal mle ulterekokl a renguk el kmo, tirkang a di ua Felisa el diak lodengei el kmo te mesuub a betok el blulak el tekoi. A uriul e a ta er a tonari er ngak el Angelines el ta er a Sioning er a Jehovah a mlo sechelik. E ngii me a bechil a mle blechoel el olengit er ngak el mo mesuub er a Biblia el obengterir. Te mlo medengei el kmo ngdiak ksemeriar el kirel a klechelid, engdi ngkmal mle soak el mo ungil el medengelii a Biblia. Me ak kilengei el mo mesuub el obengterir, engdi ngmle soak el ousbech er sel Biblia er ngak, el ngii a Nácar-Colunga el oidel a Biblia.

A BIBLIA A UCHUL ME AKI LILUUT EL MO DMAK

Felisa: Sera bo kmetecholb er a 1973, e te mla er ngii a bekord el 70 el Sioning el ngar er a Santander, el ngii a capital city er a province el Cantabria. Ngmla er ngii a kmal betok el mekekerei el beluu er a chelsel tia el province, me aki ngar er a bas me a lechub e ngdi mlimam el mo omerk er a klumech er aika el beluu.

Cherengel a taem e ak milsuub er a Biblia el obengterir a rebetok el chad, e a 11 er tir a miltecholb. E a ruumesingd er tir a mle chad er a Katolik. Ngkmal mle kirek el oba kllourreng el bedul tir, e le te di mle uai ngak el uluusbech er a klou el taem el mo mesang el kmo a tekoi el luluumerang a mle cheleuid. Ak dirrek el mle ungil el medengei el kmo, ngdi ta el Biblia me a chedaol reng er a Jehovah a sebechel el ngosuir a chad el mo ngodechii a uldesuel e mo medengelii a klemerang. (Heb. 4:12) A bechik el Bienvenido el mle bulis a miltecholb er sera 1979. E a uchei er a lemad a delak, e ngdirrek el ulemuchel el mesuub er a Biblia.

Araceli: Sera kumuchel el mesuub er a Biblia el obengterir a Resioning er a Jehovah e ngdimlak kuumerang er tir. Engdi a cherengel a taem e ngmlo diak kumdasu el uaisei. A Resioning a ullisechakl el kirel a Biblia e dirrek el uleltirakl er ngii er a klengar er tir. Me ngmirrael el mo mesisiich a klaumerang er ngak er a Jehovah me a Biblia, me ngmengal mlo dmeu a renguk. A retonari er ngak a dirrek el milsa sel deurreng er ngak me te dilu el kmo, “Araceli, molemolem el meruul er sel tekoi el moruul er ngii!”

Ak milluluuch el kmo, “Ke kmal mesaul e Jehovah el uleba kllourreng e meskak a betok el techall me ngmo sebechek el mo medengelii a klemerang er a Biblia.” Ak dirrek el ullengit er a udelek el Felisa me lousubes aike el mle mekngit el tekoi el kdilung. Seikid el taem, e ngmlo diak ki mkautoketok, e bai mlo dmeu a rengmam el chadecheduch el mesaod er a Biblia. E sera 1989 er a le 61 a rekik e ak mlo metecholb.

Felisa: Chelechang e ngmla mo 91 a rekik, e a bechik a mla mad. Ngdikea el sebechek el meruul a tekoi el ua ngar er a mong. Engdi ak dirk menguiu er a Biblia er a bek el sils, e mo er a miting, e dirrek el mo oldingel a obliil sel bo lsebechek.

Araceli: Ngkmal soak el mengedecheduch er a re badre me a re sister, e le ngak el mle sister er a ngar er a mong. Me a rebebil er tir a dirrek el mla ngmai a babier me a magazine. A lebebil er a taem e ak milengedecheduch er a ta el badre el kmal kilengei a tekoi el kulsaod, engdi ngdilu el kmo: “Ak mla mo rubak, me a lsekum ngmo diak badre, e ak mo mekerang? Ngera te mo dmung a rechad er a ikelesia me a telungalek er ngak?” Me ak dilu er ngii el kmo: “E ngerang mo melekoi a Dios?” Ngkmal mlo mekngit a rengul e le ngmle medengei a tekoi el kirel el meruul. Engdi ngdimlak lekengei el ngodechii a klengar er ngii.

Ak dirk melatk er sel taem el bechik a dilu el kmo ngsoal el mo er a miting. Seikid e ngmla mo 80 me a derengel a rekil, e di millemolem el ngar er a miting el mo lmuut er a kodellel. Ngmilsuub er a Biblia e mlo omuchel el omerk er a klumech. Me ngkmal mle dmeu a renguk el oldingel a obliil el obengkel. Engdi a eru el buil er a uchei er a bo lemetecholb, e ngmlo smecher.

Felisa: Sera bo kumuchel el mesiou er a Jehovah, e tirka el tedei el merrengek a ulemtok er ngak. Engdi a uriul e te dirrek el kilengei er a klemerang. E tiang a ta er a kot el ungil el tekoi el mla duubech el kirek. Me a uriul e ngmle sebecham el mengoit a taem el dmak e chadecheduch el kirel ngika el Dios er kemam el Jehovah me a Tekingel. Ngkmal dmeu a rengmam el sebecham el dmak el rokui el mesiou er a Jehovah.a