Predict el Kirel a Ngar Medad

Ngmla ta el molatk el kmo ngmo uangerang a klengar er a ngar medad el kirem kau me a telungalek er kau? Ngmo er ngii a kerruul me a lechub e ngchelebuul, bltikerreng me a lechub e ke mo sabisi? Ke mo kiei el kemanget el taem me a lechub e ngdi mo tedeb a klengar er kau? A rechad a mla mo betok el telael el rak el di lolatk aika el ker.

Chelecha el taem e a re expert a mesuub a blekeradel er a beluulechad e predict el kirel a ngar medad. Me alta betok er ngii a mo klemerang, me nguaisei ngngar ngii aike el kmal cheleuid. El ua tiang, sera 1912 e a Guglielmo Marconi el mle invent er a wireless telegraph a millekoi el kmo: “Sel bo le wireless a rokui el tekoi e ngmo diak a mekemad.” E a ta er a agent er a Decca Record Company el mle reject er a Beatles er a 1962 uluumerang el kmo aike el group el loukita e mengitakl a mo diak el popular er a ngar medad.

A rebetok a mo er omengelil el melasem el mo medengei el kirel a ngar mederir. A rebebil osiik a ulekrael er a remenguiu a btuch. A horoscope a blechoel el debetik er a betok el magazine me a newspaper. A rekuk bebil a mo er tirke el menguiu a kat, ochur, me a lechub e ngchim el melasem el mo medengei a tekoi el mo duubech er a ngar mederir.

A rebebil er a irechar el millasem el mo medengelii a ngar mederir a mlo omes er a reprist el tir a leko te melekingel a chedrir. El ua tiang, a King Croesus er a Lydia uleldurokl a sengkel el kmal mle klou a kerresel el mora prist el mlara Delphi er a Gris. Ngika el prist a dilu el kmo a Croesus a mo okngemedii a “klou el renged” a lsekum e ngmo oumekemad er a Sairus. A Croesus a kmal mlo ulterekokl a rengul el kmo ngmo mesisiich me ngmlo oldechelakl er a Sairus, engdi a klou el renged el mlokngemed a rengedel!

Tia el prediction er ngii a dimlak el ngerang a blo lemesisiich me a lechub e leblo le make. A Croesus urriid a rokui el tekoi le ngulerrenges er tia el diak lemera el ulaoch. E a rechad er chelecha el taem el mo omes er tirke el leko te sebechir el predict er a ngar medad a mekerang?