Ngtecha Dios?

A rebetok el chad a mo dmu el kmo te oumerang er a Dios. Engdi okmo koker er tir el kmo ngtecha Dios, e ke mo ngmai a kakerous el nger. A rebebil omdasu el kmo a Dios a meringel loukerrekeriil e di soal lomals er a rechad el kirel a mekngit el lomerellir. A rekuk bebil a omdasu el kmo a ngii di el tekoi el loruul e a Dios a blechoel el lolecholt a bltikerreng e ousubes. Me a rebebil omdasu el kmo a Dios a cheroid er kid e diak lomekerreu el kired. Ngii el kmal kakerous a uldesuir a rechad a uchul me te betok omdasu el kmo ngmeringel a bo dodengelii a Dios.

Ngngar ngii a belkul a bo dodengelii? Chochoi. A bo dungil medengelii a Dios e ngmo er ngii a belkul a klengar er kid. (Rellir 17:26-28) Sel bo mkeed er a Dios e nglmuut el mo klou a bltkil a rengul el mo er kau e olengeseu er kau. (Jakobus 4:8) Me sel bo moba melemalt el klemedengei el kirel a Dios e ngsebechel mo uchul a diak a ulebengelel el klengar el kirem.​—Johanes 17:3.

Ngmekera sebechem el mo medengelii a Dios? Molatk er a chad el mungil medengelii, el uai a kmeed el sechelim. Ngmilekera mo er ngii a klausechelei er kemiu? Kulterekokl el mlo medengelii a ngklel, medengei el kmo ngngua blekerdelel el chad, aike el soal me a chetil, me aike el bla leruul me a lolatk el mo meruul, me a lmuut el betok el tekoi el kirel. Ke mlo medengelii e tiakid ulekeed er kau el mo er ngii.

Ngdi osisiu, ngsebeched el mo medengelii a Dios loeak a bo dodengei aika el tekoi:

• NGTECHA NGKLEL A DIOS?

• NGNGUA NGERA BLEKERDELEL?

• NGERA NGMLA REMUUL A DIOS?

• NGERA NGMO MERUUL?

• NGERA NGRULLII ER KAU OBO MODENGELII A DIOS?

Tia el Ongkerongel a mileketmokl el mo onger aika el ker. Aike el bo monguiu er tia el Ongkerongel a mo ngosukau el mo medengelii a Dios, ke dirrek el mo medengei a klungiaol el bo mngai sel lebo er ngii a deleuill er kau me ngii.