3 el Suobel

Ngkirem El Mo Mesuub El Kirel A Dios

Obo msechelil a Dios, e ngkirem el mesuub el kirel. A resechelim te medengelii a ngklem e ousbech er ngii? Te ulterekokl el ousbech er ngii. A Dios a dirrek el soal obo modengelii e mousbech er a ngklel. A ngklel a Dios a Jehovah. (Psalm 83:18; Matteus 6:9) Ngkirem el dirrek el mesuub el kirel aike el soal ma chetil. Ngkirem el mo medengelterir a resechelil ma recherroel. Kede ousbech a kemanget el taem el mo medengelii a chad. A Biblia a melekoi el kmo ngmellomes el rolel a lebo er ngii a temem el mo mesuub el kirel a Jehovah.—Efesus 5:15, 16.

A resechelil a Dios a meruul aike el soal. Ka molatk er a resechelim. Oleko ngmo mekngit a tekingem el mo er tir e meruul aike el tekoi el chetirir, te di melemolem el sechelim? Ngkmal diak! Me ngdi osisiu, a lsekum e ngsoam el mo sechelil a Dios, e ngkirem el meruul aike el soal.—Johanes 4:24.

Ngdiak el rokui el klechelid a omekrael er kid el mo er a klausechelei el obengkel a Dios. A Jesus, el mle kot el kmeed el sechelil a Dios, a millekoi el kirel a teblo el rael. A chimo el rael a meteu e betok a rechad el oeakngii. Isel rael a mo er a tellemall. Sel ta er a rael a obutek e di mekesai el chad a merael er ngii. Isel rael a mo er a diak a ullebengelel el klengar. Tia belkul el kmo a lsekum e ngsoam el mo sechelil a Dios, e ngkirem el mesuub er a melemalt el rolel el mo mengull er ngii.—Matteus 7:13, 14.