10 el Suobel

Ngmekerang E Kede Metik Er A Mera El Klechelid

A lsekum e ngsoam el mo sechelil a Dios, e ngkirem el oltirakl er sel klechelid el lekengei er ngii a Dios. A Jesus a dilu el kmo “ar meral meluluuch” a mo mengull er a Dios el oltirakl er a “klemerang.” (Johanes 4:23, 24) Ngkmal di tang a melemalt el rolel a omengull el mo er a Dios. (Efesus 4:4-6) A mera el klechelid a omekrael el mo er a diak a ullebengelel el klengar, e a klsuul el klechelid a omekrael el mo er a tellemall.—Matteus 7:13, 14.

Ngsebechem el mo dongchii a mera el klechelid sel momes er tirke el oltirakl er ngii. Tirke el mera el mengull er a Jehovah a kirir el mo ungil el chad, e le Jehovah a ungil. Ngdi ua ungil el kerrekar el meradel el ourodech a ungil el meradel, me nguaisei a mera el klechelid a ourodech er a rungil el chad.—Matteus 7:15-20.

Ngkmal dmolech a omengull er a resechelil a Jehovah el kirel a Biblia. Te medenge el kmo a Biblia a mla er a Dios el mei. Te kongei aike el lolekoi el omekrael er a klengar er tir, e mesmechokl aike el mondai er tir, e ngosuterir el mesuub el kirel a Dios. (2 Timoteus 3:16) Te melasem el oltirakl aike el lolisechakl.

A resechelil a Jehovah a kaubltikerreng. A Jesus a ulechotii a bltikerreng el mo er a rechad er a lolisechakl er tir el kirel a Dios, er a lomekungil er tirke el mle smecher. Me tirke el oltirakl er a mera el klechelid a dirrek el ochotii a bltikerreng el mo er a rebebil. El ua Jesus, te diak longetukel er a remechebuul ma lechub a rengodech el bedengir a rechad. A Jesus a dilu el kmo a rechad a mo medengelterir a redisciplo er ngii el oeak sel klaubltikerreng er a delongelir.—Johanes 13:35.

A resechelil a Dios a mengebkall er a ngklel a Dios, el Jehovah. A lsekum a chad a chetil el ousbech er a ngklem, ngsebechel el mera el sechelim? Ngdiak! Sel lengar er ngii a sechelid, e kede ousbech er a ngklel e kede ouchais a ungil el tekoi el kirel ngii el sechelid el mo er a rebebil. Ma leuaisei e tirke el sorir el mo sechelil a Dios a kirir el ousbech er a ngklel e ouchais er a rebebil el kirel. A Jehovah a soal a bo doruul er tiang.—Matteus 6:9; Rom 10:13, 14.

El ua Jesus, e a resechelil a Dios a mo olisechakl er a rechad el kirel a Rengedel a Dios. A Rengedel a Dios a gobelment el ngar er a eanged el mo rullii tia el chutem el mo paradis. A resechelil a Dios a mo ouchais er tia el ungil el chais el kirel a Rengedel a Dios el mo er a rebebil.—Matteus 24:14.

A Resioning er a Jehovah a melasem el mo sechelil a Dios. Te mengull er a Biblia e kaubltikerreng. Te dirrek el ousbech e mengebkall er a ngklel a Dios e olisechakl er a rebebil el kirel a Rengedel a Dios. A Resioning er a Jehovah a oltirakl er a mera el klechelid er tia el chutem er a chelecha el sils.