11 el Suobel
Motngeklii A Klsuul El Klechelid!
A Satan ma remengelengalek el reng er ngii a diak el sorir obo mosiou er a Dios. A lsebechir e ngsorir el mengetikaik er a rebek el chad el mo cheroid er a Dios. Te mekerang e melasem er tiang? A ta el rolel a oeak a klsuul el klechelid. (2 Korinth 11:13-15) A klechelid a klsuul a lsekum ngdiak lolisechakl er a klemerang er a Biblia. A klsuul el klechelid a ua klsuul el udoud—ngkmal ungil er a osenged, engdi ngdiak a ultutelel. Ngsebechel el mo uchul a betok el mondai er kau.
A klsuul el tekoi er a klechelid a kmal diak el sebechel el odeuir a rengul a Jehovah, el ngike el Dios er a klemerang. Sera lengar er tia el chutem a Jesus, e ngmla er ngii a rechedal a klechelid el mle sorir el omekoad er ngii. Te ulemdasu el kmo a rolel a omengull er tir a mle melemalt. Te dilu el kmo: “A Demmam a di tang, el Dios.” Ngkilengei er a tekingir a Jesus? Ngdiak! Ngbai dilu er tir el kmo: “Kemiu a mlara demmiu el diabelong el mei.” (Johanes 8:41, 44) Me chelecha el sils e te betok el chad a omdasu el kmo te mengull er a Dios, engdi te bai mesiou er a Satan ma remengelengalek el reng er ngii!—1 Korinth 10:20.
Ngdi ua mekngit el kerrekar el ourodech a mekngit el rodech, ma klsuul el klechelid a ourodech er a rechad el meruul a mekngit el tekoi. Tia el beluulechad a mui er a uldikel el oeak aike el mekngit el tekoi el loruul a rechad. Ngar er ngii a deleboes el omeruul, ma klakoad, ma omerechorech, ma mesisiich el ultok, ma koad el chad, ma olterebek. A rebetok el meruul choua ika el mekngit el tekoi a ngar er ngii a klechelid er tir, engdi a klechelid er tir a diak el lomekrael er tir el mo meruul a ungil. Ngdiak el sebechir el mo sechelil a Dios a lak el lorrob a mekngit el omerellir.—Matteus 7:17, 18.
A klsuul el klechelid a olisechakl er a rechad el meluluuch el mo er a bleob el chaus. A Dios a melekoi el kmo ngdiak el kired el meluluuch el mo er a bleob el chaus. Tiang a melemalt el tekoi. Ngmo ungil a rengum oleko a chad a diak longedecheduch er kau e ngbai di mengedecheduch er a siasing er kau? Ngsebechel el mo mera el sechelim ngii el chad? Ngdiak, ngdiak lsebechel. A Jehovah a soal a rechad a longedecheduch er ngii, el diak lebo er a bleob ma lechub e ngsiasing, el diak a klengar er ngii.—Exodus 20:4, 5.
A klsuul el klechelid a olisechakl el kmo ngdi ungil a domekoad er a rebebil er a blsechel a mekemad. A Jesus a dilu el kmo a resechelil a Dios a mo kaubltikerreng. Ngdiak domekoad er a rebetik er a rengud. (Johanes 13:35) Ngdirrek el mekngit a domekoad er a remekngit el chad. Sera bo lomdechem er a Jesus a recherroel, e ngdimlak lebechititerir a redisciplo er ngii me lokoad el omekerreu er ngii.—Matteus 26:51, 52.
A klsuul el klechelid a olisechakl el kmo a remekngit a mo chuarm er a beluu er a ngau. Engdi, a Biblia a olisechakl el kmo a klengit a uchul a kodall. (Rom 6:23) A Jehovah a Dios er a bltikerreng. Ngsebechel a betik a rengul el Dios el omekcharm er a rechad el mo cherechar? Ngkmal diak! Ngar er a Paradis, e ngmo er ngii a di ta el klechelid, se lekengei er ngii a Jehovah. (Chocholt 15:4) A rokui el klechelid el oltirakl er a blulekngel a Satan a mo nguemed.