Kingdom News No. 37

A Klumech el Mo er a Beluulechad el Rokir

A Ullebengelel A Klsuul El Klechelid A Kmedang!

▪ Ngerang a klsuul el klechelid?

▪ Ngmekerang e mo diak?

▪ Ngerang a bo lerellii el kirem?

Ngerang a klsuul el klechelid?

Kau ngmekngit a rengum sel momes aike el delengerenger el loruul a rechad el oeak a ngklel a klechelid? A mekemad ma terrorism ma cheleblad el loruul tirke el leko te mesiou er a Dios, ngomtok er a uldesuem el kirel a llemalt? Ngera uchul ma klechelid a blechoel el uchul a betok el mondai?

A klengit, a diak lekngtil a rokui el klechelid, e ngbai di kngtil aike el klsuul el klechelid e merekong. A ta er a chetengakl el chad er a klechelid, el ngii a Jesus Kristus, a ullecholt el kmo a klsuul el klechelid a ourodech a mekngit el ureor, el di ua “mekngit el kerrekar a diak el sebechel lourodech a ungil rodech.” (Matteus 7:15-17) Ngerang a redechel a klsuul el klechelid?

A Klsuul el Klechelid a  . . .

◼ TELOI ER A MEKEMAD MA POLITIKS: A babier el Asiaweek a melekoi el kmo: “Ngar er a Asia ma lmuut el betok el beluu, e a remekngit el merredel a ousbech er a klechelid er a rechad el mengesuseu er tir el mo meruul aike el sorir.” Misei a uchul, e sel babier a omeklatk el kmo: “Tia el beluulechad a di merael el mo klou a uldikel er ngii.” A ta el merael a chisel el mengeteklel a klechelid el ngar er a beluu er a Merikel a dilu el kmo: “A di ta el rolel e ngmo diak a okodellir a rechad a lsekum e kede mekodeterir a reterrorist.” El mekerang? “Mekodeterir el rokui el oeak a ngklel a Rubak.” Engdi a Biblia a melekoi el kmo: “A le ngarngii a dmu el kmo, ‘Ngbetik a renguk era Dios,’ e louketui er chodam er ngii, e ngbulak.” (1 Johanes 4:20) A Jesus a dirrek el millekoi el kmo: “Bo le betik a rengmiu rar cherrouiu.” (Matteus 5:44) Ngtela el klechelid a sebechem el melekoi el kirel el kmo ngkongei er a rechederir el mo teloi er a mekemad?

◼ OMERK ER A KLSUUL EL OSISECHAKL: A oumesingd el klechelid a olisechakl el kmo a soul ma lechub a reng a diak lemeues el klalo el tuobed er a chad e melemolem el ngar er a uriul er a kodellel a chad. Ngoeak tiaikid el osisechakl, e a betok er aike el klechelid a mengereker er a rechederir, el melai a udoud el cheral a nglunguchir el kirel a soul er a rulekoad. Engdi, a Biblia a olsisechakl er a kuk ngodech el osisechakl. “Me ngikel chad (el soul) el mor a klengit, ngikei a mo mad.” (Esekiel 18:4) “A re chad a medengei el kmo te mo mad, e ngdi rulekoad a diak a ngeral lodengei.” (Olisechakl 9:5) A Jesus a ullisechakl el kmo a rulekoad a mo mekiis—me ngdiak a ultutelel el tekoi a lsekum a rechad a ngar er ngii er tir a soul el diak lemad. (Johanes 11:11-25) A klechelid er kau ngolisechakl el kmo a soul a diak lemad?

◼ KONGEI ER A DELEBOES EL OMERUUL: Ngar er aike el beluu er a Ngebard, e a bebil er a klechelid a kongei er a remengolchotaor el mo mengeteklel a klechelid er tir e orrimel er a kabelment el mo kongei er a chebechiil er a delongelel a sechal ma sechal ma redil ma redil. Ma ike el klechelid el omtok er a deleboes el omeruul a diak a ngerang el lerellii el kirir tirke el mengeteklel a klechelid el tir a meruul a deleboes el mo er a rengalek. Engdi, ngngerang a osisecheklel a Biblia? Ngbleketakl el melekoi el kmo: “Lako mecheuid; e ar ngara deleboes, mar mesiou a bleob el chelid, mar ngara laokerreng, mar saudil, mar menguchet a raod, . . . a diak bo loudiukes ra rengedel a Dios.” (1 Korinth 6:9, 10) Ke medengei aike el klechelid el kongei er a deleboes el omeruul?

Ngera mo duubech el mo er aike el klechelid el ourodech a mekngit el rodech? A Jesus a ulemeklatk el kmo: “A ikel kerrekar el diak bo lourodech a ungil rodech a medebes el rokui e obidokl ra chelsel a ngau.” (Matteus 7:19) Chochoi, a klsuul el klechelid a mo medebes e mokngemed! Engdi ngmekerang e oingerang e tia el tekoi a mo er ngii? A ues er a ulaoch el llechukl er a chelsel a Biblia el babier er a Chocholt, er a 17 ma 18 el bliongel, a meskid a nger.

Ngmekerang e mo diak a klsuul el klechelid?

Ka di molatk er tiang, a tingaol el dil a dengchokl er a kdekudel el charm. E ngii el charm a ngar er ngii a kleuid el bdelul ma teruich el orsul. (Chocholt 17:1-4) Ngika el tingaol el dil ngomtechei er a ngerang? Ngmengedereder er “ar king ra belulechad.” Ngbliull er a smiich el bekerekard, e ousbech a chochod, e mui er a ilteet. Ma dirrek, el oeak a oliul, e a “bek el renged a mlechetikaik.” (Chocholt 17:18; 18:12, 13, 23) A Biblia a ngosukid el mo medengei el kmo ngika el tingaol el dil a cheldebechel er a klechelid er a beluulechad el rokir. Ngomtechei er a diak di lechimo el klechelid e lemerekong, e ngbai a rokui el klechelid el ourodech a mekngit el rodech.

Me ngike el charm el ledengchokl er ngii ngika el tingaol el dil a omtechei er aike el renged er a politiks el ngar er a beluulechad.a (Chocholt 17:10-13) A klsuul el klechelid a ngar er a ulkel ngika el charm er a politiks, el melasem el mengetikaik e omtebechel er ngii el mo er aike el telbilel ma rolel.

Ngdi kmedung, e a tekoi el mechas a rengud er ngii a mo duubech. “Ma ikel mules el truich lorus, ma charm iaikai a mo ouketui er ngikal tingaol dil; me te mo rullii el mo cheloit e meau, e mo kma techel a bedengel e durur lokngemedii ra ngau.” (Chocholt 17:16) Aike el cheldebechel er a politiks a di mereched el mo omtok er a klsuul el klechelid e okngemedii! Ngerang a mo uchul tia el omeruul? A babier er a Biblia er a Chocholt a onger el kmo: “Ma Dios a riruul a rengrir el mo meruul a uldesuel.” (Chocholt 17:17) Chochoi, a Dios a mo oukerrekeriil er a klsuul el klechelid el kirel aike el rokui el mengelengalek el omeruul el bla lruul el ousbech er a ngklel. Me ngoeak a cherrungel el llemeltel, e ngmo ousbech er a resongel el chad er a politiks el mo okngemedii.

Ngkirem el mo mekerang me lak bo mobengkel a klsuul el klechelid er a kerrekerilel? A oderchelel a Dios a mengelechel el kmo: “Kemiul chad er ngak, mtobed ra chelsel.” (Chocholt 18:4) Nguaisei, chelechang e ngtaem el kirem el chemiis er a klsuul el klechelid! Engdi ke mo chemiis el mo er ker? Ngdiak mchiis el mo er tirke el diak loumerang er a Dios, e le a ngar er a mederir el klebesei a dirrek el mo mekngit. (2 Thesalonika 1:6-9) A di ta el omerotel a ngar er a chelsel a mera el klechelid. Engdi kede mekerang e dongchii sel mera el klechelid?

Ngmekerang e mo sebechem el dongchii a mera el klechelid

Ngera el ungil el rodech a kirel el ourodech a mera el klechelid?​—Matteus 7:17.

A Mera el Klechelid a . . .

◼ OLECHOLT A BLTIKERRENG: A remera el mengull a “diak le klalo ra belulechad,” e diak lebechei a blingelir er a klechad ma tekoi er a siukang el mo uchul a klekakiakl er a delongelir, e te bai ‘kaubltikerreng.’ (Johanes 13:35; 17:16; Rellir ar Apostel 10:34, 35) Te kongei el mo mad el kirel a ta ma tang, er a bai lomekoad er a ta ma tang.​—1 Johanes 3:16.

◼ OUMERANG ER A TEKINGEL A DIOS: A osisechakl er a mera el klechelid a mengai er a Tekingel a Dios, el Biblia, el diak lolisechakl a “tekoi . . . ra rechuodel el mei” ma “llach rar chad.” (Matteus 15:6-9) Ngera uchul? “Ele chedaol Llechukl el rokui a melluches luleak a Reng ra Dios, me ngngarngii a blkul er chosisechakl, ma chomellach, ma chomekmelemalt, ma chomekrael el mora llemalt.”​—2 Timoteus 3:16.

◼ MELISIICH ER A TELUNGALEK E OLTIRAKL ER A NGAR ER A BAB EL LLACH ER A KLDUNG: A mera el klechelid a olisechakl er a rebechiil el sechal el mo “betik a rengrir rar becherir el ua le betik a rengrir ra bedengir,” e ngosuterir a rebechiil el redil me ‘bo longull rar becherir,’ e olisechakl er a rengalek el mo ‘olengesenges rar demerir mar derrir.’ (Efesus 5:28, 33; 6:1) Ma lmuut el tang, tirke el mloterekokl er tir a ngerachel a kirel el mo ungil a blekerdelir.​—1 Timoteus 3:1-10.

Ngngar er ngii a klechelid el oltaut aika el blekeradel? A chimo el babier, el tilobed er sera 2001, a melekoi el kmo: “A lsekum a rebetok el chad a oltirakl aike el tekoi el lomerk e oltaut er ngii a Resioning er a Jehovah , e ngdimlak leduubech a Holocaust ma okodellir a rechad a mo diak er a chutem.”

Me nguaisei, el ngar er a 235 el beluu, e a Resioning er a Jehovah a diak el di lomerk er a llechul a Biblia e lemerekong, e te dirrek el oltirakl er ngii er a klengar er tir. Aki olengit er kau me bo er a Resioning er a Jehovah me lengesukau el mo medengei aike el soal a Dios a obo moruul me bo lsebechem el mengull el meluluuch er ngii. Chelechang e ngtaem el kirem el meruul er ngii. Lak bo meoud. A ullebengelel a klsuul el klechelid a kmedang!​—Sefania 2:2, 3.

A lsoam a lmuut el betok el omesodel el kirel a klumech el omerk er ngii a Resioning er a Jehovah, e moluches el mo er tir el ngar er a ta er aike el address el llechukl er a eou.

□ Ak ulengit er a brochure el dai er ngii a kmo Ngerang a Soal a Dios a Doruul

□ Momekedong er ngak el kirel a diak locheraol el omesubel a Biblia.

[Footnotes]

[Siasing el ngar er a page 3]

A klsuul el klechelid a mengedereder er “ar king ra belulechad”

[Siasing el ngar er a page 3]

“Kemiul chad er ngak, mtobed ra chelsel”