Sel Bo Lemekngit a Bechid

“Ngdi mle soak el mad er a ledu er ngak a bechik el kmo ngmengoit er ngak e mo obengkel a kekerei el redil. Sel kullatk aike el rokui el tekoi el bla kruul el kirel e ngmera el diak el fair.”—Maria, Spain.

“A bechik er a lechitak e ngmera el di miltemall a rokui el tekoi. A telbilam me a urungulam el kirel a ngar medemam a di miltemall. Ngngar ngii aike el sils el kumdasu el kmo ak mla mo daijob, engdi ak di mereched el lmuut el mo melechesuar er a klou el klengiterreng.”—Bill, Spain.

A CHAD el bechil a mo mekngit, a melechesuar er a klou el ringel. Nguaisei el rebebil a sebechir lousubes er ngike el mlo mekngit e obult, e lmuut el toketekii a chebechiielir.a Engdi a lolemolem a chebechiil me a lak, a chad el mlo mekngit a bechil a melechesuar er a kmal klou el ringel. Ngera sebechir el meruul tirke el chuarm er a chouaitia el ringel?

BADES ER A BIBLIA EL SEBECHEL NGOSUKAU

Alta rechad el becherir a mlo mekngit a chuarm er a chamireng, engdi te mla metik ongelaod er a Bades. Te mla suubii el kmo a Dios a mes a lengelir e melechesuar er a ringel el lecharm er ngii.—Malakai 2:13-16.

“Sel lesal mo ouedikel a renguk, e ng kau a cholodak e rullii a renguk el mo ungil.”—Psalm 94:19.

A Bill a kmo: “Sera kunguiu er tia el bades e ak mle imagine er a Jehovah el mengelaod er ngak e meruul er a renguk el mo ungil, el di ua chubechub el chedam.”

“Ng blak a rengum er a re blak a rengrir.”—Psalm 18:25.

A Carmen a mesaod er a longebelung er ngii a bechil el betok el buil el kmo: “Alta bechik a dimlak lochotii a blakerreng el mei er ngak, me nguaisei engdi ngsebechek lultuil er a blakerreng er a Jehovah. Ngkmal diak bo letemellii a renguk.”

“Lak el sebek a rengmiu er a ngii di le ngerang, e bai molengit er a Rubak er a bek el nglunguchiu, a ikel mousbech, . . . E a budech er a Dios, el diak el sebechel a chad el mo cherrungel el medengelii, a mo mtebechel a rengmiu ma uldesuiu.”—Filipi 4:6, 7.

A Sasha kmo: “Ak milenguiu er tia el bades el betok el taem. Sera di bo kululuuch e a Dios a milskak a budech.”

Tirka el rokui el dulsaod er tir a ngar ngii aike el taem el mlo sorir el give up. Engdi te uluumerang el ulsirs er a Jehovah e millai omelisiich er a Tekingel. A Bill a melekoi el kmo: “A klaumerang er ngak a uchul me ak feel el kmo, ngngar ngii a belkul a klengar er ngak alta rokui el tekoi a di meltemall. Alta kmirrael er a ‘kmal milkolk’ el telkib el taem engdi a Dios a ulebengkek.”—Psalm 23:4.

a A lsoam a omesodel a mo kongei lousubes me a lechub e ngdiak, e momes er a “When a Mate Is Unfaithful” el series er a Awake! er a April 22, 1999.

Aike el Mla Ngosuterir a Rebebil Loutekangel

Molebedebek a bades el melisiich er kau.

A Bill a kmo: “Ak milenguiu er a babier er a Job me a Psalm e underline aike el bades el chatter er a blekeradel el kngar ngii. Ak mlo mesa el kmo tirka el milluches er a Biblia a milechesuar er a osisiu el ringel me a sebekreng el kumelechesiu er ngii.”

Morrenges ongngak.

A Carmen a dirk melatk el kmo: “Sel lak el sebechek el mechiuaiu a leklebesei e a kurrenges ongngak.” A Daniel a kmo: “Tia mle uchul a klou el ongelaod el mei er ngak. Ak silubii el mo meduch loukita. Tia el ongngak a ngilsukak el mo omelechesiu er a budech.”

Mosaod aike el ngar er a rengum.

A Daniel a kmo: “Ngdiak el kse er ngak el mesaod aike el ngar er a renguk. Engdi te mla er ngii a rungil sechelik el kulengedecheduch er tir er a bek el sils. Ak milengedecheduch e meluches el mo er tir louchais aike el ngar er a renguk. Tia kmal ngilsukak.” A Sasha kmo: “Ngkmal mle klou a ultutelel er ngak a ngelsuil a telungalek er ngak. A delak a mle blechoel el kmeed er ngak. Sel soak el mengedecheduch er a chad, e ngmla er ngii lorrenges er ngak. A demak a dirrek el rirellak el mo omelechesiu el kmo ak ulekerreu, e ngilsukak el lmuut el mo mesisiich loltirakl er a ungil er ngak.”

Mblechoel el meluluuch.

A Carmen a kmo: “Ak mle blechoel el meluluuch. Ak mlo melechesuar er a Dios el kmeed er ngak, orrenges er ngak, e olengeseu er ngak. Chelsel tia el kmal mle meringel el blekeradel e ak liluut el kmal mo kmeed er a Dios.”