A Klemerang el Kirel a Dios me a Kristus

Ngtecha Dios?

Ngtecha Ngklel a Dios? A Dios a dilu el kmo: “Ngak a Jehovah. Tiaikid a ngklek.” (Isaia 42:8, NW) Tia el ileakl el ngklel a Dios a llechukl er a chelsel a Biblia el kuk betok er a 7,000 el taem. Me nguaisei, engdi a betok el oidel a Biblia a mla ngubetii tia el ngakl e mtechir er a dui el ua “Rubak.” A Dios a kmal soal obo msechelil, e ngii a dirrek el melisiich er kau el mo ‘omekedong er a ngklel.’​—1 Kronika 16:8.

A Dial a Jehovah. A Biblia a mesaod er a Jehovah lousbech a dui el ua “Dios” me a “Kot el Ngarbab” me a “Ulemeob” me a “Chedam” me a “Rubak” me a dirrek el “Olab a Bek el Klisiich.” Ngbetok el nglunguuch er a chelsel a Biblia a ousbech aika el kuoll el dui el mesaod el kirel a Jehovah.​—Daniel 9:4.

A Teletelel a Dios. A Dios a reng me ngdiak lemoues. (Johanes 4:24) A Biblia a oterekeklii el kmo “ng dirkak a chad el mesa Dios.” (Johanes 1:18) A Biblia a ochotii a rolel a lomelechesiu a tekoi. A rechad a sebechir el kingtir a rengul, me a lechub e te ‘odeuir a rengul.’​—Osisechakl 27:11; Psalm 78:40, 41.

A Klebokel el Blekerdelel a Dios. A Dios a diak longetukel er a ngii di el chad. (Rellir 10:34, 35) Ngdirrek el ‘mui er a blekokuii ma klechubechub, el diak le mereched el ngmasech a rengul, e olecholt er a blechoel bltikerreng ma blakerreng.’ (Exodus 34:6, 7) Me nguaisei, engdi ngar ngii a eua el blekerdelel a Dios el kmal klebokel.

Klisiich. Ngii el “Dios el Olab a Bek el Klisiich,” a uchul me ngdiak a telkelel a klisichel el mo otaut a telbilel.​—Genesis 17:1.

Llomeserreng. Ngdiak a chad el sebechel mo mekesiur a llemesel a Dios. Sei a uchul me a Biblia a kmo ng ‘di tal Dios a mellomes a rengul.’​—Rom 16:27.

Llemalt. A Dios a di blechoel el meruul a llemalt. A omerellel a “cherrungel,” e “diak a ta el bo longebirukel.”​—Duteronomi 32:4, NW.

Bltikerreng. A Biblia a melekoi el kmo a “Dios a bltikerreng.” (1 Johanes 4:8) A Dios a diak di lolecholt er a bltikerreng, ngii a bltikerreng. Tia el kot el ngarbab el bltkil a rengul a uchetemel a rokui el tekoi el loruul, e dirrek el uchul a betok el klungioled el ngar a kakerous el rolel.

A Klausechelei er a Dios me a Rechad. A Dios a betik a rengul el Demad el ngar a eanged. (Mateus 6:9) Me a lsekum kede otuil a klaumerang er kid er ngii, e ngsebeched el mo sechelil. (Psalm 25:14) E a mera er ngii, a Dios a omekedong er kid el mo kmeed er ngii lokiu a nglunguuch e dirrek el soal a ‘doterekokl a ikel rokui el tekoi el suebek a rengud er ngii, ele ng kerekikl el omekerreu er kid.’​—1 Petrus 5:7; Jakobus 4:8.

Ngera Klekakerous er a Dios me a Kristus?

A Jesus a Diak el Dios. A Jesus a kmal ileakl el chad, e le ngdi ngii el tang a ulebeob er a Dios. Tiaikid a uchul me a Biblia a omekedong er ngii el Ngelekel a Dios. (Johanes 1:14) A uriul er a lebebii a Jesus, e ngii el Jehovah a uluusbech er ngika el ketengel el ua “chad er omelib el blai” el omeob a rokui el tekoi me a rokui el chad.​—Osisechakl 8:30, 31; Kolose 1:15, 16.

A Jesus Kristus a dimlak a ta el lolekoi el kmo ngii a Dios. Ngbai milsaod el kmo: “[A Dios a] ulderchak mak mlar ngii el mei.” (Johanes 7:29) Sera longedecheduch er a ta er a disaiplo er ngii, e ngii el Jesus a ulemekedong er a Jehovah el kmo, ng “Demak el ngikel Demmiu, el Dios er ngak e dirrek el Dios er kemiu.” (Johanes 20:17, BT) Me a uriul er a lemad a Jesus, e a Jehovah a ulekisii el mo nguu a klengar er ngii el ngar a eanged, e dirrek el milsa klou el klisiich el mo dengchokl er a kidekmel ngii el Demal.​—Mateus 28:18; Rellir 2:32, 33.

A Jesus Kristus a Sebechel Ngosukau el Mo Kmeed er a Dios

A Jesus a mlei er tia el chutem el me olisechakl er kid el kirel a Demal. A Jehovah a milsaod el kirel a Jesus el kmo: “Ngika betik er a renguk el Ngelekek, me morrenges er ngii!” (Markus 9:7) A Jesus a kmal ungil medengelii a Dios el kuk ngaruchei er a ngii di el chad. Ngdilu el kmo: Ng “diak a medengelii a Chedam, ng di tal Ngalek me tirkel mlo soal a Ngalek el ochotii a Chedam er tir.”​—Lukas 10:22.

A Jesus a mle cherrungel el oukerebai a blekerdelel a Dios. A Jesus a kmal mle ungil loukerebai er a Demal me ngmle sebechel melekoi el kmo: “Ngikel mla mesekak a mla mesa Chedam.” (Johanes 14:9) A Jesus a milengesuseu er a rechad el mora Dios lokiu a kerebai er ngii er a bltkil a rengul a Demal loeak a tekingel me a omerellel. Ngdilu el kmo: “Ngak a rael, e klemerang, e klengar; ng diak a chad el mor a Chedam, a lak lokiu ngak.” (Johanes 14:6) Ngdirrek el dilu el kmo: ‘Ar meral meluluuch ra Chedam [a] meluluuch loba reng ma klemerang, ma Chedam chosiik er tirikel uaisei el meluluuch.’ (Johanes 4:23, BT) Me ka di molatk er tiang! A Jehovah a osiik er a rechad el tir a uai kau el sorir el mo medengei a klemerang el tekoi el kirel.