Be Miuul er a Micronesia e Mngesukemam!

1, 2. (a) Te mlekerang a rebetok el Kristiano er a chelecha el sils e lomekesiu er a klaumerang er a Abraham? (b) Ngera el subed a tilobed er a Omesiunged el kirel a Renged er a beluu er a Merikel, me ngngera mlo rsel?

¹ A dolukl el mo er cheroid er a telungalek er kid me a resechelid me bo el sebeched el menglou a omesiunged el mo er a Dios a ousbech er a mera el klaumerang. A chad el ullecholt er a chouaisei el klaumerang er a bekord el 4,000 el rak er a mla memong a mle Abraham. A ulekrael er a Dios el mlo er ngii a kmo, ‘Mtobed ra beluam mar chedam el mor sel beluu el bo kuchotii er kau.’​—Rel. 7:​2, 3.

² Te betok el Kristiano er a chelecha el sils a mesmechokl a blekerdelel a klengar er tir me bo el sebechir el mo meruul er a tekoi el lerirellii a Abraham−el melukl el mo kiei er a beches el basio el mo menglou er a urerel a Jehovah. Sera ltobed a okedong el kirel a ngeso el mo er a Micronesia er a Omesiunged el kirel a Renged er a February 2009 er a beluu er a Merikel, e te betok er a 100 el chad a ulenger er tia el okedong, e milechei a delengcheklir me a telungalek er tir e mlo menglou a omesiungir el mo er a Jehovah.

3. Ngera rirelleterir a rudam me a rudos er kid me te millukl el mei er a Micronesia?

³ Ngera Me Te Uaisei? Ngera millisiich er a rudam me a rudos er kid el mo meruul chouaisei el tekoi? A reteru el obekel el millukl el mo er a Guam el lobengterir a reteru el ngelekir a melekoi el kmo: “Aki ulenger er tia el okedong el mla er a Omesiunged el kirel a Renged e le ngmle somam el menglou a omesiungam. Ngdirrek el mle somam a rengelekam a bo lodengei el kmo a cheldebechellel a Jehovah a iueklii a beluulechad el rokir, el cheldebechel er a mera el klodam el meliuekl er a beluulechad.” Kede mera el oba omereng el saul el kirir a rudam me a rudos, el ua Abraham, el mla chemoit a rekeblirir me a rechederir e ‘mle imuul er a Micronesia’ el me olengeseu er kid er a urerel a Renged!​—Rel. 16:9.

4. (a) Ngera el omelsemai a lechelebangel er ngii tirke el melukl el mo olengeseu a ongdibel el ousbech a ngeso? (b) Te mekerang a rederta el chad er a chelsel a ongdibel a lolengeseu?

⁴ Ngmekera e Sebeched el Olengeseu: A dolukl el mo kiei er a beches el blai el kmal cheroid er a rebetik er a rengud el telungalek er kid a kmal diak el beot el tekoi. Me ngngera ullengeseu er tirke el mirruul el uaisei me ngmlo sebechir el melemolem a telbilel a rengrir el lolengeseu aike el basio el ousbech a ngeso? Ngar er ngii a reteru el lobekel el melekoi el kmo: “A blekerdelir a rudam me a rudos er aike el ongdibel el mei er kemam a kmal lolecholt a bltikerreng me a blekokeuii el ngii a di sebeched el metik er a chelsel a cheldebechelel a Jehovah e merekong. Ngulemeklatk er kemam er a tekingel a Jesus el ngar er a Markus 10:29, 30. Aki mera el milechititerir a rechad er a telungalek er kemam, e ngdi aki melechesuar el kmo a Jehovah a mla meskemam a betok el dart el beches el chad er a telungalek er kemam.” Me a domtechakl er a remerael, e a derta me a derta el chad er a chelsel a ongdibel a sebechir el ngar er ngii a kmal klou a ultutelel e dirrek el mo uchul a deurreng el tekoi el lerellii el kirel aike el ungil el lureor el mo meketmokl el loeak tirke el millukl el me olengeseu er a ongdibel. Ngera me ngdiak bai mrellii a turrekong er kau el mo medengelterir a derta me a derta er tirka el chad, e moruul el mo er sel tkurrebab el sebechem el rulleterir me bo lolechesuar el kmo ke mera el outkeu er tir?​—3 Jn. 8.

5. (a) Te mekerang a remechuodel e ngmai a klungiolir er a duch me a klemedengei el lolab a rebeches el odam el mo soiseb er a chelechad er a remechuodel? (b) Ngera mo ngosuterir a remechuodel el mo dmak el loureor el ngar er a kltarreng el ua ta el chelechad?

⁵ Te mekerang a remechuodel er a ongdibel a lebo er ngii a klungiolir el loeak aike el duch er tirka el odam el mo soiseb er a chelechad er a remechuodel? Ngsebechir el lomuchel el oker er tir el kirel a uldesuir er a tekoi. Te rulleterir el mo medengei el kmo te semeriar el lorrenges a ungil el omellach el sebechel el olengeseu, me ngmo beot er tirka el beches el odam el olengeseu. A rederta me a derta el chedal a chelechad er a remechuodel a kirir el melisiich er a ungil el rolel a cheldecheduch er a chelsel tia el chelechad el loeak sel leblechoel el mo mengedecheduch er a rekldemir el mechuodel, el uldimukl er tirke el beches el chad el dirk millukl el mei er a ongdibel. A remechuodel a dirrek el locha sebechir el metik el kmo ngsebechir el mo ungil el lousbech er tirka el “ngat er a rechad” sel loterekokl er tir a ureor el mo uchul e ngmo sebechir el lousbech aike el duch me a klemedengei er tir el kirel a klungiolel a ongdibel. (Efe. 4:8, 11, 12) E a remechuodel el uluungerachel aika el ureor er a uchei a dirrek el sebechir el olecholt a omengull er tir el kirel aika el chouaisei el omesmechokl. Me a remechuodel er a ongdibel, a medengei el kmo ngdiak el kakemeai me te kaingeseu el loureor el dmak el ngar er a kltarreng el ua ta el chelechad. (Gal. 6:4) Me a lemeketeketang el chedal a chelechad er a remechuodel me a lechub e dirk el beches el mlo soiseb, me tir a rokui el dmeu a rengrir er aike el sebechel a derta me a derta er tir el meruul el kirel a klungiolel a ongdibel el rokir. Sel leuaisei e te mengetmokl er a ungil el kerebai er a kltarreng el kirel a ongdibel el rokir.

6. (a) Ngmekera Kristus e omesterir a rechelechad er a remechuodel a ulekrael er a chelecha el sils? (b) Te mekerang a remechuodel e lekakull er a delongelir?

⁶ A remechuodel a medengei el kmo a Kristus a sebechel el lousbech er a chedaol reng el mo omekrael er a uldesuel a ngii di el chuodel el mo oltobed a ulekrael er a Biblia el lousbech er a ngii di el blekeradel. (Rel. 15:6-15) Me alta chelechad er a remechuodel a sebechir el mo ngmai a klungiolir a lorrenges er a rudam el klou a duch me a klemedengei er tir, engdi ngdiak a di ta er tir el chuodel el di ngii el tang a loureor a chedaol reng er a Dios er a chelsel. A remechuodel a olecholt a omengull el mo er a tang me a tang el loeak sel lekerekikl el orrenges er a ngii di el tang er a delongelir sel lousbech a omellach er a Biblia me a lechub a ulekrael el mla er a Rechelechad er a Ruungerachel.

7, 8. Te mekera tirke el melukl el mo er aike el basio el lousbech a ngeso a loukerebai er a Nehemia, e ngera el klungiaol a sebechel el mo er ngii a leuaisei?

⁷ A Kerebil a Nehemia: Tirke el melukl el mo olengeseu a ongdibel el ousbech a ngeso a sebechir el ngmai a klungiolir er a kerebil a Nehemia. A Nehemia er a lebo er a Jerusalem, e ngmle kerekikl el dimlak lebesterir a rechad el mla er isei a uldasu el kmo ngulsiik a telemellir. Ngchiloit a taem el omes a blekeradel el mla er ngii e mlo medengei er a uchei er a longedecheduch. (Momekesiu er a Osi. 18:13.) Seikid a uchul me a rekldemel er a ureor a mle sebechir el ta rengrir el rokui el melekoi el kmo: “‘De bechelii ngiil ureor!’ Me te kiltmeklterir el mo omuchel er a ureor.”​—Neh. 2:11-18.

⁸ A rudam me a rudos er kid el mla ‘imuul’ el mei er a Micronesia a kmal dmeu a rengrir er a ngeso el lengai sel lolasem el mo ungil el medengei a beches el delengcheklir, e medengei el kmo ngkmal betok a kirir el mo mesuub el kirel tia el kmal ngodech el beluu er aike el lemla er ngii el mei. Me ngdi ua Nehemia, e ngsorir el mo kerekikl me ngdiak ‘longer a tekoi er a uchei er a lerengesii,’ e bai mo osiik a ngeso er a rebebil me bo lungil el medengei a tekoi er a uchei er a lolasem el mesaod er ngii me a lechub e lolengeseu.

9. Ngera uldesuem el kirir tirke el mle ‘imuul er a Micronesia’ el me olengeseu?

⁹ A ta el odos a kmal oba omereng el saul e melekoi el kmo: “Ngmengasireng el tekoi sel domes er a rebetok el odam me a rudos el mechei a rokui el tekoi e mei me te mesiou er a ‘telungalek’ er tir er a Micronesia.” Me bo el sebeched el rokui el mo dmeu a rengud sel doeak a bltikerreng e dolisiich er a rekldemed er a ureor el tir a ‘tilobed er a belurir me a rechederir’ el mle olengeseu er kid.