A Kmal Klou a Ultutelel el Ureor
1. A dmolech el omereng el saul er kid el kirel a ureor er a berkel a klumech a rullid el mo meruul a ngera el omelenget?
1 Ngera me kede blechoel el muchelechel el mo mengoit a temed me a klisiched me aike el ngar er ngii er kid el kirel a ureor er a berkel a klumech? E le ngdiak a ureor el klou a ultutelel el uai ngii! A dolebedebek el kirel a kemanget el klungiolel e ngsebechel el kilungii a urunguled el soad el mo teloi er tia el diak deluut el mo omelekl er ngii el ureor.—Rel. 20:24.
2. Ngmekerang a urered er a berkel a klumech a lengesukid el kobkellii a ngarbab el ngklel a Jehovah?
2 Kobkelii a Ngklel a Jehovah: A ureor er a berkel a klumech a melisiich el kmo a Rengedel a Jehovah el oeak a Kristus Jesus a mo mtechei aika el rokui el kabelment e mo sumechokl a rokui el mondai er a klechad. (Mt. 6:9, 10) A Jehovah a mukebkall el kmo ngdi ngii el tang a sebechel el osebelid er a secher me a kodall. (Isa. 25:8; 33:24) Kid el omerk er a ngklel a uchul me a rebebil el omes a ungil el blekerdeled me a blakerreng er kid a sebechir el kobkellii. (1 Pe. 2:12) Ngkol ua ngera el ungil el kired a domerk er a ngklel a Kedidai el Rubak el Jehovah er a beluulechad el rokir!—Psa. 83:18.
3. Ngera el klengeltengat a mo er tirke el kongei el orrenges er a klumech er a Renged?
3 Olsobel a Klengar: A Jehovah a “chetil a lriid a tang, e bai soal cho bora bult el rokui.” (2 Pe. 3:9) Engdi, a lsekum e ngdiak a olisechakl er tir, e te mekerang a rechad e mo medengei aike el lomdasu a Jehovah el kmo ngungil me a lechub e ngmekngit el blekeradel? (Jon. 4:11; Rom 10:13-15) A rechad sel lekengei er a ungil el chais, e a blekerdelel a klengar er tir a merael el mo ungil sel lechoit a mekngit el omerellir. (Mik. 4:1-4) Me a lmuut el tang, e ngmo er ngii a ungil el omeltkir er a diak a ulebengelel el klengar. A blakerreng er kid el omerk a klumech e olisechakl er a rechad a osebelid me tirke el orrenges er kid. (1 Ti. 4:16) Ngkol ua ngera el ngarbab el techall a dobang er tia el klou a ultutelel el ureor!
4. Ngera me ngkired el mo er sel tkurrebab el sebeched el meruul er a ureor er a berkel a klumech er a Renged me a omeruul el disaiplo?
4 Ngdi kmedung e a klou el ringel a mo tomellii tia el diak el melemalt el beluulechad. Tirke el mesiou er a Jehovah a mo suobel. Me a ureor er a berkel a klumech me a omeruul el disaiplo a kot el orechudel e meklou a ultutelel e ngar er ngii a klungiolel el ureor el meketmokl er a chelecha el sils. Me ngkirel el mo kot el klou a ultutelel er a chelsel a klengar er kid.—Mt. 6:33.