Moukerebai er a Blakerreng er a Jesus el Lomerk

1. Ngera ta el tekoi el eklterir a remesiungel a Jehovah er tirke el melekoi el kmo te Kristiano?

A BLAKERRENGa er a remesiungel a Jehovah el lomerk a ta el tekoi el eklterir er tirke el melekoi el kmo te Kristiano. (Tit. 2:​14, BT) Me nguaisei engdi a lebebil e nglocha diak a klemeriarreng er kid el lomerk. Ke locha feel el ua ta el odam el meringel el loureor el ta er a remechuodel el dilu el kmo, “A lebebil e ngdiak el soak lomerk er a klumech.”

2. Ngera uchul me a lebebil e ngmo diak a klemeriarreng er kid el lomerk?

² Kede locha semeriar el meruul a lmuut el bebil er a omesiou el mora Jehovah er a bai domerk er a klumech. E ngerang? E le sel domekedechor me a lechub e kede maintain a Blil a Ongdibel, dolengeseu er a telemellel a beluu, me a lechub e kede melisiich er a rudam e kede di mereched el mes a meketmokl loeak ngii, e tia rullid el mo ungil a rengud. Kede melechesuar a budech me a bltikerreng sel doureor lobengterir a rudam e medengei el kmo te appreciate a doruul el kirir. Me nguaisei kede locha mla omerk er a osisiu el basio el betok el rak e dirkak a ungil el duubech. Me a lechub a rechad el dongedecheduch er tir oltngakl er a klumech. Kede dirrek el medengei el kmo sel lekmal kmedang a ulebongel e nglmuut el mo betok omtok er a klumech. (Mt. 10:22) Ngera sebechel ngosukid el mo melemolem loba blakerreng el lomerk e lmuut el kilungii a blakerreng er kid?

3. Ngmekera Lukas 13:​6-9 e omekesiu er a blakerreng er a Jesus?

³ Ngsebeched el suubii el mo blak a rengud el lomerk er a Jesus. Sera loruul er a omesiungel e ngkmal dimlak loridii a blakerreng er ngii el lomerk. Ngbai lorael a taem e ngliluut el mo blak a rengul el lomerk. (Monguiu er a Lukas 13:​6-9.) Ngdi nguai ngike el chad er a sers el milengoit er a edei el rak el melasem el meruul er a kerrekar el fig el dimlak a rdechel el mo ourodech, a Jesus a mle edei el rak el lomerk el mora Rechijudea engdi ruumesingd er tir a dimlak lebo el disaiplo er ngii. Me nguaisei ngdi uai ngika el chad er a sers el dimlak el give up er tia el kerrekar el fig, a Jesus me ngdimlak le give up er a rechad me a lechub lebo el soro el ngar er a omesiungel. Ngbai liluut el kmal mo meringel loureor el melasem el remutech a rengrir.

4. Ngera el kleua el tekoi a bo dorriter er a kerebil a Jesus?

⁴ Ngar tia el suobel e kede mo mesaod er a rolel e a Jesus a ulechotii a blakerreng, tokubets er aike el ulebongel el elolem el buil er a loruul er omesiungel. (Momes er a “After these things” el study note er a Lukas 10:1.) Sel dosuub aike el lullisechakl e doukerebai aike el lurruul e ngmo ngosukid el melemolem el loba blakerreng. Me dorriter er a kerebai er a Jesus el kirel aika el kleua el tekoi: (1) Ngmle ulturk er osengel er a meruul er a soal a Jehovah, (2) ngmle kerekikl lomtab a ulaoch er a Biblia, (3) ngmle ultuil er a ngelsuil a Jehovah, e (4) mle positive a uldesuel el kmo ngngar ngii a remo sorir lorrenges er ngii.

NGMLE ULTURK OSENGEL ER A MERUUL ER A SOAL A JEHOVAH

5. Ngmilekera Jesus e ochotii el kmo ngmle ulturk osengel er a meruul er a soal a Dios?

⁵ A Jesus a mle blak a rengul lomerk er a “Ungil Chais er a Rengedel a Dios” e le ngmle medengei el kmo ngureor el Dios a soal a loruul er ngii. (Lk. 4:43) Ngrirellii a berkel a klumech el mo kot el klou a ultutelel el tekoi er a klengar er ngii. Mo lmuut er aike el ulebongel el buil er a omesiungel me ngmirrael a “meklou ma mekekerel beluu el olisechakl er a re chad.” (Lk. 13:22) Ngdirrek el mle train er a relmuut el bebil er a disaiplo el mo oureor lobengkel el lomerk.—Lk. 10:1.

6. Ngmekera ureor er a berkel a klumech e ulekuak er aike el lmuut el bebil er a ureor er omesiou el dolab? (Dirrek el momes er a siasing.)

⁶ A berkel a ungil chais me ngdirrek el sel kot el klou a ultutelel el ureor el Jehovah me a Jesus a soal a doruul er ngii er chelecha el taem. (Mt. 24:14; 28:​19, 20) Ngii di el ureor el doruul el mora Jehovah a ulekuak er a ureor er a berkel a klumech. El ua tiang, kede teloi a ureor el lomekedechor me a omesiou el ngar er a Bethel el support er a berkel a klumech. Sel lebo er ngii a telemellel a beluu e kede olengeseu er a rudam me a rudos er kid me bo lsebechir el lmuut el mo ngar er a miting e omerk er a klumech. Sel dutebengii a klungel a ultutelel a ureor er a berkel a klumech e de remember el kmo ngsel ngaruchei el ureor el Jehovah soal a doruul er ngii, e ngmo odbechid el mo blechoel el meruul er ngii. A János el ta er a remechuodel er a Hungary a kmo, “Ngdi ngak lomeklatk er ngak el kmo ngdiak a ngii di el ureor er a cheldebechel el sebechel mtechir a berkel a klumech. Tiang a sel kot el ngaruchei el assignment er kid.”

7. Ngera uchul me a Jehovah a soal a dolemolem el lomerk? (1 Timothy 2:​3, 4)

⁷ Ngsebeched el smisichii a blakerreng er kid el lomerk loeak sel domes er a rechad el ua lomes er tir a Jehovah. Ngika soal tirke el rokui el sebechir a lerengesii a ungil chais e bo lodengelii a klemerang. (Monguiu er a 1 Timothy 2:​3, 4.) Tiakid a uchul me ng train er kid el mo olengeriakl er a rolel a dongedecheduch er a rechad. El ua tiang, a Love People—Make Disciples el brochure a meskid a ngeso er a uldasu er a rolel a domuchel a cheldechedechad lobengterir a rechad el moktek er kid a omuchel a omesubel a Biblia e meruul er a remo disaiplo. Mo lmuut me a lak el kengei er a klumech er chelechang, nglocha mo er ngii a techellir el kongei er ngii er a uchei er a ulebengelel a kloul ringel. Aike el dolekoi er tir er chelechang a locha mo odbecheterir er a ngar medad. Tia di sebechel meketmokl a lsekum kede melemolem el lomerk er a klumech.

NGMLE KEREKIKL LOMTAB A ULAOCH ER A BIBLIA

8. A klemedengei er a Jesus er a ulaoch ngera ngrirellii er a rolel a lousbech a temel?

⁸ A Jesus a mle medengelii a rolel e a ulaoch er a Biblia mo tmaut. Ngmle medengei el kmo a omesiungel a di edei el rak me a tedobech. (Dan. 9:​26, 27) Ngdirrek el loeak a ulaoch e ngmle medengei el kmo ngmo uangerang a kodellel e mo duubech er oingerang. (Lk. 18:​31-34) A Jesus uluusbech aike el lodengei el mo ungil lousbech a temel. Seikid a uchul me ngmle blak a rengul loureor el mo rokir a ureor el lengiluu.

9. Ngera uchul me a ulaoch er a Biblia odbechid el mo omerk loba blakerreng?

⁹ A klemedengei er kid er a ulaoch a dirrek el sebechel lodbechid el mo omerk el loba blakerreng. Kede medengei el kmo a taem el medechel a kedebengang. Kede mtebengii el kmo a blekeradel el duubecha er chelechang me a blekerdelir a rechad olengchelel aike el ledu Biblia el kmo ngochotel a uriul sils. Kede dirrek el medengei el kmo a klauketui er a Renged er a Britain me a Merikel lobengkel a Russia me a rullengeseu er ngii oltaut er a ulaoch “er a taem er a ulebongel” el kirel a king er a dimes me a king er a diluches. (Dan. 11:​40, NW) Kede dirrek el medengei el kmo a Renged er a Britain me a Merikel omtechei er a ochil sel klou el bleob el losaod er ngii a Daniel 2:​43-45. Omesubed er a ulaoch er a Biblia a uchul me ngulterekokl a rengud el kmo ngdi kmedung e a Rengedel a Dios a mo okngemed a rokui el kabelment er a rechad. Aika el rokui el ulaoch a ochotii el kmo kede kirel ker er a blechebechel a taem e odbechid el mo omerk el loba reched.

10. Ngera lmuut el bebil er a rolel e a ulaoch er a Biblia melisiich er kid el mo blak a rengud el omerk?

¹⁰ A ulaoch er a Biblia dirrek el meskid a klumech el dekmal semeriar el mo ouchais er ngii. A odos el Carrie el mesiou el ngar er a Dominican Republic a kmo: “Sel kullatk aike el rokui el klebokel el tekoi el bla letib a Jehovah el mo meruul er a ngar medad, e ak feel el kmo ngkirek louchais er a rebebil el kirel. Sel kumes a mondai er a rechad e ak mo mtebengii el kmo aika el telbiil a diak di lemei er ngak ngdirrek el mo er tir.” A ulaoch er a Biblia smisichid el mo melemolem el lomerk e le ngochotii el kmo a Jehovah olengeseu er kid el meruul er tia el ureor. A Leila el kiei er a Hungary a kmo: “A Isaia 11:​6-9 odbechak el mo share er a ungil chais el mora rebebil el mo lmuut er tirke el domes er tir e nglocha diak bo lekengei er a ungil chais. Ak medengei el kmo ngoeak a ngelsuil a Jehovah ngsebechel a ngii di el chad el change.” A Christopher el odam er a Zambia a kmo: “Ngua lomlaoch el kirel a Markus 13:​10, a ungil chais oberkang er a beluulechad el rokir. Me ak kmal feel el kmo ngmera el ileakl el techall el sebechek lolengeseu el loltaut er tia el ulaoch.” Ngera el ulaoch er a Biblia odbechau el mo melemolem el lomerk?

NGMLE ULTUIL ER A NGELSUIL A JEHOVAH

11. Ngera me a Jesus a mle kirel ultuil er a ngelsuil a Jehovah el mo melemolem loba blakerreng el lomerk? (Lukas 12:​49, 53)

¹¹ A Jesus a mle ultuil er a ngelsuil a Jehovah el mo melemolem loba blakerreng el lomerk. Alta Jesus a ulechotii omengull sel longedecheduch, ngmle medengei el kmo a ungil chais el kirel a Renged a mo ongasech a rengrir a rebebil me a rebetok a mo mesisiich lomtok. (Monguiu er a Lukas 12:​49, 53.) A remengeteklel a klechelid a dimlak sorir aike el lulemerk a Jesus me te millasem el lomekoad er ngii. (Jn. 8:59; 10:​31, 39) Engdi Jesus a millemolem el lomerk e le ngmle medengei el kmo a Jehovah obengkel. Ngdilu el kmo: “Ngdiak di le ngak el tang . . . ngikel ulderchak chobengkek; . . . dimlak le chitak, ele kdiblechoel meruul a ikel soal.”—Jn. 8:​16, 29, BT.

12. Ngmilekera Jesus e prepare er a redisaiplo er ngii el mo melemolem lomerk alta te mo omtok er tir?

¹² A Jesus a ulemeklatk er a redisaiplo er ngii el kmo ngsebechir el ultuil er a ngelsuil a Jehovah. Ngmlo betok lolterekokl a rengrir el kmo a Jehovah mo ngosuterir mo lmuut er a lechebangel odechelakl. (Mt. 10:​18-20; Lk. 12:​11, 12) Ngdilu er tir me bo lekerekikl. (Mt. 10:16; Lk. 10:3) Ngdirrek el dilu er tir el kmo lak lorrimel er a rechad a lsekum ngdiak el sorir lorrenges. (Lk. 10:​10, 11) E dilu er tir me lechiis a lsekum te mo oldechelakl er tir. (Mt. 10:23) A Jesus a uleba blakerreng e uluumera el ulsirs er a Jehovah, me nguaisei ngdimlak bo lolsiseb er ngii er a blekeradel el sebechel mo uchul a telemellel.—Jn. 11:​53, 54.

13. Ngera uchul me ngsebechel mo ulterekokl a rengum el kmo a Jehovah mo ngosukau?

¹³ Te betok omtok er a urered er chelecha el taem, me kede ousbech er a ngelsuil a Jehovah el mo melemolem el loba blakerreng el lomerk. (Och. 12:17) Ngera uchul me ngsebechel mo ulterekokl a rengum el kmo a Jehovah mo ngosukau? Molatk er a nglunguchel a Jesus el ngar er a 17 el bliongel er a Johanes. Jesus ullengit er a Jehovah me longkar er a rechapostol me a Jehovah ulenger er a nglunguchel. A babier er a Rellir ouchais er a rolel e ngilsuterir a rechapostol el mo omerk el loba blakerreng alta te mlodechelakl. Ngar tia el nglunguuch e a Jesus a dirrek el ullengit er a Jehovah me longkar er tirke el lotuil a klaumerang er tir er a klumech el lulemerk er ngii a rechapostol. Kau a uldimukl er tir. A Jehovah dirkak el stob el longer er a nglunguchel a Jesus. Ngmo ngosukau el ua lullengeseu er a rechapostol.—Jn. 17:​11, 15, 20.

14. Kede mekera medengei el kmo ngmo sebeched el melemolem el lomerk loba blakerreng? (Dirrek el momes er a siasing.)

¹⁴ Mo lmuut me a bo lemeringel er kid lomerk er a ungil chais loba blakerreng sel sal kmedang a ulebongel, kede mo nguu a support el dousbech er ngii. (Lk. 21:​12-15) Ngdi ua Jesus me a redisaiplo er ngii, kede mechititerir a rechad me te melilt lorrenges me a lechub e ngdiak e mengeroid er kid er a mondai. Mo lmuut er a terebengel a urered, me a rudam er kid a sebechir el melemolem el lomerk er a ungil chais e le te ultuil er a Jehovah el diak el klisichir. A Jehovah milsa remesiungel er a taem er a rekot el Kristiano a klisiich me chelechang ngdirrek el lomeskid a klisiich me bo lsebeched el “churrungel a berekel a tikingel a Dios” loltirakl er a soal. (2 Ti. 4:​17, BT) Ngkmal sebechel mo ulterekokl a rengum el kmo omultuil er a Jehovah ngsebechem el melemolem el lomerk el loba blakerreng.

NGMILLEMOLEM EL POSITIVE

15. Ngera ochotii el kmo a Jesus a mle positive a uldesuel el kirel a berkel a klumech?

¹⁵ A Jesus a millemolem el positive a uldesuel el kirel a ureor el lomerk. Tia uchul me ngmle sebechel el melemolem el semeriar er a berkel a klumech. El ua tiang, a ta el rak er uriul er a lebechelii a omesiungel e ngmilsa el kmo te betok a mla mo kongei el lorrenges er a ungil chais, e ulemekesiu er tir el mora dellomel el mla mo meduch e mla mo kirel el doridm. (Jn. 4:35) Bekord el ta el rak er uriul e ngdilu er a redisaiplo er ngii el kmo: “A sim a klou.” (Mt. 9:​37, 38) Uriul e ngliluut el melekoi el kmo: “A sim a klou, . . . misei e bo molengit ra Rubak ra sim me lodureklterir ar uureor el kirel a sim er ngii.” (Lk. 10:​2, BT) A Jesus millemolem el ulterekokl a rengul el kmo te ngar ngii a mo orrenges, e kmal mlo dmeu a rengul sel lebo er ngii a rurrenges.—Lk. 10:21.

16. Ngmilekera Jesus e ousbech a okesiu lochotii a positive el tekoi el kirel a berkel a klumech? (Lukas 13:​18-21) (Dirrek el momes er a siasing.)

¹⁶ A Jesus a ullisechakl er a redisaiplo er ngii me bo lolemolem el positive osengir el kirel a klumech el lobang, e tia millisiich el tir el mo melemolem lomerk el loba blakerreng. El ua tiang, ka molatk a teblo er a okesiu er ngii. (Monguiu er a Lukas 13:​18-21.) A Jesus a uluusbech er a tane er a meringel el lolisechakl er tir el kmo a klumech er a Renged a mo mengasireng a klungel a berkel e diak a sebechel stob er ngii. Ngdirrek el luluusbech er a omkukel a blauang lomekesiu er a rolel e a klumech er a Renged a mo oberk er a beluulechad e melodech er a rechad alta aika el omelodech a diak lemereched el me chemolt. Me a Jesus a ngilsuterir a redisaiplo er ngii el mesa el kmo te ngar ngii a mo orrenges er a klumech el lomerk er ngii.

17. Ngera uchul me ngkired el melemolem el loba positive el uldasu el kirel a berkel a klumech?

¹⁷ Ngodbechid el mo omerk loba blakerreng sel dolatk er a meketmokl er a beluulechad el rokir er chelecha el taem. Bek el rak e te betok el miliol el chad a mei er a Chedaol Belsoil e mesuub a Biblia el lobengked. A rebetok el dart el telael a metecholb e me teloi er kid er a ureor el lomerk. Ngdiak dodengei el kmo te dirk telang a mo kongei er a klumech engdi kede medengei el kmo a Jehovah a mengudel er a kloul seked, el tir a mo suobel er a merael el mei el kloul ringel. (Och. 7:​9, 14, BT) A Mastang er a sim a ulterekokl a rengul el kmo te dirk betok a rechad el mo kongei er a ungil chais me kede melemolem el lomerk.

18. Ngera soad a bo lutebengii el kired a rechad?

¹⁸ A redisaiplo er a Jesus a lodengelterir el kmo te blak a rengrir el lomerk. A rechad er a lesterir a rechapostol el bekeu el lomerk e “te mlo omtab el kmo tulebengkel a Jesus.” (Rel. 4:13) Me sel lomes er kid a rechad el omerk, e bo lutebengii el kmo kid me kede dirrek loukerebai er a blakerreng er a Jesus.