Molemolem el Merael el Ngar er a Klaumerang

1. Ngera uchul me a apostol Paulus a mle ungil a rengul er a rolel e nguluusbech er a klengar er ngii?

A APOSTOL Paulus a mle medengei el kmo ngdi kmedung e ngmo okodall, engdi ngmle ungil a rengul er a klengar er ngii. Ngulemes er a klengar er ngii e kmo: “Ak mla rurtii a klaidesachel el rokir, ak mla mekedeldar a klaumerang.” (2 Ti. 4:​6-8, NW) A Paulus a uluusbech er a klengar er ngii el mesiou er a Jehovah, e mle ulterekokl a rengul el kmo nguldeuir a rengul a Jehovah. Kid me ngdirrek el soad el meruul a ungil omelilt e mo oba kengei er a Jehovah. Ngmekera sebeched el meruul er tiang?

2. Ngera belkul a bo dorael el ngar er a klaumerang?

² A Paulus a millekoi el kirel me a relmuut el bebil er a reblak a rengrir el Kristiano el kmo: “Kede merael el ngara kloumerang, el diak de ngara ikel meues.” (2 Ko. 5:​7, BT) Ngera mle belkul a tekingel? Ngar er a Biblia e a tekoi el “merael” a lebebil e ngmelutk el kirel a rolel e a chad a melilt lousbech er a klengar er ngii. A lsekum a chad a merael di ultuil er aike el mues, e ngmeruul omelilt loltirakl aike el leues er a medal, lerrenges, me aike el le feel. Me nguaisei engdi chad el merael el ngar er a klaumerang a meruul omelilt lulsirs er a Jehovah el Dios. A omerellel ochotii el kmo ngulterekokl a rengul el kmo a Dios a mo omekngeltengat er ngii, le ngmo uchul a klungiolel sel loltirakl a ulekrael er a Jehovah el ngar er a Tekingel.—Psa. 119:66; Heb. 11:6.

3. Ngera el klungiaol a dengai sel dorael el ngar er a klaumerang? (2 Korinth 4:18)

³ Nguaisei kede rokui el ousbech er a osenged, oderengesed, me aike el de feel sel doruul omelilt. Engdi a lsekum sel doruul a meklou a ultutelel omelilt e kede di ousbech aike el deues me a derenges e merekong e ngulterekokl el mo er ngii a mondai. E ngerang? E le ngdiak el sebeched el blechoel el ultuil er aike el deues me a derenges. A cherengel a taem e kede mo rullii a tekoi el diak el soal a Jehovah a lsekum kede di merael loltirakl er aike el mues, mo lmuut me a lak el cheleuid. (Oli. 11:9; Mt. 24:​37-39) Sel dorael el ngar er a klaumerang e kede mo meruul omelilt el “odeuir a rengul a Rubak.” (Efe. 5:10) Sel doltirakl a ulekrael er a Dios e ngmo meskid a budech e rullid el mo mera el dmeu a rengud. (Psa. 16:​8, 9; Isa. 48:​17, 18) E a lsekum kede melemolem el merael el ngar er a klaumerang, e kede mo kiei el diak a ulebengelel.—Monguiu er a 2 Korinth 4:18.

4. Ngmekera sebechel a chad el mo medengei el kmo ngmerael el ngar er a klaumerang me a lechub ngmerael el ngar er aike el mues?

⁴ Ngmekera sebeched el mo medengei el kmo kede merael el ngar er a klaumerang me a lechub kede merael el ngar er aike el mues? Ngkired el di kid loker el kmo: Ngera omekrael omelilt er ngak? Ngdi ike el tekoi el kues omekrael er ngak? Me a lechub ngulekrael er a Jehovah omekrael er ngak? Ka me dosaod er a rolel e ngsebeched el melemolem el merael el ngar er a klaumerang er a edei el meklou a ultutelel el tekoi: Sel dolilt a ureor, sel dolilt er a chad el mo bechid, me sel dengai a ulekrael er a cheldebechel. Kede mo mesaod a tekoi el kired el melatk me bo lsebeched el lungil melilt el kirel a derta er ngii.

SEL DOLILT A UREOR

5. Ngera kired el melatk sel dolilt a ureor?

⁵ Kid el rokui a soad el ngmai aike el dousbech me aike el lousbech a telungalek er kid. (Oli. 7:12; 1 Ti. 5:8) A bebil lureor a meklou a udoud er ngii. A chad a sebechel loureor e mechar aike el lousbech e a osisiu el taem e ngngar ngii a sebechel save. Engdi a bebil lureor a locha diak el klou a udoud er ngii me ngdi sebechel ngmai aike el lousbech a telungalek er ngii. Sel dolatk a kongei er a ureor me a lechub e ngdiak e kede ulterekokl el mo melatk er a klungel a udoud. Me nguaisei a lsekum a chad a di tiakid a lolatk er ngii e ngmerael el ngar er aike el mues.

6. Ngmekera sebeched el merael el ngar er a klaumerang sel dolilt a ureor? (Hebru 13:5)

⁶ A lsekum kede merael el ngar er a klaumerang e kede dirrek el mo merriter er a bo lerellii a ureor er a deleuill er kid me a Jehovah. Ngsebeched el di kid el loker: ‘Tia lureor ngmo uchul me ak meruul a tekoi el louketui a Jehovah?’ (Osi. 6:​16-19) ‘Ngmo melemall er a omengull er ngak me ngii ngngar ngii aike el taem el bo kcheroid er a telungalek el kemanget el taem?’ (Fil. 1:​10, NW) A lsekum a nger er aika el ker a choi, e ngolechotel a llomeserreng olak mkengei er ngii el ureor, mo lmuut me a lemeringel obetik a ureor. Kid el merael el ngar er a klaumerang a uchul me kede meruul omelilt el ngii ochotii el kmo ngulterekokl a rengud el kmo a Jehovah mo meskid aike el dousbech.—Mt. 6:33; monguiu er a Hebru 13:5.

7-8. Ngmilekera ta el odam er a South America e merael el ngar er a klaumerang? (Dirrek el momes er a siasing.)

⁷ A Javiera el odam er a South America miltebengii a klungel a ultutelel a lorael el ngar er a klaumerang. Ngmelekoi el kmo: “Ak mle apply er a ureor el udoud er ngii a eru el chachisois er a ududek me ngii a kmal mo soak el ureor.” Me nguaisei engdi a Javier a kmal mle soal el mo pioneer. Ngmelemolem el melekoi el kmo: “Ak mle schedule er a interview er ngak el kirel ngii el ureor. A uchei er a interview e ak milluluuch lolengit a ngeso er a Jehovah e ulterekokl a renguk el kmo ngmedengelii sel kot lungil el kirek. Ngmle soak lolengeriakl er a urerek, engdi ngdimlak el soak ngii el lureor a lsekum ngdiak bo lengesukak lotaut a turrekong er ngak er a klereng.”

⁸ A Javier a kmo: “A manager a dilu er a temel a interview el kmo ak mo blechoel loureor el overtime. Me ak mle ungil mengedecheduch er ngii el kmo a omengull er ngak a uchul me ngdiak el sebechek el meruul er tiang.” Chochoi a Javier a mle kotouar er ngii el lureor. Eru el sandei er uriul e ngulemuchel el pioneer. Uriul er tia el osisiu el rak e ngmiltik er a part-time el urerel. Ngmelekoi el kmo: “A Jehovah rirengesii a nglunguchek e milskak a ureor el chatter er a schedule er ngak el pioneer. Ngmera el dmeu a renguk el ngar ngii a urerek el ngosukak el mo mengoit er a lmuut el klou el taem el mesiou er a Jehovah me a rudam.”

9. Ngera ke suub er a experience er a Trésor?

⁹ E kuk mekerang a lsekum kede mtebengii el kmo a urered er chelechang a olekebai er kid el merael el ngar er a klaumerang? Molatk er a Trésor er a beluu er a Congo. Ngkmo: “A beches el urerek a mle once-in-a-lifetime el opportunity. Ak milsuk er a udoud el edei el chachisois a klungel er sel last el urerek, me a rechad a kmal milengull er ngak.” Me nguaisei engdi a Trésor a milengoit a miting le ngblechoel el oureor el overtime. Ngdirrek el lebebil e te orrimel er ngii el cover up a diak el melemalt el tekoi el loruul a kombalii. A Trésor a mle soal quit engdi mle medakt a lak el betik a ureor. Ngera ngilsuir? Ngkmo: “A Habakuk 3:​17-19 a ngilsukak el mo mesa el kmo, mo lmuut me ak chitii tia el lureor e bo lak kusuk er a klou, e a Jehovah mo omekerreu er ngak. Me ak mle resign.” Ngmelemolem el kmo: “A rebetok el merreder omdasu el kmo a chad a mo kongei el chemoit a rokui el tekoi mo lmuut er a temel lobengkel a telungalek er ngii me a omengull er ngii el kirel a ureor el klou a udoud er ngii. Engdi ngkmal dmeu a renguk el milekerreuii a deleuill er ngak me a Jehovah me a telungalek er ngak. Ta el rak er uriul, e a Jehovah ngilsukak el metik er a ungil ureor el ngosukak el lungil kiei e klou a temek el kirel omesiou el mora Jehovah. Sel denguu a Jehovah el mo kot, e nglocha mo telkib el taem el diak a kmal ududed engdi Jehovah mo omekerreu er kid.” Chochoi a dotuil a klaumerang er kid er a ulekrael me a telbilel a Jehovah e kede mo melemolem el merael el ngar er a klaumerang me ngii a mo omekngeltengat er kid.

SEL DOLILT ER A MO BECHID

10. Ngera mo rullid el mo merael el ngar er aike el mues sel dolilt er a mo bechid?

¹⁰ A chebechiil a sengk el mlara Jehovah e normal el tekoi a lsoad el mo bechiil. A chad el melatk er a chad el mo ungil ongebechiall a locha mo omtab a blekerdelel, teletelel, chisel, usbechel er a udoud, ngerechelel er a telungalek er ngii, me a lsekum e ngrullii el mo happy. Aikang a meklou a ultutelel el tekoi. Me nguaisei a lsekum ngdi aikakid a lolatk a chad e nglocha di merael el ngar er aike el mues.

11. Ngmekera sebeched el merael el ngar er a klaumerang sel dolilt er a mo bechid? (1 Korinth 7:39)

¹¹ A Jehovah kmal proud er a rudos me a rudam el oltirakl a ulekrael er ngii sel lolilt er a mo becherir! El ua tiang, te oltirakl er a ulekrael er a Biblia el mo mengiil el dimerekmo lengelakl er a “taem er a ngibes er a klengeasek” e mochu melatk a chebechiil. (1 Ko. 7:​36, NW) Te merriter el kmo, a chad el lolatk el mo bechil ngolab a blekeradel el Jehovah a kmo ngblekerdelir a rungil bechiil el sechal me a rungil bechiil el redil. (Osi. 31:​10-13, 26-28; Efe. 5:33; 1 Ti. 5:8) A lsekum a chad el diak el Sioning ochotii el kmo ngsoal tir e te olengesenges er a ulekrael el mo bechiil el “oltirakl er a Rubak” el ua lolekoi a 1 Korinth 7:39. (Monguiu.) Te melemolem el merael el ngar er a klaumerang, lulterekokl a rengrir el kmo a Jehovah a mo omesterir aike el lousbech er a uldesuir me a rengrir.—Psa. 55:22.

12. Ngera ke suub er a Rosa?

¹² Molatk er a Rosa el pioneer er a Colombia. Ngmlo er ngii a chad er a urerel el diak el Sioning el soal ngii. Me a Rosa me ngmle soal ngii. Ngkmo: “Ngika kora mle ungil el chad. Ngmle volunteer er a community er ngii e healthy a lifestyle er ngii. Ngkmal mle soak omerellel el mei er ngak. Ngullab a rokui el blekeradel el mle soak er a bechiil el sechal engdi ngdimlak el Sioning.” Ngmelemolem el melekoi el kmo: “Ngmle meringel er ngak a kotouar er ngii e le ngmle tekoi el soak. Tiakid el taem ak kora mle sabisi e mle soak el mo bechiil, engdi ngdirkak kbetik er a chad el ngar er a klemerang.” Me nguaisei engdi Rosa dimlak di lolatk er aike el mues. Ngmillatk er a bo lerellii er a deleuill er ngii me a Jehovah. Me ngmle stob a rokui el contact er ngii lobengkel ngii el chad e millemolem el mechesang el mesiou er a Jehovah. Kedeb el taem er uriul e ngmlora Skuul el Kirir a Rumerk er a Rengedel a Dios (SKE) e chelechang e ng special pioneer. A Rosa kmo: “A Jehovah mla mekekii a renguk er a klou el deurreng.” Alta ngdiak lebeot a dorael el ngar er a klaumerang sel bo el imis el mesisiich a feelings er kid el kirel a kmung ngngerang, engdi ngkmal worth er ngii a dolemolem el merael el ngar er a klaumerang.

SEL DENGAI A ULEKRAEL ER A CHELDEBECHEL

13. Sel dengai a ulekrael er a cheldebechel e ngera sebechel rullid el mo merael el ngar er aike el mues?

¹³ Kede blechoel el melai a ulekrael el kirel omengull er kid er a cheldebechel loeak a remechuodel, circuit overseer, branch office, me a Governing Body. Engdi ngmekerang a lsekum ngmo diak de understand er a uchul me te milskid a ulekrael? Kede locha di mes a kngtil ngii el ulekrael me a omelsemai el mei er kid. Me kede locha mo omuchel el di melatk a kngterir a rudam el milskid ngii el ulekrael.

14. Ngera mo ngosukid sel dengai a ulekrael er a cheldebechel el mo merael el ngar er a klaumerang? (Hebru 13:​17, NW)

¹⁴ Sel dorael el ngar er a klaumerang e kede oumerang el kmo a Jehovah ngii omekrael er a cheldebechelel e medengelii a blekeradel el dengar ngii. Seikid a uchul me kede di mereched el mo olengesenges loba positive el uldasu. (Monguiu er a Hebru 13:​17, NW.b) Kede mtebengii el kmo a blekongesenges er kid a melechel er a kltarreng er a ongdibel er kid. (Efe. 4:​2, 3) Kede oumerang el kmo alta rudam el omekrael a diak lemecherrungel sel dolengesenges e a Jehovah mo omekngeltengat er kid. (1 Sa. 15:22) Kede dirrek el loumerang er a Jehovah el kmo ngmo er ngii a taem e ngmeklemeltii a ulekrael a lsekum ngkirel muklemalt.—Mik. 7:7.

15-16. Ngera ngilsuir a ta el odam el mo merael el ngar er a klaumerang alta ngmla er ngii a klaumededenger er ngii er a ulekrael el lengiluu? (Dirrek el momes er a siasing.)

¹⁵ Molatk er a experience el lochotii a klungiolel sel dorael el ngar er a klaumerang. Alta tekoi er a Sebangiol a omelekoi er a beluu er a Peru me nguaisei a rebetok el chad er a blai a ngar ngii omelekingir. A ta er aika el omelekoi a Quechua. Ngmle betok el rak el rudam me a rudos el melekoi a Quechua a mirrael a territory el losiik er tirke el melekoi a Quechua. Me nguaisei engdi llach er a beluu a uchul me ngmlo er ngii omelodech er a rolel a losiik er tir. (Rom 13:1) Sei a uchul me a rebebil a mlo melatk el kmo tiang ngmera el ungil el ulekrael. Engdi a rudam ullengesenges a ulekrael me a Jehovah ulemekngeltengat er a urerir losiik er a rechad el melekoi a Quechua.

¹⁶ A Kevin el ta er a remechuodel er a ongdibel er a tekoi er a Quechua a ta er tirke el mle bekikl. Ngkmo: “Ak mlo melatk, ‘Kede mekerang er chelechang e osiik er a rechad el melekoi a Quechua?’” Me ngmilekerang a Kevin? Ngkmo: “Ak mlo melatk er a Osisechakl 3:5. E mlo melatk er a Moses. Ngika mle kirel lomekrael er a rechad er a Israel el tuobed er a Ekipten el mora basio el telenget el diak sebechir el chemiis er a rechad er a Ekipten. Me nguaisei a Moses a di ullengesenges me a Jehovah ulemekngeltengat er a blekongesenges er ngii loeak a mengasireng el rolel.” (Exo. 14:​1, 2, 9-11, 21, 22) A Kevin a kilengei el melodech er a rolel a lomerk. Me ngngera dilubech? Ngkmo: “Ngkmal mle mechas a renguk er a rolel e a Jehovah ulemekngeltengat er kemam. Uchei aki blechoel el merael er a territory el kemanget el taem e di metik er a tang me a lechub e te terung el chad el melekoi a Quechua. Chelechang aki di mora ike el territory el betok a rechad er ngii el melekoi a Quechua. Tiakid a uchul me aki mla mengedecheduch er a rebetok el chad, e mla mo betok a return visit me a study. Ngmla mo betok a rechad el mei er a miting.” Chochoi, sel dorael el ngar er a klaumerang, e a Jehovah blechoel el lomekngeltengat er kid.

17. Ngera ke mla suub er tia el suobel?

¹⁷ Kede mla smaod a edei el meklou a ultutelel el rolel e ngsebeched el melemolem el merael el ngar er a klaumerang. Engdi ngkired el melemolem el merael el ngar er a klaumerang er a rokui el tekoi er a klengar er kid, el ua sel dolilt a rolel ongelaod me a omilil me sel doruul omelilt el kirel a skuul me a omekeroul er a rengalek. Ngii di el omelilt el kired el meruul er ngii, e ngkirel diak di lomekrael er kid aike el mues ngdirrek el kirel lomekrael er kid a deleuill er kid me a Jehovah, ulekrael er ngii, me a telbilel el mo omekerreu er kid. A doruul el uaisei e ngmo sebeched el “merael el oltirakl er a ngklel a Jehovah el Dios er kid el mo cherechar.”—Mik. 4:​5, NW.