Bltikerreng Lodbechau el Mo Melemolem el Omerk!

1. Ngera kede siluub er a annual meeting er a 2023?

NGAR er a annual meeting er a 2023,a e kede ngilai a omeldechel a bebil er a tekoi el doumerang e ngilai a bebil announcement el kirel a berkel a klumech. El ua tiang, kede silubii el kmo a rebebil a mo er ngii a techellir el ngiltii el mo dechor el lobengterir a rechedal a Jehovah er a uriul er a telemellel a Kloul Babilon. Kede dirrek el mlo medengei el kmo ngomuchel er a November 2023, e a rokui el publisher a mla mo diak el report a rokui el telengtengil a urerir er a berkel a klumech. Aika el omelodech, ngrullii a berkel a klumech el mo diak el lorechudel el ua ngar er a mong? Ngkmal diak el uaisei!

2. Ngera uchul me a derta el sils lengelakl a rullii a berkel a klumech el lmuut el kmal mo orechudel? (Markus 13:​10, BT)

² A derta el sils lengelakl a rullii a berkel a klumech el lmuut el kmal mo orechudel. E ngerang? E le ngmocha diak a taem. Molatk aike el lulemlaoch a Jesus el kirel a berkel a klumech er a uriul sils. (Monguiu er a Markus 13:​10, BT.b) A doltirakl er a babier er a Mateus e a Jesus a dilu el kmo a ungil chais a mo oberk er a beluulechad el rokir er a uchei er a lemei a “ulebongel.” (Mt. 24:14) Tia mesaod er a ulebengelel a mekngit el blekeradel er tia el beluulechad er a Satan. A Jehovah mla kutmeklii a “sils ma . . . sikang” el kirel aike el tekoi el mo duubech. (Mt. 24:36; 25:13; Rel. 1:7) A derta el sils lengelakl okedid er tiang. (Rom 13:11) Engdi chelecha el dongiil er a ulebongel e ngkired el melemolem el omerk er a klumech.

3. Ngera odbechid el mo omerk?

³ Me sel dorriter er a bereked er a klumech e tiakid a klou a ultutelel el ker el kid el rokui a ungil dolatk er ngii: Ngera uchul me kede omerk er a ungil chais? A kedeb el nger er ngii a, ngbltikerreng odbechid el mo omerk. Aike el doruul el ngar er a urered er a berkel a klumech a ochotii a bltkil a rengud el kirel a ungil chais, bltkil a rengud el mora rechad, me a ngaruchei er ngii a bltkil a rengud el mora Jehovah me a ngklel. Ka me dosaod a derta er aikang.

KEDE OMERK LE NGBETIK A RENGUD ER A UNGIL CHAIS

4. Kede mekerang sel dengai a ungil chais?

⁴ Ngsebechem el lotkii el kmo ngmle uangerang a feeling er kau er a omngai a ungil chais, el locha lemechell a ta er a chedal a telungalek er kau me a lechub e te mle offer er kau a ureor el kmal muluusbech er ngii? Ke locha kmal mle semeriar el mo ouchais er a resechelim me a telungalek er kau. A osisiu el tekoi ngdilubech er a omrengesii sel kot lungil chais, el ngii a ungil chais er a Rengedel a Dios?

5. Ngmle uangerang a feeling er kau er a omkot el suubii a klemerang er a Tekingel a Dios? (Dirrek el momes a siasing.)

⁵ Ka molatk er sel taem er a omkot el suubii a klemerang er a Tekingel a Dios. Ke silubii el kmo a Demam el ngar er a eanged a betik a rengul er kau, e soal obo mchedal a telungalek er ngii, e mla tibir el mo okngemedii a ringel, me kau a sebechem el mo oba omelatk el kmo ke mo mesterir a rebetik er a rengum el mo mekiis er a beches el blekeradel, me a lmuut el betok. (Mk. 10:​29, 30; Jn. 5:​28, 29; Rom 8:​38, 39; Och. 21:​3, 4) Aika el klemerang a rirtechii a rengum. (Lk. 24:32) Ngkmal mle soam aika el mosuub, e mle soam louchais er a rokui el chad el kirel!—Momekesiu er a Jeremia 20:9.

6. Ngera ke suubii er a experience er a Ernest me a Rose?

⁶ Molatk er a experience er a odam el Ernest.c Ngika mle bekord el teruich a rekil er a lemad a demal. Ngkmo: “Ak millatk el kmo, ‘Ngika ngmla mora eanged? Me a lechub e ngmla mo diak el mo cherechar?’ A kulemes er a rengalek el mla er ngii a demerir e uluureng okmo me ak uai tir.” A Ernest a mle blechoel el mora olekull e mo outubuach er a debellel a demal e meluluuch el kmo: “Rubak, please e ngmera el soak el mo medengei el kmo a demak ngngar ker.” Bekord el 17 el rak er uriul er a lemad a demal e te mle offer er a Ernest omesubel a Biblia, me ngdi mle mereched el kongei. Ngkmal mlo dmeu a rengul el mo medengei el kmo a rulekoad a diak lolechesuar a ngerang, e ua lemechiuaiu el kmal imiit a mederir, me a Biblia tibir el kmo ngmo er ngii okiis er a ngar medad. (Oli. 9:​5, 10; Rel. 24:15) Me ngika mocha metik a nger er aike el ker el kmal meketeketa er a lolatk el kirel! A Ernest a kmal mle semeriar er aika el klemerang er a Biblia el losuub. A bechil er a Rose me ngmlo obengkel el mesuub e dirrek el kmal mlo soal a klumech er a Renged. Me te miltecholb er a 1978. Te kmal mle blak a rengrir el lomerk aika el mekreos el klaumerang er tir er a telungalek er tir, resechelirir, me a lmuut el bebil el sorir el lorrenges. Tia uchul me a Ernest me a Rose a mla ngosuterir a rebetok er a 70 el chad el mo olengeriakl el mo nguu a techolb.

7. Ngera duubech sel lemedalem er a rengud a bltkil a rengud el kirel a klemerang er a Biblia? (Lukas 6:45)

⁷ Me ngbleketakl el kmo, sel lemedalem er a rengud a bltkil a rengud el kirel a klemerang er a Biblia e ngmo diak el sebeched el di lmuk. (Monguiu er a Lukas 6:45.) Kede mo feel el ua redisaiplo er a Jesus er a taem er a rekot el Kristiano el tir a dilu el kmo: “Kemam a diak el sebecham el mo lmuk el diak kim ouchais a ikel bla kim ues ma bla kim renges.” (Rel. 4:20) Ngkmal betik a rengud er a klemerang me ngsoad el share er ngii el mora rokui el chad el sebeched.

KEDE OMERK LE NGBETIK A RENGUD ER A RECHAD

8. Ngera odbechid el mo ouchais er a ungil chais mora rebebil? (Momes er a baks el “Love People—Make Disciples.”) (Dirrek el momes er a siasing.)

⁸ Kede di ua Jehovah me a Ngelekel el betik a rengud er a rechad. (Osi. 8:31; Jn. 3:16) Kede chubteterir tirke el ‘diak a Dios er tir’ e ‘diak chomeltkir.’ (Efe. 2:​12, BT) Ngsorir el remos er a mondai er a klengar, e kid oba uki el lousbech er ngii, el lungil chais er a Rengedel a Dios. A bltkil a rengud me a klechubechub er kid el mo er tir a odbechid el mo meruul aike el rokui el sebeched me bo lsebechir el nguu a ungil chais. Tia el mekreos el klumech a sebechel mesterir a omelatk, ngosuterir el nguu sel kot lungil klengar el sebeched el nguu er chelechang, e mesterir a techellir el mo nguu a “meral klengar,” el ngii a diak a ulebengelel el klengar er a beches el blekeradel er a Dios.—1 Ti. 6:19.

9. Ngera kede dirrek el louchais er ngii el kirel a ngar medad, e ngerang? (Esekiel 33:​7, 8)

⁹ A bltkil a rengud el mora rechad a dirrek el odbechid el mo ouchais er tir el kmo a ulebongel er tia el mekngit el blekeradel er a beluulechad a kmedang. (Monguiu er a Esekiel 33:​7, 8.) Kede chubteterir a rengar bita er kid me a rechedad el diak el ngar er a klemerang. A rebetok er tir a kiei el diak el lodengei el kmo a “kloul ringel, el direkak le borngii ra uchelel a belulechad el me lmuut er chelechang, ma ka le borngii er chelechal mong,” a merekung. (Mt. 24:​21, BT) Ngkmal soad a bo lodengei el kmo ngngera mo duubech er tia el taem er a kerrekeriil, el klsuul klechelid a mo mokngemed me tia el mekngit el blekeradel er a beluulechad a mo diak er a Armakedon. (Och. 16:​14, 16; 17:​16, 17; 19:​11, 19, 20) Nglunguched el kmo a rokui el chad bo lorrenges aike el dolekoi er tir e bo lobengked el ngar er a bliochel el omengull er chelechang. Engdi te mekerang tirke el diak bo lorrenges er kid er chelechang, luldimukl er a rebetik er a rengud el chedad?

10. Ngera uchul me ngkmal klou a ultutelel a dolemolem el louchais er a rechad el kirel a tekoi el di kmedung e ngmo duubech?

¹⁰ Ngua losaod er ngii sel uleak uchei el suobel, nglocha oltirakl er a soal a Jehovah el rechad a mo mengodech a rengrir sel lesa telemellel a Kloul Babilon. A leuaisei e nglmuut el klou a ultutelel a douchais er tir el kirel er chelechang. Molatk er tiang: Aike el douchais er tir er chelechang a locha bo lolebedebek er seikid el taem. (Momekesiu er a Esekiel 33:33.) Te locha mo melatk aike el duluuchais er tir, e tia mo odbecheterir el me teloi er kid el ngar er a bliochel el omengull er a uchei er a bo lak a taem. Ngua ngike el milengkar er a kelebus er a Filipi el mlengodech a rengul er a uriul er a lebo er ngii a “mesisiich el desiu,” a rebebil el diak lorrenges er kid er chelechang a locha mo mengodech a rengrir sel lesa telemellel a Kloul Babilon.—Rel. 16:​25-34.

KEDE OMERK LE NGBETIK A RENGUD ER A JEHOVAH ME A NGKLEL

11. Kede mekera msang a Jehovah klebkall, odanges, me a klisiich? (Ocholt 4:11) (Dirrek el momes a siasing.)

¹¹ Sel kot el klou a ultutelel luchul me kede omerk er a ungil chais a kid el betik a rengud er a Jehovah me a chedaol el ngklel. Kede omes er a berkel a klumech el rolel e kede oldanges er ngika el Dios el kmal betik a rengud er ngii. (Monguiu er a Ocholt 4:11.) Kede oba rengud el rokir el kongei el kmo a Jehovah a rredemelel a nguu a klebkall, odanges, me a klisiich er a rokui el mengull er ngii. Kede msang a klebkall me a odanges sel de share er a rechad aike el sioko lochotii el kmo ngii a “mileob a rokui el tekoi,” me kid a ngar lengii el milskid a klengar. Kede msa klisiich, sel debsang a klisiched loeak a dousbech a temed, klisichel a bedenged, me aike el ngar ngii er kid me bo lsebeched el mui el teloi er a berkel a klumech loltirakl er a blekeradel er a klengar er kid. (Mt. 6:33; Lk. 13:24; Kol. 3:23) Ngkmal soad el mengedecheduch el mesaod er ngika el Dios el kmal betik a rengud er ngii. Ngdirrek el soad el louchais er a rechad el kirel a ngklel, me ngii ngngua ngera el Dios. E ngerang?

12. Ngmekera dongedaol er a ngklel a Jehovah sel domerk er a klumech?

¹² Bltkil a rengud el mora Jehovah odbechid el mo mengedaol er a ngklel. (Mt. 6:​9, BT) Ngsoad el mengikiid er a ngklel a Jehovah er aike el blulak el lolekoi a Satan el kirel. (Gen. 3:​1-5; Job 2:4; Jn. 8:44) Sel domerk er a klumech e ngkmal soad el mesebechakl er a Dios er kid e ouchais a klemerang el kirel el mora rokui el kongei el lorrenges. Ngsoad a rokui el chad a bo lodengei el kmo sel kot el ngaruchei el blekerdelel a bltikerreng, me a rolel a longedereder a melemalt, e a Rengedel a di kmedung e ngmo okngemed a rokui el ringel me a rechad a mo melechesuar er a budech me a deurreng. (Psa. 37:​10, 11, 29; 1 Jn. 4:8) Sel domerk er a klumech e douchais aika el tekoi el kirel a Jehovah e kede chemedolii a ngklel. Ngdirrek el kmal dmeu a rengud e le kede kiei loltirakl aike el kired el meruul el Sioning er a Jehovah. Ngoeak a ngera el rolel?

13. Ngera uchul me kede kmal proud el okedongall el Resioning er a Jehovah? (Isaia 43:​10-12)

¹³ A Jehovah mla ngiltid el mo “sioning” er ngii. (Monguiu er a Isaia 43:​10-12.) A letter el mlara Governing Body er a sesei el rak er a mla memong a dilu el kmo: “Sel kot el chetengakl el tekoi el sebeched el nguu a mo okedongall el ta er a Sioning er a Jehovah.”d E ngerang? Molatk er tia el okesiu. A lsekum kousbech er a chad el mo sioning er kau er a kerrekeriil er a kort, e ke mo ngiltii a chad el modengelii e oumerang er ngii, chad el lungil chisel a uchul me a tekingel bo loumerang. Me a Jehovah el mla ngiltid el mo Sioning er ngii ochotii el kmo ngungil medengelkid e oumerang er kid el mo ouchais er a rechad el kmo ngdi ngii el tang a mera el Dios. Kede feel el kmo tia mera el chetengakl el kid a Sioning er ngii. Me kede ousbech a bek el techall el mo ouchais er a ngklel e omeketakl el kmo aike el betok el blulak el lolekoi el kirel a diak el klemerang. Sel doruul el uaisei e kede kiei lotirakl er a ngakl el de telechull er ngii el Resioning er a Jehovah!—Psa. 83:​18, NW; Rom 10:​13-15.

KEDE MO MELEMOLEM EL OMERK ER A KLUMECH EL MO LMUUT ER A ULEBONGEL

14. Ngera el tekoi a locha di kmedung e ngmo duubech?

¹⁴ Kede kmal semeriar el kirel aike el locha di kmedung e ngmo duubech! Ngoeak a klengeltengat er a Jehovah e ngomeltked el kmo a rebetok bo lekengei er a klemerang er uchei er a lomuchel a kloul ringel. Kede dirrek el kmal semeriar el kmo a temel a kloul ringel e nglocha lmuut el mo er ngii a betok el chad el tuobed er a beluulechad er a Satan e me teloi er kid el oldanges er a Jehovah!—Rel. 13:​48, NW.

15-16. Ngera kede melemolem el meruul er ngii, e meruul er ngii el mo oingerang?

¹⁵ Engdi chelechang e ngngar ngii a urered. Ngar ngii a ileakl el techelled el teloi er a ureor el diak el lluut el mo er ngii, el lomerk er a ungil chais el kirel a Rengedel a Dios er a beluulechad el rokir. Osisiu el taem e ngdirrek el kired el louchais er a rechad er aike el tekoi el di kmedung e ngmo duubech. A rechad a kirir el mo medengei el kmo a ulebengelel tia el mekngit el blekeradel er a beluulechad a kmedang. E sel lemei ngii el sils e te mo medengei el kmo a klumech el dulemerk er ngii a mlara Jehovah el Dios.—Ese. 38:23.

¹⁶ Me ngngera kede mla rullii er a rengud el mo meruul er ngii? Bltkil a rengud er a ungil chais, bltkil a rengud el mora rechad, me a ngaruchei er ngii a bltkil a rengud el mora Jehovah el Dios me a ngklel a odbechid el mo melemolem el omerk loba reched me a blakerreng el dimerekmo ledu Jehovah el kmo, “Ngmerekong!”