‘Tial Evangkelio a Mo Oberk’!
1. Kede mekerang e medengei el kmo ngdiak a ngii di el ngerang el sebechel el torebengii a ureor er a berkel a klumech?
1 Ngkmal diak a ngii di el ngerang el sebechel el torebengii a Jehovah me lak lecherrengelii a uldesuel. (Isa. 14:24) Alta Mengeteklel a Israel er a Gideon me a 300 el chedal a kmal dimlak a techellir el mo mesisiich er a 135,000 el soldau er a Midian, engdi Jehovah a dilu er ngii el kmo: Ke “mo osebelii a Israel er a re chad er a Midian. Ele ng ngak oldurech er kau.” (Men. 6:14) Ngera el ureor er chelecha el sils a lolisiich er ngii a Jehovah? A Jesus a dilu el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.” (Mt. 24:14) Me ngdiak a ngii di el chad el sebechel el torebengii tia el ureor me lak lemecherrungel!
2. Ngera me ngsebeched el melatk el kmo a Jehovah a mo olengeseu er a derta me a derta er kid er a urered er a berkel a klumech?
2 A Jehovah a Olengeseu er a Derta me a Derta er Kid: Kede oba ulterekokl el reng el kmo a Jehovah a mo ngosuterir a Resioning er ngii el mo ungil er a urerir el ua ta el cheldebechel, engdi ngsebeched el melatk el kmo ngdirrek el olengeseu er a derta me a derta er kid? Ngar er aike el taem el luluusbech er ngii, e a Paulus a milechesuar er a ngelseuil a Jehovah el mo er ngii el oeak a Ngelekel el Jesus. (2 Ti. 4:17) Ngsebeched el oba ulterekokl el reng el kmo a Jehovah a dirrek el omekngeltengat a blakerreng er a derta me a derta el chad el sorir el meruul a soal.—1 Jn. 5:14.
3. A Jehovah ngolengeseu er kid er a ngera el blekeradel?
3 A sebekreng er kau er a klengar er a bek el sils ngrullau el kmal mo diak a klisichem el mo omerk er a klumech? “Ng melisiich er tirkel mechitechut e mesulang.” (Isa. 40:29-31) Kau ke chelebangel a odechelakl me a lechub a ultok? “Bsa RUBAK a berredem, e ng mo ngosukau.” (Psa. 55:22) Kau a lebebil er a taem e ngmo diak lulterekokl a rengum? “Morael; ak mo ngosukau el mengedecheduch.” (Exo. 4:11, 12) Ngngar er ngii a chelitechetul a bedengem el uchul me ngtelkael a sebechem el meruul er a berkel a klumech? A Jehovah omes el kmal mekreos er a osengel aike el sebechem el meruul el oba klengar er kau el rokir, el mo lmuut er aike el kmal mekekerei el sebechem el meruul el tekoi.—1 Ko. 3:6, 9.
4. A ulterekokl el reng el dobang el ngar er a Jehovah ngrullid el mo mekerang?
4 “Ng techa mo olutii sel uldars el chimal [a Jehovah]?” (Isa. 14:27) Me bo lulterekokl a rengud el kmo a Jehovah a omekngeltengat a urered er a berkel a klumech, e bo dolemolem el omerk el oba “blekeu el mengedecheduch a tekoi ra Rubak.”—Rel. 14:3.