‘[A] Llomeserreng a Ochotii a Urerel el Kmo Ngmelemalt’
1. Ngua ngera osengir a rebebil el kirel tia el urered?
1 A lebebil er a taem, e ngsebeched el mo remenges a mekngit el omelekoi er a rechad er a blai el diak a ungil el klemedengei er tir er kid me a lechub e te mla remenges a cheleuid el tekoi el kirir a Resioning er a Jehovah. Alta ngmla mengodech a osengir el oeak aike el diak el melemalt el tekoi el motobed er a razio me a tb me a simbung. Ngar er a bebil er a basio e a rechad a omekedong er kid el kmo kede “kdekudel el cheldebechel.” Kede mekerang sel bo dechelebangel a chouaika el mekngit el omelekoi?
2. Ngera sebechel el ngosukid el mo diak lemechitechut a rengud sel dechelebangel a mekngit el omelekoi?
2 Molemolem el Oba Melemalt el Osengem er a Tekoi: Sera kot el dart el rak, e a rechad a mle blechoel el cheleuid a uldesuir e ulemtok er a Jesus me rekuk bebil er a remesiungel a Jehovah. (Rel. 28:22) Engdi, te dimlak lebechei aika el mekngit el omelekoi me lerelleterir el mo merur er a omesiungir. A Jesus a dilu el kmo: “Ngdi llomeserreng a lochotii a urerel el kmo ngmelemalt.” (Mt. 11:18, 19) Ngmillemolem el meruul a soal a Demal el oba blakerreng, e mle ulterekokl a rengul el kmo tirke el mera el sorir el mo medengelii a klemerang a mo sebechir el mesang a kerresel a ungil el chais. Ngsebechel el mo diak lemechitechut a rengud a lsekum kede melemolem el melatk el kmo a Ngelekel a Dios a chilarm a osisiu el blekeradel.
3. Ngera uchul me ngdiak el kirel el mo mechas a rengud er a mekngit el chais me a ultok?
3 A Jesus a millekoi el kmo a beluulechad a mo ouketui er a ruleltirakl er ngii el di ua luluuketui er ngii. (Jn. 15:18-20) Sei a uchul me ngdiak el kirel el mo mechas a rengud er a mekngit el chais me a ultok. Ngkired el medengei el kmo a chouaisei el tekoi a mo blechoel el ngar er ngii er a klteketel a taem el dengar er a uriul el sils e lemengal mo klou a ngasechereng er a Satan. (Och. 12:12) Ngsebechel el mo ungil a rengud e le aika el tekoi a olechotel a kmo a beluulechad er a Satan a di kmedung e ngmo nguemed.
4. A lsekum e ngmedung a mekngit el omelekoi el kirel a ungil el chais, e ngmekerang a donger?
4 Monger el Oba Delemedemek: Sel lemedung a mekngit el omelekoi el mei er kid, e ngkired el blechoel el onger el oba delemedemek. (Osi. 15:1; Kol. 4:5, 6) E a lsekum e ngdi ungil, e ngsebeched el smodii el mo er ngika el melemalt a rengul el chad er a blai el kmo ngngar er ngii a betok el cheleuid el tekoi el kirir a Resioning er a Jehovah el mla motobed me a lechub e kede oker er ngii el kmo ngera uchul me nguaisei a uldesuel. A medemedemek el nger er kid a sebechel el rullii el mo oumededenger aike el tekoi el bla el renges el kirir a Resioning er a Jehovah, e mo orrenges sel lluut el mo oldingel er ngii a ta er a Sioning. Engdi a lsekum a chad er a blai a kmal kesib a rengul e nglocha ungil a molmesumech er ngii e morael. Ngsebechel el mo ulterekokl a rengud el kmo alta ngkakerous a osengir a rechad el kired engdi a Jehovah a omes er a omesiunged el kmal mekreos.—Isa. 52:7.