Bo “Budech Kemiu ma Rokui el Chad”
1. Ngera el omellach er a Biblia a sebechel el ngosukid sel debetik er a rechad el kesib a rengrir a doldingel er tir?
1 A rechedal a Jehovah a kmal sorir a budech e omerk el kirel. (Isa. 52:7) Engdi a lebebil er a taem, e kede mo metik er a rechad el kesib a rengrir a doldingel er tir. Ngera sebechel el ngosukid me kede melemolem el oba budech er a chelsel a chouaisei el blekeradel?—Rom 12:18.
2. Ngera me ngklou a ultutelel a bo doba sekutaberreng?
2 Doba Sekutaberreng: A rebebil a kesib a rengrir a doldingel er tir e le ngchetirir a klemerang, e a rekuk bebil a checherd a rengrir e le ngkuk bebil el tekoi a uchul. Alta e kede uleldingel er tir er a mekngit el taem me a lechub e ngngar er ngii a mondai er tir. Me alta ngmo kesib a rengul a douchais er ngii a ungil chais, engdi ngkired el melatk el kmo a uchul e nguaisei e le ngii el mla mecheblad er a klsuul el tekoi. (2 Ko. 4:4) A doba sekutaberreng a mo ngosukid el mo chelellakl a rengud e mo medengei el kmo ngdiak el kesib a rengul er kid.—Osi. 19:11.
3. Ngmekerang a dolecholt a omengull el mo er rechad el doldingel er tir?
3 Dolecholt a Omengull: A rebetok el ngar er a basio el doldingel er ngii a ngar er ngii a mesisiich el klaumerang er tir. (2 Ko. 10:4) Me ngar er ngii a llemeltir el melilt el kmo te mo orrenges me a lechub e ngdiak. Ngkmal diak el soad el melekoi a mekngit el kirel a klaumerang er tir me a lechub e derelleterir el mo omdasu el kmo ngkuk klou a klemedengei er kid er tir el kirel a Biblia. Me a lsekum e te olengit er kid el merael, e ngkired el meruul el uaisei.
4. Ngmekerang a dongedecheduch el oba delemedemek?
4 Dongedecheduch el Oba Delemedemek: Me alta rechad a melekoi a mekngit el kired, engdi kede oba delemedemek el mengedecheduch. (Kol. 4:6; 1 Pe. 2:23) Me ngdiak doutoketok er tir e bai melasem el mesaod er a tekoi el de dul kongei er ngii. Alta ngsebeched el mekekokid el oker er ngii el kirel a uchul me ngomtok er kid. Engdi a lebebil er a taem, e ngungil a deterebengii a cheldechedechad me lak demengal ongesechii a rengul a chad.—Osi. 9:7; 17:14.
5. Ngera el klungiaol a mo er ngii sel dolecholt a budech el ngar er a omesiunged?
5 A lsekum e kede oba budech, e a chad er a blai a mo melatk a blekerdeled me ngsebechel el mo orrenges er a kuk ta er a chad sel bo loldingel er ngii. (Rom 12:20, 21) Me alta e ngkmal mesisiich el omtok engdi a ta er a klebesei e ngsebechel el mo odam er kid. (Gal. 1:13, 14) Me a lekengei er a klemerang me a lak, engdi kede mengebkall er a Jehovah me a osisechekled sel dolemolem el oba kllourreng e dolecholt a budech.—2 Ko. 6:3.