Lmuut el Mo Ungil a Duch er Kid el Ngar er a Omesiunged—Mengedecheduch er a Chad er a Blai el Kmal Kesib a Rengul

A Uchul Me Ngklou a Ultutelel: A rebetok el chad el ungil a blekerdelir a sebeched el metik er tir el ngar er a omesiunged. Engdi a Jesus a ulemlaoch el kmo a rebebil er a rechad a mo ouketui er kid. (Jn. 17:14) Me ngdiak el kirel mo rrau a rengud sel bo debetik er a chad el kmal kesib a rengul. Sel bo leuaisei, e ngsoad el mengedecheduch er ngii el ngar er a rolel el odeuir a rengul ngike el domtechei er ngii el Jehovah. (Rom 12:17-21; 1 Pe. 3:15) A doruul el uaisei, e ngmo sebeched el torebengii tia el blekeradel me ngdiak lorael el mo klou. Tiang a dirrek el sebechel el mo uchul a ungil sioning el mo er a chad er a blai me a rechad el omes er kid, el rulleterir el mo sebechir el orrenges er kid sel lluut a rebebil er a Resioning er a Jehovah el mo oldingel er tir.—2 Ko. 6:3.

Rolel a Moruul er Ngii:

Molemolem el olecholt er a chelellakl el reng me a ungil el blekeradel. E le ngmo cholleklii tia el blekeradel. Lak mrellii tia el blekeradel el di mo delongeliu el terung. (Oli. 7:9) Nglocha kesib a rengul e le ngar er ngii a mondai el lechelebangel er ngii me a lechub e ngkau el mle oldingel er ngii er a mekngit el taem. Me alta e ngchecherd a rengul er a klemeched, engdi tia blechoel el uaisei e le ngii el mla remenges a cheleuid el tekoi el kired.—2 Ko. 4:4.
Monger er ngii el ousbech a medemedemek el tekoi e molecholt a klechubechub. (Osi. 15:1) Aikakid a kldei el tekoi el uchul me a chad er a blai a sebechel el mo kesib a rengul er kid el Sioning er a Jehovah. (1) Ngmilechiuaiu e kokisii, me a lechub e ke milengesang er ngii? Me alta ngdiak dolengit a klausubes el kirel a urered, engdi ngsebechem el okiu a klengariourreng e ke olengit a klausubes e le kuleldingel er ngii er a mekngit el taem. (2) Ngkesib a rengul e le ngrirenges a klsuul el tekoi el kired? A leuaisei, e nglocha sebechem el dmu el kmo: “Ngsebechek el mo medengelii a uchul me ngkesib a rengum. Engdi aike el tekoi el mrirenges el kiram a diak el melemalt. Ngdi ungil a bo ksodii?” (3) Ngar er ngii a ultekengel er a ta er a tekoi el doumerang er ngii el uai a omesuld el ngakl me a lechub a tekoi er a rasech? Ngsebechem el dmu el kmo: “Ak medengelii a omolekoi er ngii. A rebebil er a rechad a dirrek el uai a uldesuem. Ngsebechek el ochotii er a Biblia a uchetemel tia el osisechakl?”
A lsekum a chad a kmal checherd a rengul, e nglocha ungil a lak molasem el mengedecheduch er ngii e bai morael. A lsekum e ngolengit me a Resioning er a Jehovah lak lluut el mo omes er ngii, e ngsebechem el meketeklii el mo er ngii el kmo a ongtil a kmal bo motireklii.

Molasem er Tiang er Chelecha el Buil:

Molasem a tekoi el bo molekoi sel bo moldingel er a temel a omengull el telungalek er kau.
Uriul er a bo merek el mengedecheduch er a chad er a blai el kmal mle kesib a rengul, e mosaod er tia el blekeradel el obengkel a kldemem el kmo nglocha kora mle sebechel ua ngerang a omongedecheduch er a chad er a blai el ngar er a ungil el rolel.