Ngmla Ta el Mngar er a Mui el Taem el Omesiou?
1. Ngera el techall a luleldeu a rengrir er ngii a rebetok, e ngera uchul me a rebebil a mlo diak el teloi er tia el ureor?
1 Ngar er aika el mereko el rak, e a rebetok el telael el chad a mla oldeu a rengrir er a techellir el sebechir el ngar er a mui el taem el omesiou el olisechakl e omerk er a ungil el chais. (Rel. 5:42) Engdi a rebebil a mla er ngii a ungil el uchul e te mlo diak el teloi er tia el ureor. Me a lsekum ngmla ta el mngar er a mui el taem el omesiou, e nglocha ungil a omluut el merriter a blekerdelel a klengar er kau el kmo kele bla bo el sebechem el lmuut el mo soiseb er tia el ureor.
2. Ngera uchul me tirke el mla er a mui el taem el omesiou er a ngar er a mong a dirk sebechir el merriter a blekerdelel a klengar er tir er chelecha el taem?
2 Ngsebechel el Mengodech a Blekerdelel a Klengar er Kau: Sel tekoi el mlo uchul me ngmlo diak omngar er a mui el taem el omesiou a locha mla mo diak. El uai tiang, a lsekum e ngmlo diak omngar tia el ureor e le ngmlo diak el sebechem el oldingel el 90 el sikang er a bek el buil, e nglocha mla mo sebechem el lmuut el mo teloi er ngii er chelechang el di mousbech a 70 el sikang. A urerem me a ngerechelem er a telungalek ngdikea el sal betok el uai sera omkot el mo diak mngar er a mui el taem el omesiou? A ta el odos el mlo diak el ngar er a mui el taem el omesiou el secherel a uchul a liluut el mo teloi er tia el ureor er a bo el 89 a rekil. Ngii el mlo diak el bo er a osbitar el kmeed el ta el rak a uchul me ngmelatk el kmo ngmla mo mesisiich el sebechel el lmuut el mo er ngii a techellel el mo teloi er a mui el taem el omesiou!
3. Ngoeak a ngera el rolel e ngsebechir a rechedal a telungalek el kaingeseu me bo el sebechir el ngosuir a ta er tir el mo teloi er a mui el taem el omesiou?
3 Me alta e ngdirkak a ta el mngar er a mui el taem el omesiou, engdi nglocha ngar er ngii a ta er a chedal a telungalek er kau el mlo diak el ngar er tia el ureor e le ngmle kirel el mengetmokl er a ta er a chedal a telungalek, el uai a mla mo chuodel el demal me a lechub e ngdelal. (1 Ti. 5:4, 8) A leuaisei, e nglocha sebechem kau me a lechub a rebebil el ngar er a telungalek er kau el remuul a lmuut el betok el olengeseu er ngike el mlo diak el ngar er a mui el taem el omesiou. Ngungil a omdak el mesaod a tekoi. (Osi. 15:22) Sel sekum a rokui el chedal a telungalek a dmak el kaingeseu me bo el sebechel a ta er a tir el mo ngar er a mui el taem el omesiou, e ngsebechir el ulterekokl a rengrir el medengei el kmo ngmla er ngii a techellir el olengeseu.
4. E kuk mekerang a lsekum e ngdiak a techellem el teloi er a mui el taem el omesiou er chelecha el taem?
4 Lak bo el mechitechut a rengum a lsekum a blekerdelel a klengar er kau a uchul me ngdiak el sebechem el lmuut el mo teloi er a mui el taem el omesiou. Kau el soam el mo teloi er tia el ureor a kmal oldeu er a rengul a Jehovah. (2 Ko. 8:12) Moluluuch el kirel tia el urungulem, e bo mkerekikl er a techall el mo er ngii el sebechem el ngodechii a blekerdelel a klengar er kau. (1 Jn. 5:14) A ngar medad el taem e a Jehovah a locha mo mekengii a klou el “siseball ra ngarngii a klisichel lurreor” me bo el sebechem el lmuut el mo melechesuar a deurreng er a ureor er a mui el taem el omesiou!—1 Ko. 16:9.