Bo Lulterekokl a Rengum el Ousioning er a Blil a Siobai
1. Ngera me ngdiak el kirel el mo mechitechut a rengud a lsekum e ngmeringel er kid el ousioning er a blil a siobai?
1 Ngmeringel er kau el mo ousioning er a blil a siobai? A leuaisei, e lak bo lemechitechut a rengum. A Paulus a uleba blekeu, engdi a lebebil er a taem e ngmle kirel el melisiich er tia el blekengel me bo el sebechel el omerk er a klumech. (1 Th. 2:2) Kede mo mesaod a bebil el omelsemai el bo dechelebangel sel doldingel a siobai me a rolel e kede mo mesisiich er ngii.
2. Ngera me ngdiak debekikl el kmo kede mo mengesang er a rechad er a ureor?
2 Ngmo Seselk a Rengrir a Rechad er a Ureor a Dongesang er Tir? A rebetok el chad el oureor er a siobai a mesiou er a buai me te medengei el kmo a rechad a mo mengesang er tir. Me te blechoel el ungil a blekerdelir e le te omes er kau el ua ta er a okiaksang. Me sel dungil el oubail e lungil a blekerdeled, e te mo ungil el mengedecheduch er kid.
3. Ngera sebeched el rullii me lak bo el seselk a rengrir a rechokiak?
3 Ngak Ngkirek el Mo Melekoi a Cheldechedechak er Mederir a Rebetok el Okiak? A lsebechel, e mngiltii a taem el diak el sal meseked a stoang, el uai sel kot el mengai a chesmerel. Mongiil el mo er sel taem el di bo el ngii el tang a merreder me a lechub a chad er a stoang, er a uchei er a omongedecheduch er ngii. E di mkedebengii a cheldechedecham.
4. Ngera sebeched el melekoi sel dousioning er a blil a siobai?
4 Ngera Kirek el Melekoi? Mongedecheduch er a merreder a lsekum e ngbetok a rechad er a ureor. Ngsebechem el dmu el kmo: “Ngmeringel a debetik er a rechad er a siobai er a blirir, me aki me oldingel er kau er a basio er a urerem. Ak medengei el kmo ke oureor, me ak di mereched.” Ngungil a lak dosaod el kirel a tenget me bo lomdasu el kmo kede olterau a klalo, engdi a lsekum e toker er a rolel a lemeketmokl a urered, e kede mo mesaod er ngii. Me ngdi mo ultuil er a teletelel a siobai el ngar er ngii, e ngsebechem el olengit a kengei er a merreder el mo mengedecheduch er tirke el bebil el chad er a ureor, e momelekl a cheldechedecham el mo er tir. A lsekum a chad a mechesang er a urerel e di mkedebengii a cheldechedecham e bsang a tract. Engdi a lak a techellem el mengedecheduch er a rechad er a ureor, e nglocha sebechem el mechei a babier er aike el basio el lebo er ngii er a temel a ulengellir.
5. Ngera uchul me ngulterekokl a rengud el ousioning er a blil a siobai?
5 Ngsebechem el mo ua Jesus me a Paulus el mle ulterekokl a rengrir el ousioning er a blil a siobai. (Mt. 4:18-21; 9:9; Rel. 17:17) Molengit er a Jehovah me lengesukau el mo chelellakl a rengum e bo moba blekeu. (Rel. 4:29) Ngsebeched el metik er a rechad el ngar er a blil a siobai a uchul me ngungil a dolasem er tia el ta er a bedengel a ureor er a berkel a klumech.