A Ungil el Rolel a Berkel a Klumech er a Rael
1. Ngerang a ta er a rolel e ngsebeched el oukerebai er a Jesus?
1 Ngar er a omesiungel a Jesus el ngar tia el chutem, e ngmle blak a rengul el mengedecheduch er a rechad el lebetik er tir er a rael me a bek el basio el lebo er ngii. (Lk. 9:57-61; Jn. 4:7) Ngkmal mle soal el merkii tia el klou a ultutelel el klumech el mo er a rokui el chad el lebetik er tir. Me chelecha el taem, e a berkel a klumech er a rael a ta er a kot el ungil el rolel e ngsebeched el ngosuterir a rechad el mo nguu a llomeserreng er a Dios. (Osi. 1:20) Ngmo uchul a klungiaol a lsekum e kede melasem el mengedecheduch er a rechad el ousbech er a sekutaberreng.
2. Ngera uchul me ngklou a ultutelel el dolasem el mengedecheduch er a rechad sel domerk er a klumech er a rael?
2 Molasem el Mengedecheduch er a Rechad: Ngkmal ungil a lsekum e kede merael el mo mengedecheduch er a rechad er a bai dolatk el kmo kede dengchokl e mengiil er a rechad el me mengedecheduch er kid. Bo el ungil a klikm er kau sel momes er a chad, e bo el chelellakl a rengum e lungil a omerellem. A lsekum e ke oldingel el obengkel a ta er a chad, e ngungil a bo mongedecheduch er a rekakerous el chad. Ngkirem el melasem el mengedecheduch er tirke el semeriar el blo betik er tir. A lsekum e ngmo er ngii a techellem e molengit er ngii me louchais el kmo ngsebechiu el lmuut el mo kasoues er ker. A rebebil el omerk er a klumech a oldingel er a osisiu el basio, e tiang a mo uchul e ngsebechir el mengedecheduch er a osisiu el chad me bo el sebechir el omekeroul a klemeriarreng er tir.
3. Kede mekerang e mo oba sekutaberreng sel domerk er a klumech er a rael?
3 Moba Sekutaberreng: Moba sekutaberreng sel molilt er a basio er a buai me a dirrek a rechad el mongedecheduch er tir. Ngdiak el belkul a kmo ngkmal kired el mengedecheduch er a rokui el chad el me engelakl er kid. Ngkired el mo ungil el omtab er a rechad. A lsekum a chad a me engelakl el di orreched e ngungil a lak molasem el mengedecheduch er ngii. Me a lsekum ke ngar er a medal a basio er a siobai, e bo mkerekikl me lak bo el uchul a chetituokel el tekoi er a delongelem kau me a merreder er a ureor. Ngbai ungil a omolasem el mengedecheduch er a rechad el mereko er a ureor er a omolasem el mengedecheduch er a rengar er a omerollir el mo oureor. Bo mkerekikl a omongedecheduch er a chad me lak mrellii el mo medakt me a lechub e ngkibetiekl. Ngdirrek el kirel mo tabesul a omerellem sel momesterir a babier. Me a lsekum a chad a diak el semeriar, e ngsebechem el di msang a tract.
4. Ngera uchul me a berkel a klumech er a rael a ta er a bedengel a ureor el mo uchul a klungioled me a deuil a rengud?
4 A berkel a klumech er a rael a dirrek el meskid a klou el techall el mo omriid a tane er a klemerang er a chelsel a kedeb el taem. (Oli. 11:6) A rebebil er a rechad el debetik er tir a locha tirke el meringel el debetik er tir sel doldingel a obliil. Ngera me ngdiak deruul a temed me bo el sebeched el omerk er a klumech er a rael el ngii a ta er a kot el ungil el rolel a berkel a klumech?