Kmal Ungil e Beches el Rolel a Dousioning er a Buai
1. Ngera te mla melisiich er tir el mo meruul aike el ongdibel el ngar aike el basio el betok a rechad el merael er ngii?
1 Aike el ongdibel el ngar er aike el basio el betok a rechad el merael er ngii a lolisiich er tir el mo ousioning er a buai, el ousbech a tebel me a lechub a cart el blechobech a babier er ngii. A lsekum te ousbech a cart el blechobech a babier er ngii, e ngkesengil e ngta el publisher a dechor me a lechub e ngdengchokl er bita er tia el blechobech a babier er ngii. Engdi te teru el publisher a kirir el ngar er a tebel el blechobech a babier er ngii. Tirke el ngar er a bita er aika el blechobech a babier er ngii a kirir el melasem el mo ungil a omerellir, e ungil a klikm er tir, e ungil el outkeu er a rechad. A lsekum a chad a mo blak a rengul el omes er a ta er a babier, e a ta er a publisher a sebechel el mechelii a cheldecheduch, el oeak a ledu el kmo, “Ngmla ta el molatk el kmo ngerang dmung a Biblia el kirel tia el tekoi?” A kuk ta er a publisher me a lechub e te terung a sebechir el ngar bita er tia el blechobech a babier er ngii e omerk a klumech er a ngii di el taem.
2. Mosaod er a tekoi el dilubech el ochotii a klungel a ultutelel a dousioning er a buai el ousbech aike el blechobech a babier er ngii.
2 Tia el rolel a dousioning a mlo uchul e a rebetok el beches el chad a mlo mesuub a Biblia. A ta el ngalek er a college a millilt el mo meluches a research er ngii el kirir a Resioning er a Jehovah, engdi ngdimlak el sebechel el metik er a Blil a Ongdibel. A ongingil el sandei e ngmilsa tebel el blechobech a babier er ngii el ngar er a mekesekesel a skuul. Me ngulemuchel a omesubel a Biblia, e chelechang e ngika el ngalek er a skuul a mla metecholb el publisher e teloi er tia el osisiu el rolel a dousioning.
3. Ngua ngera uldesuir a rebebil el kirel tia el rolel a dousioning er a buai?
3 A ta el odos el uleldeu a rengul er a chouaitia el rolel a dousioning er a buai a dilu el kmo: “A rebebil a mei er aika el blechobech a babier er ngii el mo melai a beches el magazine. A rekuk bebil a dirkak a ta el lerenges el kirir a Resioning er a Jehovah er a uchei. Ngsebechek el mesa el kmo ngokiu tiaikid el rolel, e ngsebeched el mengedecheduch er a rebetok el chad.” A kuk ta er a odos a dilu el kmo, “Tiang a kmal ungil e beches el rolel a dousioning e le rechad a mei er kid, e a lsekum e ngdiak el sal semeriar, e te di mei e le ngsorir el mo medengelkid.”
4. Ngera uchul me nguchul a klungiaol a dongetmokl aika el blechobech a babier er ngii er a osisiu el taem me a basio er a bek el sandei?
4 Ngmo uchul a klungiaol a dongetmokl aika el blechobech a babier er ngii er a osisiu el basio, er a osisiu el sils, me a osisiu el taem er a bek el sandei. Sel doruul el uaisei, e a rechad a mo smau el omes aika el blechobech a babier er ngii e mo diak el merur el me mengedecheduch er kid e oker a ker me a lechub e te melai a babier. A ongdibel er kau ngmla kutmokl a rolel a dousioning er a buai? A leuaisei, e alta e ngsebechem el mo teloi er tia el uchul a deurreng me a klungiaol el rolel a dousioning el “omerk er a Rengedel a Dios.”—Lk. 9:60.