Bo Mungil el Ousbech a Temem Sel Momerk er a Klumech
A Resioning er a Jehovah a milengoit a 1,945,487,604 el sikang el omerk er a klumech er a chelsel a 2014 el rak er a omesiou. Me tiang a meketeklii el kmo ngkmal soad el melemolem el blak a rengud el mesiou er a Jehovah! (Psa. 110:3; 1 Ko. 15:58) Me chelecha el “olekeda ulebongel,” ngsebeched el lmuut el mo ungil el ousbech a temed sel domerk er a klumech?—1 Ko. 7:29.
A lsekum ngsoad el mo ungil el ousbech a temed, e nglocha mo kired el melodech a tekoi el doruul. El ua tiang, a lsekum ngblechoel el mo chuib a ta el sikang e dirkak mongedecheduch er a chad, e ngsebechem el sikii a rolel e ke mo metik er a rechad e mengedecheduch er tir? A bek el beluu a kakerous, engdi aika el tekoi el bo dosaod a locha sebechel el ngosukau el mo ungil el ousbech a temem me lak bo mua chad el “melik el di mengesengsang.”—1 Ko. 9:26.
Sel Doldingel a Obliil: Ngmla mo betok el rak el siukang er kid el soad el oldingel a obliil a letutau. Engdi a rebetok el chad a oureor sel lemellomes, me ngsebechem el mo oldingel a obliil er a telia el sils el mo bedul a kebesesengei el ngii a taem el rebetok a mla me remei me te olengull? Sel letutau el mo sueleb e nglocha bai ungil a dousioning er a tkul a rael me a lechub e ngbasio er a siobai.
Sel Dousioning er a Buai: A tebel me a cart a kirel el ngar er aike el basio er a chelsel a territory el mloterekokl er a ongdibel el betok a rechad el me engelakl er ngii. (Momes er a July 2013 el Omesiunged el Kirel a Renged, er a 5 el llel.) Engdi a lsekum ngdikea lsal betok a rechad el ngar aika el basio, e a Chelechad er a Rudam el Oungerachel er a Berkel a Klumech a sebechir el ngiltii a ta er a basio el ungil el kirel a tebel me a cart, el betok a rechad a me engelakl er ngii.
Sel Deluut el Mo Oldingel er a Rechad me a Omesubel a Biblia: Ngsebechem el lmuut el mo oldingel er tirke el semeriar me a lechub e ke mesuub el obengterir a rechad er sel taem el bebil er a telengtengil a berkel a klumech a diak el sal ungil el merael? El ua tiang, a lsekum te betok a rechad a ngar er a blirir sel moldingel er a tutau er a sebadong, e ngsebechem el bai mesuub el obengterir a rechad a lechodochosong me a lechub a lekebesengei? Me sel mluut el mo oldingel er tirke el semeriar, ngsebechiu el omii er kemiu el di mo mekesai el chad el ngar er a derta el mlai me bo el sebechiu el oldingel er a relmuut el betok el chad?
Me alta ngsebeched el omechur a temed er a ngii di el taem el domerk er a klumech, engdi ngkmal mo dmeu a rengud sel sekum e kede mengedecheduch er a rebetok el chad. Me a lsekum e ngar er ngii a taem el diak el sal ungil el merael a ta er a telengtengil a berkel a klumech, e molasem er a kuk tang. E moluluuch el mo er a Jehovah el ngike el “Rubak er a sim” me lengesukau el mo ungil el ousbech a temem sel momerk er a klumech!—Mt. 9:38.