A Rolel a Dousioning el Ousbech a Tebel me a Cart

A rolel a dousioning el ousbech a cart me a tebel a mla obeketakl el kmal ungil el rolel e kede olechau a rengrir a remelemalt el chad el mo medengelii a klemerang. (Jn. 6:44) Me a remechuodel a muklatk el mo kutmokl a rolel a dousioning er a buai el ngar er aike el basio er a territory er a ongdibel el betok a rechad el mo er ngii. Aike el cart er kid a diak di lengar er a ta el basio. Me a lebebil er a taem e ngsebeched el di mong el diak dolai a kengei er a rulab a dereder. Me te rua techang a sebechir el meruul er tia el ureor? Tirke el publisher el meduch el omtab a tekoi, e ungil a blekerdelir e meduch el mengedecheduch er a rechad. Me aikakid a bebil er a tekoi el sebeched el meruul el ngosukid el mo ungil el kutmeklii tia el ureor.

Aike el sebeched el meruul:

Bo lungil a omerellem e moutkeu er a rechad el me engelakl. A rebebil el publisher a ochotii a ungil klikm er tir e outkeu er a rechad. E a lsekum a chad a engelakl e omes er a tebel e ngsebechir el dmu er ngii el kmo, “A lengar er ngii a soam e mnguu.”
Bo mdechor el ungil a cherridem er a cart. Ngar er a bebil el basio e ngungil a bo dedechor el kmeed er a cart. Engdi a rebebil a mla metik er ngii el kmo sel lekeed er a tebel e ngmo meringel er a rechad el mo stob a uchul me ngkirir el mo telkib el cheroid er a cart e mengiil el mo lmuut er sel taem el chad a mo er a cart. Me sel lebo er a cart a chad e ngsebechir el omuchel el mengedecheduch el oker el kmo, “Ngmla ta el molatk er tia el ker er a uchei?”
Mousbech er a Biblia er a bek el techall.
Mosaod er a rolel a omesubel a Biblia el mo er a chad el nguu a ta er a babilenged el dosuub er ngii el ua Biblia Olisechakl el babier. E mochotii er ngii sel video el Ngera Me Ngkirem el Mesuub er a Biblia? el ngar er a computer me a lechub e ng tablet.
A lebo er ngii a techall e mnguu a ngklel me a address er a chad. Me a lsekum a chad a diak el kiei er a basio el domerk er a klumech er ngii e mketmeklii sel Please Follow Up (S-43) el form e mereched el nguu el msang a melechesel a ongdibel.