Ngerang a Uchul a Deuil a Rengum?
1. Ngerang a uchul a deuil a rengud er a ulebongel er a bek el buil?
1 Ngera el deurreng a dobang sel bo el ulebongel er a buil me bo el kired el kuk meluches a temed? (Gal. 6:4) Alta e kede mesiou el special pioneer el mengoit a 130 el sikang el oldingel me a lechub e kede publisher el mla nguu a kengei el di oldingel el 15 el bung er a ta el buil, engdi kid el rokui a kirel mo dmeu a rengud e le kid el milsiou er a Jehovah el oba rengud el rokir.—Psa. 100:2.
2. Ngera me ngkirel el mo blak a rengud el ngar er a omesiunged el mo er a Jehovah?
2 A Jehovah el ngii a Chimong el Kedidai el Dios er a uldekial a eanged me a chutem, a rredemelel a melai aike el kot el ungil er kid. (Mal. 1:6) A bltkil a rengud el mo er ngii a uchul me kede mla tuib a klengar er kid el mo meruul a soal. Me a lsekum e ngulterekokl a rengud el kmo kede ulemsang a Jehovah a “ikel kot el ungil” el duch er kid, klisiched, me a temed, e ngngar er ngii a ungil el uchul e ngdmeu a rengud. (Osi. 3:9) Me nguaisei engdi, a lsekum kede medengei el kmo ngsebeched el remuul a lmuut el betok el kirel a omesiunged, e ngkired el mo meruul el uaisei.
3. Ngera me ngdiak lungil a domekesiu er kid el mo er a rebebil?
3 “Lak Lomekesiu a Urerel er a Urerel a Kuk Tar a Chad”: Ngdiak lungil a domekesiu er kid er a rebebil me a lechub e domekesiu a klisiched er chelechang me a klisiched er a ngar er a mong. Ngkakerous a blekerdelel a klengar er kid me a duch el dolab, me a domekesiu er kid er a rebebil e ngmo uchul a klaisichai me a lechub e ngrullid el mo omdasu el kmo ngdiak a ultuteled. (Gal. 5:26; 6:4) A Jesus a dimlak lomekesiu a omerellel a ta er a chad el mo er a kuk tang. Ngbai mle chemat er a derta el chad er aike el sebechel el meruul.—Mk. 14:6-9.
4. Ngera el meklou a ultutelel el tekoi a sebeched el suub er a okesiu er a Jesus el kirir a retedei el mesiou?
4 Ngar sel okesiu er a Jesus el kirir a retedei el mesiou, e a rederta el mesiou a ngilai a udoud “el oltirakl er a duch er tir.” (Mt. 25:15) Me sera lluut el mei ngika el mastang, e ngmle soal el mo medengei a chisel a urerir, me ngchilat er tirke el mle blak a rengrir el oureor el oltirakl er a duch er tir me a blekerdelel a klengar er tir me te uleldeu a rengrir el obengkel a mastang er tir. (Mt. 25:21, 23) Me ngdi osisiu, sel demechesang er a ureor er a berkel a klumech er a Renged, e ngsebechel el mo ulterekokl a rengud el kmo kede oba kengei er a Dios e mo er ngii a uchul e ngdmeu a rengud!