Molemolem el Meruul er a Remo Disaiplo
1. Ngera kired el meruul me bo el sebechir a rechad el mo suobel?
1 A report er a odingel er a 2014 a olecholt er a klou el blakerreng er a rechedal a Dios el omerk er a ungil chais er a Renged. (Mt. 24:14) Ngoeak a ureor er a odingel obliil, ileakl el ureor el merous a tract me a invitation, me a dousioning er a buai, e kede mla merkii tia el klumech er a Biblia el mo er a rebetok el chad. Engdi a lsekum e a rechad a mo suobel, e ngkired el olengeseu er tir el mo disaiplo er a Jesus el oeak sel dosuub a Biblia el obengterir.—1 Ti. 2:4.
2. Ngera el ker a sebeched el di kid el oker el mo ngosukid el mo blechoel el kltmokl el mo omuchel a omesubel a Biblia?
2 Bo Blechoel el Kltmokl el Mo Omuchel a Omesubel a Biblia: Sel obetik er a chad el semeriar, e ke melasem el mo medengelii a rolel a momekedong er ngii e mereched el lmuut el mong el omuchel a omesubel a Biblia? Ngoingerang sel ulebongel el taem el kau a millasem el omuchel a omesubel a Biblia sel omkot el mengedecheduch er a chad? Ke mla ta el moker er tirke el oblechoel el momesterir a magazine el kmo ngsorir el mesuub er a Biblia? Ke mla ocholt aike el video el Ngera Me Ngkirem el Mesuub er a Biblia? me a Ngera Duubech er a Omesubel a Biblia? el mo er tirke el omdak el oureor, me a rengar er a skuul, tonari er kau, rechedam, me a rekuk di mkaodengei el chad? Sel mousioning el ousbech a tebel me a cart, e ke ouchais er tirke el melai aike el babier el dousbech el mesuub el kmo ngdirrek el sebechir el mesuub a Biblia el diak locheraol?
3. Ngera el tekoi a usbechall el mo olisechakl a rechad er a klemerang?
3 Ngeso el Dengai er a Jehovah me a Jesus: Sera lomuchel er a tekingel el kmo moruul er a redisaiplo el ousbech er a tekoi el “morael,” e a Jesus a ulechotii a klungel a ultutelel a bo demeringel el oureor e dolecholt a klemeriarreng. Ngdimlak lebechikid me di lekid e ngbai tilbir el di obengked. (Mt. 28:19, 20) A Jehovah a mla meskid a chedaol reng me a dirrek aike el klekedall me a osisechakl el dousbech el mo olisechakl er a rechad a klemerang. (Sek. 4:6; 2 Ko. 4:7) Ngsebeched el meluluuch me lebo er ngii a urunguled me a klisiched el mo teloi er tia el kmal klou a ultutelel el lureor.—Fil. 2:13.
4. Ngera uchul me kede melemolem el meruul er a remo disaiplo?
4 Sel domerk er a ungil chais e ngmeskid a klou el deurreng. Ngmedechel a deurreng er kid sel dengesuir a chad el mo medengelii a klemerang e bo dedak el merael er a “siseball el mor a klengar.” (Mt. 7: 14; 1 Th. 2: 19, 20) Me sel dolemolem el meruul er a remo disaiplo, e kede odeuir a rengul a Jehovah el “diak el soal a ngii di le chad a leriid, e bai soal a rokui el chad a lobult el mo imikr a kngterir.”—2 Pe. 3:9.