Bo Blechoel el Kltmokl el Mo Omuchel a Omesubel a Biblia
1. Ngera uldimukl er a doltaut er sel ngerachel el lebilskid a Jesus el ngar er a Matteus 28:19, 20?
1 A Jesus a milskid a ngerecheled el mo ‘rulleterir ar chad el mo Obengkel . . . , e molisechakl er tir.’ (Mt. 28:19, 20) Me a leuaisei, ngsoad el mo blechoel el kltmokl el omuchel a omesubel a Biblia er a bek el taem, el diak el di el sel Sebadong me a lechub e ng Sandei el mla mengilt el kirel a domuchel a omesubel a Biblia. Aika el ulekrael el beldukl er iou a sebechel el ngosukid.
2. Ngsebeched el omuchel a omesubel a Biblia el obengterir a rua techang?
2 Momuchel a Omesubel a Biblia: Sel deblechoel el omuchel a omesubel a Biblia, e ngklou a techelled el mo mesuub a Biblia el obengkel a chad. (Oli. 11:6) Ke mla ta el molasem el mesuub el obengkel a chad el ketengem el mengedecheduch er ngii? A rechedal a ta el ongdibel el ngar er a Merikel a mle blak a rengrir el meruul er tiang el ta el buil. Ngmera el mlo dmeu a rengrir e le ngmlo sebechir el omuchel el mesuub a Biblia el obengterir a re 42 el beches el chad! Lak momdasu el kmo tirke el semeriar el chad el moldingel er tir a medengei el kmo ngsoam el mesuub a Biblia el obengterir. Sel omluut el mong, e ngera me ngdiak bai momuchel a omesubel a Biblia el obengterir? Ngdi ungilbesul a lak el sorir el mesuub er seikid el taem. Ngsebechem el melemolem el omekeroul er a klemeriarreng er tir. Ke mla ta el moker er a retonari er kau me a rechedam me tirke el mdak el oureor, me a dirrek el mdak el ngar er a skuul a lsekum e ngsorir el mesuub a Biblia el obengkem? Ngdirrek el sebechem el oker er tirke el mosuub a Biblia el obengterir el kmo kele lengar er ngii a resechelirir me a lechub a rechederir el sorir el mesuub a Biblia.
3. Ngera el ungil el dongu a ngar er ngii el sebeched el ousbech el omuchel a omesubel a Biblia, e kede ousbech er ngii er oingerang?
3 A Ungil el Dongu: Ngsebeched el mesuub a Biblia el ousbech er a ungil el dongu el tract el dai er ngii a kmo Kau Ngsoam el Mo Medengelii a Klemerang? Ngsebechem el nguu el mesterir a rechad er a blai el tir a kongei el melai a kuk bebil er a babier me a lechub e ngkuk diak. Ngsebechem el ousbech er ngii sel moldingel a basio er a siobai, me sel moldingel er a tkul a rael, me sel moluches a tengami, me sel mluut el mo oldingel er tirke el semeriar. Ngdirrek el sebechem el mecherei er aike el blai el diak a rechad er ngii. Ngera me ngdiak mobang sel mngar er a olidiuul er a buai? Sel ulebongel el llel a mo telkib el mesaod er a rolel a omesubel a Biblia e mo olecholt er a Doruul el babier.
4. Ngmekerang a dousbech er sel Medengelii a Klemerang el tract el mo omuchel a omesubel a Biblia?
4 A uriul er a omnguu a tract el msa chad, e ngsebechem el ocholt aike el ker el ngar er a medal e oker er ngii el kmo, “Ngera er aika el ker a kmal soam el mo medengelii a nger er ngii?” E sola e mdak el mesa nger er ngii er a chelsel tia el tract, e mchiuii me a lechub e di msodii sel ulebongel el llel el oba tekingem, el ngii a mesaod el kirel a rolel a omesubel a Biblia. Ngdirrek el sebechem el ochotii el kmo ngmo metik er ker a komakai el omesodel tia el suobel er a chelsel a Doruul el babier, e msang tia el babier, e kutmeklii a taem el mluut el mo omes er ngii e molemolem er a omesodel tia el babier.
5. Ngera me ngkired el mo blechoel el kltmokl el mo omuchel a omesubel a Biblia?
5 A basio el doldingel er ngii a dirk ngar er ngii er ngii tirke el oureng el mo mesuub aike el lolisechakl a Biblia. Me sel deblechoel el kltmokl el mo omuchel a omesubel a Biblia el obengterir a rechad, e ngsebechel el mo klou a techelled el mo melechesuar a deurreng el oeak sel dengesuterir a rebebil el mo merael er a rael el mo er a klengar.—Mt. 7:13, 14.