Rolel a Dolechau a Rengrir Tirke el Dolisechakl er Tir
1. Ngerang rirellii er a rengrir tirke el ullerrenges er a osisecheklel a Jesus?
1 A Jesus Kristus a ulechau a rengrir tirke el ullerrenges er ngii. Ngmla er ngii a ta el taem, e ng “kilard” a rengrir a redisaiplo er ngii er a uriul er a lomeketakl a Bades el mo er tir. (Lk. 24:32) A blekongesenges el mo er a Dios a kirel el mera el ngar er a rengud el mei, me kede mekerang a dolechau a rengrir tirke el chad el dolisechakl er tir me bo el sebechir el melodech a tekoi er a chelsel a klengar er tir?—Rom 6:17.
2. Ngmekerang a dolechau a rengrir a rechad el ousbech a delemedemek me a sekutaberreng?
2 Mousbech er a Delemedemek me a Sekutaberreng: Te betok el chad a diak bo loruul a tekoi a lsekum kede di ouchais er tir el kmo ngera melemalt me a chelebirukel el omeruul. Me a di domtok a klaumerang er tir el oeak sel doker er tir a betok el ker a sebechel el mo uchul e kede rulleterir el mo chetirir el orrenges. Me a lsoad el melisiich er a chad, e ngkired el me a kot e mo medengei a uchul me ngoumerang e meruul a tekoi. A ungil ker el doker el mo medengelii a uldesuel a chad a sebechel melisiich er ngii el mo ouchais aike el kmal ngar er a rengul. (Osi. 20:5) E seikid e ngmo sebeched el melilt a tekoi el ngar er a Tekingel a Dios el sebechel mo olechau er a rengul. Sei a uchul me ngklou a ultutelel el kired el mo semeriar er a uldesuel ngii el chad e dirrek el mo oba kllourreng. (Osi. 25:15) Me lak dobes el kmo a rechad a kakerous a rechedir sel lolengeriakl er a omesubir. Me debecherei a chedaol reng er a Jehovah me lomekrael a uldesuir me a omerellir.—Mk. 4:26-29.
3. Ngmekerang a dolengeseu er tirke el dolisechakl er tir el mo omekeroul a ungil el blekeradel?
3 Mngesuterir el Mo Omekeroul a Ungil el Blekeradel: A cheldecheduch er a Biblia el olecholt er a ungilreng me a bltkil a rengul a Jehovah a sebechel el ngosuterir tirke el dolisechakl er tir el mo omekeroul a ungil el blekeradel. Ngsebeched el ousbech a bades el ua Psalm 139:1-4 me a lechub e ng Lukas 12:6, 7 el mo ochotii el kmo a Dios a kmal semeriar er a derta er kid. A rechad sel bo loba dmolech el omereng el saul el kirel a klou el blekokuii er a Jehovah, e a bltkil a rengrir me a blakerreng er tir a dirrek el sebechel el mukeroul. (Rom 5:6-8; 1 Jn. 4:19) Ngdirrek, sel bo lodengei el kmo a omerellir a ngar er ngii a lerellii er a Jehovah, e ngsebechel rulleterir el mo sorir el meruul a betok el tekoi el mo odeuir a rengul e kobkellii a Jehovah.—Psa. 78:40, 41; Osi. 23:15.
4. Ngmekerang a dolecholt a omengull er kid er a ilmeklir a rechad el melilt a tekoi sel domerk er a klumech?
4 A Jehovah a diak el lorrimel er a ngii di el chad el mo olengesenges a llechul. Ngbai olengit er a rechad el mo oltirakl er ngii el oeak sel lolecholt el mo er tir el kmo ngrolel a llomeserreng a loltirakl a ulekrael er ngii. (Isa. 48:17, 18) Kede oukerebai er a Jehovah sel dolisechakl er a rechad el di mo tir el melilt aike el bo loruul. A rechad sel bo lodengei el kmo ngkirir el melodech a blekerdelel a klengar er tir, e seikid e aika el omelodech el bo loruul a klou a lerellii er a chelsel a klengar er tir. (Rom 12:2) Ngdirrek el mo uchul e te mengal mo kmeed er a Jehovah el ngike el merriter a rengrir a rechad.—Osi. 17:3.