MKIEI EL UA KLENGAR ER A REKRISTIANO

Beches el Telengtengil a Miting er a Ongeua el Ureor

Ngomuchel er a January 2018, e a miting er a Ongeua el Ureor a mo uldimukl er ngii a notes er a omesubel a Biblia me a media el mengai er sel study edition er a New World Translation of the Holy Scriptures (nwtsty) el ngar er a Internet, alta ngdirkak lebo er ngii er a omelekingem. Tia ulterekokl el lmuut el mo dochel a klemedengei er kau sel mongetmokl er kau el kirel a miting. E a ngaruchei er ngii, e ngsebechel el rullau el lmuut el mo kmeed er a betik er a rengud el Demad el Jehovah!

NOTES ER A OMESUBEL A BIBLIA

Aika el notes er a omesubel a Biblia a mo dochel a klemedengei er kid el kirel a siukang, me a beluu, me a omelekoi el ngar er a bades er a Biblia.

Mateus 12:20

Llut el mengchat: Tiang a olbidel el ngar er ngii a cheluchul a olib er a chelsel el deblechoel el metik er a blai. Me a llut a uluusbech er a cheluchul a olib lomekard er a olbidel. A tekoi er a Grik el “llut el mengchat” a mesaod el kirel a llut el dirk mengchat alta ngmochu me a lechub e ngmla mo diak a ngeuil e le ngdirk ngar er ngii a bas el medechel. Me a ulaoch er a Isaia 42:3, NW, a milsaod el kirel a klechubechub er a Jesus, el okesiul a kmo, ngdiak bo el bechititerir me bo lak a omeltkir a rengariou a rengrir el chuarm a chelebirukel el omeruul.

Mateus 26:13

Meral: Ngtekoi er a Grik el a·menʹ el mlengai er a tekoi er a Hebru el ʼa·menʹ el belkul a kmo “bo leuaisei.” A Jesus a mle blechoel el ousbech er tia el tekoi er a uchelel a cheldechedechal, ngtelbiil, me a lechub e ngulaoch el melisiich el kmo aike el lolekoi a klemerang e sebeched el loumerang. A usbechel a Jesus er tia el tekoi el “meral” me a lechub e ng amen a kmal ileakl el ngar aike el babier er a klechelid. Sel lomelekl er ngii (a·menʹ a·menʹ), el uaike el ngar er a Ebangkelio er a Johanes e tia el tekingel a Jesus a moiuid el “kmal meral.”—Jn 1:51, BT.

MEDIA

Siasing me a video el olecholt a komakai el tekoi el ngar er a Biblia.

Bethphage, me a Rois er Olib, me a Jerusalem

Tia el kedeb el video a olecholt er a rael er a beluu er a et-Tur el ngii a locha mle beluu er a Bethphage er a ngar er a mong el mo er a Rois er Olib. E a beluu er a Bethania a ngar er a ongos er a Bethphage er sel ngesachel el bedul a ongos er a Rois er Olib. Me a Jesus me a redisaiplo er ngii sel lengar er a Jerusalem e te blechoel el kiei er a Bethania, el chelecha el taem e ngbeluu er a el-ʽAzariyeh (El ʽEizariya ), el tekoi er a Arab el belkul a kmo “Basio er a Lasarus.” A Jesus a ulterekokl el kiliei er a blil a Martha, me a Maria, me a Lasarus. (Mt 21:17; Mk 11:11; Lk 21:37; Jn 11:1) Me a omerollel a Jesus el ngar er a blirir el mo er a Jerusalem, a locha uleak a ua tia el osisiu el rael el ngar er a video. Me sera lengar er a roba el mo ngmasech er a Rois er Olib el mo er a Jerusalem er a Nisan 9, 33 C.E., e a Jesus a locha mla er a Bethphage e merael el mo er a Jerusalem.

Deel el Ngar er a Kotel a Ochil a Chad

Tiang a siasing er a rruul el okesiul a kotel a ochil a chad el deleel er a deel el mle 4.5 el ints (11.5 cm) a klemengetel. Sera 1968 e tirke el mengiis a chutem el kirel a omesubel a siukang er a rechad er a ngar er a mong a miltik er tia el mera el kotel a ochil a chad el deleel er a deel er a diluches er a Jerusalem. A omesuub a kmo ngmlengai er a taem er a omengederederir a rechad er a Rom. Tia ochotii el kmo a rechad el mle okodall a luluusbech a deel el meleel er tir er a teluo el kerrekar. Me tia el deel a locha di uai sel deel el luluusbech er ngii a resoldau er a Rom el meleel er a Jesus Kristus er a teluo el kerrekar. Tia lebiltik er ngii er a baks el rruul er a bad el okedongall el ossuary, e tia mle blil aike el mla mo medirt el chiuesir a rechad. Tia ochotii el kmo a chad el mildeel er a teluo el kerrekar a sebechel el mo medakl.—Mt 27:35.