Momuchel el Mong Me Mrellii a Deleuill er Kau me a Odam er Kau​—Ngmekera Omoruul el Uaisei?

Ka molatk el kmo ke kiei er a Galilea er a taem er a Jesus. Ke ngar er a omerollem el mo er a Jerusalem el mo mengedaol er a Chedaol Sils er a Delidui. Tia el mats a meseked er a rekldemem er a klaumerang el dirrek el mla er a cheroid el mei. E soam el mo melenget el mo er a Jehovah me ke oba kaming e merael el mo er a templo. Me a obo er a templo e ngdirrek el meseked er a rechad el mo melenget a tengetengir. E mocha temem el omsa ngika el kaming el mo er a reprist. E seikid e ke lotkii el kmo a odam er kau, el locha teloi er tia el seked me a lechub e ngar tia el mats, a ngar er ngii a chetil er kau. A Jesus a ouchais er a tekoi el kirem el mo meruul er ngii. (Monguiu er a Mateus 5:24.) Me ke mekerang kau me a odam er kau e rullii a delongeliu el mo ungil el oltirakl a lullekoi a Jesus? Ngar aika el baks er iou, e mngiltii sel melemalt el nger.

NGKIREM EL . . .

• di mengedecheduch er a odam er kau a lsekum e ke omdasu el kmo ngar er ngii a ungil el uchul e ngkesib a rengul

• melasem el omeklemalt er a uldesuel a odam er kau e le ngii el di mereched el metemall a rengul me a lechub e ngdirrek el uchul tia el mondai

• kerekikl el orrenges er a odam er kau el mesaod er a uldesuel, e alta ngdiak mungil medengelii a tekoi el losaod er ngii, engdi ke olengit a klausubes el kirel a mekngit el omerellem

A ODAM ER KAU A KIREL . . .

• louchais er a rechad er a ongdibel el kirel a mekngit el omerellem me bo el sebechir el mesebechakl er ngii

• el oungeroel er kau, e ouchais a bek el mekngit el tekoi el mriruul, e orrimel er kau el mo kongei el kmo ke mlo mekngit

• mesa el kmo, ngousbech a klengariourreng me a blekeu me bo el sebechem el mo mengedecheduch er ngii, e mera el mo ousubes er kau

Me alta omengull er kid er chelecha el sils a diak luldimukl a tenget el charm, engdi ngera ngullisechakl a Jesus el kirel a deleuill er kid me a odam er kid me a omengull el lekengei er ngii a Dios?