Reference el kirel a Subeled er a Miting er a Klengar me a Omesiunged
March 5-11
MEKREOS EL TEKOI EL NGAR ER A BIBLIA | MATEUS 20-21
“A Le Ngar Ngii er Kemiu a Soal el Mo Ngarbab, E Ng Kirel Mo Mesiou er a Rokui el Chad”
nwtsty-E media
Blil a Makit
A bebil el blil a makit el uai tiang el domes er ngii er a siasing, a mle dechor er bita er a rael. A rechad lolterau a klalo a di omechobech a kloklir el tongetengii a rael. Me a rechad er a beluu a mle sebechir el mong e omechar a klalo er a blai, me a bekai, me a meringel a cheral el obebeu el klalo, me a dirrek el rodech me a iasai. Ngdimlak a icebox er seikid el taem me a uchul me a rechad a mlo er a blil a makit er a bek el sils. Ngar tiang e ngsebechir el remenges a chais er a rechad er a ngodech el beluu el tir a mlei el oldingel me a lechub e te mlei el omsaso a kloklir, me a rengalek a dirrek el sebechir el milil, me a rechad el dimlak a urerir a sebechir el osiik a rolel a ureor. Me ngngar er aika el blil a makit e a Jesus a ulemekungil er a resmecher. A Paulus a dirrek el ulemerk a klumech el ngar aika el basio. (Rellir 17:17, BT) Ngkmal mle klou a klekakerous er tir me a remengeteklel a klechelid me a Refarisi el tir a mla er a blil a makit e le ngmle sorir a rechad a leseterir e loutkeu er tir.
nwtsty-E notes er a omesubel a Biblia el kirel a Mt 20:20, 21, BT
derrir ar ngelekel a Zebedeus: Ngdelal a apostol Jakobus me a Johanes. A doltirakl er a babier er a Markus, e a Jakobus me a Johanes a itir a mle sorir el oker er tia el ker e ngdi te uluusbech er a derrir er a Salome el mo olengit er a Jesus. A Salome a locha ta er a Maria el mle delal a Jesus.—Mt 27:55, 56; Mk 15:40, 41; Jn 19:25.
ta bo ldengchokl ra kidekmem, ma ta le bora katrum: Ngar tiang e aika el deruchall a melutk el kirel a odanges me a klisiich. Me nguaisei engdi ngike el blechoel el oba a lmuut el ngarbab el odanges a ngike el ngar er a kadikm.—Psa 110:1; Rel 7:55, 56; Rom 8:34.
nwtsty-E notes er a omesubel a Biblia el kirel a Mt 20:26, 28
mesiou: A Biblia a blechoel el ousbech er a tekoi er a Grik el di·aʹko·nos el melutk el kirel a chad el oba klengariourreng el diak el metom el olengeseu er a rebebil. Tia el tekoi a lousbech er ngii el mesaod er a Kristus (Rom 15:8), me a remesiou el kirel a Kristus (1Ko 3:5-7; Kol 1:23), me a rullengeseu er a remesiou el kirel a Kristus (Fil 1:1; 1Tim 3:8), me a remesiou el sibai er a blai (Jn 2:5, 9) me a remesiou el chad er a kabelment (Rom 13:4).
Morriter er a Tekingel a Dios
nwtsty-E notes er a omesubel a Biblia el kirel a Mt 21:9, BT
Hosanna: Tia el tekoi er a Grik a mlengai er a tekoi er a Hebru el belkul a kmo, “aki kmal olengit me mosobelemam me a lechub “aki meluluuch me mosobelemam.” Ngar tiang el bades e ngnglunguuch el mo er a Dios el kirel a osobel. Me ngsebechel el moiuid el kmo, “aki olengit me beskemam a osobel.” Cherengel a taem e tia el tekoi a blo lousbech er ngii el melutk el kirel a nglunguuch me a odanges. Tia el tekoi er a Hebru a debetik er ngii er a Psa 118:25, el ngii a mle uldimukl er aike el Hallel Psalms el ngii aike el chelitakl el lulengitakl er a taem er a Baskua. Me nguaisei, aika el tekoi a kmal mla er a uldesuir a rechad er a chelsel tiakid el taem. Me a ta er a rolel e a Dios a ulenger er tia el ongit el mo olsobel er a Ngelekel a David a sera lokisii er a kodall. Ngar er a Mt 21:42, e a Jesus a ulemelekl aike el tekoi el ngar er a Psa 118:22, 23 e millekoi el kmo aika el bades a mesaod el kirel a Mesias.
Ngelekel a David: Tia olecholt el kmo a Jesus a ngar er a uldidellel a rsechel a David e dirrek el ochotii a deruchellel el ngike el telbiil el Mesias.
jy-E 244 par. 4-6
Nguluusbech er a Kerrekar el Fig el Olisechakl el kirel a Klaumerang
Ngera uchul me a Jesus a rirellii tia el kerrekar el mo moalech? Ngulechotii a uchul me ngmirruul er tia el tekoi er a ledu el kmo: “Ak meral melekoi er kemiu el kmo chomko kom oumerang el diak louesarech a rengmiu, e ng mo sebechiu el remuul a ikel bla kruul el mor tial kerrekar el fig. E diak di le tiang e le merekong. Ng dirrek el mo sebechiu el melekoi er tial bukl el kmo, ‘Mengukl el mor a daob,’ e ng mong. A lsekum kom oumerang, e a ngii di le ngerang el molengit sel moluluuch cho bo mngai.” (Mateus 21:21, 22) Me nguaisei, a Jesus a liluut el mesaod el kirel a klaumerang el sebechel el ngmukl a bukl.—Mateus 17:20.
Me a Jesus er a lerellii a kerrekar el fig el mo moalech e ngullecholt er a klungel a ultutelel a klaumerang er kid er a Dios. Ngdilu el kmo: “Sel cho moluluuch el olengit a ngerang, e moumerang el kmo kom mla ngmai, e seikid e kom mo ngmai a ikel cho molengit.” (Markus 11:24) Tia kmal klou a ultutelel el suobel el kirir a rokui el rubengkel a Jesus! E lmuut el klou a ultutelel el kirir a rechapostol er ngii e le tir el kmedu el mo chelebangel a meringel el omelsemai. Me nguaisei, ngar ngii a dirrek el sebeched el suubii el kirel sel kerrekar el fig el mlo moalech me a klisichel a klaumerang er kid.
A renged er a Israel a di mle uai a blekerdelel tia el kerrekar el fig. Te mle telbiil el chedal a Dios me ngngar er a ues e te uleltirakl a Llach engdi tia el renged el rokir a dimlak a klaumerang er tir e dimlak el lourodech a ungil rodech. Te ultngeklii a ngelekel a Dios! Me nguaisei, a Jesus a ulechotii a mo duubech el mo er tia el renged el dimlak a klaumerang er tir er sera lerellii tia el kerrekar el fig el mo moalech.
March 12-18
MEKREOS EL TEKOI EL NGAR ER A BIBLIA | MATEUS 22-23
“Molengesenges Aike el Eru el Kot el Ngarbab el Llach”
nwtsty-E notes er a omesubel a Biblia el kirel a Mt 22:37
rengum: Sel lousbech er ngii el ngar er a okesiu, e ngmesaod el kirel aike el ngar a chelsel a chad el me tuobed er a blekerdelel. E sel losaod er ngii el obengkel a “klengar” me a “uldesuem” e ngmesaod el kirel aike el tekoi el lolechesiu a chad, me a urungulel, me a uldesuel. Aike el edei el tekoi (rengum, me a klengar, me a uldesuem) el lousbech a diak el kakeakl me a lechub e le kakerous. A uchul me te omasech el kldei a melisiich er sel rolel e a bltikerreng er kid el mo er a Dios a mecherrungel.
uldesuem: A chad a kirel el ousbech er a uldesuel el mo medengelii a Dios e omekeroul er a bltkil a rengul el mo er Ngii. (Jn 17:3; Rom 12:1) Ngar er a Dut 6:5 e ngousbech er a ‘rengum, me a klengar, me a klisichem.’ Me nguaisei, sel donguiu er a babier er a Mateus e ngousbech er a “uldesuem” el diak lousbech er a “klisichem.” Nglocha ngar er ngii a bebil el uchul me ngkakerous. A kot, a tekoi er a Hebru er a irechar a dimlak a tekingir el “uldesuem,” engdi tia tekoi a mle blechoel el uldimukl er a belkul a tekoi er a Hebru el “rengum.” Tia el tekoi el “rengum” el tekoi er a Hebru a millutk el kirel aike el ngar er a chelsel a rengul a chad, e aika uldimukl er aike el lomdasu, me aike el lolechesiu, me a blekerdelel, me aike el tekoi el oldubech er ngii el mo meruul a tekoi. (Dut 29:4; Psa 26:2; 64:6; momes er a notes er a omesubel a Biblia el kirel a rengum el ngar tia el bades.) Tia e a uchul me ngngar er a Septuagint e te ousbech er a tekoi er a Grik el “uldesuem” el mesaod er a tekoi er a Hebru el “rengum.” (Gen 8:21; 17:17; Osi 2:10; Isa 14:13) A dirrek el ta er a uchul me a Mateus er a lomelekl a tekoi el ngar er a bades Dut 6:5 e nguluusbech er a tekoi el “uldesuem” e le tekoi er a Hebru el “klisichem” a sebechel melutk el kirel a klisichel a bedengel a chad me a lechub e ngklisichel a uldesuel. Me alta ngdiak dodengelii sel uchul me te ousbech er a tekoi el “uldesuem” engdi kede medengei el kmo aike el tekoi a osisiu a belkul a uchul me a remilluches a ebangkelio a dimlak el lousbech er a osisiu el tekoi el ngar er a babier er a Duteronomi.
nwtsty-E notes er a omesubel a Biblia el kirel a Mt 22:39
E a ongerul: Ngar er a Mt 22:37, e a Jesus a di mle bleketakl el onger er a keril ngike el Farisi, me nguaisei ngdirrek el dilechii a ongeru el llach (Lev 19:18), e ulisechakl el kmo aika el eru el llach a dmak el oureor e churrengelii a Llach el rokir me aike lulisechakl a re Profet.—Mt 22:40.
ngar bitar kau: Tiang el tekoi er a Grik a diak di losaod er a retonari er kid. Ngsebechel melutk el kirel a ngii di el chad el ngii a mei er a bita er kid.—Lk 10:29-37; Rom 13:8-10.
nwtsty-E notes er a omesubel a Biblia el kirel a Mt 22:40
a Llach . . . a re profet: “A Llach” a melutk el kirel a babier er a Genesis el mo er a Duteronomi. E a “re profet” a melutk el kirel aike el babier er a ulaoch el ngar er aike el bades el tekoi er a Hebru. Me nguaisei engdi sel ledak el mesaod el terung e ngmelutk el kirel aike el rokui el bades el tekoi er a Hebru.—Mt 7:12; 22:40; Lk 16:16.
ultuil: A tekoi er a Grik el lousbech er ngii a belkul a kmo “el ultuil er ngii; mengai a uchetemel er ngii.” Me a Jesus a ulechotii el kmo aike el rokui el bades er a Hebru a mengai a uchetemel er a bltikerreng el diak el di ike el Teruich el Llach.—Rom 13:9.
Morriter er a Tekingel a Dios
nwtsty-E notes er a omesubel a Biblia el kirel a Mt 22:21, BT
kloklel a kaiser le bora kaiser: Aika el tekingel a Jesus me aike el osisiu el tekingel el ngar er a Mk 12:17 me a Lk 20:25, a di chimo el omesodel el kirel a merreder er a Rom. Me a “kloklel a kaiser” a uldimukl er aike el tekoi el kired el mengkad el mo er a kabelment me a dirrek el mo mengull e olengesenges er tir a lsekum e ngdiak lolemall a llechul a Dios el ngar er a Biblia.—Rom 13:1-7.
kloklel a Dios le bora Dios: Aika uldimukl er a cherrungel el omengull er kid, me a cherrungel el bltikerreng er kid, me a dirrek el cherrungel el blekongesenges er kid el mo er a Dios.—Mt 4:10; 22:37, 38; Rel 5:29; Rom 14:8.
nwtsty-E notes er a omesubel a Biblia el kirel a Mt 23:24
Kom omiich er a chimol eaes a le ngar a imeliu, e bai omerekakl er a kiamo: A eaes me a kiamo a kot el kekerei me a kot el klou el bedengel a charm el rechad er a Israel a mle medengei el kmo ngdiak el klikiid. (Lev 11:4, 21-24) Me a mle belkul a tekingel a Jesus a kmo, te kmal mle kerekikl el otirakl llach e chemoit aike el meklou a belkul el tekoi el ngii aike el omellach. Me ngar er a osengir a rechad e te kmal kerekikl a llach el ngii a uai a lomiich a eaes er a imelir e chemoit aike el lmuut el meklou a ultutelel el tekoi el ngii a omellach, el ngii el blekeradel el Jesus a ulemekesiu er ngii er a omerekakl a kiamo.
March 19-25
MEKREOS EL TEKOI EL NGAR ER A BIBLIA | MATEUS 24
“Molemolem el Klekar er a Tekoi er a Klereng er a Taem er a Uriul Sils”
it-2-E 279 par. 6
Bltikerreng
Ngsebechel a Bltikerreng er a Chad el Mo Mekelekolt. A Jesus er a louchais er a redisaiplo er ngii el kirel a tekoi el mo duubech er a ngar medad e ngdilu el kmo, a bltikerreng (a·gaʹpe) er a rebetok el chad el tir a melekoi el kmo te oumerang er a Dios a mo mekelekolt. (Mt 24:3, 12) A apostol Paulus a dirrek el dilu el kmo a ta er a olengchelel a taem er a uriul sils a rechad a mo “betik a rengrir er a udoud.” (2Ti 3:1, 2, NW) Me ngsebeched el mesa el kmo a chad a sebechel el mo diak el melemalt a uldesuel e mo oridii sel mera el rolel a bltikerreng el lulebang er a uchei. Tia ochotii a klungel a ultutelel a dolemolem el olecholt er a mera el rolel a bltikerreng e dolisiich er ngii el oeak a dmolech el omelebedebeked er a Tekingel a Dios e dolodech er a klengar er kid el mo oltirakl a omellach er Ngii.—Efe 4:15, 22-24.
Kau Ke Oltaut er a Cherrungel el Ngerechelem el Mo er a Dios?
5 A Jesus Kristus a millekoi el kirel a orechudel el taem er kid el kmo: “Le be ldum a Ngelekel a chad e ngua sel taem ra Noah. Er ser uche ra le me eeleb e te mlenga e melim, e mo bechiil e melibuk a chebechiil, el mo lmuut er sel sils ra bocha lsiseb ra Arhe a Noah, e sola e dimlak lolechesiu el mo lmuut er sera le me eeleb el okngemedeterir el rokui, ma le me Ngelekel a chad e ngdirrek el uaisei.” (Matteus 24:37-39) A letabesul a omeruul, e ngdiak lemekngit a omengang me a omelim, me a chebechiil a lekiltmeklii a Dios. (Genesis 2:20-24) Ngdi a lsekum a osenged er aike el doruul er a bek el sils a mo ua lekot el klou a ultutelel er kid, e ngera me ngdiak mlia er a nglunguchem? A Jehovah a sebechel el ngosukid el mo osiik er a Renged el mo kot, e meruul a melemalt el tekoi, e mo oltaut a ngerecheled er ngii.—Matteus 6:33; Rom 12:12; 2 Korinth 13:7.
jy-E 259 par. 5
A Rechapostol a Oker er a Mo Olangch
A Jesus a dilu er a redisaiplo er ngii el kmo ngkirir di mekar e melemolem el klekar e kltmokl. Ngdirrek el dilu el kmo: “A oublai er a blai a lodengelii a le mer ngii a merechorech, e kom medengei el kmo ng di mo mekar e diak le bechere blil me le metemall er a re merechorech. Isei e kemiu me ng dirrek el kiriu el di mo kldmokl, ele Ngelekel a Chad a mei er sel kmal diak momdasu el kmo ng mei er ngii.”—Mateus 24:43, 44.
Morriter er a Tekingel a Dios
nwtsty-E notes er a omesubel a Biblia el kirel a Mt 24:8
ringel er a rengelel a cheroll: A mondai me a ringel el lulemlaoch el kmo ngmo duubech er a temel a kloul ringel el losaod er ngii a Mt 24:21 a di uai a rengelel a cheroll el ngii a medmekudm e a cherengel a taem e a ringelel a di merael el mo mesisiich.
nwtsty-E notes er a omesubel a Biblia el kirel a Mt 24:20
blsechel a kerrasem: Ngmle meringel er a rechad a omais a beluu e metik a kall me a basio el bo el bad er ngii e le ngkmal klou a chull, me a oiu, me a kelekolt er a blsechel a taem er a kerrasem.—Esr 10:9, 13.
ng Ulengull el Sils: Ngar er aike el beluu el uai a Judea e ngmle meringel er a rechad a ngar er a kemanget el omerael e dirrek el cheltekill a telechull e le ngmle mekull er a temel a Ulengull el sils. Ngdirrek a siseball er a beluu a mle chelsimer er a temel a Ulengull el Sils.—Momes er a Rellir 1:12 me a App. B12.
March 26–April 1
MEKREOS EL TEKOI EL NGAR ER A BIBLIA | MATEUS 25
“Mongkar”
Morriter er a Tekingel a Dios
Bo Leblak a Rengud el Olengeseu er a Rudam er a Kristus
7 Me chelecha el sils e kede ungil el medengelii a belkul a okesiu er a sib me a kaming. Kede medengei el kmo a “Ngelekel a Chad” me a lechub e ng “King” a melutk el kirel a Jesus. Me a “odam” er a King a melutk er a rengellitel el Kristiano, el tir a mo mengedereder el obengkel a Jesus el ngar er a eanged. (Rom 8:16, 17) A “sib” me a “kaming” a melutk el kirir a rechad er a bek el beluu. Te mo mukerrekeriil er a mo bedul a ulebongel er a kloul ringel, el ngii a di kmedung el mo omuchel. Kede dirrek el medengei el kmo, a Jesus a mo oukerrekeriil er a rechad el ultuil er a omerellir el mo er a rengellitel el dirk ngar er a chutem. Me kede oba klou el omereng el saul e le Jehovah a mla meketeklii a belkul tia el okesiu me aike el bebil er a okesiu el debetik er a 24 me a 25 el bliongel er a Mateus!
w09 10/1 22 par. 16-18
Kemiu a Sechelik
16 Ke mekerang e ochotii a ungil el deluill er kau me a rudam er a Kristus a lsekum ke oba omelatk el mo kiei er tia el chutem, el chederedall er a Rengedel a Dios? Me bo dosaod a edei el rolel. A kot, e ngkired el teloi er a ureor er a berkel a klumech el oba rengud el rokir. A Kristus a uleldurech er a rudam er ngii el mo omerk er a ungil el chais er a beluulechad el rokir. (Matteus 24:14) Me nguaisei, tirke el odam er a Kristus el dirk ngar er tia el chutem er a chelechang, a ousbech a ngeso er a rekldemir el ngodech el sib, me bo el sebechir el churrengelii tia el ureor. Me a bek el taem el bo el teloi er tia el ureor er a berkel a klumech tirke el chedal a ngodech el sib, e te olengeseu er a rudam er a Kristus el kutmeklii tia el mekreos el ureor. Me a blak a rengul e mellomes a rengul el mesiou me a dirrek el Kristus, a kmal oba omereng el saul el kirel tia el ungil el deluill.
17 A ongeru el rolel e ngmo sebechir tirke el ngodech el sib el olengeseu er a rudam er a Kristus, a oeak sel lousbech a ududir el olengeseu er tia el ureor er a berkel a klumech. A Jesus a millisiich er a rulebengkel el mo omak a klausechelei er tir el ousbech a “kerruul” er tir. (Lukas 16:9) Tiang a diak el belkul a kmo kede omechar er a klausechelei er kid el obengkel a Jesus me a lechub e ng Jehovah. Ngbai belkul a kmo, sel dousbech aike el ngar er ngii er kid el olengeseu a tekoi er a Rengedel a Jehovah me a urerel a ongdibel el ngar er tia el chutem, e kede ochotii el kmo, a klausechelei me a bltkil a rengud a diak di loeak a omelekinged, e ngdirrek el oeak a “chomeruul ma klemerang.” (1 Johanes 3:16-18) Ngsebeched el olengeseu sel dousbech aike el ngar er ngii er kid el kirel a ureor er a berkel a klumech, e dolenget a ududed el olengeseu a ureor er a okedecherul me a oketmeklel a blil a omengull, e dirrek el melenget a udoud el kirel a ureor er a berkel a klumech er a beluulechad el rokir. A Jehovah me a Jesus a kmal oba omereng el saul el kirel a meklou me a mekekerei el tengetenged el mla er a rengud el mo er tir.—2 Korinth 9:7.
18 A ongedei el rolel e kede ochotii el kmo kede sechelil a Kristus, a sel dolengesenges a ulekrael er a remechuodel er a ongdibel. Tirka el odam a miltutk er a Kristus el okiu a chedaol el reng er a Dios. (Efesus 5:23) A apostol el Paulus a milluches el kmo: “Mngesenges a ikel lolekoi ar mengetekliu e moltirakl.” (Hebru 13:17) A lebebil er a taem, e ngmo meringel er kid el oltirakl a ulekrael er a Biblia el omeskid a remechuodel er a ongdibel. Tiang a sebechel el mo uchul e kede omes a tekoi el ngar er a cheleuid el rolel e le kid el medengei a chelitecheterir. Me nguaisei, engdi a Kristus el Bdelul a ongdibel a kmal dmeu a rengul el ousbech er tirka el diak el mecherrungel el chad. Me a leuaisei, e a blekongesenges er kid el kirel a deruchellir a ochotii a ungil el klausechelei er kid el obengkel a Kristus. Me sel doba deurreng el oltirakl a ulekrael er a remechuodel e lak el biusech a medad er a kngterir, e tiang a olechotel a bltkil a rengud el mo er a Kristus.