Reference el kirel a Subeled er a Miting er a Klengar me a Omesiunged
February 3-9
MEKREOS EL TEKOI EL NGAR ER A BIBLIA | GENESIS 12-14
“A Telbiil el Ngar Ngii a Lerellii er Kau”
it-1-E 522 par. 4
Telbiil
Telbiil el Obengkel a Abraham. Tia el telbiil el obengkel a Abraham a mlo oureor er sel taem a Abram (Abraham) a mlo imuul er a Eufrates el mora Kanaan. A Llach er a telbiil a mleketmokl er a 430 el rak er uriul. (Gal 3:17) A Jehovah a milengedecheduch er a Abraham er a lekiei er a beluu er a Ur el belurir er a rechad Kaldea el kmo, morael el mo er sel beluu el Ngak a mo ochotii er kau. (Rel 7:2, 3; Gen 11:31; 12:1-3) Me a Exodus 12:40, 41 (LXX) ouchais er kid el kmo a ulebongel er aike el 430 el rak el lekiei er a Ekipten me a beluu er a Kanaan, “isel sils” e a Israel el ngii a mle sibai er a Ekipten a tilobed er ngii el beluu. Tia el sils er a lemengubet er a Ekipten a mle Nisan 14, 1513 B.C.E., el sils er a Baskua. (Exo 12:2, 6, 7) Me tia belkul a kmo a Abraham a mlo imuul er a omoachel er a Eufrates el mora Kanaan er a Nisan 14, 1943 B.C.E., el ngii sel taem el telbilel a Jehovah el mora Abraham a mlo oureor. Me a Jehovah er a longedecheduch er a Abraham er a lengar er a Sikem er a beluu er a Kanaan e ngliluut el dochelir a telbiil el obengkel el kmo, “Tiakid a beluu el sel bo kumesterir a ruldidellel a rsechem,” e ulechotii el kmo tia el telbiil a ngar ngii a rellii er sel telbilel a Dios er a Sers er a Eden e ochotii el kmo ngika el “ruldidellel a rasech” a mo chad e mei er a chutem. (Gen 12:4-7) A bebil er a olechotel er a Jehovah el luluuchais er a uriul, a debetik er a Genesis 13:14-17; 15:18; 17:2-8, 19; 22:15-18.
w89-E 7/1 3 par. 4
Ngera Uchul Me Ngkirem el Mo Medengelii a Klemerang el Kirel a Abraham
A Dios a liluut el melekoi er tia el kmal klou el telbiil el mora Abraham er a chelsel a eru el kakerous el taem. (Genesis 18:18; 22:18) Me a Dios a bo loltaut er tia el telbiil e ngdirrek el mo olekiis er tirke el telungalek el tir a mla mad. A klengar el bo lenguu tirka el mo mekiis a klengeltengat e le te mo mekiis el mo kiei er tia el chutem el ngar er a Baradis el ngii a ririid er a kot el uchul. E seikid e te mosisechakl el kmo te mekerang e nguu a klengeltengat el mo kiei el diak a ulebengelel.—Genesis 2:8, 9, 15-17; 3:17-23.
it-2-E 213 par. 3
Llach
Me a doltirakl olechotel er a reksi, e a rebebil er a mesuub a tekoi a oumera el kmo sel loliuid a chutem e ngike el momechar tia el chutem a mo dechor sel basio el sebechel mesa tia el chutem el rokir me aike el oliochel er ngii. Me ngika el momechar a chutem sel ledu el kmo, “Ak mesang,” e ngbelkul a kmo ngkongei er tia el tekoi. Me a Jehovah er a letibir el mora Abraham el kmo momsa beluu er a Kanaan e ngdilu er ngii el kmo bo mungil merkii osengem er a bek el uchul a eolt. A Abraham a dimlak ledu el kmo “Ak mesang,” e le nglocha ngii el uchul a Dios a dilu el kmo ngmo omsa Beluu er a Nglat el mora ruldidellel a rsechel er a uriul. (Gen 13:14, 15) Me a Moses el ngike el ulemtechei er a rechad er a Israel a ledilu er ngii el mo “omes” er a beluu, e a doltirakl er a omeruul el dulsaod er ngii, e ngbelkul a kmo a beluu a mo moiuid el mora Israel el bo lolai er ngii loltirakl er a ulekrael er a Josua. (Dut 3:27, 28; 34:4; dirrek el momes er a ongit er a Satan el mora Jesus el ngar er a Mt 4:8.) A ta er a osisiu el blekeradel a sel losarech er a beluu me a lechub e lesiseb er ngii el mo melai er ngii. (Gen 13:17; 28:13) Ngar a bebil el chuodel el babier e ngouchais a idisel a kerrekar el ngar er a chutem el lolterau er ngii.—Momekesiu er a Gen 23:17, 18.
Morriter er a Tekingel a Dios
Moba Bltikerreng el Meruul a Budech
A Biblia a meskid a ungil el kerebai er a rolel a dosmechokl a chetituokel el tekoi el mo er ngii er a delongeled kid a remesiungel a Dios. A Abraham me a Lot el ngelekel a odam er ngii a di dul mle betok a chermir el sib. Me a remengkerengel a chermir a mlo kautoketok e le te di mle ketitech er a telkib el basio. A Abraham a mle soal el meruul a budech, me ngkilengei er a Lot me lengiltii sel soal el chutem. (Gen. 13:1, 2, 5-9) Me tiang a kmal ungil el kerebai el kired! Me a ker a kmo, a Abraham ngmlo chebuul e le ngmilsa Lot a kot el ungil el chutem? Ngkmal dimlak. Sera bo lekebii, e a Jehovah a tilbir el mo er a Abraham el kmo ngmo msa betok el klengeltengat. (Gen. 13:14-17) Me ngera kede suubii er tiang? A lsekum ngsoad el oba bltikerreng el meruul a budech e nglocha mo kired el chemoit a bebil el soad el tekoi, engdi a doruul el uaisei e a Jehovah a ulterekokl el mo omekngeltengat er kid.
it-2-E 683 par. 1
Prist
A Melkisedek el King er a Salem a mle mengasireng el prist (ko·henʹ). A Biblia a diak louchais er a ruldidellel a rsechel me a cherellel me a lechub a kodellel. A kleprist er ngii a dimlak loeak a uldidellel a rasech, e dimlak a oeak uchei me a lechub a oeak uriul er ngii. Me ngika milsiou el king e prist. A kleprist er ngii a mle ngarbab er a kleprist er a Levi e le Levi a uai ble lullecha ongeltacher el mora Melkisedek le ngmle ruldidellel a rsechel a Abraham, e a Abraham a millecha er a ongeltacher el mora Melkisedek e mlukngeltengat er ngii. (Gen 14:18-20; Heb 7:4-10) Me ngoeak aika el tekoi e a Melkisedek a mle chungel a Jesus el ngike el “prist el mo cherechar el oltirakl er a deruchellel a Melkisedek.”—Heb 7:17.
February 10-16
MEKREOS EL TEKOI EL NGAR ER A BIBLIA | GENESIS 15-17
“A Jehovah a Liluut Lomngakl er a Abram me a Sarai—E Ngera Uchul?”
it-1-E 817
Urrebet er a Klengit
Nguaisei, a omerellir a rechad a di ngar ngii a kngtil. A klengit me a tellemall a dikesir a rechad el mla er a Adam. (Rom 5:12; Psa 51:5) Engdi a Jehovah el ngii a diak a kngtil a “medengei el kmo kede rruul er a ngerang; ng melatk el kmo kid a di chebechab” e chubechubechad. (Psa 103:13, 14) Ngulemes er a blak a rengul e bekongesenges el Noah el “dimlak a telemellel e di mle ngii el tang a ungil chad er sel taem.” (Gen 6:9) Ngdilu er a Abraham el kmo, “Molengesenges er ngak er a klemengetel a klengar er kau e bo lak a terchedem.” (Gen 17:1) Me alta tirka el teru a dimlak lemecherrungel e dirrek el mla mad, engdi a Jehovah el ngii a “omes er a rengul a chad” a ulemes er tir el dimlak a telemellir. (1Sa 16:7; momekesiu er a 2Ki 20:3; 2Kr 16:9.) Ngmilengelechel er a rechad er a Israel el kmo: “Ngkiriu el mo diak a telemelliu er medal a Jehovah el Dios er kemiu.” (Dut 18:13, NW; 2Sa 22:24) Ngtilengetengii a ngelekel el sechal el ngii a dimlak a telemellel (Heb 7:26) el olubet el tenget, e oeak tiakid el tenget e ngsebechel omekedong er tirke el olecholt er a klaumerang e bekongesenges el “melemalt” me a lechub e ngdiak a telemellir e a osisiu el taem e a Jehovah a dirk melemalt el diak a telemellel el Chad er a Kerrekeriil.—Rom 3:25, 26.
it-1-E 31 par. 1
Abraham
Ngmlo chuib a taem. Ngmlo teruich el rak el lengar er a Kanaan e a Sara a dirk kebai. Me ngullengit me lebo er ngii a ngelekel el loeak a sibai er ngii el redil er a Ekipten el Hagar. Me a Abraham a kilengei. Me ngar er a rak er a 1932 B.C.E., e a Abraham a 86 a rekil e a Ismael a mechell. (Gen 16:3, 15, 16) Ngliluut el engelakl a klou el taem. Ngmlo rak er a 1919 B.C.E., el Abraham a mlo 99 a rekil e a Jehovah a dilu el kmo, a rokui el sechal er a telungalek er a Abraham bo lobotk el olechotel a ileakl el telbiil el deleuill er ngii me a Abraham. A osisiu el taem e a Jehovah ngildechii a ngklel a Abram el mo Abraham “ele kmo rullau el mo uchelel a betok el beluu.” (Gen 17:5, 9-27; Rom 4:11) Me ngdi mle mereched el taem er uriul, e a Abraham a mlo omtechakl er a tedei el anghel el bedul a Jehovah, e tir a tibir el mo er ngii el kmo a Sara a mo dioll e mechellii a ngalek el sechal er chelecha el mei er rak!—Gen 18:1-15.
w09-E 2/1 13
Ngera Belkul a Ngakl?
A Dios a ngilodech a ngklir a bebil chad el kirel a ulochel. El uai tiang, ngildechii a ngklel a Abram el belkul a kmo “A Chedam a Ngarbab” el mo Abraham el belkul a kmo “Demerir a Rebetok.” Ngtilaut el ua loltirakl a belkul a ngklel me a Abraham a mlo demerir a betok el renged. (Genesis 17:5, 6) Dirrek el molatk er a bechil a Abraham er a Sarai el locha belkul a ngklel a “uchul a mondai.” Nglocha kmal mlo ungil a rengul er a Dios a lengedechii a ngklel el mo “Sara” el belkul a kmo “Ngelekel a King el Redil” el belkul a kmo ngmo ruldidellel a rsechir a reking.—Genesis 17:15, 16.
Morriter er a Tekingel a Dios
it-1-E 460-461
Blechobech
A Jehovah a dilu er a Abram (Abraham) el kmo: “A ruldidellel a rsechem a di mo blengedakl el ngar a ngodech el beluu; te mo sibai e mo omengedakl el ngar isei el 400 el rak.” (Gen 15:13; dirrek el momes er a Rel 7:6, 7.) Aika el tekoi a mildung er a uchei er a lemechell a ‘uldidellel a rasech’ el Isak. Ngar er a rak er a 1932 B.C.E. e ngmilechell a Ismael el ngelekel a Abram er a sibai er a Ekipten el Hagar, e a rak er a 1918 B.C.E. e ngmilechell a Isak. (Gen 16:16; 21:5) A domechur er a taem er a letobed a rechad er a Israel er a Ekipten el ngii sel a ulebengelel a taem er a omengedakl me a omengarm (Gen 15:14), el bedul uriul el mora taem er a Abram e kede mora rak er a 1913 B.C.E., el sel taem el Isak a locha mle bekord el eim a rekil. Ngar tiakid el taem e a Isak a mla mechib er a tut e kiei er a “ngodech el beluu” el diak le belual e ngulemuchel a taem er a ulekcharm, er sel taem e a 19 a rekil Ismael a “ulemekako” er a Isak. (Gen 21:8, 9, NW) Tia mle oberaod el tekoi er a taem er a irechar alta e ngdiak a domes er ngii el uaisei er chelecha el taem er kid. Ngsebeched el mesa berredel er a blekerdelel a Sara me a dirrek el Dios el kilengei er a ongtil el kmo a Hagar me a ngelekel er a Ismael lorael el mo er cheroid. (Gen 21:10-13) Me tia el tekoi el llechukl er a Biblia e komakai omesodel a dirrek el melutk el kmo tia mle uchelel a ulaoch er a 400 el rak er a omengedakl el ngii a mlo merek er a letobed er a beluu er a Ekipten.—Gal 4:29.
it-1-E 778 par. 4
Tebadel
“Mor ngii eual cheroll.” Molatk el kmo a Jehovah dilu er a Abraham el kmo ngar ongeua el telecheroll e a ruldidellel a rsechel a lmuut el mora beluu er a Kanaan. (Gen 15:16) Ngar er a chelsel aike el 430 el rak, el ulemuchel er sel taem er a lemeketmokl a telbilel a Dios el mora Abraham el mo er sel taem er a letobed er a beluu er a Ekipten a rechad er a Israel e te mle betok er a eua el telecheroll, alta ngmle kemanget a klengar er a rechad er seikid el taem el ua ochotel er a chedaol llechukl. Me nguaisei engdi a rechad er a Israel a di mle 215 el rak el lengar er a Ekipten. Me tia el ‘eua el telecheroll’ a otirakl er sel taem er a lesiseb er a Ekipten e sebeched el omechur er ngii el uai tiang, chimo el kebliil er a rechad er a Israel klebliil er a Levi: (1) Levi, (2) Kohath, (3) Amram, me a (4) Moses.—Exo 6:16, 18, 20.
February 17-23
MEKREOS EL TEKOI EL NGAR ER A BIBLIA | GENESIS 18-19
“‘Ngikel Oukerrekeriil er a Beluulchad’ a Tilemellii a Sodom me a Gomora”
Ngike el Oukerrekeriil er a Beluulechad a Blechoel el Meruul a Llemalt
“NGIKEL oukerrekeriil er a beluulchad el rokir a kirel meruul a llemalt.” (Genesis 18:25) A blak a rengul el Abraham a uleker er a ker el dimlak lebelkul a kmo ngmle telkib el rrau a rengul. A keril a bai ulechotii el kmo ngmle ulterekokl a rengul el kmo a Jehovah a mo oukerrekeriil er a beluu er a Sodom me a Gomora el ngar er a melemalt e tabesul el rolel. Ngmle ulterekokl a rengul el kmo a Jehovah a kmal diak el sebechel el omals er a remelemalt el ua redengerenger. Ngkmal dimlak leuaisei a uldesuel a Abraham. E a uriul e a Jehovah a dilu el kmo Ngii el “RUBAK a mesisiich el osebechekliu, ng cherrungel e melemalt el ngar a rokui el rolel. A Dios er kemiu a blak a rengul e merang, ng meruul a llemalt ma ungil.”—Duteronomi 31:19; 32:4.
A Kllourreng—Kede Outekangel e Le Ngar Ngii a Omeltked
A Jehovah a ochotii a kot el ungil el kerebai el kirel a kllourreng. (2 Petrus 3:15) Ngar er a Biblia e kede blechoel el menguiu el kirel a kllourreng er a Jehovah. (Nehemia 9:30; Isaia 30:18) Me kede dirk medengelii a mle blekerdelel a Jehovah er sel taem el Abraham a uleker er ngii a bebil el ker el kirel a uldesuel el mo olekngemed er a Sodom? A Jehovah a dimlak loleb er a Abraham e ngbai ullecholt er a kllourreng er a lorrenges a bek el keril me aike el uchul a sebekreng er ngii. Me seikid e a Jehovah a ulechotii el kmo ngrirenges a tekingel a Abraham, e ulterekeklii el kmo ngdiak bo lolekngemed er a Sodom alta ngdi mle teruich el melemalt el chad a kiei er ngii el beluu. (Genesis 18:22-33) A Jehovah a mle blechoel lorrenges el oba kllourreng e dimlak bo leseselk a rengul!
A Jehovah a Kmal Ngarbab el Dios er Kid!
Ngkmal sebechel el mo ulterekokl a rengud el kmo a Jehovah a di kmedung e ngmo otutii a omengederederel, e le ngdiak el kengei me lolemolem a mekngit, e kid a dirrek el medengei el kmo kede kiei er a taem er a ulebongel. A Jehovah a di mle mereched el okngemedeterir a remekngit el chad er a taem er a Ieleb. Ngdirrek el mle mereched el okngemedii a Sodom me a Gomora me a Farao me a resoldau er ngii. A Sisera me a resoldau er ngii me a Senakerib me a urrurt er ngii el chad er a Asiria, me ngkmal dimlak el sebechir el mo mesisiich er a mekemedil ngike el Imong el Kedidai el Jehovah. (Genesis 7:1, 23; 19:24, 25; Exodus 14:30, 31; Mengeteklel 4:15, 16; 2 King 19:35, 36) Misei a uchul me ngkmal ulterekokl a rengud el kmo a Jehovah el Dios a diak el bechei a mekngit el omeruul me bo el uchul e le motuub a ngklel me a lechub e lebechei a mekngit el omeruul me lomekcharm er a Resioning er ngii. Me a lmuut el tang, chelecha el taem, e kede omes a bleketakl el olechotel el kmo a demiel a Jesus a mla mei me a dirrek el ulebongel er tia el mekngit el blekeradel a di kmedu e ngmo nguemed.—Matteus 24:3.
Morriter er a Tekingel a Dios
w88-E 5/15 23 par. 4-5
Ngar Ngii a Chad el Mla Mesa Dios?
Ngsebeched el mtebengii a uchul me a Abraham a milengedecheduch er ngika el anghel el mlo oba teletelel a chad el ua longedecheduch er a Jehovah. Ngika el anghel el millekoi a tekingel a Dios el mora Abraham e dirrek el ulemtechei er a Dios a uchul me a Biblia melekoi el kmo “A RUBAK chilolt er a Abraham.”—Genesis 18:1.
Molatk el kmo a anghel el melekingel a Dios a sebechel el melekoi a Tekingel el di ua usbechel a dengua me a lechub a razio. Me a uchul me a Abraham me a Moses me a Manoa me a rekuk bebil a mle sebechir el mengedecheduch er a melekingel a Dios el anghel el ua longedecheduch er a Dios. Me alta tirka el chad a mle sebechir el mesterir tirka el anghel el lulengedecheduch er tir me a dirrek el klebkellel a Dios el oeak tir engdi dimlak el sebechir el mera el mesa Dios. Me a leuaisei tia kmal diak lomtok a tekingel a apostol Paulus el kmo: “Ng dirkak a chad el mesa Dios.” (Johanes 1:18) Tirka el chad dimlak lesa Dios te bai milesterir a rechanghel el tir ulemtechei er a Dios.
Mngesuterir a Rebebil el Mo Outekangel a Ringelel a Uldesuir
A Lot a mlo mekngit a omelilt el lerirellii er sera lengiltii el mo kiei el teloi er tirke el kmal mekngit a omerellir el chad er a Sodom. (Monguiu er a 2 Petrus 2:7, 8.) Tiang a mle ungilbesul el beluu, engdi a Lot a kmal mlo chuarm er sera lolukl el mo kiei er ngii. (Gen. 13:8-13; 14:12) A bechil a locha kmal mlo soal kiei er tia el mats, me a lechub e ngmlo betik a rengul er a rebebil el kiliei er ngii el mlo uchul me ngmlo diak lolengesenges er a Jehovah. Me ngmlad er sel taem el Dios a ultengelii a chull el ngau me a sulfur er ngii el beluu. E ka di molatk er a reteru el ngelekel a Lot el redil. Tirkang a mle kltmokl el mo becherir a resechal el tir a mlad er a beluu er a Sodom. Me a Lot a urriid a blil me a kloklel, e sel kot el mle meringel er ngii el rokui, a ngii el urridii a bechil. (Gen. 19:12-14, 17, 26) Me a Jehovah, ngmlo diak loba kllourreng el bedul a Lot er a chelsel tia el meringel el taem er a klengar er ngii? Ngdiak leuaisei.
February 24–March 1
MEKREOS EL TEKOI EL NGAR ER A BIBLIA | GENESIS 20-21
“A Jehovah a Di Blechoel Loltaut a Telbilel”
wp17.5-E 14-15
A Dios a Milengeklii el “Ngelekel a King el Redil”
A Sara er a locherchur e ngolechotel a kmo ngmle ngesonges a klaumerang er ngii? Ngkmal diak! A Biblia melekoi el kmo: “Ma kloumera uchul ma Sara mlo engelakl a rekil e di ngiluu a klisiich ra mo dioll, le nguluumera el kmo, ngikel mellib a blak a rengul.” (Hebru 11:11, BT) A Sara a mle medengelii a Jehovah; Ngmle medengei el kmo a Jehovah a sebechel otaut a rokui el telbilel. Ngtecha er kid a diak lousbech er choua itia el klaumerang? Ngkmal kired el mo ungil medengelii a Dios el ngar er a Biblia. Sel doruul el uaisei e kede mesa sel uchul me a Sara uleba chouaisei el klaumerang. A Jehovah a oltirakl a tekingel e remuul a rokui el tekoi el bla letib, el bebil e ngmeruul el uaisei el kmal ngar er a mengasireng el rolel me kede mo ocherur le ngmechas a rengud!
“BOR A IKEL LEDU ER KAU”
Me a Sara mle 90 a rekil er a bo loruul er tia el tekoi el luluurureng er ngii er a klengar er ngii el rokir. Ngmilechellii a ngalek el sechal er a bechil el mla mo dart a rekil! Me a Abraham a milengeklii ngii el ngalek el Isak, me a lechub “cherechur” el ua dilu er ngii a Dios. Kede kora di melatk er a Sara el locha mlo mesaul er a cheroll engdi kmal klou a klikm er ngii e melekoi el kmo: “A Dios a milskak a deurreng ma cherechur. Ma re bek el chad el rongesii a mo ocherechur el obengkek.” (Genesis 21:6) Tia el mengasireng el sengk el mlara Jehovah a mlo deuil a rengul er a klengar er ngii el rokir. Me nguaisei engdi tia mle klou el ngerachel.
A Isak er a lebo le eim a rekil e a telungalek er ngii a rirellii a mur el kirel el olechotel a kmo ngmla mechib er a tut. Engdi ngdimlak lungil a rokui el tekoi. Kede menguiu el kmo a Sara di ‘ulemes’ er a mekngit el blekerdelel a Ismael. A Ismael el mle 19 a rekil el ngelekel a Hagar a di ulemekako er a Isak. Tia dimlak di lekora ousekool el omekako. A apostol Paulus a uriul e ngmlukreng el meluches el kmo a blekerdelel a Ismael a mle odechelakl el bedul a Isak. Me a Sara milsa tia el tekoi el kmo ngulecheracheb el sebechel el mo uchul a telemall el mora ngelekel. A Sara a mle medengei el kmo a Isak a dimlak di le ngelekel e ngdirrek mle medengei el kmo a Isak a mla er ngii a ileakl el deruchellel er a moktek er a Jehovah. Me nguleba blekeu el mo mengedecheduch er a Abraham. Ngullengit er ngii el mo odureklii a Hagar me a Ismael el mo er cheroid.—Genesis 21:8-10; Galatia 4:22, 23, 29.
Me ngera ngmirruul er ngii a Abraham? Kede menguiu el kmo: “Tia kmal uldkelii a rengul a Abraham, ele Ismael a dirrek el ngelekel.” Ngmle betik a rengul er a Ismael me ngdimlak el sebechel el ungil omdasu. Me nguaisei engdi a Jehovah a mle ungil el mes a tekoi. Kede menguiu el kmo: “Ma Dios a dilu er a Abraham el kmo, ‘Lak el sebek a rengum er a buik ma sibim el Hagar. Di bor a ikel ledu er kau a Sara, ele ng okiu a Isak e ng mor ngii a re ngelekem el ngalek er a telbiil.’” A Jehovah ulelterekokl er a rengul a Abraham el kmo ngmo kutmeklii a Ismael me a Hagar. Me a Abraham el ngii a uleba blakerreng a ulerrenges a tekingel a Jehovah.—Genesis 21:11-14.
Morriter er a Tekingel a Dios
wp17.3-E 12, ftn.
“Kau a Klamiokel Dil”
A Sara mle ochedal a Abraham. A Tera a mle demerir el terung engdi mle kakerous a derrir. (Genesis 20:12) Me alta chouaisei el chebechiil a terached er chelecha el taem engdi ngklou a ultutelel el dolatk el kmo a blekeradel er a ngar er a mong a mle ngodech. A rechad er seikid el taem a mle kmeed er a chelerrungel el Adam me a Eva ulebang engdi turridii. Me a rechad er sel taem el kmal dirk mle mesisiich a bedengir a uchul me a chebechiil er a delongelir a rekauchad a dimlak luchul a telemall el mora rengelekir. Eua dart el rak er uriul er a taem er a Abraham e a klemengetel a klengar er a rechad a mlo ua taem er kid. Ngar tiakid el taem e a llach er a Moses a ulemul a chebechiil er a delongelir a rechad el kauchad.—Levitikus 18:6.
w89-E 7/1 20 par. 9
A Abraham a Kerebai el Kirir Tirke el Rokui el Sorir el Mo Sechelil a Dios
A blekerdelel a Abraham a liluut el ochotii a klaumerang er ngii. A Biblia a melekoi el kmo: “Ng mlar isei e a Abram a tileketekii a olengetongel er ngii el mor a RUBAK.” (Genesis 12:7) Tia locha dirrek el uldimukl er a omelenget el charm e le “olengetongel” el tekoi er a Hebru a belkul a kmo “basio er omelenget.” Uriul e a Abram mirruul er tia el blekeradel er a kuk bebil basio er a beluu el olechotel a klaumerang er ngii. Ngdirrek el mle “omekedong er a ngklel a Jehovah.” (Genesis 12:8; 13:18; 21:33, NW) A tekoi el “omekedong er a ngklel” a dirrek el belkul a kmo “ouchais (omerk) er a ngklel.” Me a telungalek er a Abraham me a dirrek el rechad er a Kanaan a locha dirrek el rirengesii el bekeu lomerk er a ngklel a Dios er ngii el Jehovah. (Genesis 14:22-24) Ngdi osisiu, tirke el rokui el sorir el mo sechelil a Dios a kirir el olecholt er a klaumerang er tir loeak sel lomekedong er a ngklel a Dios. Tia uldimukl er ngii a omerk er a klumech e “blechoel el oldars a tenget er odanges el mor a Dios, el ngii a urerel a ngor el olecholt er a ngklel.”—Hebru 13:15; Rom 10:10.