Reference el kirel a Subeled er a Miting er a Klengar me a Omesiunged
November 2-8
MEKREOS EL TEKOI EL NGAR ER A BIBLIA | EXODUS 39-40
“A Moses a Mle Kerekikl Loltirakl a Ulekrael”
A Jehovah Ngmedengelkau?
13 A Moses a bai “mle ngariou a rengul chad, ng kuk ngariou a rengul er a re bek el chad el ngar a beluulchad.” (Ulecherangel 12:3) Ngullecholt a delemedemek me a klengariourreng el mle blak a rengul el oltirakl a ulekrael er a Jehovah. (Exodus 7:6; 40:16) Ngdiak a olechotel a kmo a Moses a mle blechoel el okerker el kirel a rolel a Jehovah a loruul a tekoi me a lechub e blo leseselk a rengul el oltirakl a ulekrael er a Jehovah. El uai tiang, a Jehovah a milsterir a rechedal a llechul a okedecherul a tento el mo lmuut er a komakai el tekoi, el ua chiro er a rekodoll me a ildisel a blil a techerakl el bo lousbech el meruul er aike el kateng er a tento. (Exodus 26:1-6) A lsekum a ta er a odam el olab a ngerachel er a ongdibel a meskau a komakai el teletelel a omoruul a tekoi, e nglocha mo seselk a rengum. Engdi a Jehovah, a ngike el cherrungel el tebechelel a ongdibel, el mesterir a urerir a remesiungel e oumerang el kmo te mo ungil el kutmokl. Me a Jehovah sel lebeskid a mekekerei el omesodel a tekoi, e ngngar er ngii a ungil el uchul e ngmeruul el uaisei. Mutebengii tia el kmo, a Moses a dimlak bo el seselk a rengul er aike el mekekerei el omesodel a tekoi, el ua lomdasu el kmo a Jehovah a dimlak loumerang er ngii me a lechub e lak lsebechel a Moses el kutmeklii a urerel el kmal mo ungil. A Moses a bai dilu er a rechad er a ureor me te ‘remuul el rokui’ aike el ledilung a Dios. (Exodus 39:32) Ngmera el klou el olechotel a klengariourreng! A Moses a mle medengei el kmo tiang a urerel a Jehovah, e ngii a di lousbech er ngii a Dios el mo kutmeklii tia el ureor.
Kau Ngblak a Rengum er a Rokui el Tekoi?
3 A Hebru 3:5 a melekoi el kmo: “Moses a mlar chomesiou, me ngmle blak a rengul.” Ngera rirellii a profet el Moses el mo blak a rengul? Sera longetmokl e lomekedechor er a tento el templo e “a Moses a riruul a ikel rokui el le dilu er ngii a RUBAK.” (Exodus 40:16) Ma dongull er a Jehovah e kede olecholt a blakerreng er kid el mo er ngii el loeak sel dolengesenges er ngii. Tiang a uldimukl er a dolemolem el mengull er a Jehovah sel bo dechebangel a omelsemai ma ringel. Engdi, a bo dungil el mtekangel a omelsemai e ngdiak el di letiaikid a oterekeklii a blakerreng er kid e lemerekong. A Jesus a kmo: “Ngikel blak a rengul ra kekerel tekoi a dirrek el blak a rengul ra kloul tekoi; me ngikel diak le blak a rengul ra kekerel tekoi a dirrek el diak le blak a rengul ra kloul tekoi.” (Lukas 16:10) Ngkmal kirel el mo blak a rengud el mo lmuut er aike el kora ua lemekekerei el tekoi el doruul.
Morriter er a Tekingel a Dios
(Exodus 39:34, NW) me a dekedek el mengeriich el budel a sechal sib, me a dekedek el budel a seal, me a sersel el kateng;
it-2-E 884 par. 3
Budel a Seal
Uchul me a Rechad er a Israel a Mle Sebechir el Ngmai. A lsekum a taʹchash er a Biblia a melutk el kirel a seal, e ngduubech a ker el kmo te milekera rechad er a Israel e ngmai a budel a seal. Alta seal el charm a blechoel el ngar er a mekelekolt el basio el ua diluches me a dimes er a beluulechad, engdi ngngar ngii a bebil er ngii el sorir a mekekeald el basio. Chelecha el taem e a bebil er a monk seal a kiei er a Daob er a Mediterranea, me a lmuut el bebil er a daob el mekeald a debel. Te rechad a uchul me ngmla mo mekesai a ildisel aika el charm engdi ngar er a taem er a Biblia e aika el charm a locha kmal mle betok er a Daob er a Mediterranea me a Bekerkard el Daob. Sera 1832 e a Dictionary of the Holy Bible (139 el llel) er a Calmet el tekoi er a Merikel a millekoi el kmo: “Ngsebeched el metik a betok el seal er aike el mekekerei el iungs el ngar er a Bekerkard el daob me a peninsula er a Sinai.”—Dirrek el momes er a The Tabernacle’s Typical Teaching, el lulluches er ngii a A. J. Pollock, London, er a 47 el llel.
w15-E 7/15 21 par. 1
Ngklou a Ultutelel el Kmo Ngtecha Mes a Urerem?
Sera bo el merek a okedecherul a chedaol tento e a eabed a “mililii a Tento er a RUBAK, ma klebkellel a RUBAK a milekekii.” (Exo. 40:34) Me a Jehovah a mle bleketakl lochotii el kmo tia el basio oba kengei er ngii! Omomdasu e ngmlo uangerang a uldesuel a Besalel me a Oholiab? Alta ngklir a dimlak le llechukl er a urerir engdi nglocha kmal mle dmeu a rengrir el mo medengei el kmo a Jehovah ulemekngeltengat er a meringel el urerir. (Osi. 10:22) Ngar er aike el ongingil rak e nglocha kmal mlo remutech a rengrir er a lesa el kmo, aike el lurruul a dirk lousbech er a omesiou el mora Jehovah. Sel lebekiis er a beches el blekeradel e te locha dirrek el kmal dmeu a rengrir el mo medengei el kmo a chedaol tento a luluusbech er ngii er a mera el omengull el bekord el 500 el dart el rak!
November 9-15
MEKREOS EL TEKOI EL NGAR ER A BIBLIA | LEVITIKUS 1-3
“A Moktek er a Tenget”
it-2-E 525
Tenget
Delaol tenget. A delaol tenget a miltenget el rokir el mora Dios. Ngdimlak a telkib er ngii el mora chad el oldars er tia el tenget. (Momekesiu er a Men 11:30, 31, 39, 40.) Tia el tenget a mle ongit el mora Jehovah me lekengei er a tenget er a klengit el bebil taem e ngmlodars el obengkel. A Jesus Kristus el tilengetengii a klengar er ngii el “delaol tenget” a uldersii a kerresel a klengar er ngii el rokir.
it-2-E 528 par. 4
Tenget
Tenget el grain. A tenget el grain el dirrek el moiuid el tenget el redechel a wheat, uldars el merikengko, tenget el merikengko, me a lechub e ng uldars el grain a lullenget el lobengkel a tenget er a budech, tenget er a klengit me a uldars er a kot el rodech. Me nguaisei, a lebebil e te di millenget el di uaisei. (Exo 29:40-42; Lev 23:10-13, 15-18; Ule 15:8, 9, 22-24; 28:9, 10, 20, 26-28; 29 el bliongel) Tia el tenget a mle olechotel a klou el klengeltengat er a Jehovah el mo er tir me a dellemelir. Aika mle blechoel el uldak er a cheluch me a ochod. A tenget el grain a sebechel kot el ungil merikengko, delul redechel a wheat, me a lechub e ng blauang me a lechub e ng keik el delul er a stob, delul er a ollaol, me a lechub e ngcherredoched er a delluchel el ongeredechidel. A bebil er a tenget el grain a mlora olengetongel er a delaol tenget, a bebil a lulenga reprist, e a bebil a lulenga tirke el uleldars er tia el tenget sel loruul er a tenget er a budech. (Lev 6:14-23; 7:11-13; Ule 18:8-11) Aike el tenget el grain el modars er a olengetongel a diak le kirel el ngar ngii a omkukel me a lechub e lurrechomel er a honey (el tia melutk el kirel a ilotel a kerrekar el fig me a lechub e ngosechel a rodech) el ngii a sebechel chutur.—Lev 2:1-16.
it-2-E 526 par. 1
Tenget
Tenget er a budech. A tenget er a budech el lekilengei a Jehovah a ochotii el kmo ngbudech a delongelir. Ngike el melenget me a telungalek er ngii a mo menga er a tenget (er a chelsel a mekesekesel a chedaol tento; a doltirakl a mle siukang e te riruul a delidui er bita er a kateng el merers er a chedaol tento, el sel lengar ngii a mekesekesel a chedaol tento; e ngar er a templo e te riruul a delemerab er a blengur). Ngike el prist el mirruul er tia el tenget a mla er ngii a blingelel me a dirrek el tirke el prist el uluureor me ngmla er ngii a blingelir. Aike el lekel a mlora Jehovah me a rsechel el ngii a omtechei er a klengar a dirrek el mlo er ngii. Me tia el blekeradel a ua lolechotel a kmo a Jehovah, reprist, me tirka el melenget a dmak el omengur el olechotel a kmo ngbudech a delongelir. A chad el diak el klikiid (el oltirakl aike ledu a Llach el kmo ngdiak leklikiid) e mengang me a lechub e ngkolii a tech er sel taem el Jehovah a kmo ngmla mo diak el sebechel el menga er ngii (ngar er a temel a kleald e a tech a di mereched el mo mekngit) a mo okodall. Ngika el chad a mla mekidekelii tia el blengur e le ngii el diak leklikiid me a lechub e ngii el mla kolii a tech el diak leklikiid er osengel a Jehovah el Dios, el olechotel a kmo ngdiak longull a chedaol el tekoi.—Lev 7:16-21, NW; 19:5-8, NW.
Morriter er a Tekingel a Dios
Omesodel a Babier er a Levitikus
2:13—Ngera uchul ma sar a mle kirel modars “lobengkel a bek el tenget”? Ngdimlak loruul er tiang me bo lungil a telemtemul a tenget. Ngar er a beluulechad el rokir, e a sar a lousbech el mengereomel a kall. Tia mlodars lobengkel a tenget e le ngii a omtechei er a mimokl er a mo mechut ma lechub a mo nguemed.
it-1-E 813
Laok
A uchul tia el llach. Ngar cheungel a Llach er a telbiil e a rasech me a laok a mle kloklel a Jehovah. A rasech el omtechei er a klengar, a di ta el Jehovah a sebechel meskid me a leuaisei a klengar a kloklel. (Lev 17:11, 14) A laok a sel kot lungil part er a charm. Me a lekel a charm el modars a ochotii el kmo sel kot el ungil a blingelel a Jehovah, el ngii omeskid a betok lungil tekoi. Ngdirrek el ochotii el kmo ngika el chad el melenget a soal omsa Jehovah sel kot lungil er ngii. Ngii el laok el mle okesiul a rechad er a Israel el omsa Jehovah sel kot lungil er tir me a uchul e ngmelekoi el kmo ngmo medul er a olengetongel el “kall” el “ungil a bul bau” el mora Jehovah. (Lev 3:11, 16) Me a chad el kolii a laok a tomellii a llechul a Jehovah e le laok a mla mechedaol el mora Dios. Ngike el kolii a laok a mo okodall. Me nguaisei engdi a laok a diak el ua rasech e le lekel a mla mad el charm me a lechub a charm el miltemall er a ta er a charm a sebechir el lousbech el kirel a bebil er a tekoi.—Lev 7:23-25, NW.
Omesodel a Babier er a Levitikus
3:17. E le a laok a sel mle kot el ungil el bliongel, ma blul el diak lekirir el menga er ngii a mlo bleketakl er a rechad er a Israel el kmo sel kot el ungil el bliongel a mo er a Jehovah. (Genesis 45:18) Tiang a omeklatk er kid el kmo ngkired el omsa sel kot el ungil er kid el mo er a Jehovah.—Osisechakl 3:9, 10; Kolose 3:23, 24.
November 16-22
MEKREOS EL TEKOI EL NGAR ER A BIBLIA | LEVITIKUS 4-5
“Bsa Jehovah Sel Kot el Ungil er Kau”
it-2-E 527 par. 9
Tenget
Tenget er a teluchakl. A tenget er a teluchakl a dirrek el tenget el kirel a klengit, e le chad el touchakl a belkul a kmo ngmla rullii a klengit. Tia el tenget a lurruul er ngii el kirel a ileakl el klengit e mle ngodech er aike el bebil er a tenget er a klengit e le chad el meruul er ngii a mesumech er a telbiil el miltemall. Tia sebechel telbiil er a delongelel ngii me a Jehovah me a lechub e ngdelongelel ngii me a ta er a chad. Tia el tenget er a teluchakl a mesumech er a rengul a Jehovah er a telbiil el miltemall me a lechub e ngmo olluut a llemeltel ngike el rirebet er a klengit e dirrek el melubet er ngii er a belsel er a klengit el lerirellii.—Momekesiu er a Isa 53:10.
w09-E 6/1 26 par. 3
Ngmelatk a Ngelsengesed
A Llach a ulecholt er a blekerdelel a Jehovah el blechoel melatk er a rechad el kmo: “A lsekum ng diak el sebechel el oba ngelekel a sib el mo tengetengel el mor a RUBAK el kirel a klengit el le rirellii, e ng ngmai a teblol belochel er a ked ma lechub e ng teblol ulekeroul el ngelekel a belochel.” (7 el Kekerei el Bades) A tekoi el “a lsekum ng diak el sebechel” a dirrek el sebechel moiuid el “ngdiak el sebechel lodesii a chimal.” A chad er a Israel a lsekum e ngkmal chebuul me ngdiak el sebechel melenget er a sib e a Dios a mle dmeu a rengul kongei er a tenget el sebechel lodesii a chimal el nguu, el ngii a teblo el belochel er a ked me a lechub e ngulekeroul el belochel.
w09-E 6/1 26 par. 4
Ngmelatk a Ngelsengesed
E a lsekum a chad a dirrek el dimlak el sebechel melenget a teblo el suebek el charm? A Llach a melekoi el kmo: “E ng ngmai a erul bond (ngeai me a lechub e ngetiu el kob) el merikengko me ng mo uldersel el kirel a klengit.” (11 el Kekerei el Bades) A Jehovah a kilengei er tirke el kmal chebuul el mo meruul er a tenget er a klengit el diak a rasech er ngii. Me alta chad er a Israel a kmal chebuul engdi ngmla er ngii a techellel el mo meruul er a tngakireng el mesumech er a deleuill er ngii lobengkel a Dios.
Morriter er a Tekingel a Dios
Moukerebai er Tirke el Blak a Rengrir el Chedal a Jehovah
14 A ungil el omeruul a sebechel el ngosukau me ke melemolem el blak a rengum el mo er a Jehovah e dirrek el mo blak a rengum el mo er a rechad. El ua tiang, ke locha ungil el medengei el kmo a odam a mla ruebet er a oberaod el klengit. Engdi ngdirk soam el melemolem el blak a rengum el mo er ngii, e le ngikang a kmal sechelim me a lechub e ngchedam. Engdi ke medengei el kmo nglmuut el klou a ultutelel el kirel el mo blak a rengum el mo er a Jehovah. Me ke di ua Nathan el mo olengesenges er a Jehovah, engdi ngmo ungil a omerellem el mo er a odam. Me ke dmu er ngii el kmo ngkirel el mo olengit a ngeso er a remechuodel, e kirel el mereched el mong. Engdi a lsekum ngdiak lebong, e ngkirem el mo subedeterir a remechuodel. Me sel moruul el uaisei, e ke ochotii a blakerreng er kau el mo er a Jehovah. E a osisiu el taem e ngungil a omerellem el mo er a odam er kau, me ngmo sebechir a remechuodel el ngosuir me nglmuut el mo ungil a delongelel ngii me a Jehovah. E a remechuodel a mesmechokl er ngii el okiu a ungil e melemalt el rolel.—Monguiu er a Levitikus 5:1; Galatia 6:1.
it-1-E 1130 par. 2
Cheledaol
Charm me a Dellomel. A rokui el kot el sechal ngelekel a kerbou, sib, me a kaming a mle chedaol er a Jehovah el diak el sebechir el melai a techil me a lechub e lolterau. Aika mle kirel metenget e dirrek el mla er ngii a mlo blingelir a reprist. (Ule 18:17-19) A kot el rodech me a ongeltacher a chedaol, me a aike el rokui el mlo metenget el kirel omesiou er a chedaol tento me ngdirrek el chedaol. (Exo 28:38) Me aika el chedaol tekoi er a Jehovah a dimlak el kirir el mo meterekakl me a lechub e bo lebeot a rengrir el kirel. Ngsebeched el mesa berredel tia el tekoi er a llach el kirel a ongeltacher. A lsekum a chad a mla imakl a rdechel a dellemelel el wheat el mo ongeltacher engdi ngii me a lechub e ngta er a chedal a telungalek er ngii a dimlak lodengei e ngmai a bebil er ngii e remuul el mo kall, e ngika el chad a tomellii a llechul a Dios e le ngdimlak longull a chedaol tekoi. A Llach a milengerechir er ngii el mo mtechei aika el luluusbech e dochelir er a 20 el basent. Ngdirrek el mle kirel tongetengii a sechal sib. Tia ullecholt er a klungel a ultutelel a dongull a chedaol tekoi er a Jehovah.—Lev 5:14-16.
November 23-29
MEKREOS EL TEKOI EL NGAR ER A BIBLIA | LEVITIKUS 6-7
“A Olechotel a Omereng el Saul”
A Tekoi el Sebeched el Suub er a Babier er a Levitikus
9 Ongeru el klubeled: Kede mesiou er a Jehovah e le kede oba omereng el saul el kirel. Kede mo mesuub el kirel tia el tekoi lokiu sel dorriter a tenget er a budech, el ngii a ta er a klou a ultutelel el tedebechel a mera el omengull er a Israel er a irechar. Ngar er a babier er a Levitikus, e kede mesuub el kmo a chad er a Israel a sebechel odersii a tenget er a budech el “tenget er omerengelsaul.” (Lev. 7:11-13, 16-18) Me ngmeruul er tiang e le ngsoal, el diak lomdasu el kmo ngkirel meruul er ngii. Ngkongei el meruul er ngii e le ngmle betik a rengul er a Dios er ngii el Jehovah. Me ngii el chad, me a telungalek er ngii, me a reprist a mo menga er a techel a charm el mlo tenget. Engdi ngar ngii a bebil el klekedellel a charm el di mora Jehovah. Aika ngera el klekedellel ngii el charm?
Aike el Tenget el Odeuir er a Rengul a Dios
15 A kuk ta er a tenget a mle tenget er a omereng el saul, el lulsaod a Levitikus 3 el klou el bliongel. Tia el tekoi a sebechel el moiuid el kmo “a tenget el kirel a budech.” A tekoi er a Hebru, e a “budech” a melutk er a kuk klou er a di blekeradel el diak a mekemad ma lechub a uldikel er ngii. A babier el Studies in the Mosaic Institutions a mesaod el kmo “A Biblia a olecholt er tiang, e ngdirrek el blekeradel ma lechub a budech el obengkel a Dios, ma klengeltengat, ma deurreng, ma ungil el reng.” Me nguaisei, a tenget er a omereng el saul a mlo oldars el diak lolterekokl er a budech el obengkel a Dios, el mo melngakl a rengul, e ngbai mle olechotel a omereng el saul ma lechub mo mengemedaol er a ungil el budech el obengkel a Dios el uleldeu er a rengrir tirke el ngiluu a kengei er ngii. A reprist me ngike el oldars a milenga er a tenget er a uriul el rasech ma laok a mlo modars el mo er a Jehovah. (Levitikus 3:17; 7:16-21; 19:5-8) Ngoeak a klebokel el rolel ma tekoi er a okesiu, e ngike el oldars, ma reprist, ma Jehovah el Dios a ua ledak el ngar er a blengur, el olecholt er a deleuill er a budech er a delongelir.
Tenget er a Odanges el Odeuir a Rengul a Jehovah
8 Ngmekerang ngike el melenget? A Llach a ulechotii el kmo a ngii di el chad el mo er a medal a Jehovah a kirel el mo klikiid e diak a telemellel. A ngii di el chad el diak leklikiid e le ngii di el uchul a mle kot el mo oldars a tenget el kirel a klengit ma lechub a tenget el kirel a ileakl el klengit me bo lemesumech e bo leklikiid a deruchellel er a medal a Jehovah me bo lekengei er a delaol el tenget ma lechub a tenget er a budech er ngii. (Levitikus 5:1-6, 15, 17) Kede mera el oba omereng el saul el kirel a klungel a ultutelel a deklikiid er a medal a Jehovah? A lsoad a Dios a bo lekengei er a omengull er kid, e ngkired el mo mereched el sumechokl a ngii di el ngerang el omtok er a llach er a Dios. Ngkired el mereched el osiik a ngeso el lomeskid a Dios—e “rar mechuodel ra eklesia” ma “tngakireng el tenget el kirel a kngtid,” el Jesus Kristus.—Jakobus 5:14; 1 Johanes 2:1, 2.
Morriter er a Tekingel a Dios
it-1-E 833 par. 1
Ngau
Ngar er a chedaol tento me a templo. Te uluusbech a ngau el kirel omengull er a chedaol tento me a dirrek el uriul er a lebo er a templo. Ngbek el tutau me a kebesengei el ngarbab el prist a melul ochod er a olengetongel er a omelul el ochod. (Exo 30:7, 8) A llechul a Dios a milengerechir el kmo a ngau di lekard er bebul a olengetongel er a delaol tenget el diak le mad. (Lev 6:12, 13) Me a klaumerang er a Rechijudea el lekengei er ngii a rebetok el chad el kmo a Dios a uleak a mengasireng el rolel e mekerdii tia el ngau er a olengetongel, a diak lemengai a uchetemel er a Bades. A doltirakl a ulekrael er a Jehovah el mora Moses e a rengelekel a Aron a mle kirir el “chumlii a ngau er bebul a olengetongel e mechobech a idungel er ngii” e mochu nguu a tenget el loia er bebul olengetongel. (Lev 1:7, 8) Me ngmle uriul er a lemechedaol a telungalek er a Aron el mo nguu a kleprist me a dirrek el uriul er a leruul a tenget er a omengedaol, e a Jehovah a uldureklii a ngau el mlara eabed el ngar bebul a chedaol tento, el dmul a tenget el ngar bebul a olengetongel. Me tia el ngau el uleak a mengasireng el rolel e mo er ngii a dimlak le ngeuil a ngau er a olengetongel e ngbai ngau el “ngilkokl el sueseb a delaol tenget ma laok er bebul a olengetongel.” Me a ngau er a olengetongel el millemolem el kmard a ngeuil sel ngau el dimla kmard er a olengetongel me a dirrek el ngau er a Dios. (Lev 8:14–9:24) A ngau er a Jehovah a dirrek el dilul a tenget el mlara olengetongel er a uriul er a loluluuch a Salomon er a omengedolel a templo.—2Kr 7:1; dirrek el momes er a Men 6:21; 1Ki 18:21-39; 1Kr 21:26 el kirel a lmuut el bebil er a olechotel a Jehovah a uleak a mengasireng el rolel e dilul a tengetengir a remesiungel el olecholt el kmo, ngkongei a tengetengir.
si-E 27 par. 15
Ongedei el Babier er a Biblia—Levitikus
15 (3) A chad el diak er a rengul e rullii a klengit a mle kirel melenget er a tenget er a klengit. A charm el mo metenget a di moltirakl er a chad el loldars er a tenget el ngii a prist, renged el rokir, merreder er a beluu, me a lechub e ngkuk di chad er a beluu. Tia el tenget a diak el ua aike el tenget el lsekum e ngsorir a rechad e ngsebechir el melenget. Tia el tenget er a klengit a kirel modars.—4:1-35; 6:24-30.
November 30–December 6
MEKREOS EL TEKOI EL NGAR ER A BIBLIA | LEVITIKUS 8-9
“A Olechotel a Klengeltengat er a Jehovah”
it-1-E 1207
Omengedaol
Me a Moses a tilechelbii a Aron me a rengelekel sechal er a Nadab, Abihu, Eleasar, me a Ithamar (me a lechub e ngdilu er tir me loriso er tir) er a brons el kanadarai el mla er a mekesekesel a chedaol tento e mililii a Aron er a bilel a ngarbab el prist. (Ule 3:2, 3) Me tia el kmal klebokel el bilel a Aron a mle klebikl er ngii a besiich el lulemekesiu a blekeradel me a ngerachel el kirel a chad el ngar tia el deruchall el olab. E sola e a Moses a ngiluu a chilt el choiltii a chedaol tento me a rokui el klekedall er a chedaol tento me a dirrek el olengetongel er a delaol tenget, me a kanadarai me a rokui el klekedall el luluusbech el kirel aika el tekoi. Aika mlechedaol e meakl el kirel omesiou er a Dios. A ulebongel e a Moses a ngiluu tia el chilt el chubelii er a bdelul a Aron el chemedolii.—Lev 8:6-12; Exo 30:22-33; Psa 133:2.
it-1-E 1208 par. 8
Omengedaol
Ngar tiakid el ongeai el sils e a Aron me a rengelekel a mlechedaol el mo nguu a kleprist e tia dirrek el mle ketengir el meruul er a tngakireng (el diak lousbech er a ulekrael er a Moses) el kirel a renged er a Israel. Ngdiak di bo longikiid er a klengit el lemlechell e urrebet er ngii e ngdirrek el kirel a omengull er a kolt el ngelekel a kerbou el ngii a kmal ulengesechii a rengul a Jehovah. (Lev 9:1-7; Exo 32:1-10) Uriul er a loruul er tia el kot el omelenget e a Jehovah uldureklii a ngau el mla er sel eabed el ngar bebul a chedaol tento el dmul aike el medechel el tenget el mlara olengetongel el olechotel a kmo ngmla tutketerir e kongei er a kleprist er tir.—Lev 9:23, 24.
A Tekoi el Sebeched el Suub er a Babier er a Levitikus
13 Ongeua el klubeled: A Jehovah a omekngeltengat er a tedebechel a cheldebechelel el ngar tia el chutem. Ka molatk er a tekoi el dilubech er a 1512 B.C.E. er sel taem er a loleketek er a chedaol tento er a uchul a Rois el Sinai. (Exo. 40:17) A Moses a uluungerachel er a ungil klebesei el mo melalem er a Aron me a rengelekel el mo mesiou el prist. A renged er a Israel a mlo dmak e ulemes er tirka el prist el oldars er a kot el tengetengir el charm. (Lev. 9:1-5) Ngmilekera Jehovah e ochotii el kmo ngkilengei er tia el dirk milteketek el kleprist? A Aron me a Moses er a lomekngeltengat er a rechad, e a Jehovah a ultengelii a ngau er a eanged el mo melul aike el mlo medechel el tenget el ngar er a olengetongel.—Monguiu er a Levitikus 9:23, 24.
Morriter er a Tekingel a Dios
A Uchul Me Ngkired el Chedaol
6 A reprist er a Israel a mle kirir el klikiid a bedengir er a bek el taem. Me tia ngera belkul el kired er chelechang? A rebetok er tirke el mesuub er a Biblia el obengked a mesekid el kltmokl e beches a bedenged, me a basio er a omengull er kid me ngdirrek el di kltmokl. Me a lmuut el tang, a chad el soal el mesiou er a Jehovah a dirrek el kirel el mo ‘klikiid a uldesuel.’ (Monguiu er a Psalm 24:3, 4; Isa. 2:2, 3.) Me ngkired el mesiou er a Jehovah el klikiid a uldesued me a rengud me a dirrek el bedenged. Me a leuaisei, ngkired el blechoel el merriter er kid. A lebebil er a taem e kede mo medengei el kmo ngar er ngii a meklou el tekoi el kired el melodech me bo el sebeched el mo chedaol. (2 Ko. 13:5) El uai tiang, a mla metecholb el chad el omes a siasing er a remeau a kirel el di ngii el oker el kmo, ‘A omerellek ngochotii el kmo ak chedaol?’ Me a leuaisei, ngkirel el mo osiik a ngeso me bo el sebechel el torebengii tia el kikiongel el omerellel.—Jak. 5:14.
it-2-E 437 par. 3
Moses
A Jehovah rirellii a Moses el mo melekingel a Llach er a telbiil el obengkel a Israel, el kmal ileakl el deruchall el dirkak a ta el chad el mo obang ngdi ta el Jesus Kristus el Melekingel a beches el telbiil. Me a Moses a ngilai a rsechel a charm el duiim er a babier er a telbiil, el omtechei er a Jehovah el “chedal” tia el telbiil me a rechad (el merreder er a beluu ulemtechei er tir) el dirrek el mo “chedal” tia el telbiil. Ngchiliuii a babier er a telbiil el mora rechad me te dilu el kmo, “Aki mo meruul a ikel rokui el bla le dung a RUBAK; aki mo olengesenges er ngii.” (Exo 24:3-8; Heb 9:19) Me a Moses er a loureor el Melekingel a Jehovah e ngmlo er ngii a ileakl el techellel el omekrael er a okedecherul a chedaol tento me a dirrek el klekedall er ngii el oltirakl er a rolel el lechilderderii a Jehovah, e dirrek el kutmeklii a kleprist e chemedolii a Aron el ngarbab el prist lousbech er a ileakl el chilt. Ngdirrek el ulemekrael er a kot el taem el tia el beches el kleprist a mirruul a tenget er a chedaol el tento.—Exo 25-29 el bliongel; Lev 8, 9 el bliongel.