Reference el kirel a Subeled er a Miting er a Klengar me a Omesiunged
MARCH 7-13
MEKREOS EL TEKOI EL NGAR ER A BIBLIA | 1 SAMUEL 12-13
“Ngmo Uchul Otuub a Doruul a Tekoi el Diak a Llemelted er Ngii”
w00 11/1 23 par. 17
Kldidai el Reng a Uchul a Otuub
17 Sel dekot el omes er tiang, e ngkora ua lemelemalt a omerellel a Saul. E ngdimlak a cheldechulel e le ng a rechedal a Dios a mle “meringel el oumekemad,” e “mlo diak a chiolir,” me te ulemritel er a dakt el kirel a kmal meringel el blekerdelir. (1 Samuel 13:6, 7) Ngulterekokl, e ngdiak lemekngit a di lekid el rullii a tekoi a leredemellel a blekeradel. Engdi ka molatk, a Jehovah a sebechel el menguiu a reng e medengei aike el mera el ngar er a chelsel a rengud. (1 Samuel 16:7) Me nguaisei, ngmle sebechel el omes a bebil el tekoi el kirel a Saul el dimlak lemocholt er a cheldecheduch er a Biblia. El ua itiang, a Jehovah a mle sebechel el omes el kmo ngmle kedeb a rengul a Saul e le ngkedidai a rengul. A Saul a locha mlo kesib a rengul e le ngulemdasu el kmo—ngii el king er a Israel el rokir—a mle kirel el mengiil er a kmal chudelang, e kelekall el profet! Ma ngii di lengerang el uchul, engdi a Saul a ulemdasu el kmo a eudel a Samuel a uchul me ngar er ngii a llemeltel el mo melai a techall e mo choitii a bleketakl el tekoi el mlo er ngii. Me ngera dilubech? A Samuel a dimlak loldanges er a omerellel a Saul. Ngbai, nguluungeroel er a Saul, e ngdmu el kmo: “A chomerrederem a dikea mlemelemii . . . ele kau a ulerrengesmengoit ra Rubak.” (1 Samuel 13:13, 14) Me ka mesang, a kldidai el reng a liluut el mlo uchul a otuub.
A Blekongesenges er Kau a Klou a Ultutelel el Mo er a Jehovah
8 A cheldecheduch el ngar er a Biblia el kirel a King el Saul a ochotii a klungel a ultutelel a blekongesenges. A Saul er a lomuchel el mengedereder e ngmle ngar er a eou a rengul e ungil el merreder, e di mle ngii el omes er ngii ‘el ua lak a belkul.’ E a uriul, e a kldidairreng ma cheleuid el uldasu a mlo mengedereder er a uldesuel. (1 Samuel 10:21, 22; 15:17) A ta er a taem, e a Saul a mle kirel el oumekemad er a Rechad er a Filistia. A Samuel a dilu er a king me lechiielii me sel lemei e ngmo odars a tenget el mo er a Jehovah e dirrek el mo omsa ulekrael. Engdi, a Samuel a mlo meoud el mei ma rechad a meterekla kung. Ma lesengei el uaisei, e a Saul a “millenget a delaol tenget.” A Jehovah a dimlak lekengei er tiang. Ma Samuel er a lemeremang, e a king a mesosaod er a orrengesmengoit er ngii el kmo, a Samuel a mlo meoud a uchul me ng ‘millatk el kmo ng kirel el melenget er a tenget’ el olengit er a ngelseuil a Jehovah. A King el Saul a ulemdasu el kmo, a loldars a tenget e nglmuut el klou a ultutelel er a lolengesenges er a ulekrael el mengiil er a Samuel el me meruul er a tenget. A Samuel a dilu er ngii el kmo: “Ng klebelung el tekoi sel mrirelii. Ng dimlak molengesenges er a le dillii er kau a Rubak el Dios.” Ngdimlak lolengesenges er a Jehovah a uchul ma Saul a urridii a kleking er ngii.—1 Samuel 10:8; 13:5-13.
Morriter er a Tekingel a Dios
Kau Ke Kongei el Oltirakl a Ungil el Ulekrael er a Jehovah?
15 A rechad er a Israel alta e te ulemdasu el kmo ngsebechir el oumerang er a chad el king el kuk ngaruchei er a loumerang er a Jehovah. A ble leuaisei a uldesuir, e te mocha oltirakl a “diak le meral chelid.” Tir el uluumerang er a ta el diak el mera el chelid a uchul me ngmlo beot er tir el oumerang aike el betok el diak el mera el chelid el mla er a Satan el mei. El uai tiang, a chad el king a sebechel rulleterir el mo mengull a bleob el chelid. A rechad el oumerang a bleob el chelid a omdasu el kmo ngsebechir el oumerang aika el chelid el rruul er a kerrekar me a bad e le ngsebechir el mesterir e merutech ngii el bleob. Tirka el chad a diak loumerang er a diak lemeues el Jehovah el Dios el ngii a mileob a rokui el tekoi. E a apostol el Paulus a millekoi el kirel a bleob el kmo ng “diak le meral ngarngii.” (1 Korinth 8:4) A bleob el chelid a diak el sebechel el omes, e orrenges, e mengedecheduch, me a lechub e loruul a ngii di el ngerang me ngklebelung el tekoi a dongull e le ngsebeched el mesterir e merutech ngii el bleob. A bleob el chelid a diak el sebechel el ngosuterir a rechad e le te “diak le meral chelid” me tirke el oumerang er tir a di mo “ua ikel bleob el chelid el le riruul.”—Psalm 115:4-8.
MARCH 14-20
MEKREOS EL TEKOI EL NGAR ER A BIBLIA | 1 SAMUEL 14-15
“A Blekongesenges a Lmuut el Ungil er a Tenget”
A Blekongesenges er Kau a Klou a Ultutelel el Mo er a Jehovah
4 A rokui el klalo el ngar er ngii er kid a kloklel a Jehovah e le ngii a Ulemeob a rokui el tekoi. Ma leuaisei, e ngngar er ngii a kmung ngerang el sebeched el msang? Chochoi, ngngar er ngii a mekreos el tekoi el sebeched el msang. E tiang ngerang? Ngsebeched el mo medengelii a nger el ngar er sel uleklatk el kmo: “Bo le mellomes a rengum e rungalek, e mrellii a renguk el mo ungil, me le bor ngii a nger er ngak el mor a chad el mekngit a uldesuel el kirek.” (Osisechakl 27:11) Ngsebeched el msa Dios a blekongesenges er kid. Malta e ngkakerous a blekerdeled ma dirrek el ulekuruled, e ngdi ngoeak a blekongesenges, e a derta ma derta er kid a sebechel el mo onger er sel mekngit el omelsemai er a Satan el Diabelong el kmo a rechad a diak lolemolem el blak a rengrir el mo er a Dios a bo lechebangel a ongarm. Ngkol uangera el techall a dobang!
Kau Ke Kongei el Melemolem el Melai a Omesmechokl?
4 A tekoi el dilubech el mora King Saul a ocholt aike el sebechel duubech sel lak doba klengariourreng. A Saul a kmal mlo imis el kedidai a rengul me ngdimlak lekengei el kmo ngkirel mesmechokl er a uldesuel me a omerellel. (Psa. 36:1, 2; Hab. 2:4) A blekerdelel a ulebeketakl er sel taem el Jehovah uluuchais er ngii aike el kirel meruul sel bo lemesisiich er a rechad er a Amalek. Me nguaisei engdi a Saul a dimlak lolengesenges. A profet Samuel er sera loker er ngii el kirel tia el tekoi e ngdimlak lekengei el kmo ngmlo mekngit. Ngbai millasem el osiik a excuse el kirel a omerellel loeak a lomekbeot er a berredel a omerellel e loltelechakl er a rechad el kirel. (1 Sa. 15:13-24) Ngulechotii a osisiu el blekeradel er a uchei. (1 Sa. 13:10-14) Ngklengiterreng e le ngmlo kedidai a rengul. Ngdimlak lsemecheklii a uldesuel, me a Jehovah chileklii e ultngeklii.
5 Ngdiak el soad el mo ua Saul me ngkired el di kid el oker el kmo: ‘Sel kunguiu a uleklatk er a Tekingel a Dios, ngblekerdelek el soak el di osiik a excuse me ngdiak kultirakl er ngii? Ak mengkekerei er a berredel a omerellek? Ak mo oltelechakl er a rechad el kirel a omerellek?’ A lsekum a nger er kid er a ta er aika el ker a chochoi, e ngkired el sumechokl a uldesued me a blekerdeled. E le lak e ngsebechel kmal mo kedidai a rengud me a Jehovah mo otngeklid me ngdiak desechelil.—Jak. 4:6.
Morriter er a Tekingel a Dios
Moukerebai er a Klechubechub er a Jehovah
10 Tiang a diak lebelkul a kmo ngkmal kired el blechoel el olecholt er a klechubechub. El ua tiang, a King el Saul a locha ulemdasu el kmo ngolechotel a klechubechub a lsekum ngdiak lomekoad er a Agag, el king er a Amalek el cherrouir a rechedal a Dios. A Saul a dirrek el dimlak lokoad a rokui el chermir a rechad er a Amalek. Engdi Jehovah a dilu er a Saul el kmo ngkirel mekodeterir a rokui el chad er a Amalek me a rokui el chermir. Engdi Saul a dimlak lolengesenges me a Jehovah a ultngeklii me ngmlo diak el king. (1 Samuel 15:3, 9, 15) A Jehovah a ngike el melemalt el chad er a Kerrekeriil el sebechel el menguiu a reng er a rechad, e dirrek el medengei el kmo ngoingerang e ngdiak lekengei lolecholt er a klechubechub er ngii. (Klengiterreng 2:17; Esekiel 5:11) Ngdi kmedung e ngmo oukerrekeriil er tirke el rokui el chetirir lolengesenges er ngii. (2 Thesalonika 1:6-10) Seikid el taem, e ngmo diak a klechubechub er ngii el mo er tirke el rokui el mekngit el chad. Me sel omerellel el mo okngemedeterir a remekngit el chad, a olechotel a klechubechub er ngii el mo er tirke el melemalt el chad el bo lolsobel er tir.
MARCH 21-27
MEKREOS EL TEKOI EL NGAR ER A BIBLIA | 1 SAMUEL 16-17
“Mekemad a Mekemedil a Jehovah”
Ngua Ngera Klemedengei er Kau el Kirel a Jehovah?
18 A David a miltebengii el kmo a Jehovah a ullengeseu er ngii. El ua tiang, sel taem el David a ulemekerreu a chermel a demal sib er a laion me a kuma, e ngmiltebengii el kmo a Jehovah a ngilsuir el mo omekoad aika el kdekudel el charm. Me sera bo lemesisiich er a mekoar el chad er a mekemad el Goliath, e ngmilsa el kmo a Jehovah a ngike el ulemekrael er ngii. (1 Sa. 17:37) E sera lechiis er a King Saul el mle mechechei er ngii, e ngmle medengei el kmo a Jehovah a ngike el ulsebelii. (Psa. 18, omesodel el ngar er a bebul) A David a ble lekedidai a rengul, e ngmlo omdasu el kmo ngdi mle ngii e kutmokl aika el rokui el tekoi. Engdi ngmle ngariou a rengul, me ngmle sebechel mtebengii el kmo a Jehovah a ullengeseu er ngii.—Psa. 138:6.
19 Ngera klubeled er tiang? Ngdiak di dolengit a ngelsuil a Jehovah e lemerekong. Ngdirrek el kired el melasem el mo omtab el kmo ngoingerang e mekerang a Jehovah lolengeseu er kid. E le lsekum e ngariou a rengud, e kede medengei el kmo ngdiak el sebechel el di kid e kutmokl a rokui el tekoi, e a Jehovah a mo ngosukid el meruul aike el diak el sebeched el kutmokl. E a bek el taem el desa Jehovah el olengeseu er kid, e a deleuill er kid el obengkel a mengal mo mesisiich. A Isaac, el odam el ngar er a Fiji, el mla mesiou er a Jehovah el betok el rak a miltebengii a klemerang er tia el tekoi. Ngmelekoi el kmo: “Sel kulatk er a klengar er ngak, e ngsebechek el mesa rolel e a Jehovah a ngilsukak el ulemuchel er sel taem er a kusuub a Biblia el me lmuut er chelechang. Sei a uchul me a Jehovah a kmal merang er a uldesuek.”
Mketmeklau er Chelechang el Kirel a Odechelakl
12 Ngera uchul me a David a kmal mle bekeu a rengul? Ngkmal uluumerang el kmo a Jehovah a obengkel. (Monguiu er a 1 Samuel 17:37, 45-47.) A David a dimlak lomekesiu er a meklungel a bedengel a Goliath el mo er ngii. Ngbai ulemes er a Goliath el kmal kekerei sel lomekesiu er ngii el mora Jehovah. Me ngera kede suubii er tia el cheldecheduch? Kede mo oba blekeu a lsekum ngmo ulterekokl a rengud el kmo a Jehovah obengked, e dirrek a lsekum ngmo ulterekokl a rengud el kmo ngar a osengel a Dios el Olab a Bek el Klisiich e a rumtok er kid a kmal mekekerei. (2 Kr. 20:15; Psa. 16:8) Me ngokiu a ngera el rolel e ngsebeched el smisichii a blekeurreng er kid er chelechang, er uchei er a bo demodechelakl?
w99 12/1 25-26 par. 17
Kemiu el Ngeasek—Momekeroul er a Omelebedebekiu!
17 Obo momekerreu er kemiu er a bedikl er a Satan a belkul a kmo ngkiriu el blechoel el mengkar—e a bebil er a taem, e ke ousbech a klou el mesisiich el blekeu. A bebil er a taem e ko mo metik el kmo ko mo omtok, el diak di el resechelimiu, e ngbai beluulechad el rokir. Ngike el milluches er a psalm el David a milluluuch el kmo: “Kau a omeltkek, O Jehovah el Ngike el Chimong el Kedidai el Rubak, el ultebechelel a klengar er ngak er a kdirk kekerei. O Dios, ke ulsisecheklak er a kngalek el mei, el me lmuut er a chelechang e melemolem el ouchais el kirel aike el mengasireng el urerem.” (Psalm 71:5, 17) A rechad a medengelii a David el kirel a blekeu er ngii. Engdi ngulemekeroul er ngii er a oingerang? Sera ledirk kekerei! Uchei er a bo lolsiuekl er a merael a chisel el Goliat, e a David a ulechotii a kmal ngar er a bab el blekeu er a lomekerreu er a delebechelel el sib er a demal—ngmilekodir a laion ma kuma. (1 Samuel 17:34-37) Engdi, a David a milsa Jehovah a mui el chetengakl el kirel a blekeu er ngii, e le ngulemekedong er ngii el kmo ‘ultebechelel a klengar er ngak er a kdirk kekerei.’ A duch er a David el mo ultuil er a Jehovah a rirellii el mo mesisiich er a ngii di el ongarm el lechillebangel. A lsekum e kom dirrek el mo ultuil er a Jehovah e ko mo metik el kmo, ngmo meskemiu a blekeu ma klisiich el mo ‘kats er a beluulechad.’—1 Johanes 5:4.
Morriter er a Tekingel a Dios
Omesodel a Babier er a Kot el Samuel
16:14—Ngera el mekngit el reng a ulemekcharm er a Saul? Sel mekngit el reng el milengitehut er a Saul er a budech er a uldasu a mle sel mekngit el uldasu el ngar er a btelul ma rengul—sel reng er a chelsel el mle soal el meruul a mekngit. Sera lenguu a chedaol el reng er ngii a Jehovah, e a Saul a ulridii a osebecheklel e a mekngit el reng er ngii a mocha mesisiich el mengedereder er ngii. E le Dios a milecherei tia el reng el mo omtechei er a chedaol el reng er ngii, ma uchul e tia el mekngit el reng a okedongall el kmo “mekngit el chelid el mlodurch er a Rubak.”
MARCH 28–APRIL 3
MEKREOS EL TEKOI EL NGAR ER A BIBLIA | 1 SAMUEL 18-19
“Molemolem el Ngariou a Rengum Sel Bo Lungilbesum”
Multuil er a Reng er a Dios Obo Mchebangel a Mengedengodech el Blekeradel er a Klengar
4 Ngdi mle telkib e ngka el klekar a sib el buik a ngilsechekl el mo merael a chisel el chad er a beluu el rokir. Ngmlokedong el mo mesiou er a king e ousekool a tumetum el mo er ngii. Ngmilekodir a mesisiich el chad er a mekemad el Goliath, el ngii a kmal mle mesisiich el soldau me ngmo lmuut er a remeketeket el soldau er a Israel me te mle medakt el mengebangel er ngii er a mekemad. A lengiltii el mo mengetakl er a resoldau, e a David a mlo mesisiich er a mekemederir er a rechad er a Filistia. A rechad er a beluu a kmal mlo betik a rengrir er ngii. Te mlo melibech a chelitakl el oldanges er ngii. Uchei er tiang, e a ta er a adviser er a King el Saul a milsaod er a David el kmo ngdimlak di el “meduch loutumetum” a harp, e ngdirrek el mle “bekeul chad, e ungil soldau, e chad ra cheldecheduch, e klamiokel el chad.”—1 Samuel 16:18; 17:23, 24, 45-51; 18:5-7.
Mesang a Klekakerous er a Blekerdelir a Rechad
6 A rebebil er a rechad a mo mekedidai a rengrir e le tir el ungil a mederir, e merael a chisir, e chad er a chelitakl me a ongngak, e mesisiich, me a lechub a rechad a sorir tir. A David a mle uaisei el chad, engdi ngmillemolem el ngariou a rengul er a klengar er ngii el rokir. El ua tiang, a uriul er a lokodir a Goliath, e a King el Saul a dilu er a David el kmo ngsebechel mo bechil a ngelekel engdi ngdilu el kmo: “Ngak ak techang, ma kleblillek ng kuk ngeral ngar a Israel me ng kirek el mo bechil a ngelekel a king?” (1 Samuel 18:18) Ngera ngilsuir a David me ngmillemolem el ngariou a rengul? Ngmle medengei el kmo a rokui el blekeradel, me a duch, me aike el ileakl el techall a lengilai, e le Dios el mle ngariou a rengul e kmal millatk er ngii. (Psalm 113:5-8) A David a miltebengii el kmo aike el rokui el ungil er ngii a mla er a Jehovah el mei.—Momekesiu er a 1 Korinth 4:7.
7 A rechedal a Jehovah er chelecha el taem a melasem el mo oba klengariourreng el ua David. Ngmera el mo rutechii a rengud sel dodengei el kmo a Jehovah el kot el Ngarbab el Dios a kmal ngariou a rengul. (Psalm 18:35) Ngsoad el oltaut aika el tekoi el kmo: “Mochotii er a klengar er kemiu a klechubechub, ma blekokuiirreng, ma klengariourreng, ma delemedemekerreng, ma kllourreng.” (Kolose 3:12) Kede dirrek el medengei el kmo a bltikerreng a “diak le mead e le kedidai a rengul.” (1 Korinth 13:4) Me a rebebil sel lesekid el loba klengariourreng, e nglocha dirrek el mo sorir el mo medengelii a Jehovah. Ngdi ua diak loumerang el bechiil sechal el sebechel el mo kmeed er a Jehovah lokiu a ungil blekerdelel a Kristiano el bechil redil, me a rechad a sebechir el mo kmeed er a Dios lokiu a klengariourreng er a remesiungel.
Morriter er a Tekingel a Dios
it-2 695-696
Profet
Alta te miltutk er a chedaol reng er a Jehovah el mo profet, me nguaisei engdi te dimlak el teluchel er a chedaol reng er a bek el taem el longedecheduch. Ngbai mla er ngii a taem el le ‘metuchel’ er a chedaol reng me te mlo medengei a tekingel a Dios. (Ese 11:4, 5; Mik 3:8) Tia ngar ngii a lerirellii er tir, me ngdimlak el sebechir loreked e bai mlo ouchais aika el tekoi. (1Sa 10:10; Jer 20:9; Amo 3:8) Me tirka dimlak di loruul a ongasireng ngdirrek el rolel a longedecheduch me a rolel a loruul a tekoi a kmal mle smiich e dimlak leblekerdelir a redi chad. Tia locha uchul me a rechad a millekoi el kirir a rebebil el kmo, “te ua omerellir a reprofet.” (1Sa 10:6-11; 19:20-24, NW; Jer 29:24-32; momekesiu er a Rel 2:4, 12-17; 6:15; 7:55.) Tir el kmal ultaut osengir er a ngerechelir e bekeu el meruul er ngii a uchul me a rechad a omes omerellir el kora ngodech, el ua omerellel ngike el profet er a bo loleitel er a cheluch er a bdelul a Jehu. Tirke el ofiser er a Jehu er a bo lodengei el kmo ngika mle profet e te mlo omes a tekingel el kmal klou a ultutelel. (2Ki 9:1-13; momekesiu er a Rel 26:24, 25.) Me a Saul er a loltoir er a David e ngmlo “ua omerellir a reprofet.” Ngika mildobed a bilel e mlo blengkangk e “di diak loubail el tal sils el mo klebesei el mo tutau,” me a David a mlo sebechel chemiis er ngii. (1Sa 19:18–20:1, NW) Tia diak lebelkul a kmo, a reprofet a mle blechoel lomedobed a bilir. Ngar er aike el eru el taem el Biblia mesaod el kirel a profet el omedobed a bilel e ngouchais el kmo te mirruul el uaisei el lomekesiu er a tekoi el ngar er a ulochel a Dios. (Isa 20:2-4; Mik 1:8-11) A Saul el mlo diak loubail a locha mle olechotel a kmo ngkmal di chad, el mla mengai aika el bilel el king e kmal diak el sebechel er a klisichel a Jehovah, me a lechub e ngkuk ngar ngii a ngodech luchul me ngmlo uaisei. Me nguaisei, engdi Biblia diak louchais er tia el uchul.
APRIL 4-10
MEKREOS EL TEKOI EL NGAR ER A BIBLIA | 1 SAMUEL 20-22
“Rolel e Kede Mo Ungil Sechelei”
Mteketek a Mesisiich el Klausechelei er a Uchei er a Lemei a Ulebongel
18 Chelecha el taem, e a rudam me a rudos er kid a chuarm a kakerous el ringel. El ua tiang, a rebetok a chuarm er a meklou el telemellel a beluu me a lechub e ngmekemad. Me sel leduubech aika el tekoi, e a rebebil er kid a mengemedaol er a rudam me a rudos er kid el mo kiei lobengterir. E a rebebil a kuk olengeseu lokiu a udoud. Engdi kid el rokui a sebeched lolengit er a Jehovah me lolengeseu er tir. Me a lsekum kede mo medengei el kmo a odam me a lechub a odos er kid a mechitecheto rengul, e nglocha mo diak dodengei el kmo kede mekerang e ngera kede mo dmung. Engdi kede rokui el ngar ngii a sebeched el remuul. El ua tiang, ngsebeched el mengoit a temed lobengterir tirka el sechelid. Ngsebeched el mo ungil lorrenges er tir sel longedecheduch. E dirrek el sebeched el ousbech er a kot el soad el bades el mengelaod er tir. (Isa. 50:4) A klou a ultutelel el tekoi a sel temem el obengterir a resechelim er sel taem el tir a ousbech er kau.—Monguiu er a Osisechakl 17:17.
Morael er a Rolel a Jehovah
7 A Dios a soal a bo debekongerachel el sechelei. (Osisechakl 17:17) A ngelekel a King el Saul el Jonathan a ngklel a mlo sechelil a David. Me sel taem er a lrenges el kmo a David a mla mekodir a Goliath, e “a Jonathan a kmal mlo soal a David me ng mlo betik a rengul er ngii el di ua le betik a rengul er a di ngii.” (1 Samuel 18:1, 3) A Jonathan a dirrek el silebedii a David el kmo a Saul a soal el omekoad er ngii. Ma uriul er a lechiis a David, e ngmlo kebtech ngii ma Jonathan e rirellii a telbiil er a delongelir. A Jonathan a kileed e ngoridii a klengar er ngii er a bo longedecheduch er a Saul el kirel a David, engdi a uriul e tirka el teru el sechelei a mlo kebtech e liluut el smisichii a deluill er tir. (1 Samuel 20:24-41) Ngar er a ulebongel el klasoes er tir, e a Jonathan a millisiich er a David e “menglou er a rengul er a ulekerreuil a Dios.”—1 Samuel 23:16-18.
w09 10/1 25-26 par. 11
Lomelemii a Ungil el Klausechelei er a Chelsel Tia el Diak a Bltikerreng er Ngii el Beluulechad
11 Moba blakerreng el bedul a sechelim. A Salomon a milluches el kmo: “A sechelid a di blechoel el oubltikerreng, e a ta er kid el sechal a ngosukid er a chelebuul.” (Osisechakl 17:17) Sera loluches aika el tekoi, e nglocha millatk er sel klausechelei er a demal el David, me a Jonathan. (1 Samuel 18:1) A King el Saul a mle soal a ngelekel el Jonathan a bo leking er a beluu er a Israel. Engdi a Jonathan a kilengei er sel tekoi el kmo a Jehovah a mla ngiltii a David el mo king. Me a Jonathan a dimlak el ua demal er a Saul el mlo mechechei er a David, er a lengai a chetengakl me a lechub e ble lemereched el mlo oumerang a klsuul el tekingel a demal. (1 Samuel 20:24-34) Me kid kede ua Jonathan, el dmeu a rengud a lsekum a resechelid a mo er ngii a ngerechelir er a chelsel a ongdibel? Kid kede mo mengelaod e olengeseu er a resechelid sel bo lechelebangel a ringel? Kid kede mereched el mo oumerang a mekngit el tekoi el medung el kirir a resechelid? Me a lechub e kede mo ua Jonathan el oba blakerreng el mesebechakl er a resechelid?
Morriter er a Tekingel a Dios
Omesodel a Babier er a Kot el Samuel
21:12, 13. A Jehovah soal kid a bo dousbech a omelebedebeked ma dachelbid el mo outekangel a meringel el tekoi er a chelsel a klengar er kid. Ngmla meskid a chedaol el Tekingel, el meskid a llomeserreng, ma klemedengei ma duch er a uldasu. (Osisechakl 1:4) Ngdirrek el sebeched el osiik a ngesou er tirke el mla metutk el mechuodel el Kristiano.
APRIL 18-24
MEKREOS EL TEKOI EL NGAR ER A BIBLIA | 1 SAMUEL 23-24
“Moba Kllourreng el Mengiil er a Jehovah”
Multuil er a Reng er a Dios Obo Mchebangel a Mengedengodech el Blekeradel er a Klengar
8 A David a dimlak lekengei el melemall er a Saul. Ngullecholt er a klaumerang ma kllourreng, e mle dmeu a rengul el mechei a rokui el tekoi er a chimal a Jehovah. Uriul er a king er a ltobed er a ii, e a David a ulemekedong el mo er ngii el kmo: “Ma Rubak bo lomiich el kmo ngtecha er kid a mekngit! Bo lomals er kau er chomerellem el kirek, ele ngak a kmal diak bo ktemellau.” (1 Samuel 24:12) Altang mle medengei el kmo a Saul a mle cheleuid a omerellel, engdi David a dimlak lolasem el di ngii el melaitechei; ma ka ble lemekngit a omelekingel el mo er a Saul ma lechub e lullekoi a mekngit el kirel. Ngmla er ngii a lmuut el bebil er a taem, el David a ulerreked er ngii me lak bo loruul a tekoi el mo melaitechei. Ngbai, mle ultuil er a Jehovah el mo omeklemalt a tekoi el kirel.—1 Samuel 25:32-34; 26:10, 11.
A Blekeradel el Mchelebangel Ngomekrael er a Klengar er Kau?
A ongedei el tekoi el sebeched el ousbech er ngii a okiu sel dongiil er sel temel a Jehovah er a bai dousbech a tekoi el mo melodech er a blekerdelel a klengar er kid el ngii el tekoi a diak el mengai a uchetemel er a bades. A disaiplo el Jakobus a milluches el kmo: “Mcherrengelii a urerel a ducherreng, el kirel me bo mcherrungel el diak a tellemall ma ngelsonges er kemiu.” (Jakobus 1:4) A ducherreng a sebechel el mo ‘churrengelii a urerel’ a lsekum kede kongei el chobengelii a omelsemai e diak dolasem el osiik er a beot el rolel el ousbech a tekoi el diak loltirakl er a bades el lorreched el mesmechokl a mondai. Seikid e a klaumerang er kid a mo measem e obiich, e dirrek el obeketakl a klisichel. A Josef me a David a uleba tiaikid el rolel a ducherreng. Te dul dimlak losiik a mereched el rolel a loruul a tekoi el mo uchul a kngtil a rengul a Jehovah. Te bai mle meduch a rengrir el outekangel a meringel el blekeradel er a klengar er tir. Te dirrek el milengiil er sel ungil el temel a Jehovah, me ngkmal mlo klou a klengeltengat el lengilai e le tir el mle meduch a rengrir el outekangel! Me a Jehovah a mlo ousbech er tir el omekerreu, e dirrek el omekrael er a rechedal.—Genesis 41:39-41; 45:5; 2 Samuel 5:4, 5.
Kid me kede dirrek el mo chelebangel a tekoi el sebechel el mo uchul e kede mo osiik a rolel e mesmechokl er ngii el diak loltirakl er a bades. El uai tiang, kau ke omelechesiu er kau el mechitechetong a rengum e le ngdiak ko betik er a chad el sebechem el mo bechil? A lsekum e nguaisei, e mongeroid er kau er a ngii di el tekoi el sebechel el mengesuseu er kau el mo melemall er a llechul a Jehovah el kmo bo bechiil el di “ngara Rubak.” (1 Korinth 7:39) Kau ke chelebangel a mondai er a chelsel a chebechiielem? Lak becherei a uldasu er tia el beluulechad el di melisiich dertel a chebechiil me lomekrael er kau, e molasem el dmak kau me a bechim el outekangel a ngii di el mondai el mchelebangel. (Malakai 2:16; Efesus 5:21-33) Ngmeringel er kau el omekerreu er a telungalek er kau el telemellel a tekoi er a keizai a uchul? A dongiil er sel temel a Jehovah e nguldimukl er a dongeroid er kid er a ngii di el rolel a omengereker el ngii a diak el melemalt. (Psalm 37:25; Hebru 13:18) Nguaisei, kid el rokui a kired el mo meduch a rengud el outekangel a ngii di el omelsemai er a klengar, e msang a Jehovah a ungil el uchul e ngdmeu a rengul el omekngeltengat er kid. Me sel doruul el uaisei, e ngmo ulterekokl a rengud el mengiil er sel ungil el temel a Jehovah el mo mesmechokl a rokui el tekoi.—Mika 7:7.
Morriter er a Tekingel a Dios
Lak Becherei a Ngii Di el Tekoi Me Lorrob er Kau Me Lak Mnguu a Nguked
11 Me a lsekum e ngmo blak a rengud lolecholt er a bltikerreng me a ungil lomeruul, e ngdiak di demereched el mo mechechei. A Tekingel a Dios a kmo: “A bltikerreng a klou a rengul e bekokuii. Ng diak le mechechei.” (1 Korinth 13:4) Me ngkmal kired el melasem el mo omes a tekoi el ua osengel a Jehovah, e seikid e ngdiak debecherei a chelechei me bo el blekerdeled. Ngkired lomes er a rudam me a rudos er kid el ua klekedellel a bedengel a ta el chad, el ngii a ongdibel. E a Biblia a kmo: A “lsekum ng modanges a tang, e a ikel bebil me ng mo obengkel er a deurreng.” (1 Korinth 12:16-18, 26) Me a lsekum ngduubech a ungil tekoi el mora ta er a odam er kid, e ngmo dmeu a rengud el kirel el diak bo demechechei er ngii. Ka di molatk er a ungil kerebil a ngelekel a King el Saul el Jonathan. A Jonathan a dimlak bo lemechechei er a David er sera lemengilt el mo king el dimlak el ngii a mengilt. Ngdirrek el bai millisiich e olengeseu er a David. (1 Samuel 23:16-18) Me kid, ngsebeched el mo ua omerellel a Jonathan el mera el ulechotii a bltikerreng me a ungil lomeruul?
APRIL 25–MAY 1
MEKREOS EL TEKOI EL NGAR ER A BIBLIA | 1 SAMUEL 25-26
“Kau, Ke Di Mereched el Mo Meruul a Tekoi er a Uchei er a Omolatk?”
ia 78 par. 10-12
Ngulechotii a Llomeserreng
10 Ngmle uangera omerellir tirka el soldau el mo er tirke el mengkerengel a sib? Ngkmal di beot er tir a melai a kelir el sib er a delebechel, engdi ngkmal dimlak loruul el uaisei. Te bai mle ua cheotelel a mats el mle iliuekl er a chermel me a remesiungel a Nabal el omekerreu er tir. (Monguiu er a 1 Samuel 25:15, 16.) Ngmle betok a sebechel duubech el mora sib me a remengkerengir. Ngmle betok a sebechel me oldechelakl er tir, me a dirrek el oliochel er a Israel el mlara dimes a mle betok a rechad er a ngodech el beluu me a remerechorech el merael er ngii.
11 Nglocha kmal mle meringel er a David a metik a kelir tirka el soldau er ngii er a lengar er a ked. Me a ta er a klebesei e ngulderecheterir a reteruich el chad el mo olengit a ngeso er a Nabal. A David a ngileltii a kmal ungil taem el mo mengedecheduch er ngii. Tia mle temel a mur er omelamk el sib, me ngmle siukang el doruul a meklou el blengur e dorous. A David a mle ungil ngmilt a tekingel e uluusbech a tekoi el ullecholt omengull. Ngika di mle ngii lomekedong er ngii el “ngelekem el David” e le nglocha millatk el kmo ngika kmal klou er ngii. Me ngmilekerang a Nabal?—1 Sa. 25:5-8.
12 Ngika kmal ngilasech a rengul! Ngike el mesiou el dulsaod er ngii er a uchei a dilu er a Abigail el kmo ng “uleltuub er tir.” A Nabal a mlo mengeremrum el kirel a kelel, imelel, me a techel a chermel. Nguleltuub er a David e omes er ngii el diak a ultutelel, e ulemekesiu er ngii er a mesiou el chiliis. Tia el uldesuel a dimlak el kakerous er a uldesuel a Saul el kirel a David, el ngii a kmal uluuketui er a David. Tirka el terung a kmal dimlak loba osengel a Jehovah. A Dios a kmal mle betik a rengul er a David e ulemes er ngii el kmo ngking er a Israel er a ta er a klebesei, el dimlak lomes er ngii el omtok el mesiou.—1 Sa. 25:10, 11, 14.
ia 80 par. 18
Ngulechotii a Llomeserreng
18 Ngngilai a ultelechakl el kirel tia el mondai e ullengit er a David me lousubes er ngii. Ngdilu el kmo ngmedengei el kmo bechil a chelsengsang el di ua belkul a ngklel, le nglocha mle soal a David a bo lutebengii el kmo, ngdiak a ngngera el rellii a bo longkekerei er ngii el mesmechokl er chouaisei el chad. Nguluuchais er a David el kmo ngoumera el kmo ngtelutk er a Jehovah e ngii uluumekemad a “mekemedil a RUBAK.” Ngdirrek el ulechotii el kmo ngoumerang er a telbilel a Jehovah er a kleking el mo er ngii le ngdilu er ngii el kmo: “RUBAK . . . le rellau el mo king er a Israel.” Ngdirrek el dilu er a David me lak lerellii a tekoi el mo uchul e ngchelsechusem a klengar er a rechad er a chimal e bo luchul a ‘kngtil a rengul ma uucherreng er a rengul,’ me a ukltkel bo loldechelakl er ngii. (Monguiu er a 1 Samuel 25:24-31.) Aika el ungil tekingel a kmal rutechii a reng!
Morriter er a Tekingel a Dios
ia 80 par. 16
Ngulechotii a Llomeserreng
16 Tiang ngbelkul a kmo a Abigail a ulemtok er a blechebechel a derreder e mlo omtok er a chederedellel a bechil? Ngdiak. Lak mobes el kmo a Nabal a mle mekngit a omerellel el mora ngellitel el mesiungel a Jehovah, el ngii el omeruul a mle sebechel mo uchul okodellir tirke el rokui el chedal a telungalek er ngii el dimlak a telemellir. A Abigail a lsekum e ngdimlak lokerang, e ngika ngdiak bo lechelsechusem er a kngtil a bechil? Ngar er a chelsel tiakid el blekeradel e ngngiluu a Dios el bdelul el mo ngaruchei er a bechil.