Reference el kirel a Subeled er a Miting er a Klengar me a Omesiunged
JANUARY 2-8
MEKREOS EL TEKOI EL NGAR ER A BIBLIA | 2 KING 22-23
“Ngera Uchul Me Ngungil a Lengariou a Rengud?”
w00 9/15 29-30
Ngariou a Rengul Josia Uleba Kengei er a Jehovah
A rechad a ulemuchel er a di tutau el meruul a telemellel a templo. A Josia locha kmal uleba omereng el saul le te mirruul aika el tellemall el leriruul a ruchelel. Me a ureor a merael e a Safan a me ouchais er ngii a tekoi. Tiang ngerang? Ngika oba iluil el babier! Ngouchais er ngii el kmo a Ngarbab el Prist Hilkia a mla metik er a “babier er a Llach er a RUBAK, sel Llach el Dios a ngiluu el msa Moses.” (2 Kronika 34:12-18) Tia locha sel original copy er a Llach!
Josia kmal soal mo medengei a bek el tekoi el llechukl er ngii. A Safan a menguiu e ngii a kerekikl lorrenges el kmo ngera el llach a melutk el kirel ngii me a rechedal. A kmal ileakl el tekoi er a uldesuel a kmo, a Llach a mesaod er a klungel a ultutelel a mera el omengull me a blals me a blebaol el mo duubech a lsekum te mora klsuul el omengull. Me a Josia er a lutebengii el kmo te diak loltirakl a rokui el llechul a Dios e ngsildelii a bilel e dmu er a Hilkia, Safan, me tirke el bebil el kmo: “Morael el mo kmer a tekoi er a RUBAK el kirek ma kirir a rokui el chad er a Juda el kirel a ikel osisechakl er tial babier. A RUBAK a kesib a rengul er kid ele rucheled a dimlak leruul a ikel kirel ruoll el lolekoi tial babier.”—2 King 22:11-13; 2 Kronika 34:19-21.
w09 6/1 16-17 par. 20
Moba Blakerreng el kirel a Blil a Jehovah!
20 Sel taem er a loruul er a klou el ureor a King el Josia, e a Ngar er a Bab el Prist el Hilkia “a miltik er a babier er a Llach er a RUBAK, sel Llach el Dios a ngiluu el msa Moses.” Me ngngiluu el msang a melechesel a king el Safan me ngmilenguiu er ngii el mo er a Josia. (Monguiu er a 2 Kronika 34:14-18.) Ngera dilubech? A king a di mle mereched el sodelii a ikrel a bilel e lmangel, e dilu er a rechedal me loluluuch el mo er a Jehovah. Ngoeak a profet el dil el Hulda, e a Dios a milsumech a kerrekerilel el mo er a renged er a Juda el kirel a rolel a omengull el bleob el mileketmokl er a chelsel a beluu. Engdi a Jehovah a miles a ungil el omerellel a Josia er a lekikidii a rengedel er a omengull el bleob el chelid. Me alta e a meklou el chelebuul a mla moterekokl el mo er tia el renged el rokir, engdi a Josia a millemolem el uleba kengei er a Jehovah. (2 Kronika 34:19-28) Ngera kede suubii er tia el tekoi? Ngsoad el mo ua Josia el mereched el oltirakl a ulekrael er a Jehovah. E mo kerekikl el orrenges a uleklatk me bo lsebeched el diak bo dechelsechusem er a rumtok a mera el osisechakl me a ultok el ngii a sebechel el choitechetur a omengull er kid. Me kede oba ulterekokl el reng el kmo a Jehovah a sebechel el mes a blakerreng er kid el kirel a mera el omengull el ua tekoi el dilubech el mo er a Josia.
Morriter er a Tekingel a Dios
Ngsebechem el Mo Mesisiich el Diak Lultuil er a Okurullem
Altae ngmle mekngit a blekerdelel a klengalek er ngii, engdi a Josia a milruul aike el ungil er a osengel a Jehovah. Ngkmal mle ungil a omengederederel ma Biblia a dmu el kmo: “Ngdirekak a king ra ngara mong el ua ingii el milsiou ra Rubak el oba rengul el rokir ma uldesuel el rokir ma klisichel el rokir, e olengesenges a rokuil llach ra Moses; e dirrek isel mei e ngdirekak a king el mo ua ingii.”—2 King 23:19-25.
Ngkol ua ngera el ungil el okesiu a lerirellii a Josia el kirir tirke el mle chelebangel a mekngit el taem er a klengalek er tir! Ngera el klubeled a sebeched el ngmai er a ungil el kerebil? Ngerang a ngilsuir a Josia el mo ngiltii a ungil el rael e melemolem el ngar er ngii?
JANUARY 9-15
MEKREOS EL TEKOI EL NGAR ER A BIBLIA | 2 KING 24-25
“Lak Mobes el Kmo Ngngera el Taem a Dekiei er Ngii”
Sils er a Kerrekerilel a Jehovah a Kmedang!
2 A ulochel a Sefania a millisiich er a uldesuel a ngeasek el Josia el kirel a klungel a ultutelel a bo longikiid er a Judah er a diak leklikiid el omengull. Engdi, a omerellel a king el mo mengikiid er a beluu er a klsuul el klechelid a dimlak longeroid er a rokui el delengerenger er a delongelir a rechad ma lechub ngubetii a kngtil a King el Manase, el demal a demal, el ngike el “milkekii a Jerusalem er a rsechir a rediak telemellir.” (2 King 24:3, 4; 2 Kronika 34:3, NW) Mada a sils er a kerrekerilel a Jehovah a ulterekokl el mei.
Omesodel a Babier er a Jeremia
Ngar er sel ongeteruich ma ta el rak er a omengederederel a Sedekia e ngmle 607 B.C.E. Ma King el Nebukadnesar er a Babilon a mla mo 18 el buil er a liliueklii a Jerusalem. Ngar er a ongeuid el sils er a ongeim el buil er a ongeteruich ma ongetiu el rak er a omengederederel a Nebukadnesar, e a Nebusaradan, el mengeteklel a klsoldau, ‘a siliseb’ er a Jerusalem. (2 King 25:8) A Nebusaradan a locha mle sebechel el ngar er a kiamp er ngii er a ikrel a cheuatel er a mats, e omes er a blekerdelel a beluu e melib aike el soal el mo meruul. A edei el sils er a uriul, el ngar er a ongeteruich el kebesengil a buil, e ng ‘soiseb’ er a Jerusalem. Ma “cheuatel a mloiubek.”—Jeremia 52:7, 12.
Morriter er a Tekingel a Dios
Omesodel a Babier er a Ongeru el King
24:3, 4. E le Manase el mle chelsechusem er a rasech a uchul, ma Jehovah “a diak el sebechel el ousubes” er a Judea. A Dios a mengull er a rsechel a diak a telemellel el chad. Ngsebeched el mo ulterekokl a rengud el kmo a Jehovah a mo melaitechei er a rsechel a diak a telemellel el chad e mo olekngemed er tirke el mlo uchul a kodellir.—Psalm 37:9-11; 145:20.
JANUARY 16-22
MEKREOS EL TEKOI EL NGAR ER A BIBLIA | 1 KRONIKA 1-3
“A Biblia Ngdelbochel Ada Ngmelekoi a Mera el Tekoi”
w09 9/1 14 par. 1
Adam me a Eva Te Mle Mera el Chad?
El ua tiang, kede omes a ruldidellel a rsechir a Rechijudea er a babier er a Kot el Kronika er a 1 el mora 9 el bliongel me a 3 el bliongel er a babier er a Lukas. Ngmeskid a komakai el ruldidellel a rasech er a 48 me a 75 el telecheroll. A Lukas a mesaod er a uldidellel a rsechel a Jesus Kristus e a Kronika mesaod a ruldidellel a rsechir a reking me a reprist er a renged er a Israel. Aika el teblo lomesodel a ruldidellel a rasech a debetik a ngklel a Salomon, David, Jakob, Isak, Abraham, Noah, me a Adam. Aika el rokui el ngakl el debetik er aika el teblo lomesodel a uldidellel a rasech, a mesaod er a rechad el mera el mle chad, e a Adam ngike el kot el mera el chad el ngar tia el list.
Noah ma Ieleb—Ngmera el Dilubech, el Diak el Delbochel el Cheldecheduch
A eru el cheldecheduch el mesaod er a uldidellel a rasech er a kebliil el ngar er a Biblia a olecholt el kmo a Noah a mle mera el chad. (1 Kronika 1:4; Lukas 3:36) A Esra ma Lukas, el du el milluches aike el cheldecheduch er a uldidellel a rasech, a kmal mle kerekikl er a omesubir er a suobel. A Lukas a milluches er a uldedelid el klengelakel er a Kristus el mo er a Noah.
w09 9/1 14-15
Adam me a Eva Te Mle Mera el Chad?
Molatk er a osisechakl er olubet el kmal mekreos er a rengrir a rechad lomais el ngar er a ikelesia. Tia el osisechakl a kmo a Jesus Kristus a mle kongei el tongetengii a cherrungel el klengar er ngii el olubet lolsobel er a rechad er a kngterir. (Mateus 20:28; Johanes 3:16) Kede medengei el kmo a olubet a char el mekekad el melubet me a lechub e kede olluut er a tekoi el ririid. Sei a uchul me a Biblia mesaod er a Jesus el “olbatel.” (1 Timothy 2:6, BT) Olbatel er a ngerang? A Biblia kmo: “Adam a mlo uchul e a rokui el chad a mor a kodall, me ng dirrek el ua isei el Kristus a mlo uchul e a rokui el chad a mo mekiis er a kodall.” (1 Korinth 15:22) A cherrungel el klengar er a Jesus el mlodars el tenget a kerresel osisiu el cherrungel el klengar lurridii a Adam er a lebora klengit er a Eden. (Rom 5:12) Me ngbleketakl el kmo a lsekum a Adam a diak lemera el chad e a olubet el tengetengel a Kristus a di mo diak a ultutelel.
Morriter er a Tekingel a Dios
it-1 911 par. 3-4
Uldidellel a Rasech
Ngklir a Redil. Ngar ngii a ungil luchul me a lebebil e a redil a uldimukl a ngklir er a uldidellel a rasech. Ngar er a Genesis 11:29, 30, e ngomasech er a Sarai (Sara) e le telbiil uldidellel a rasech a mo oeak ngii, el diak loeak a kuk ta er a bechil a Abraham. Milka a dirrek el lomasech er ngii le nglocha ngii el delal a delal a Rebeka el bechil a Isak. A Isak a dimlak el kirel mo melai er a bechil er aike el renged el iliuekl er tir me tia ochotii el kmo a Rebeka chedal a Abraham. (Gen 22:20-23; 24:2-4) E ngar er a Genesis 25:1, e ngomasech er a ngklel a Ketura el ngike el mlo oeakuriul el bechil a Abraham. Tia ochotii el kmo a Abraham a liluut el mo bechiil er uriul er a lemad a Sara, me ngii a dirk sebechel omeob er a rengalek er a betok er a 40 el rak er uriul er a Jehovah uleak a mengasireng el rolel e rirellii el mo sebechel loungalek. (Rom 4:19; Gen 24:67; 25:20) Ngdirrek louchais er a klauchad er a rechad er a Midian me a Arab el mora rechad er a Israel.
Lea, Rahel, me a re kankiubain er a Jakob me a rengelekir el sechal a dirrek el lomasech er tir. (Gen 35:21-26) Tia ngosukid el mo medengei a belkul a omerellel a Dios el mo er tirka el ngelekir. Tiakid osisiu el luchul me kede metik a ngklir a relmuut el bebil er a redil er aike el omesodel a uldidellel a rasech. A lsekum a chutem a lorous loeak tir, e a ngklir a locha bo lluches. (Ule 26:33) Me nguaisei engdi a Tamar, Rahab, me a Ruth a ileakl. A derta er tir a dilubech a ileakl el tekoi er a klengar er tir el mlo uchul e te mlo uldimukl er a ruldidellel a rsechel a Mesias el Jesus Kristus. (Gen 38; Rut 1:3-5; 4:13-15; Mt 1:1-5) A lmuut el bebil er a redil lomasech er tir a debetik a ngklir er a 1 Kronika 2:35, 48, 49; 3:1-3, 5.
JANUARY 23-29
MEKREOS EL TEKOI EL NGAR ER A BIBLIA | 1 KRONIKA 4-6
“A Nglunguchek, Ngera Ngouchais el Kirek?”
w10 10/1 23 par. 3-7
Ngike el ‘Onger a Nglunguuch’
Jabes a mle chad er a nglunguuch. Ngulemuchel er a nglunguchel lolengit er a klengeltengat er a Dios. E a uriul e ngullengit edei el tekoi el ochotii el kmo ngmui a klaumerang er ngii.
A kot e a Jabes ullengit el kmo: “Mkilungii a beluak.” (10 el kekerei el bades) Ngika dimlak lengibes a rengul er a chetemel a kuk ta er a chad. E ngbai ongtil a locha mle kirir a rechad. Nglocha ullengit el kmo lolemolem el ngar ngii a budech sel longlou er a chetemel me bo lsebechir a rebetok el mengull er a Dios el mo kiei er ngii.
Ongerung, e ngullengit er a Dios me bo ‘lobengkel.’ Tia mesaod el kirel a klisichel a Dios lousbech er ngii lolengeseu er a remengull er ngii. (1 Kronika 29:12) A Jabes ulemes el bedul a Dios el ngii a diak el kedeb chimal el kirir tirke el lolecholt er a klaumerang er tir er ngii.—Isaia 59:1.
Ongedei, a Jabes a milluluuch el kmo: “Mkekerengak er a ngii di le ngerang el mekngit el sebechel el mo uchul a ringelek.” Tia el tekingel el kmo, “sebechel el mo uchul a ringelek” a diak losaod el kmo Dios bo lecheroid a ringel, e ngbai mesaod el kmo lak bo lemechitechut a rengul er a mekngit el ues.
A nglunguchel a Jabes ochotii el kmo ngulemekerreu el kirel a mera el omengull me a klaumerang er ngii er Ngike el lorrenges a nglunguuch. Me ngmilekerang a Jehovah? Tia el kedeb el cheldecheduch a lorekui er ngii el kmo: “Ma Dios a milsa sel lullengit er ngii.”
Morriter er a Tekingel a Dios
Omesodel a Babier er a Kot el Kronika
5:10, 18-22. Sera Leking a Saul, e aike el kebliil el ngar er a ongos er a Jordan a uldelecheklterir a Rehagrait, el ildisir a resoldau er tir a mle eru el chachisois er a resoldau er a Saulus. Tia mlo uaisei e le tirke el mesisiich el chad er aike el kebliil a uluumerang er a Jehovah e ulemes el bedulngii el kirel a ngeso. Me bo demui el ultuil er a Jehovah el ngar er tia el klaumekemad er a klereng el omtok er a recherreued.—Efesus 6:10-17.
JANUARY 30–FEBRUARY 5
MEKREOS EL TEKOI EL NGAR ER A BIBLIA | 1 KRONIKA 7-9
“Ngsebechem el Kutmokl a Meringel el Ngerachel Loeak a Ngelsuil a Jehovah”
Omesodel a Babier er a Kot el Kronika
9:26, 27. Tirke el mengkar a siseball el Levait a mle klou a ngerechelir. Te ullab a kisel aike el tuangel el mo er a chedaol el basio er a chelsel a templo. Te mlo chemolt el sebechir el oungerachel el omkais a siseball er a bek el sils. Kid a mlukngerachel el mo omerk el mo er tirke el rokui el chad el ngar er a beluad el olengeseu er tir el mo mesiou er a Jehovah. Ngdiak bo deuai tirke el mengkar a siseball el Levait el mle bekongerachel e oterekekill?
w11 9/15 32 par. 7
Ngsebechem el Mo Uai a Finehas Sel Bom Chelebangel a Omelsemai?
A Finehas a kmal mle oberaod a ngerechelel er a Israel er a irechar. Engdi ngoeak a blekeu, klemedengei, me a ulsisel er a Dios e ngmle sebechel remuul. A Jehovah kilengei a meringel urerel el kirel ongdibel er ngii. A bekord el 1,000 el rak er uriul e a Esra mlukreng el mo meluches el kmo: “A Finehas el ngelekel a Eleasar a mle merreder er tir er a ngar a mong; a RUBAK a ulebengkel.” (1 Kr. 9:20) A rokui el omekrael a ureor er a cheldebechelel a Jehovah bo leuaisei, chochoi rokui el Kristiano el mesiou er a Jehovah loba blakerreng bo leuaisei.
Morriter er a Tekingel a Dios
w10 12/1 29 par. 6
Mongitakl el Mo er a Jehovah!
6 Nguaisei, me ngokiu a reprofet er a Jehovah e ngulemekrael er a remengull er ngii el mo oldanges er ngii el okiu a chelitakl. Tirke el mle chedal a telungalek er a remo prist, el tir a mle chad er a chelitakl, a dimlak el kirir el meruul aike el ureor el mle kirir a re Levait el meruul, me bo el sebechir el ousbech er a klou el temir el melibech a chelitakl, e dirrek el mesuub el mengitakl.—1 Kronika 9:33.
FEBRUARY 6-12
MEKREOS EL TEKOI EL NGAR ER A BIBLIA | 1 KRONIKA 10-12
“Msisichii a Urungulem el Soam el Meruul er a Soal a Dios”
“Mosisecheklak el Mo Meruul a Soam”
12 Ngdirrek el sebeched el oukerebai er a omerellel a David el uleltirakl a omellach. A omellach a di ua uldasu me a lechub e ngklemerang el ngosukid el mo medengelii a uldesuel a Jehovah e mo ungil melilt a tekoi. Me ngsebeched el mo ua David el omtab a belkul a llechul a Jehovah. El ua tiang, a ta el taem e a David a uluureng el melim a ralm er a chido er a Bethlehem, engdi a rechad er a Filistia a mla er tia el mats. Me a retedei el chedal a David a kilengei el mo ocherur a kodall el mo melai a ralm er sel chido, engdi a David a dimlak lolim e “chilubel el odars el mor a RUBAK.” E ngera uchul? A David a dilu el kmo: “Ngkmal diak kulim a ikal ralm, ele ngdi ua kulim a rsechir tirkal chad el klengar er tir a mlo ocherur a kodall!”—1 Kronika 11:15-19.
13 A David a mle medengelii a llach el kmo a rasech a diak el kall e kirel el mechubel er a chutem. Ngdirrek el mle medengelii a uchul me a Jehovah a millekoi er tia el llach, e le ngmle medengei el kmo: “A klengar er a bek el outeliil a ngar a rasech.” Engdi tiang a di ralm el diak el rasech. Ngera uchul me ngdimlak lolim? Ngdimlak lolim e le ngmle medengelii a omellach el mengai er tia el llach. A rasech a mekreos er a osengel a Jehovah. Me a David a ulemdasu el kmo a bo lolim er tia el ralm, e ngdiak lolecholt a omengull el kirel a rsechir tirka el chad el kilengei el mo ocherur a kodall el mo melai er ngii. Me ngdimlak lolim, ngbai ulechebelii er a chutem.—Levitikus 17:11; Duteronomi 12:23, 24.
Bechei a Llechul a Dios me a Omellach er Ngii Me Loksongii a Ukltkem
5 A lsekum ngsoad a llechul a Dios a lengesukid e ngkmal kired el meruul a lmuut el betok er a di donguiu me a lechub e di dodengei. Ngkired el mo betik a rengud er a llechul, e mo oba omengull el kirel. A Biblia a melekoi er kid el kmo: “Mouketui a mekngit, e le betik a rengmiu er a ungil.” (Amos 5:15) Engdi ngmekera doruul el uaisei? Ngkired el mesuub el mo omes a tekoi el ua osengel a Jehovah. Ka molatk er tiaikid el rolel, ngkora diak lungil a cheliuem me a toktang a dmu er kau el kmo ke mo menga ungil er a bedenged el kall, e mo exercise, e meruul a bebil el omelodech er a klengar er kau. Me kultirakl a tekingel e mlo mesa klungiolel! Me ngua ngera uldesuem el kirel a tekingel ngika el toktang?
6 Me ngdi osisiu, ngike el Ulemeob er kid a mla meskid a llach el mo omekerreu er kid er a telemellel a klengit, e rullii a klengar er kid el mo ungil. El ua tiang, a Biblia osisecheklid el kmo ngdiak el kired el omulak, e mengeblad, e merechorech, e meruul a deleboes me a tekoi er a uldikel me a koadelchad, me a lechub e ngtekoi er a olai. (Monguiu er a Osisechakl 6:16-19; Ocholt 21:8) Me sel bo desa klungiolel a dolengesenges er a Jehovah, e a bltkil a rengud el mo er ngii me a llechul a mukeroul.
Morriter er a Tekingel a Dios
(1 Kronika 12:33, NW) A rechad er a Sebulun a mla er ngii a re 50,000 er tir el mle sebechir el mo oumekemad, kltmokl lousbech a bek el bedengel a klekedall er a mekemad, el molengeseu er a David loba cherrungel el blakerreng.
it-1 1058 par. 5-6
Rengul a Chad
Mesiou Loba “Rengud el Rokir.” A chaidirengul a chad a kirel cherrungel me lolemolem el ngar, engdi rengul a chad a sebechel mo teloadel. A David a milluluuch el kmo: “Mrellii a renguk el mo cherrungel el meluu er a ngklem,” el belkul a kmo a chad a sebechel mo blii a bltkil a rengul me a omeluu er ngii. (Psa 86:11, NW) Ngii el chad a ‘teleuadel a rengul’ e “ouralmsils” er a omengull er ngii el mora Dios. (Psa 119:113; Och 3:16) A chad a dirrek el sebechel mo “teblo rengul,” melasem el mesiou er a reteru el mastang, me a lechub e ngmelekoi er a tekoi engdi uldesuel omdasu er a tang. (1Kr 12:33, NW; Psa 12:2, NW, ftn) Jesus a kmal uluuketui er a recheblad el uaisei el chad.—Mt 15:7, 8.
A chad el soal lodeuir a rengul a Dios a diak el kirel teloadel a rengul me a lechub e le teblo rengul, e ngbai kirel mesiou er ngii loba rengul el rokir. (1Kr 28:9) Tia ousbech er a meringel lureor e le rengud a cheblad e soal meruul a mekngit. (Jer 17:9, 10; Gen 8:21) Aike el ngosukid el melemolem loba rengud el rokir el mesiou er a Dios a: doluluuch el mera el ngar er a rengud el mo er ngii (Psa 119:145; Kle 3:41), deblechoel el mesuub er a Tekingel a Dios (Esr 7:10; Osi 15:28), deblak a rengud el teloi er a ureor lomerk er a ungil chais (momekesiu er a Jer 20:9), e deteloi er tirke el loba rengrir el rokir el mesiou er ngii.—Momekesiu er a 2Ki 10:15, 16.
FEBRUARY 13-19
MEKREOS EL TEKOI EL NGAR ER A BIBLIA | 1 KRONIKA 13-16
“Ngmo Ungilbesud Sel Doltirakl a Ulekrael”
Kau Ke Oker el Kmo, “Ngngar er Ker a Jehovah?”
12 Uriul er a ark er a telbiil er a lemoluut el mo er a Israel me lengar er a Kiriath-jearim el betok el rak, e a King el David a mle soal el nguu el mo loia er a Jerusalem. Ngmilengedecheduch er a remechuodel lullab chomerredel er a rechad e dilu el kmo a Ark er a Telbiil a mo mengukl ‘a lsekum ng mle ungil er tir e a Jehovah a kongei er ngii el tekoi.’ Engdi ngdimlak bo lungil el osiik el mo oterekeklii a uldesuel a Jehovah el kirel tia el tekoi. Okmo ngmerruul el uaisei, e ngulterekokl el dimlak lolengasech er a Ark er a Telbiil er a kareta. Ngulterekokl el locha lulengol er ngii a rengelekel a Kohath el chad er a Levi, el ua lullekoi a Dios el kmal bleketakl. Ma lta David a mle blechoel el loker er a Jehovah el kirel a ulekrael, e tiaikid el taem eng dimlak loruul er ngii er a mera el rolel. Tiang a mlo uchul a tellemall el dilubech. A David a kilengei er a uriul er a lolekoi el kmo: “A Jehovah el Dios er kid a mlo omtok er kid, e le kid el dimlak dosiik er ngii loltirakl er a mera el rolel.”—1 Kronika 13:1-3, NW; 15:11-13; Ulecherangel 4:4-6, 15; 7:1-9.
Kau Ke Oker el Kmo, “Ngngar er Ker a Jehovah?”
13 Ma rechad er a Levi er a bocha lolai er a Ark er a telbiil er a blil a Obed-edom el mo er a Jerusalem, e a chelitakl el llilechesii a David a lulngitakl er ngii. Ngmle uldimukl er a uleklatk el mera el lullechesuar er a chelsel a rengrir el kmo: “Mosiik er a Jehovah ma klisichel, bo blechoel el losiik er a medal. Molatk aike el ungil el omerellel el bla lruul, ma ike el ongasireng er ngii ma ike el kerrekerilel el tuobed er a ngerel.”—1 Kronika 16:11, 12, NW.
Morriter er a Tekingel a Dios
Mongull er a Jehovah, el King el Diak a Uchelel me a Ulebengelel
14 A David a ngiluu a Blil a Telbiil el mo er a Jerusalem. Me ngar tia el taem er a klou el deurreng, e tirke el Levait a milengitakl a chelitakl er a odanges e dillii a tekoi el llechukl er a 1 Kronika 16:31 el kmo: “Mouchais er a bek el beluu el kmo, ‘A RUBAK a king.’” Me alta e a Jehovah a King el diak a uchelel me a ulebengelel, engdi ngdirrek el sebeched el dmu el kmo, a Jehovah a King, sel lousbech er a klisichel me a lechub e ngmelutk er a ta er a chad el mo omtechei er ngii. Me ngkmal klou a ultutelel a bo dodengelii a rolel e a Jehovah a mo King. Me a uchei er a lemad a David, e a Jehovah a tilbir el kmo a omengederederel a David a mo melemolem el diak a ulebengelel. Ngdilu el kmo: “Ngak a mo dolemii a ta er a ruldidellel a rsechem el mo king e mo smisichii a rengedel.” (2 Sa. 7:12, 13) E tia el telbiil a tilaut er sera le be lduum a ‘uldidellel a rsechel’ a David er a betok er a 1,000 el rak er a uriul. Me ngikang techang, e mlo King er oingerang?
FEBRUARY 20-26
MEKREOS EL TEKOI EL NGAR ER A BIBLIA | 1 KRONIKA 17-19
“Molemolem Loba Deurreng Alta Ngdiak el Sebechem el Remuul Aike el Soam”
w06 10/1 27 par. 1
Moturk a Medam er a Klungiolel a Cheldebechelel a Jehovah
A DAVID el mle Chad er a Israel er a irechar, a mle ta er a merael a chisel el chad el losaod er ngii er a bades er a Chuodel el Testament. Ngika el mengkar er a sib el chad er a chelitakl el profet e king a kmal uluumerang el ulsirs er a Jehovah el Dios. A David el kmal mle kmes a deleongel er ngii ma Jehovah a uchul me ngmlo soal el omekedechor er a blil a Dios. A choua itia el blai, ma lechub e ngtemplo, a mo olsechelel a mera el omengull er a Israel. E a David a mle medengei el kmo a omengetmokl el kirel tia el templo a mo uchul a deurreng ma klengeltengat el mo er a rechedal a Dios. Sei a uchul ma David a milengitakl el kmo: “Te ngeltengat tirkel mngilteterir, tirkel molilt er tir el mo kiei el ngar a chedaol blim. Ng mo ungil a rengmam er a ikel ungil tekoi er a blim, el klengeltengat el ngar a chedaol Templo er kau!”—Psalm 65:4.
Betik a Deurreng er Aike el Techall el Molab er Chelechang
11 Ngdi osisiu, ngsebeched el menglou er a deurreng er kid sel bo leblak a rengud el meruul aike el sebeched er a omesiunged el mora Jehovah. Bo le ‘blak a rengum’ el omerk er a klumech e bo mui el teloi a tekoi er a ongdibel. (Rel. 18:5, BT; Heb. 10:24, 25) Bo mungil kltmokl el kirel a miting me bo el sebechem el onger el ngar er a rolel e ke melisiich er a rebebil. Bo mungil kutmokl a part er kau er a miting. E a lsekum e te olengit er kau el molengeseu er a ileakl el ureor er a ongdibel e bo molab a taem e dirrek el bo el sebeched el ultuil er kau. Lak bo momdasu el kmo a ngerachel el bla mnguu a diak el sal klou a ultutelel e kmal di waste a temem. Bo meringel el oureor el menglou a duch er kau. (Osi. 22:29) Sel mongoit er a klou el temem el meruul a tekoi el kirel a Jehovah e ke mo olengeriakl e lmuut el mo dmeu a rengum. (Gal. 6:4) Ngdirrek el mo beot er kau a mo dmeu a rengum el kirir tirke el ngmai a ngerachel el mle soam el ngmai.—Rom 12:15; Gal. 5:26.
Morriter er a Tekingel a Dios
w20.02 12, baks
Ngkmal Betik a Rengud er a Demad el Jehovah
A Jehovah, Ngungil Medengelkak?
Ngmla ta el molatk el kmo, ‘Ngar a delongelir a rebetok el biliol el chad el kiei er tia el chutem, e ngera uchul me a Jehovah a kmal melatk er ngak?’ Te betok el ungil a blekerdelir el chad a melatk er tia el tekoi. A King David a milluches el kmo: “RUBAK, ng mo ngera belkul a chad me ke kuk kmal melatk er ngii? Ng di chad, e ke kmal kerekikl er ngii?” (Psa. 144:3) A David a mle ulterekokl a rengul el kmo a Jehovah a ungil medengelii. (1 Kr. 17:16-18) E okiu a Tekingel me a cheldebechelel, e a Jehovah a oterekokl a rengud el kmo ngungil medengelii a bltkil a rengud el mo er ngii. Ka molatk a bebil tekoi el ngar a Tekingel a Dios el sebechel ngosukau el mo ulterekokl a rengum el kirel tia el klemerang el tekoi:
• A Jehovah a mle medengelkau er a uchei er a omechell.—Psa. 139:16.
• A Jehovah a medengei aike el ngar a rengum, e dirrek el medengei el kmo ngera komdasu.—1 Kr. 28:9.
• A Jehovah a onger a derta el nglunguchem.—Psa. 65:2.
• A omerellem a ngar ngii a lerellii er a uldesuel a Jehovah.—Osi. 27:11.
• A Jehovah a ngike el ulemekrael er kau el mo er ngii.—Jn. 6:44.
• A Jehovah a ungil medengelkau me a lsekum ke mad e ngsebechel el lmuut el okisau. Ngmo meskau a beches el bedengem me a uldesuem el di ua tia el bedengem me a uldesuem er chelechang. E lmuut el mo meskau a osisiu el blekerdelem me a tekoi el modengei.—Jn. 11:21-26, 39-44; Rel. 24:15.
FEBRUARY 27–MARCH 5
MEKREOS EL TEKOI EL NGAR ER A BIBLIA | 1 KRONIKA 20-22
“Mngesuterir a Rengeasek el Mo Ungilbesrir”
“Mngai el Oterekokl er Tirkel Blak a Rengrir el Chad”
8 Monguiu er a 1 Kronika 22:5. A David a locha ulemdasu el kmo, a Salomon a dirkak bo lsebechel el meruul er tia el kmal klou a ultutelel lureor. Tia el templo a “kirel el kmal mo klebokel,” e a Salomon a “dirk kekeriei e metitur.” Engdi a David a mle medengei el kmo, a Jehovah a mo ngosuir a Salomon el rullii tia el ileakl lureor. Me ngdi riruul aike el sebechel el olengeseu er ngii el mo kltmokl el kirel tia el kmal klou lureor.
“Mngai el Oterekokl er Tirkel Blak a Rengrir el Chad”
7 A David a kmal mle soal lomekedechor er a templo er a Jehovah, me nglocha mlo mekngit a rengul. Engdi ngkilengei el melisiich er a ureor el ngelekel er a Salomon a mo oungerachel er ngii. Me a David a ullengeseu lomekrael er a rechad er a ureor, e milengudel a brons me a airong el deel me a silber me a kolt me a dirrek el kerrekar. Ngdimlak lomdasu el kmo ngtecha mo nguu a chetengakl el kirel okedecherul a templo, el uriul e ngmo okedongall el templo er a Salomon. Ngbai millisiich er a Salomon er a ledu el kmo: “Mada rungalek, a RUBAK bo lobengkem, me bo le sebechem el lomelemii a okedecherul a blil a RUBAK el Dios er kau, le ng dilu ikal tekoi el kirem.”—1 Kronika 22:11, 14-16.
Ruungalek, Kom Molengeseu er a Ngelekiu el Mo Metecholb?
14 A remechuodel a sebechir el olengeseu er a ruungalek sel losaod a ungil tekoi el kirel a turrekong er kid er a omesiunged el mora Jehovah. A ta el odos a dirk melatk er sel taem el Brother Russell a milengedecheduch er ngii er a le elolem a rekil. Ngmelekoi el kmo, “Ngchiloit a 15 el bung el mengedecheduch er ngak el kirel a turrekong er ngak.” Me ngera mlo rsel? A uriul, e ngika el odos a mlo pioneer, e mle pioneer el kuk betok er a 70 el rak! Me ngkmal bleketakl el kmo a ungil tekoi me a omelisiich a ngar er ngii a lerellii er a klengar er a chad. (Osisechakl 25:11) A remechuodel a dirrek el sebechir el mengemedaol er a ruungalek me a rengelekir el mo meruul a ureor er a Blil a Ongdibel. E sebechir el olengit er a rengalek el mo meruul a ureor el sebechir el meruul.
15 Te mekera rebebil el ngar er a ongdibel e olengeseu? Ngokiu sel lolecholt a tabesul uldasu el kirir a rengeasek. El ua tiang, ngsebechem el omes aike el mo uchul me a remekekerei el ngalek a sebechir el mo kmeed er a Jehovah. A ngalek, ngmle ungil a nger er ngii er a miting me a lechub e ngmla er ngii a subelel er sel miting el kirel a klengar me a omesiunged? Ngmle ousioning el mora chad er a skuul me a lechub e ngmirruul a melemalt el tekoi er sel taem el mlorimel el mo meruul a mekngit? A lsekum e nguaisei, e mereched el chotengii! Ngsebeched el remuul a turrekong er kid el mo mengedecheduch er a remekekerei el ngalek er a uchei me a uriul er a miting, e sel doruul el uaisei, e a rengalek a mo omdasu el kmo te ngar er a “delongelir a re betok el chad” el chedal a Dios.—Psalm 35:18.
Morriter er a Tekingel a Dios
Omesodel a Babier er a Kot el Kronika
21:13-15. A Jehovah ulderechii a anghel el mo torebengii a ringel e le ngmle meringel er Ngii el omes er a rechedal el chuarm. Ochoi, “ng klou a klechubechub er ngii.”