Reference el kirel a Subeled er a Miting er a Klengar me a Omesiunged
© 2023 Watch Tower Bible and Tract Society of Pennsylvania
SEPTEMBER 4-10
MEKREOS EL TEKOI EL NGAR ER A BIBLIA | ESTHER 1-2
“Molasem el Mo Ngariou a Rengum el Ua Esther”
Moba Klengariourreng er a Chelsel a Taem er a Ringel
11 Ngdirrek el sebechel mo measem a klengariourreng er kid sel loldanges, me a lechub e te chemat er kid a rebebil. A Esther a chirremii tia el rolel a odanges me a omengebkall. Ngika el dil a ta er a kot el mle klebokel el redil er a Persia. Ngmle ta el rak el lekiei el teloi er a rebebil el redil el di chelilt er a meringel a cheral cheluch me a ungil lomengetmeklel a bedengir, el kaiuechit el kirel ngike el bo lengiltii a king el mo kuin er ngii. E a uriul e a king a ngileltii a Esther el mo kuin, engdi a rokui el chetengakl el mlo er a Esther a dimlak lerellii el mo kedidai a rengul. Ngbai millemolem loba klengariourreng e ungil a omerellel e ulecholt a omengull el mo er a rechad.—Esther 2:9, 12, 15, 17.
ia 130 par. 15
Ngmilsebechakl er a Rechedal a Dios
15 Sera lebocha el taem el kirel Esther el mo omes er a king, e ngmla er ngii a techellel el melilt a ngii di el ngerang el lomdasu el kmo ngousbech el lmuut el menglebokel er ngii. Engdi ngmle ngariou a rengul e di kilengei aike el ledilu er ngii a Hegai. (Esther 2:15) Nglocha miltebengii el kmo a klebekelel a diak di el seikid a mo nguu a rengul a king. Ngklengariourreng a lmuut el lungil. Ngika ngmle cheleuid?
Moba Klengariourreng er a Chelsel a Taem er a Ringel
12 A klengariourreng er kid a mocholt lokiu a biled, me a omerelled el ochotii el kmo kede oba omengull el mo er a rechad. Kede dirrek el melasem el olecholt er a ‘delemedemek me a chelellakl reng,’ e bai diak dousimang me a lechub e kede melasem el mengas a rengrir a rechad. (Monguiu er a 1 Petrus 3:3, 4; Jeremia 9:23, 24) Me a tekoi el domdasu a sebechel el mo chemolt el okiu a tekinged me a omerelled. El ua tiang, kede locha mo melasem el meruul er a rechad el mo omdasu el kmo, kid a kmal ileakl el chad lokiu a tekoi el doruul me aike el dodengei, me a lechub e te rechad el dodengelterir. Me a lechub e kede melasem el meruul a tekoi el leko bo lomdasu a rechad el kmo ngdi mle uldesued, e a lechub e te mla er ngii a ullengeseu er kid. Engdi ka molatk er a Jesus, ngmle sebechel el mengas a rengrir a rechad el lousbech er a llemesel a rengul. Engdi ngbai mle blechoel el mesaod a tekoi lousbech er a Tekingel a Dios. Ngkmal mle chetil a rechad a loldanges er ngii, e le ngdi mle soal a rokui el klebkall me a odanges a lebo er a Jehovah.—Johanes 8:28.
Morriter er a Tekingel a Dios
Ke Medengei el Kmo Ngerang?
A rehakase a miltik a llechukl er a Persia er a irechar el mesaod el kirel a chad el ngklel a Marduka (tekoi er a Belau e ng Mordekai). Ngika uluureor er a blil a king er a Susa el locha mle chad er omeluches. Arthur Ungnad el semmong er a reksi er a rechad er a Oriental a kmo tia mle kot el omesodel a chad el “Mordekai el diak el ngar er a Biblia” er tiakid el taem.
Seikid el taem el mei e a rebetok el hakase mla oiuid a betok el llechukl er a Persia. A bebil er ngii a lebiltik er bita er cheotelel a mats er a Persepolis el mlara chelsel a blil a mekreos el klalo. Aika el llechukl a mlara taem er a omengederederel a Xerxes I. Aika llechukl el tekoi er a Elam e sebeched el metik a ngakl er ngii el dirrek el ngar er a babier er a Esther.
A bebil er aika el llechukl er a Persepolis a mesaod el kirel a chad er a temel a omengederederel a Xerxes I el ngklel a Marduka. Ngika uluureor er a blil a king el ngar er a Susa el melechesel a king. A ta er a llechukl a mesaod er ngii el kmo ngchad er oliuid. Tia kmal mesaod er a Mordekai er a Biblia. Ngika mle ofiser luluureor er a blil a King Ahasuerus (Xerxes I) e mle sebechel melekoi a kesengil e ngteblo el omelekoi. Ngika mle blechoel el dengchokl er a siseball el mora blil a king er a Susa. (Est. 2:19, 21; 3:3) Tia el siseball a mle klou el omekedecheraol e mle blil a urerir a re ofiser er a blil a king.
Ngkmal ngar ngii a klaisisiu er a Marduka losaod er ngii aika el llechukl er a Mordekai losaod er ngii a Biblia. Tirka kiliei er a osisiu el taem er a reksi, osisiu el beluu, e milsiou el ofiser er a osisiu el basio. Aika omeketakl er ngii el kmo a Marduka me a Mordekai a di bita losisiu el chad.
SEPTEMBER 11-17
MEKREOS EL TEKOI EL NGAR ER A BIBLIA | ESTHER 3-5
“Mngesuterir a Rebebil el Mo Meruul Aike el Kot Lungil Sebechir”
it-2 431 par. 7
Mordekai
Diak Lekengei el Losus er a Haman. Uriul er tiang e a Ahasuerus a rirellii a Haman el mo kot el ngarbab er tirke el rokui el mengeteklel e dilu er a rebek el mengeteklel me bo loutubuach e losus er a Haman. A Mordekai a kmal dimlak el kengei el mo meruul er tiang le ngii el chad er a Judea. (Est 3:1-4) A Mordekai el millekoi el kmo ngkmal diak bo loruul er tiang le ngii el Chijudea ochotii el kmo tia el omeruul a mle ulekuak er a deleuill er ngii me a Dios er ngii el Jehovah. Ngmiltebengii el kmo a mo outubuach el mengull er a Haman a dimlak di el sus er ngii el mora chad el ngarbab a deruchellel, el ua lurruul er ngii a rechad er a Israel er a irechar el mora rechad el mle ngarbab a deruchellir. (2Sa 14:4; 18:28; 1Ki 1:16) Ngar ngii a ungil luchul me ngdimlak losus er a Haman. Ngika mle chad er a Amalek el Jehovah dilu el kirir el kmo, ng “di mo oumekemad er a re chad er a Amalek el diak a ulebengelel.” (Exo 17:16) Me tia mle blakerreng er ngii el mora Dios el diak el sus el mora chad el ngarbab a deruchellel.
it-2 431 par. 9
Mordekai
Uluusbech er Ngii el Lolsobel er a Rechad er a Israel. Sera letobed a tekoi el mo omekoad er a rokui el Chijudea er a renged el rokir, a Mordekai a dilu el kmo ngoumerang el kmo a Esther a mlora deruchellel er tiakid el taem el mo olsobel er a Rechijudea. Nguluuchais er a Esther er tia el kmal oberaod el ngerechelel e ullengit er ngii me bo longedecheduch er a king. Me alta ngmle sebechel mo uchul a klengar er a Esther engdi Esther a kilengei el mo meruul er ngii.—Est 4:7–5:2.
ia 133 par. 22-23
Ngmilsebechakl er a Rechedal a Dios
22 Esther a locha kmal mlo oberaod a rengul er a lerengesii tia el chais. Tiakid sel kot el ngarbab el omelsemai er a klaumerang er ngii. Ngkmal mle medakt, e di mle bleketakl louchais er tiang er a Mordekai. Ngulemeklatk er ngii er a llechul a king. A chad el diak lomekedong er ngii a king engdi ngmo omes er ngii a mo okodall. Ngdi lsekum ngodersii a kolt el skersel el bedul ngii el chad e ngmosobel a klengar er ngii. E a Esther a dimlak lomdasu el kmo ngmo mocholt er a klechubechub tokubets sel lolatk a tekoi el dilubech el mora Vasti el ultngeklii a tekingel a king e dimlak el soal mo omes er ngii. Me a Esther a dilu er a Mordekai el kmo ngmla mo 30 el klebesei el dirkak lomekedong er ngii a king! Tia milsa betok el uchul me ngulemdasu el kmo nglocha dikea el soal ngii ngika el diak lultebechel a rengul el king.—Esther 4:9-11.
23 A tekingel a Mordekai a kmal silsichii a klaumerang er a Esther. Ngdilu er ngii el kmo a lsekum e ngdiak lokerang e a osobelir a Rechijudea mo mei loeak a kuk ta er a rolel. Engdi ngika ngmekera sebechel lomdasu el kmo ngdiak bo luldimukl er tir sel letaut odechelakl? A Mordekai ulechotii a mesisiich el klaumerang er ngii er a Jehovah el kmo ngkmal diak bo lebechititerir a rechedal me lemokngemed me a diak bo lebechei a telbilel me lak el taut. (Jos. 23:14) A Mordekai a dilu er a Esther el kmo: “Ng diak dodengei, a lta e ke mlor a rengedel a king el kirel a ua itial taem.” (Esther 4:12-14) A Mordekai e ngdiak el rredemelel a bo doukerebai er ngii? Ngika mle cherrungel lulsirs er a Dios er ngii el Jehovah. E kid?—Osi. 3:5, 6.
Morriter er a Tekingel a Dios
kr 160 par. 14
Mesebechakl er a Llemeltir el Mengull
14 Rechedal a Jehovah a di ua Esther me a Mordekai el mesebechakl er a llemeltir el mengull er a Jehovah er a rolel el bla lechederderii. (Esther 4:13-16) Ngkau ngdirrek el sebechem el meruul el uaisei? Chochoi. Ngsebechem el blechoel el meluluuch el kirir a rudam me a rudos er kau el chuarm er chelechang le kabelment el merrob a urered. Aika el nglunguchem a klou a lerellii el mora rudam me a rudos er kid el chelebangel a ringel me a odechelakl. (Monguiu er a Jakobus 5:16.) A Jehovah ngonger aika el nglunguuch? Kid el mla mo mesisiich a kerrekeriil er a kort ochotii el kmo ngmera el longer!—Heb. 13:18, 19.
SEPTEMBER 18-24
MEKREOS EL TEKOI EL NGAR ER A BIBLIA | ESTHER 6-8
“Klubeled er a Ungil Rolel a Omengedecheduch”
ia 140 par. 15-16
Ngulechotii a Llomeserreng, Blekeu, e Dimlak Di Lolatk er Ngii
15 Esther luleba kllourreng e milengiil el mo ongingil sils el mo ouchais er a ongtil er a king, a milsa techellel a Haman el mo meruul er a mo urebetellel. A Jehovah ngmla er ngii a lerellii er a uchul me a king a dimlak a ietel a medal? (Osi. 21:1) Tia uchul me a Tekingel a Dios a melisiich er kid el mo oba reng er ‘omengiil’! (Monguiu er a Mika 7:7.) Sel dongiil er a Jehovah e kede locha mo mesa el kmo a rolel a losmechokl a mondai er kid a lmuut lungil er a ngii di el tekoi el dullatk er ngii.
Ngulechotii a Blekeu er a Longedecheduch
16 Esther a dimlak el soal melemolem el melasem er a kllourreng er a king. Me ngkirel louchais a king a rokui el tekoi er a ongeru el blengur lurruul er ngii. Engdi ngmekera bo loruul er tiang? A king a milsang a techellel el louchais er a lluut loker er ngii el kmo ngngera ongtil. (Esther 7:2) Ngmocha ‘blsechel el mengedecheduch’ a Esther.
ia 140 par. 17
Ngulechotii a Llomeserreng, Blekeu, e Dimlak Di Lolatk er Ngii
17 Kede locha imagine er a Esther el dulii a kedeb el nglunguuch el mora Dios er ngii er a uchei er a lolekoi el kmo: “A lsekum a kungil er a rengum kau el king, me a ongtik a ungil er a osengel a king, e a kulengit el kmo mosebelak ngak me a rechedak.” (Esther 7:3, NW) Mutebengii el kmo a Esther ulechotii el kmo ngmilengull er ngii el mo ouchais el kmo ngngera ungil. Ngkmal mle ngodech er a Vasti, el ngike el mle kot el bechil a king el mle durengul lomekrur er a king! (Esther 1:10-12) Me a lmuut kung a Esther a dimlak lolekoi a kngtil a king el tiluu er a klebelngul a Haman. E ngbai ullengit er a king me lomekerreu er ngii er a telemall.
ia 141 par. 18-19
Ngulechotii a Llomeserreng, Blekeu, e Dimlak Di Lolatk er Ngii
18 Tia el ongtil a locha kmal chilsir a rengul a king. Ngtecha bekeu a rengul el mo melemall er a kuin er ngii? A Esther a millemolem el melekoi el kmo: “Aki mla moterau, ngak me a rechedak el mo okodall e nguemed. Omko ki di mloterau el sechal me a redil el mo sibai, e ak di liluk. Engdi tia el tekoi a diak lungil le ngmo uchul a telemellel a king.” (Esther 7:4, NW) Mutebengii el kmo ngdi mle bleketakl louchais er a mondai, engdi ngdilu el kmo omko te di mloterau el sibai e ngdi liluk. Engdi tia el okngemedel ngii me a rechedal a kmal mo klou el tekoi el diak el sebechel lobart.
19 Kerebil Esther osisecheklid er a rolel e kede kosuseur a uldesuel a chad. A lsekum ngmo kirem louchais er a oberaod el mondai el mora betik er a rengum me a lechub e ngchad lolab a klisiich, e a uldekial a kllourreng, omengull, me a di bleketakl el rolel omengedecheduch a kmal klou a lerellii.—Osi. 16:21, 23.
Morriter er a Tekingel a Dios
w06 3/1 31 par. 4
A Omesodel a Babier er a Esther
8:17—Ngoeak a ngera el rolel e a ‘rechad er a beluu a mellekoi el kmo te chad er a Chijudea’? A betok el chad er a Persia a ngilodech a blekerdelel a klengar er tir el mo oltirakl er a Rechijudea, e le te ulemdasu el kmo a omeldechel tia el llach a olechotel a ulekerreuil a Dios el mo er tir. A uaisei el omellach a ngar er ngii a otutel er sel ulaoch el ngar er a Sekaria. Ngdmu el kmo: “Seikid e a re truich el chad er a ngodech el beluu a mor a tal chad er a Judea e dmu el kmo, ‘Aki obengkem el mor sel bor ngii, ele kim mla remenges el kmo a Dios a obengkem.’”—Sekaria 8:23.
SEPTEMBER 25–OCTOBER 1
MEKREOS EL TEKOI EL NGAR ER A BIBLIA | ESTHER 9-10
“Nguluusbech er a Klisichel Lolengeseu er a Rechedal”
it-2 432 par. 2
Mordekai
Me a Mordekai a miltechir a Haman e mlo merreder er tirke el rokui el mengeteklel a king me a king a dirrek el milsang a kebkebil el mla er ngii olengchelel a king er ngii. A king a milsang a Esther a blil a Haman me a Esther a rirellii a Mordekai el mo oungerachel er a blil a Haman. Tia mle osobel me a taem er a deurreng el mora Rechijudea. Te betok er a rechedal a renged er a Persia mlo olab el mora Rechijudea me a Rechijudea mle kltmokl el kirel a sils er a Adar 13. Me a rebek el merreder er a beluu uleltirakl er tir le Mordekai a kmal mle ngarbab a deruchellel. A odechelakl a liluut el medechel er a ta el sils er a chelsel a di beluu er a Susa. Betok er a 75,000 el cherrouir a Rechijudea er a chelsel a Renged er a Persia mlad. A reteruich el ngelekel a Haman el sechal a mle uldimukl er tir. (Est 8:1–9:18) Me sera loterekeklii a Esther e a Mordekai a ultebedii a tekoi el kmo ngmo er ngii a chedaol sils el loruul er ngii er a ta er a ta el rak er a 14 me a 15 el sils er a Adar, lokedongall el Purim, el bo loumur e oldeu a rengrir e merous a ungil er a delongelir me a mora remechebuul. Me a Rechijudea kilengei er ngii e dilu er a rengelekir me tirke el me teloi er tir el mo meruul er ngii. Me a Mordekai el mle ongeru el merreder er a beluu a uleba omengull er a Rechijudea el telbiil el chedal a Dios, e millemolem loureor el kirel a klungiolir.—Est 9:19-22, 27-32; 10:2, 3.
it-2 716 par. 5
Purim
Moktek er Ngii. Alta te melekoi el kmo a Chedaol el Sils er a Purim a loruul er ngii er chelechang a Rechijudea el di ungil klebesei el diak el mera el kirel a klechelid me a lebebil e te kora meruul er ngii el kmal mo klou el tekoi, me nguaisei tia dimlak el uaisei er a lekot el moterekokl e loruul er ngii. A Mordekai me a Esther a mle mesiungel a mera el Dios el Jehovah, me a chedaol el sils a mileketmokl el mo mengebkall er a Jehovah. Ngsebeched el melekoi el kmo a Jehovah a uchul osebelir a Rechijudea, le Mordekai el dimlak letemellii a blakerreng er ngii el mengull er a Jehovah el di ngii el tang. A Haman a locha mle chad er a Amalek, el renged el Jehovah milelsii e dilu el kmo ngmo mesuld el mo diak. A Mordekai milengull a tekingel a Dios e dimlak el kengei el mo outubuach er a Haman. (Est 3:2, 5; Exo 17:14-16) Me a dirrek el tekingel a Mordekai el mora Esther (Est 4:14) ochotii el kmo ngulemes el bedul a lmuut el ngarbab el klisiich el kirel osobelir a Rechijudea. Me a omerellel a Esther el ulelsengerenger er a uchei er a bo lomes er a king el kirel sel kot el ongtil, ochotii el kmo ngulemes el bedul a Dios el mo olengeseu er ngii.—Est 4:16.
cl 101-102 par. 12-13
“Moukerebai er a Dios” er a Rolel Omousbech a Klisiich el Molab
12 Jehovah mla meskid a rudam el mo omekrael er a ongdibel er a Rekristiano. (Hebru 13:17, NW) Tirka el odam ousbech a klisiich el bla lengai er a Dios el olengeseu e omekerreu er a delebechel. A klisiich lobang ngmesterir a llemeltir el mengedereder er a rekldemir er a klemerang? Ngkmal diak! A remechuodel a kirir el tabesul osengir e ngariou a rengrir el kirel a klisiich el lolab er a chelsel a ongdibel. (1 Petrus 5:2, 3) A Biblia melekoi er a rudam lomekrael: “Bo mklekar er a Ikelesia er a Dios, el le rirellii el mo kloklel el okiu a kodellel a Ngelekel.” (Rellir 20:28) Tia klou a ultutelel luchul me ngkirir el mo ungil omerellir el mora rederta el sib er a delebechel er a Dios.
13 Ngsebeched lomekesiu er ngii er tiang. A kmal kmeed el sechelim a olengit er kau el mo omekerreu er a klalo el kmal mekreos er a rengul. Ke medengei el kmo ngkmal ngarbab el char a lechilitii el kirel. Kau a locha kmal mo kerekikl lomekerreu er ngii. Ngdi osisiu, a Dios a mla omekngerachel er a remechuodel er a kmal mekreos el tekoi er a rengul: ngmla mesterir ongdibel, el rechedal a lomekesiu er tir el mora sib. (Johanes 21:16, 17) A sib er a Jehovah kmal mekreos er a rengul, te kmal imis el mekreos le ngulemechar er tir lousbech er a rsechel a di ta el Ngelekel el Jesus Kristus. Ngdiak a char el ngarbab er tiang. Remechuodel el ngariou a rengrir a diak lobes er tiang e kerekikl omerellir el mora sib er a Jehovah.
Morriter er a Tekingel a Dios
w06 3/1 31 par. 5
A Omesodel a Babier er a Esther
9:10, 15, 16—Ngera uchul ma rechad er a Chijudea a dimlak lebo lengai aike el berrober er a recherrouir? Sera lekotoar el mo melai a klalo e te ulechotii a moktek er tir el mo mesebechakl a klengar er tir, el dimlak lomekeek a iltetir.
OCTOBER 2-8
MEKREOS EL TEKOI EL NGAR ER A BIBLIA | JOB 1-3
“Molemolem Lolecholt er a Delechel a Bltkil a Rengum el Mora Jehovah”
Moukerebai er a Klaumerang me a Blekongesenges er a Noah me a Daniel me a Job
16 Ngera bebil er a omelsemai el Job a mlo chelebangel? Ngmlo chelebangel a meklou el omelodech er a klengar er ngii. A uchei e a Job a “mle kot el merau el chad er ongos.” (Job 1:3) Ngkmal mle merau me ngmle betok a rechad el medengelii e ullecholt a omengull el bedulngii. (Job 29:7-16) Me nguaisei, engdi ngdimlak a ta el bo lomdasu el kmo, ngkuk ungil er a rebebil me a lechub e ngdiak lousbech er a Dios. E kid a medengelii tiang e le Jehovah a ulemekedong er ngii el kmo, “mesiungek” e dirrek el dilu el kmo: “Ng meluu er ngak e kerekikl el diak a ngeral le rellii el mekngit.”—Job 1:8.
17 Engdi a blekerdelel a klengar er a Job a kmal di mle mereched el mengodech. Ngurriid a rokui er ngii, me ngkmal mlo meringel a uldesuel e mlo oureng el mad. E chelecha el taem e kede medengei el kmo, a Satan a ngike el mle uchul aika el ringel el mora Job. Ngdilu el kmo a Job a di milsiou er a Jehovah e le ngdi osiik a mo uchul a klungiolel. (Monguiu er a Job 1:9, 10.) A Jehovah a ulemes er tia el ultelechakl el kmal oberaod el tekoi. Me ngmo mekerang e ochotii el kmo ngika el Satan a kmal bulak? Ngmilsa Job a techellel el mo ochotii a blakerreng er ngii el mora Dios, e dirrek el ochotii el kmo ngmesiou er a Dios e le ngbetik a rengul er ngii.
Molemolem er a Blakerreng er Kau!
10 A Satan a dirrek el meruul a osisiu el tekoi el bedul a derta er kid. Me ngera klaisisiu er a blekeradel el mcharm er ngii er aike el lechilarm er ngii a Job? Ngoeak a tekingel a Satan e ngua ledu el kmo kau a diak lemera el betik a rengum er a Jehovah el Dios, e ke dirrek el mo meterob el mesiou er Ngii sel bo lekirem lolsobel er a klengar er kau, e dirrek el diak lolemolem a blakerreng er kau el mora Dios! (Job 2:4, 5; Och. 12:10) Ngmo uangera uldesuem el kirel tia el tekoi? Ngulterekokl el kmal mo mekngit a rengum, engdi ka molatk er tia el tekoi el kmo: A Jehovah a oumerang er kau me ngmeskau a kmal mengasireng el techall. A Jehovah a msa techellel a Satan me ngmelasem er a blakerreng er kau. E ngii el Jehovah a oumerang el kmo ngsebechem el lomelemii a blakerreng er kau el bedulngii e ngosuir el meketeklii el kmo a Satan a bulak. Ngii a dirrek el tibir el mo olengeseu er kau el rullii tia el tekoi. (Heb. 13:6) Tiang a kmal ileakl el techall el mo sebeched el nguu a klaumerang er ngika el Mengedereder er a uldekial a eanged me a chutem! Me kau, ke mla mo medengelii a klungel a ultutelel a blakerreng? Tiang a rullid me ngsebeched el otngakl a blulekngel a Satan, e olengeseu el mengikiid er a ungil ngklel a Demad e dirrek el olengeseu el melisiich er a omengederederel. Me ngera sebeched el meruul el mo lomelemii a blakerreng er kid?
Morriter er a Tekingel a Dios
Klubeled er a Tekingel a Jesus er a Uchei er a Lemad
9 Ngera ngdilu a Jesus? Uchei er a lemad a Jesus e ngmle klou a ngerel el melekoi el kmo: “Dios er ngak, Dios er ngak, ngera uchul me ke mla choitak?” (Mt. 27:46) A Biblia a diak louchais er a uchul me a Jesus a millekoi aika el tekoi. Engdi molatk a louchais er kid aika el tekoi. A ta er ngii a kmo, a Jesus er a lolekoi aika el tekoi e ngultutii a ulaoch el ngar er a Psalm 22:1. Aika el tekoi a dirrek el ulechotii el kmo, a Jehovah a diak bo ‘longkar’ er a Ngelekel. (Job 1:10) A Jesus a mle medengei el kmo a Demal a diak bo lomekerreu er ngii er a recherrouel me bo lsebechel el measem el mo er sel kot el tkurrebab el rolel. Me a lmuut kung, aika el tekoi a meketeklii el kmo a Jesus a dimlak a kngtil e dimlak el rredemelel a mo nguu a kodall.
OCTOBER 9-15
MEKREOS EL TEKOI EL NGAR ER A BIBLIA | JOB 4-5
“Mongeroid er Kau er a Cheleuid el Chais”
mwb16.04 3, baks
Elifas:
• Nglocha mle chad er a Teman el ngar er a beluu er a Edom. A Edom a mle belurir a remellomes a rengrir el chad el uai a losaod er ngii a Jeremia 49:7
• Nglocha mle kot el klou er tir e merael a chisel el chad e dirrek el mle chad er a ongelaod, a uchul me ngmle kot el mo mengedecheduch. Nguleltobed a kldei el cheldecheduch e mle mekemanget a cheldechedechal er tirke el teru el milengedecheduch
w05 9/15 26 par. 2
Moltngakl a Diak el Melemalt el Uldasu!
Elifas a millatk er a taem el lebo el duum er ngii a mesisiich el reng e melekoi el kmo: “A cheluut a silsengii el mer a medak, me ng mlo mengesengasech a luchek. Ng mle sebechek el mesang a kmo ng ngerang el dechor; mak ullengeng, e ngdi dimlak el sebechek el dongchii el kmo ng ngerang. E sola e kmal mlo kellechakl e ak rirengesii a ngor.” (Job 4:15, 16) Ngera el reng a ulemekrael er a uldesuel a Elifas? A tekoi lullekoi ochotii el kmo ngika kmal diak el ta er a melemalt el anghel er a Dios. (Job 4:17, 18) Ngmle ta er a mekngit el anghel. E le ble le anghel er a Jehovah e ngdimlak lomesmechokl er a Elifas me tirke el teru el lulebengkel le tir el dimlak lolekoi a klemerang. (Job 42:7) Nguaisei a Elifas miltuchel er a mekngit el anghel. A tekingel a dimlak lolecholt a uldesuel a Dios.
w10 2/15 19 par. 5-6
Moltngakl a Uldasu Lolisiich a Satan
Satan uluusbech er a Elifas el ta er tirke el mlo odngelii a Job el melekoi el kmo a rechad a kmal mechitechut. Ngmillekoi el kirir a rechad el kmo te di “bleob el chutem” e dmu er a Job el kmo: ‘‘[Te] rruul er a chebechab me ngsebechel di beot el metemall el ua bangikoi. Te metemall er a tutau el mo klebesei. Te remiid el mo cherechar.”—Job 4:19, 20, NW.
Ngar er a kuk ta er a bades e ngomekesiu er kid el mora “bekai,” el klalo el rruul er a chutem el beot er ngii a metemall. (2 Ko. 4:7) Kede mechitechut le kid luldiukes er a klengit e diak demecherrungel. (Rom 5:12) Omko ngdi kid e ngdiak el sebeched el otekau odelecheklel a Satan. Engdi ngngar ngii a ngeso el mora Rekristiano. Alta ngar ngii a chelitechetud, kede kmal mekreos er osengel a Dios. (Isa. 43:4) Me a dirrek el Jehovah omesterir a chedaol reng er tirke el lolengit er ngii. (Lk. 11:13) Chedaol reng er ngii a sebechel meskid a “klou el klisiich,” me ngsebeched loutekangel a ngii di el ringel lomeskid a Satan. (2 Ko. 4:7; Fil. 4:13, NW) A lsekum kede mo mesisiich el dechor lomtok er ngii, e “mesisiich el oumerang” e a Dios a mo smisichid. (1 Pe. 5:8-10) Me ngdiak a belkul demedakt er a Satan el Diabelong.
mrt 32 par. 13-17
Em Protect er a Diak el Klemerang el Chais
● Morriter el kmo a chais ngmla er ker el mei me a tekoi er a chelsel
Aike el lolekoi a Biblia: “Morriter a rokui el tekoi.”—1 Thesalonika 5:21.
Uchei er a bo moumerang me a lechub e ke forward er a chais, mo lmuut me a lsekum e nghaeri me a lechub te di omelekl er ngii er a news, e moterekeklii el kmo ngklemerang me a lechub e ngdiak. Ngmekera omoruul er tiang?
Morriter el kmo ngsebeched loumerang er ngike el uchul tia el chais. Tekoi er a media loltobed a news me a kombalii me a lmuut el bebil er a cheldebechel a meruul chisir el mo ungil me a lechub e te omechoid a tekoi le ng commercial er tir a uchul me a lechub e nguldesuir er a tekoi er a balatiks. A lebebil e a resechelid a forward aika el diak el melemalt el chais el mei er kid loeak a email me a lechub e ng post er a social media. Me lak moumerang aika el tekoi el mdirkak mtirterii el kmo ngmla er ker el mei.
Mtiriter a tekoi er a chelsel ngii el chais el kmo ngmelemalt. Momes a date, verify a tekoi er ngii, me a mesisiich el evidence el support a tekoi el lluches. Bom kerekikl aike el kora kmal oberaod el tekoi el bla lomekbeot a belkul me a lechub e ngtekoi el ngar ngii a lebo el lerellii er a rengum me a uldesuem.
Morriter er a Tekingel a Dios
w03 5/15 22 par. 5-6
Molemolem Loba Blakerreng Me Bom Kats er a Rurt el Mo Nguu a Klengar
Ngsebechel lomtebechel er a rengud sel bo dolatk el kmo kede part er a cheldebechel el rechedal a meliuekl er a beluulechad el rokir e mera el mengull er a Jehovah. Kede mera el ngeltengat el teloi er a rechad el kmal olecholt er a bltikerreng! (1 Petrus 2:17) Me kid a dirrek el sebeched el ngosuterir a rebebil el mo klebechel a rengrir.
Molatk omerellel a melemalt el chad el Job. Mo lmuut er a Elifas me ngmlo melekoi el kmo: “A le ngar ngii a melsibas el mechitechut e mesaul, e a tekingem a mekdechar a rengul me ng mo dechor.” (Job 4:4) E kid a mekerang? A derta er kid a ngerechelel lolengeseu er a rudam me a rudos el outekangel el ngar er a omesiungir el mora Dios. Ngar omerelled el mo er tir e doruul loltirakl er a reng el losaod er ngii a bades el kmo: “Msisiich a ikel mesulal chim, ma bkul a uach el omritel er a chellitechut.” (Isaia 35:3) Kau ngsebechem el rullii a turrekong er kau el mo melisiich er a ta me a lechub e teru el kldemem er a klemerang sel ta el bom kasoues? (Hebru 10:24, 25) Sel omchat er tir e moreng a sulir el kirel a blakerreng er tir el melasem loldeu er a rengul a Jehovah, e ngkmal sebechel ngosuterir el mo melemolem loba blakerreng er tir el melasem el mo kats er a rurt el mo nguu a klengar.
OCTOBER 16-22
MEKREOS EL TEKOI EL NGAR ER A BIBLIA | JOB 6-7
“Sel Bo De Feel el Kmo Ngdikea el Sebeched el Mtekengelii a Klengar”
w06 4/1 4 par. 10
A Omesodel a Babier er a Job
7:1; 14:14—Ngera belkul a “klengar er a chad a ua orimel el mor a mekemad” ma lechub e “ngsibai”? Ma Job a kmal chilarm me ngmlo melatk el kmo a klengar a di mui er a ringel ma ongarm ma orimel el ureor. (Job 10:17) A Job a ulemekesiu er sel taem el chad a ngar er a Sheol, er a taem er a kodellel el mo lmuut er a okiis, el ua letaem er a klsibai.
‘A Jehovah . . . Olsobel er Tirke el Mechitechut a Rengrir’
A LEBEBIL er a taem e kede locha mo melatk el kmo a klengar er kid a kmal kedeb e “betok a ringelel.” (Job 14:1) Sei a uchul me ngar ngii a taem el bo lemechitechut a rengud. A rebetok el mesiungel a Jehovah er a irechar me te dirrek el mlo mechitechut a rengrir. A rebebil er tir a uluureng el mad. (1 Ki. 19:2-4; Job 3:1-3, 11; 7:15, 16) Me nguaisei engdi a Jehovah el Dios el luluumerang er ngii a mle blechoel el olterekokl a rengrir e olengeseu er tir. A tekoi el dilubech el mo er tir a melluches me bo el sebechel mengelaod e olisechakl er kid.—Rom 15:4.
g 1/12 16-17
Sel Bom Feel el Kmo Ngmla Mo Soam el Giving Up
Alta ngkmal meringel a blekeradel el omngar ngii, lak mobes el kmo ngdiak di lekau el tang, me a chelecha el taem e a oumesingd er a rokui el chad a chelebangel er a ta er a bedengel a mondai. A Biblia kmo: “A bleob el rokui a dul ongingd e ngara ringel ra cheroll.” (Rom 8:22, BT) Alta chelecha el taem e ngkora diak el sebechel mesmechokl a mondai er kau, engdi cherengel a taem a blekeradel a blechoel el mo ungil. Engdi chelechang e ngngera sebechel ngosukau?
Mouchais aike el ngar er a rengum el mora chad el moumerang er ngii. A Biblia kmo: “A sechelid a di blechoel el oubltikerreng, e a ta er kid el sechal a ngosukid er a chelebuul.” (Osisechakl 17:17, NW) A Biblia mesaod er a melemalt el chad el Job el kmo sera lechebangel a ringel e nguluuchais aike el mlara rengul el mora rebebil. A Job er a bo le feel el kmo “ng mla tmurk a renguk er a klengar er ngak,” e ngdilu el kmo: “Ak di mo dmu ikel mekngit er a renguk, ma ikel metacherbesul er a uldesuek.” (Job 10:1) Sel douchais aike el ngar er a rengud el mora ta er a chad, e ngsebechel ngosukid el mo omes a mondai er kid er a kuk ta er a rolel.
Moluluuch louchais er a Dios aike el rokui el ngar er a rengum. A rebebil omdasu el kmo a nglunguuch a tekoi el di meruul er a rengud el mo ungil, engdi Biblia ngodech omesodel. A Psalm 65:2 melekoi el kirel a Jehovah el Dios el kmo ‘ngonger a nglunguuch’ me a 1 Petrus 5:7 a kmo: “Ng kerekikl el omekerreu er [kau].” A Biblia betok omeleklel er a klungel a ultutelel a bo doumera el lulsirs er a Dios. El ua tiang:
“Moumeral ulsirs er a RUBAK el oba rengum el rokir. Lak mulsirs er a di llemesel a rengum. Mletkii a RUBAK er a ikel bek el moruul, e ngii a mo ochotii er kau a melemalt el rael.”—OSISECHAKL 3:5, 6.
“[Jehovah] mesterir a lousbech tirkel rokui el meluu er ngii; ng orrenges ongterir e olsobel er tir.”—PSALM 145:19.
“Ng ngar ngii a blekenged el mor medal a Dios, ele kede ulterekokl el medengei el kmo ng rongesid a dolengit a ngii di le ngerang er ngii el ultuil er a ikel tekoi el ungilbesul er a rengul.”—1 JOHANES 5:14.
“A RUBAK a cheroid er a dengerenger, e ngdi ng orrenges a nglunguchel a melemalt el chad.”—OSISECHAKL 15:29.
A lsekum kouchais er a Dios a ringel el omchelebangel, e ngmo meskau a ngeso el mousbech er ngii. Sei a uchul me a Biblia melisiich er kau el mo “di blechoel el oumeral ulsirs er ngii. Msbedii er a ikel ngar a rengum.”—Psalm 62:8.
Morriter er a Tekingel a Dios
(Job 6:3, NW) E ngkuk oberaod er a chelechol er a rriil a uchul me a cheldechedechak a mlo ua le terrekakl.
Mngesuterir a Rebebil el Mo Outekangel a Ringelel a Uldesuir
10 Monguiu er a Job 6:2, 3, NW. A lebebil er a taem e a Job a mlo “terrekakl” a cheldechedechal. E a uriul e nguluuchel er a rengul er a tekoi el ledilung. (Job 42:6) Me a chad el chuarm er a meringel mondai er ngii er chelechang, a di ua Job el mo meterekakl a longedecheduch, me ngdmu tekoi el bo louuchel a rengul er ngii er a uriul. Me ngmekera donger er ngii? Ngbai ungil a bo dolecholt er a klechubechub er a bai bo lemekngit a tekinged. Lak dobes, ngdimlak lemoktek er a Jehovah el soal a bo dechuarm er a mondai me a ringelel a uldasu el kid a chelebangel er chelechang. Me kede ungil medengei el kmo a blak a rengul mesiungel a Jehovah a sebechel mo mekngit a tekingel er sel taem el lechuarm a uldesuel. Ngmo lmuut me a lsekum ngmo dmu cheleuid el tekoi el kirel a Jehovah me a lechub e ngkired, me ngdiak el kirel di mereched el mo kesib a rengud er ngii me a lechub e kede oukerrekeriil er ngii el kirel a tekoi el ledilung.—Osi. 19:11.
OCTOBER 23-29
MEKREOS EL TEKOI EL NGAR ER A BIBLIA | JOB 8-10
“A Diak Lemengodech el Bltikerreng er a Dios a Mekerreuid er a Blulekngel a Satan”
Ngsebechem el Odeuir a Rengul a Dios?
A Job a kmal mlo chuarm er a betok el chelebuul. Me ngmlo cheleuid a uldesuel el ulemdasu el kmo a Dios a diak lomekerreu er ngii a leblak a rengul el mo er Ngii me a lak. (Job 9:20-22) Ngkmal mlo mesisiich el omdasu el kmo ngmle melemalt a omerellel, me ngua ledu el kmo ngii a lmuut el melemalt er a Dios.—Job 32:1, 2; 35:1, 2.
Ngngera Belkul er Kau a Diak Lemengodech el Bltikerreng er a Jehovah?
14 A diak lemengodech el bltikerreng er a Dios a meskid osebechakl er a tekoi er a klereng. A David a milluluuch el mora Jehovah el kmo: “Kau omertelek; ke mo osebelak er a chelebuul. Ng mo klou a ngerek el mengitakl el kirel olsobel er kau, ele ke mesebechakl er ngak. . . . Tirkel oumeral ulsirs er a RUBAK a selebechakl er a diak le mengodech el bltikerreng er ngii.” (Psa. 32:7, 10) Ngdi ua cheotelel a beluu el lulemekerreu er a rechad el mle kiei er a chelsel, a diak lemengodech el bltikerreng er a Jehovah mesebechakl er kid er a ngii di el tekoi el mo choitechetur a deleuill er kid me ngii. Me a dirrek el diak lemengodech el bltikerreng er ngii odbechii a Jehovah el mo olekeed er ngii er kid.—Jer. 31:3.
Morriter er a Tekingel a Dios
w10 10/1 14-15 par. 19-20
“Le Ngtecha Medengelii a Uldesuel a [Jehovah?]”
19 Ngera kede mla suubii el kirel a “uldesuel a [Jehovah]”? Ngkired el ousbech er a Tekingel el meklemeltii a uldesued el mo oltirakl er a uldesuel. Ngkmal diak el kired el omes er a Jehovah el di ua rechad e dirrek el diak doukerrekeriil er ngii el oltirakl a uldesued. A Job a dilu el kmo: “Chomko Dios a chad el ua ngak, e ng sebechek el onger er ngii; e aki dmak el mor a kerrekeriil el smodii a delongelam.” (Job 9:32) Sel bo dodengelii a uldesuel a Jehovah e kede mo ua Job el mle sebechel el melekoi el kmo: “E ngdi ika di dertelkib el olechotel a klisichel. Ng di omengelulau er ngii el de rirenges. Ng techa sebechel el mo medengelii a meral klungel a klisichel a Dios?”—Job 26:14.
20 Ngera kired el meruul er ngii a lsekum e kede menguiu er a Biblia e metik a tekoi el meringel er kid el mo medengei a belkul el ileakl el kirel a uldesuel a Jehovah? A lsekum kede merriter er ngii e dirrek el diak bo el bleketakl er a rengud, e ngsebeched el omes er ngii el ta er a omelsemai el kirel a klaumerang er kid el mo er a Jehovah. Lak dobes el kmo a tekoi el meringel er kid el mo medengelii a belkul a meskid a techelled el mo ochotii a klaumerang er kid el kirel a Jehovah. Ngkired el medengei el kmo ngdiak el sebeched el mo medengei a rokui el tekoi el loruul a Jehovah. (Olisechakl 11:5) Kede kongei er a klemerang er a tekingel a apostol el Paulus el kmo: “O, ngmeral dmolech a ilteet ra llomeserreng ma klemedengei ra Dios! A kerrekerilel a diak le mutab ma rolel a diak le motirakl! ‘Ngtecha mle medengelii a rengul a Rubak, malechub e ngtecha mlara telbilel a uldasu ra Rubak?’ ‘Ma techa ulemuchel el msa Rubak me ngkirel nguu chomeksaul?’ Le rokuil tekoi a duubech ra Dios, e motaut loeak ngii, e lmuut el mora Dios. A klebkall le bora Dios el mo cherechar. Amen.”—Rom 11:33-36.
OCTOBER 30–NOVEMBER 5
MEKREOS EL TEKOI EL NGAR ER A BIBLIA | JOB 11-12
“Edei el Rolel e Ke Nguu a Llomeserreng e Nguu a Klungiolem er Ngii”
w09 4/1 12 par. 17
A Job a Uleldanges er a Ngklel a Jehovah
17 Ngera ngilsuir a Job el lomelemii a blakerreng er ngii? A uchei er a bo el charm, e ngmilekurulii a kmes el deluill er ngii el obengkel a Jehovah. Ngdiak a olechotel a kmo ngmle medengelii sel omelsemai er a Satan el omtok er a Jehovah, engdi ngii a millemolem er a blakerreng er ngii. Ngdilu el kmo: “Ng mo lmuut er a kodellek el di kdu el kmo ng diak a telemellek.” (Job 27:5) Ngmilekerang a Job e mekurulii a kmes el deluill el obengkel a Dios? Ngulterekokl el rirenges a omerellel a Dios el mo er a Abraham me a Isak me a Jakob, el tir a mle chedal er a irechar. E dirrek el sel lomes aike el bleob el meliuekl er ngii, e ngmle sebechel el omtab a betok el blekerdelel a Jehovah.—Monguiu er a Job 12:7-9, 13, 16.
Ngkmal Diak Di Lekau el Tang e Le Jehovah a Blechoel el Obengkem
10 Momak a klausechelei er kau lobengterir a reblak a rengrir el Kristiano. Mosiik er a resechelim er a ongdibel el sebechem el ngmai a klubelem er tir. Tirka sebechir el meklou, mekekerei, me a lechub e te chad er a ngodech el beluu. A Biblia omeklatk er kid el kmo a “re mechuodel a mellomes a rengrir.” (Job 12:12, 13) A remeklou a dirrek el sebechir el ngmai a klubelir er a remekekerei. A David a kmal mle kekerei er a Jonathan engdi ngmla er ngii a kmes el deleongel er tir. (1 Sa. 18:1) A David me a Jonathan a mle kaingeseu el mesiou er a Jehovah er a chelsel a betok el meringel el blekeradel. (1 Sa. 23:16-18) A Irina el di ngii el tang a Sioning er a telungalek er ngii a kmo: “A rudam me a rudos er kid a mera el sebecherir el mo delad, demad, e ta er kid. A Jehovah a sebechel rulleterir el mo sel telungalek el dousbech er ngii.”
11 Ngsebechel mo meringel er kid a omak a klausechelei er kid me a rebebil, tokubets a lsekum e kede sekemerur. A Ratna el kmal sekemerur el odos el silubii a klemerang alta ngmlo chobangel a ultok a kmo: “Ngmle kirek el kongei el kmo ak kuusbech er a ngelsuil a telungalek er ngak er a klereng.” Ngsebechel el mo meringel er kid ouchais aike el ngar er a rengud, me nguaisei engdi a kmes el deleongel a mouak loeak a ungil cheldecheduch. A resechelim a kmal sorir el melisiich e olengeseu er kau, me nguaisei engdi ngkirem el louchais er tir er a rolel e ngsebechir el meruul el uaisei.
12 A ta er a kot el ungil rolel e ngsebeched lomak a klausechelei er kid me a rebebil a sel domerk er a klumech el obengterir. A Carol el dulsaod er ngii er a uchei a kmo: “Ngkmal mla mo er ngii a rungil sechelik e le kmilengoit a taem el obengterir el oldingel e meruul a tekoi el ngar omesiungam el mora Jehovah. Ngar aika el mereko el rak e a Jehovah a mla ngosukak el oeak tirkaikid el sechelik.” Ngsebeched el mesa el kmo ngkmal mo uchul a klungioled sel domak a klausechelei er kid lobengterir a reblak a rengrir el Kristiano. A Jehovah ousbech er tiakid el klausechelei er kid me a rebebil el olengeseu er kid el mo mesisiich a mengitechut el uldasu, el uai sel bo domdasu el kmo ngkmal di kid el tang.—Osi. 17:17.
it-2 1190 par. 2
Llomeserreng
Llomeserreng el Mlara Dios. Cherrengelel a llomeserreng a ngar er a Jehovah el Dios, el “di ta el ngii a mellomes.” (Rom 16:27, NW; Och 7:12) A klemedengei a dmak loureor lobengkel a tekoi el ngii a klemerang, me a Jehovah el ngii a Ulemeob, el ‘diak a ulebengelel el Dios, el diak a uchelel el diak a ulebengelel’ (Psa 90:1, 2), a medengei a rokui el tekoi. Aike el tekoi el omtebechel er a melidiul me a rolel a rokui el tekoi er a beluulechad oureor el rechad ousbech er a research me a invention er tir, el lak ngii e ngdiak el sebechir a rechad el omekduch a ngii di el ngerang, a mengai er a tekoi el bla leruul a Jehovah. (Job 38:34-38; Psa 104:24; Osi 3:19; Jer 10:12, 13) Me a llechul el kirel a ungil me a mekngit a lmuut el ngaruchei e klou a ultutelel el kirel a ungil klengar el kirir a rechad. (Dut 32:4-6) Ngdiak a tekoi el diak el lutebengii a Jehovah. (Isa 40:13, 14) Alta ngomechei a tekoi el omtok a melemalt el llechul me ngngar ngii, engdi a ngar medad e ngmo remuul a rokui el tekoi el mo oltirakl er a soal me aike el tekoi el bla ledung a “diak le iit.”—Isa 55:8-11; 46:9-11.
Morriter er a Tekingel a Dios
w08 9/1 28 par. 5
Sel Dongedecheduch er a Rengeasek
▪ ‘Ngak ak kumtab a belkul a tekingel?’ A Job 12:11 a kmo: “Ng kmal di ua charm e soal el mengarm a kall, ma dingam me ng ua isei el soal lorrenges a tekoi.” Me a chelechang e ngkmal kirem el “mengarm” a tekingel a ngelekem. A rengeasek a blechoel el mesaod a tekoi el ua el klemerang. El ua tiang, “Ke blechoel el diak morrenges er ngak!” e “Ke blechoel el omdasu el kmo ak dirk ngalek!” Moba klemedengei el kmo a ngelekem a sebechel el blechoel el melekoi a tekoi el diak el mera el ngar er a rengul. Sel lolekoi el kmo, “Ke blechoel el omdasu el kmo ak dirk ngalek,” a sebechel el belkul a kmo, “Ngdiak moumerang er ngak.” E a “Ke blechoel el diak morrenges er ngak,” a belkul a kmo, “Ngsoak el ouchais aike el ngar er a renguk.” Molasem el omtab a belkul a tekingel.