Reference el kirel a Subeled er a Miting er a Klengar me a Omesiunged
© 2023 Watch Tower Bible and Tract Society of Pennsylvania
JANUARY 1-7
MEKREOS EL TEKOI EL NGAR ER A BIBLIA | JOB 32-33
Mongelaod er Tirke el Betok a Lebekikl el Kirel
it-1 710
Elihu
Elihu dimlak lolab el mora ngii di el chad me a lechub e lolad er tir. Ngmle medengei el kmo ngkmal di ua Job el rruul er a chutem me a Olab a Bek el Klisiich a Ulemeob er ngii. Ngdimlak el soal lomekdakt er a Job e ngbai mera el sechelil el milengedecheduch er ngii lousbech er a ngklel, el blekeradel el dimlak a ta el loruul er ngii a Elifas, Bildad, me a Sofar.—Job 32:21, 22; 33:1, 6.
Kau Ke Oba Osengel a Jehovah el Kirel a Chelitechut?
8 Ngera sebechel el ngosukid el mo oba klemedengei el bedul a rudam er kid el ousbech a ngeso? Lak mobes el kmo a rebetok er tir a chuarm el kirel a secherir me a lechub e ngringelel a uldasu me a lechub e te kiei el teloi er a rediak loumerang el chederir. Oleko kede chelebangel a osisiu el tekoi e ngulterekokl el soad a rechad a bo lolechesuar a blekeradel el dechelebangel er ngii. Ka molatk er a rechad er a Israel. Te kmal chilarm er a betok el ringel er a beluu er a Ekipten, engdi uchei er a bo lesiseb er a Beluu er a Nglat e a Jehovah a ulemeklatk er tir el kmo ngkirir el kerekikl me lak bo lolechib a mederir er tirke el ousbech a ngeso. Ngmilengerechir er a rechad er a Israel el mo olengeseu er tirke el mechitechut me a remechebuul.—Lev. 25:35-38; Dut. 15:7, 11.
9 Ngdiak el kired el mereched el mo oltelechakl er a rudam er kid el kirel a mondai er tir me a lechub e bo domdasu el kmo kede kuk ungil er tir. Ngbai soad el olengeseu er a rudam er kid sel lousbech a ngeso. (Job 33:6, 7; Mt. 7:1) El ua tiang, oleko a chad a ngar er a chotobai e accident el metemall me te nguu el mo er a osbitar, e a re nurs me a re toktang te mo mechesang el oker el kmo ngtecha ngike el uchul a accident? Ngdiak, te bai omuchel el omkar er ngika el telemall el chad. Me tiang a di osisiu el blekeradel el kired. Sel taem el odam er kid a mo mechitechut a rengul e ngkmal kired el mereched el mo melisiich er ngii.—Monguiu er a 1 Thesalonika 5:14.
10 Te ngar er ngii a rebebil el rudam me a rudos er kid el domes er tir e ngua lekora mechitechut. Engdi sel bo dekerekikl el omtab a blekerdelel a klengar er tir e kede locha mo medengei el kmo ngkmal diak lemechitechut. Ka di molatk er a ringelel a klengar er a odos el bechil a diak losiou er a Jehovah. E kuk mekerang a chedil el di mesobil e kmal blak a rengul el omekeroul er a rengelekel e dirk melemolem el blak a rengul el mei er a miting? Me a lechub a rengeasek el tir a bek el sils el oltngakl a orimel er a skuul el sebechel el mo uchul e te mo cheroid er a klemerang. Tirka el rokui a mera el betik a rengrir er a Jehovah e mla tibir el mo melemolem el blak a rengrir el mo er ngii. Me sel dolatk aika el tekoi el lechelebangel, e tiang a ngosukid el mo omes er tir el “mesisiich el oumerang” alta e kede omdasu el kmo te mechitechut.—Jak. 2:5.
Ngoingerang a Ungil Taem el Dongedecheduch?
17 A ongeua el chad el mlo omes er a Job a Elihu el chedal a Abraham. Ngulerrenges er a Job me tirke el tedei el chadecheduch. Ngmle blak a rengul lorrenges me ngmlo sebechel el ungil el mengedecheduch e bleketakl a uleklatk el ledilung el ngilsuir a Job el sumecheklii a uldesuel. (Job 33:1, 6, 17) Ngmle klou a ultutelel er a Elihu el mo kobkellii a Jehovah, el diak el ngii me a lechub e ngii di el chad. (Job 32:21, 22; 37:23, 24) Me ngokiu a kerebil a Elihu, e kede suubii el kmo ngar ngii a taem el di deluk me a taem el dongedecheduch. (Jak. 1:19) Kede dirrek el suubii el kmo sel domeklatk, e a kot el klou a ultutelel tekoi el dolatk er ngii a mo msa klebkall a Jehovah el diak el kid.
18 Ngsebeched lochotii el kmo kede mengreos er tia el sengk er a omengedecheduch lokiu sel doltirakl a ulekrael el kirel a taem el dongedecheduch me a rolel a dongedecheduch. A mellomes a rengul el King Salomon a mlukrael el mo meluches el kmo a tekoi el “medung er a ungil blsechel a di ua kolt el ringngo el ngar a klebokel belatong el silber.” (Osi. 25:11) Me sel bo dungil rongesii a chad ebo domdasu er a uchei er a dongedecheduch, e a tekinged a mo uaike el kolt el ringngo el mekreos e dirrek el klebokel. A bo deuaisei, e alta ngkedeb me a lechub e ngkemanget a tekinged, engdi ngmelisiich er a rebebil, e dirrek el rullii a Jehovah el mo dmeu a rengul er kid. (Osi. 23:15; Efe. 4:29) Tiaikid a kot lungil rolel e kede ochotii el kmo kede mereng a sulel a Dios er tia el sengk er a omengedecheduch!
Morriter er a Tekingel a Dios
Molemolem el Olekeed er Kau er a Jehovah
10 Ngdirrek el kired el mo kerekikl er a rolel a dongetmokl er kid, engdi ngdiak el kired el omesiich er kid el uai a rengeasek. A Biblia a kmo: “A kemanget el klengar a omeksullel a melemalt el chad, ma cheball el chui a krone er a klebkall.” (Osi. 16:31) A Jehovah a omes er a rengul a chad el kuk klou a ultutelel er a rolel a longetmokl er ngii, me kid me ngkired el mo oba osisiu el uldasu. (Monguiu er a 1 Petrus 3:3, 4.) Kid kede mo melemall er a klengar er kid el oeak a kdekudel el rolel a ukeruul me a lechub e ngbotk el mo menglebokel er kid? Ngdiak el ior er a rekid me a klisichel a bedenged, e le mera el klebekellel a chad a mo er ngii el oeak a ‘deurreng el le besterir a RUBAK.’ (Neh. 8:10) Ngar er a chelsel a beches el beluulechad, e ngmo cherrungel a klisichel a bedenged e sebeched el lmuut el mo ngeasek. (Job 33:25; Isa. 33:24) Me chelecha el dongiil er sel taem, e ngkired el mo ungil el melilt a tekoi e mo oumerang aike el telbilel a Jehovah. Tiang a mo ngosukid el mo dmeu a rengud er a klengar er kid er chelechang e mo diak desal lomdasu el kirel a klisichel a bedenged.—1 Ti. 4:8.
JANUARY 8-14
MEKREOS EL TEKOI EL NGAR ER A BIBLIA | JOB 34-35
Sel Ua Lak el Fair a Klengar
A Dios, Ngngua Ngerang?
A Dios a meruul a llemalt. “Ngkmal diak el sebechel a di ta el mera el Dios el meruul a mekngit, ngdiak el sebechel a Olab a bek el klisiich el meruul a cheleuid!” (Job 34:10, NW) A kerrekerilel a melemalt. Ngdi ua lolekoi a ta er a milluches er a Psalm el kirel a Jehovah: “Koukerrekeriil er a re chad er a bek el beluu el oba llemalt.” (Psalm 67:4) A Jehovah “omes er a rengul a chad” a uchul me ngdiak el mecheblad er a blulekngir. Ngmedengelii a klemerang me ngsebechel melemalt el loukerrekeriil. (1 Samuel 16:7) Me a lmuut kung, a Dios a medengei a rokui el diak el melemalt me a chebirukel lomeruul er a beluulechad, e mla tibir el kmo ngdi kmedung e ngmo “melai er a re dengerenger el oltobed er tir er a beluu.”—Osisechakl 2:22.
Ngera Mo Nguemed Sel Lemei a Rengedel a Dios?
5 Ngera ngmo meruul er ngii a Jehovah? Chelecha el taem, e a Jehovah a dirk omesterir a techellir a remekngit el chad me lobult. (Isaia 55:7) Alta e tia el mekngit el blekeradel a kmedu el mo nguemed, engdi tirka el chad a dirkak lemukerrekeriil. Me ngera mo duubech el mo er tirke el diak lekengei el ngmodech a blekerdelir, e dirk melemolem el melisiich er tia el blekeradel el mo lmuut er a taem er a kloul ringel? A Jehovah a mla tibir el kmo, ngmo okngemedeterir a rokui el mekngit el chad er tia el chutem. (Monguiu er a Psalm 37:10.) Chelecha el taem, e a rebetok a meduch el omart a mekngit el omerellir me te blechoel el diak bo lobals el kirel ngii el omerellir. (Job 21:7, 9) Engdi a Biblia a mengelechel er kid el kmo: “Ng mengkar a bek el blekeklel a chad. Ng diak a milkolk el sebechel el mertii er a Dios a chad el meruul a klengit.” (Job 34:21, 22) Me ngkmal diak el sebechel a ngii di lengerang el obart er a osengel a Jehovah. Ngsebechel el mes a rokui el mekngit el omerellir. E a uriul er a Armakedon, e kede mo osiik er tir er aike el basio el lebla er ngii engdi ngkmal diak debetik er tir. Te mo nguemed el mo cherechar!—Psa. 37:12-15.
Ke Mo Mesibas er a Jesus?
19 Kede mesa osisiu el tekoi er chelecha el taem? Chochoi. A rebetok a mesibas e lekid el diak domekbitang er a tekoi er a balatiks. Ngsorir a desengkio. Me nguaisei engdi kede mtebengii el kmo, a dengiltii a chad el mo mengedereder er kid e a Jehovah omes er kid el oltngakl er ngii. (1 Sa. 8:4-7) A rechad a dirrek el omdasu el kmo, ngkired el omekedechor a skuul me a osbitar e meruul a tekoi el olengeseu er a beluu. Te mesibas lekid el blak a rengud el omerk er a klumech e diak dolasem el mesmechokl a mondai er tia el beluulechad.
20 Ngera kired el meruul me lak demesibas? (Monguiu er a Mateus 7:21-23.) Ngkired el nguu tia el ureor el bilskid a Jesus el mo kot el klou a ultutelel er a klengar er kid. (Mt. 28:19, 20) Ngdiak el soad el mechei a tekoi er a balatiks me a beluu me bo longesang er kid. Ngbetik a rengud er a rechad e soad el olengeseu er tir er a mondai er tir, engdi kede medengei el kmo sel kot el ungil rolel e ngsebeched el olengeseu er tir a dosisecheklterir el kirel a Rengedel a Dios e dengesuterir el mekurulii a deleuill er tir me a Jehovah.
Morriter er a Tekingel a Dios
Me Sel Rengum el Soam el Melenget Bo Luchul a Odanges el Mo Jehovah!
3 A kekerei el chad el Elihu a ulerrenges a cheldechedecherir tirka el tedei el chad me a Job. Me sera bo lemerek, e a Elihu a uleker er a Job el kirel a Jehovah el kmo: “Ke ngosuir a Dios cho msal mo melemalt? Ng diak a ngeral lousbech er ngii er kau a Dios.” (Job 35:7) Me a tekingel a Elihu, ngua lullasem el mesaod el kmo a blakerreng er kid el mesiou er a Dios a diak a belkul? Ngdiak leuaisei. A Jehovah a dimlak losmechokl er a Elihu el ua lurruul el mo er tirke el tedei el chad. A Elihu a mle ngodech a omesodel er a tekoi, el belkul a tekingel a kmo a Jehovah a diak lousbech er kid el mo mengull er ngii, e le Ngii a cherrungel el Dios. Ngdiak el sebeched el rullii el lmuut el mo meteet, me a lechub e nglmuut el mo mesisiich. E le rokui el ungil el blekeradel me a duch, a dengilai er a Dios e ngii a omes er kid er sel rolel a dousbech aika el tekoi.
JANUARY 15-21
MEKREOS EL TEKOI EL NGAR ER A BIBLIA | JOB 36-37
Uchul Me Ngsebechem Loumerang er a Telbilel a Dios el Kirel a Diak a Ulebengelel el Klengar
Ngsebeched el Mo Ungil el Medengelii a Dios?
A DIOS EL DIAK A UCHELEL ME A ULEBENGELEL: A Biblia a olisechakl el kmo a Dios a ‘diak a ulebengelel, el diak a uchelel.’ (Psalm 90:2) Me ngbleketakl el kmo ngdiak dodengelii a uchelel, e Ngii a di ngar er ngii el mo cherechar. Me a rechad a ‘diak el sebechir el mo cherrungel el medengelii a klengarbab er ngii, ma lechub e le bechur a rekil.’—Job 36:26.
A klungiolem: A Dios a tibir a diak a ulebengelel el klengar el kirem a lsekum ke mo ungil el medengelii. (Johanes 17:3) Kede mekerang e mo ultuil er tia el telbiil oleko Dios a diak el sebechel el melemolem el ngar el mo cherechar? Ngdi ngike el “King el diak a uchelel ma ulebengelel” a sebechel el otutii tia el telbiil.—1 Timothy 1:17.
Kau, Ke Mereng a Sulel a Dios er Aike el Lebeskau?
6 A ralm el ngar a beluulechad a moitiitel e le beluulechad a kmal lungil a cherridel er a sils. A lsekum a beluulechad a mlo telkib el kmeed, e ngmrecherechii a ralm el mo diak, me ngkmal mo mekeald e medidirt el diak lsebechel a bleob el kiei er ngii. E a lsekum ngtelkib el mlo cheroid, e a rokui el ralm er a chelsel a mo kori el di dokedekii tia el chutem. Me a Jehovah a lilia tia el beluulechad er a kmal ungil basio me ngsebechel lomekbeches a ralm el mo uchul a klengar. A sils a kmeldii a ralm el ngar a daob me a bebul a chutem e mebii el mo eabed. Me a bek el rak, e a sils a mengeald er a kmal imis el klou el ralm. E tia el ralm a di ngar a melidiul el bekord el teruich el klebesei er a uchei er a lerebet el chull me a lechub e ng yuki. Me a cherengel a taem, e tia el ralm a lmuut el mora daob me a kuk bebil er a basio, e di melemolem el uaisei. Tiang a meketeklii el kmo a Jehovah a mellomes a rengul e mesisiich.—Job 36:27, 28; Oli. 1:7.
Lolemolem el Mesisiich a Omeltkem
16 A omeltked er a diak a ulebengelel el klengar a mekreos el sengk er a Jehovah. Kede kmal omes el beduluchei el kirel a ungil el klengar er a ngar medad, el dodengelii el kmo ngmera el mo tmaut. Tia uai a uak, el omtebechel er kid me ngsebeched loutekangel a ringel, mo mesisiich odechelakl, e diak demedakt el mad. Ngua lkunged, lomekerreu er a uldesued me lsebeched lotngakl a cheleuid el uldasu e mo melemolem lurrekodel er a klemerang. A omeltked el mengai a uchetemel er a Biblia olekeed er kid er a Dios e ochotii a dmolech el bltkil a rengul el mei er kid. Nguchul a klungioled sel lolemolem el mesisiich omeltked.
Morriter er a Tekingel a Dios
(Job 37:20, NW) Ngkired el louchais er ngii el kmo ngsoak el mengedecheduch? Me a lechub e ngngar ngii a chad el mla dmu tekoi el kired louchais er ngii?
it-1 492
Omengedecheduch
A tekoi me a uldasu er a taem er a rechad er a Biblia a lulemerk el ngar er a kakerous el rolel. A klou el rolel e te mle kauchais a chais er a beluu me a chais er cheroid oeak a tekoi er a ngor. (2Sa 3:17, 19; Job 37:20) Rechad el mirrael a beluu el omsaso a klalo sel stob losiik a kall, ralm, me a lmuut bebil e te ullab a chais er a cheroid el beluu. A beluu er a Palestine a kmal mle ileakl le ngmlara bita er a Asia, Africa, me a Europe, me a remerael a mlei el ngar er a kakerous el beluu. Me ngmle beot er a rechad el kiei er a beluu er a Palestine el ngmai a chais er a ngodech el beluu. Chais er a beluu me a chais er cheroid a mle sebechir el ngmai er a blil a makit.
JANUARY 22-28
MEKREOS EL TEKOI EL NGAR ER A BIBLIA | JOB 38-39
Kau, Ke Mengoit a Taem el Omes a Blebelel a Jehovah?
Kau Ke Kongei el Mengiil er a Jehovah?
7 A Biblia mesaod el kirel a Jehovah er a lomeob er tia el chutem el kmo ng “millib el kmo ng mo ua klungel a ngerang,” e lilia orreked er a “nglosel,” e lilia “saus el bad er a beluulchad.” (Job 38:5, 6) Ngdirrek el milengoit a taem el omes a urerel. (Gen. 1:10, 12) Ka molatk a uldesuir a rechanghel er a lomes aike el tekoi el lulemeob a Jehovah. Te locha kmal mle semeriar el omes! A ta el taem e te mlo ‘oldiu er a deurreng.’ (Job 38:7) Ngera kede suubii? A Jehovah a uluusbech a betok el telael el rak el omeob er tia el chutem, me nguaisei engdi sera bo lomes aika el blebelel el lulekekokil lomeob e ngdilu el kmo, “ngkmal ungil.”—Gen. 1:31, NW.
A Okiis a Ochotii a Bltikerreng, Llomeserreng, me a Kllourreng er a Dios
2 A kot e a Jehovah a milebii a kldemel er a ureor. E okiu ngika el kot el Ngalek, e “a rokuil tekoi” a ulebeob, el uldimukl er a rebetok el miliol el anghel. (Kol. 1:16, BT) A Jesus a kmal mle dmeu a rengul er tia el ileakl el techall el mo oureor lobengkel a Demal. (Osi. 8:30) Me a rechanghel el ngelekel a Dios me te dirrek el mla er ngii a uchul e te mle dmeu a rengrir. Tirka miles a rokui el tekoi el leriruul er a eanged me a chutem a Dios me a Jesus, el ngii a mle Ua Chad er Omelib el Blai. Ngera mle uldesuir? Te “uleldiu er a deurreng” er a lesa beluulechad el obeob e dirrek el uleba deurreng er a leues aike el bek el blebelel a Jehovah, el tokubets a rechad el blebelel. (Job 38:7; Osi. 8:31) Me a derta er aika el blebelel a Jehovah a ulechotii a bltikerreng me a llomeserreng er ngii.—Psa. 104:24; Rom 1:20.
Msuub a Lmuut el Betok el Kirel a Jehovah Sel Momes a Blebelel
8 A Jehovah a rredemelel a klaumerang er kid. A Jehovah ngilsuir a Job el lmuut el mo dmolech a klaumerang er ngii er ngii. (Job 32:2; 40:6-8) Ngar er a cheldechedechal lobengkel a Job e ngmilsaod a betok el blebelel luldimukl er a btuch, eabed, me a bisebusech. Ngdirrek el milsaod el kirel a charm, el ua kerbou er a ked me a uos. (Job 38:32-35; 39:9, 19, 20, NW) Aika dimlak di lochotii a klisichel a Dios ngdirrek lochotii a bltkil a rengul me a llomeserreng er ngii. Ngoeak tia el cheldechedecherir e a Job a kmal mlo mesisiich a klaumerang er ngii er a Jehovah. (Job 42:1-6) Ngdi osisiu, sel dosuub el kirel a blebelel a Jehovah e ngomeklatk er kid el kmo, a Jehovah a lmuut el mellomes a rengul e mesisiich er kid. E kmal sebechel torrob a rokui el ringeled, e ngii a mo meruul er tiang. Sel bo dodengelii tiang e ngsebechel ngosukid el smisichii a klaumerang er kid er ngii.
Morriter er a Tekingel a Dios
it-2 222
Ngike el Omeskid a Llach
Jehovah omeskid a llach. Jehovah ngike el omeskid a llach. Ngmla remuul a llach el ngii a mengederoder a blekeradel er a melidiul me a beluulechad (Job 38:4-38; Psa 104:5-19) me a klengar er a charm. (Job 39:1-30) A rechad el blebelel a Jehovah a dirrek el kirir loltirakl aika el llechul mengederoder er a melidiul me a beluulechad. Me a rechad el sebechir el merriter a tekoi e medengei a ungil me a mekngit a uchul me ngdirrek el kirir lolengesenges a llechul a Dios el kirel a ungil me a mekngit. (Rom 12:1; 1Ko 2:14-16) A llechul a Jehovah dirrek el mengederoder er a rechanghel.—Psa 103:20; 2Pe 2:4, 11.
Llechul a Jehovah el mengederoder er a melidiul me a beluulechad a diak el sebechel mengodech. (Jer 33:20, 21) A llechul el bleketakl el mues er a melidiul a kmal melemalt e sebeched lultuil a uchul me a re scientist el medengei a sodel a sebechir el calculate a movement er a buil me a planet me a lmuut el bebil er a klekedall er a melidiul. Sel bo lak lotirakl aika el llechul a melidiul e ngduubech a tellemall. Ngdi osisiu el kirel a llechul a Dios el kirel a ungil me a mekngit. Ngdiak el sebechel mengodech. A bo lak doltirakl e ngmo uchul a tellemall. Ngkmal el ulterekokl el di ua llechul a Dios el kirel a melidiul, me nguaisei a tellemall a locha diak lemereched el duubech. Engdi “lak kom mecheuid; a Dios a diak le mecheblad, ele ikel lolalem a chad, ia ikei a bo loridm.”—Gal 6:7; 1Ti 5:24.
JANUARY 29–FEBRUARY 4
MEKREOS EL TEKOI EL NGAR ER A BIBLIA | JOB 40-42
Aike el Desuub er a Experience er a Job
w10 10/1 11-12 par. 4-6
“Le Ngtecha Medengelii a Uldesuel a [Jehovah?]”
4 Sel dolebedebek a ungil el omerellel a Jehovah, e ngkired el mo kerekikl me ngdiak doukerrekeriil a omerellel el oba uldesuel a klechad. Tia el omeruul a medung er a tekingel a Jehovah el ngar er a Psalm 50:21 el kmo: “Me kulemdasu el kmo a kua ikau.” El di ua tekingel a chad el milsuub er a Biblia er a 175 el rak er a mla me mong el kmo: “A rechad a oukerrekeriil er a Dios el oltirakl a di uldesuir e dirrek el omdasu el kmo a Dios a kirel el mukerrekeriil el oltirakl a llach el ua rechad.”
5 Ngkired el mo kerekikl me lak bo domes er a Jehovah el di oltirakl a uldesued me aike el soad el tekoi. Ngera uchul me tiang a kmal klou a ultutelel? El uai tiang, sel dosuub a Bades e ngsebeched el mo omdasu a bebil el blekerdelel a Jehovah el ua lak el melemalt el oltirakl er a diak el cherrungel el osenged er a tekoi. Tiaikid el omeruul a dilubech el mo er a rechad er a Israel el mlo uchul a cheleuid el uldesuir el kirel a omerellel a Jehovah el mo er tir. Ka momtab a tekingel a Jehovah el mo er tir el kmo: “Ngdi kemiu a kmo, ‘A loruul er ngii a Rubak a diak le melemalt.’ Morrenges er ngak kemiu el chad er a Israel. Kom omdasu el kmo a blekerdelek a kuruul a tekoi a diak le melemalt? Ng bai blekerdeliu a diak le melemalt.”—Esekiel 18:25.
6 A ta el tekoi el sebechel el ngosukid el mo mengeroid er kid er a mekngit el uldasu a mo kerekikl me ngdiak doukerrekeriil er a Jehovah, e dirrek el diak dobes el kmo ngdiak de mecherrungel me kede mo remuul a cheleuid el tekoi. A Job a mluklatk el kirel tia el tekoi. Ngar sel taem er a le chuarm er a ringel, e ngmlo omdasu el di kirel e le ng chelebuul el lechilarm er ngii a uchul. Ngmlo diak lolatk a meklou a ultutelel el tekoi. Engdi ngoeak a bltkil a rengul a Jehovah e ng silmecheklii a uldesuel a Job. A Jehovah er a loker er a Job a 70 el kakerous el ker e ngdimlak el sebechel el longer er a ta er ngii el ker. Me tiang a mileketeklii er a Job el kmo ngii a mle cheleuid a uldesuel. Me a klengariourreng er a Job a ngilsuir el mo meklemeltii a uldesuel.—Monguiu er a Job 42:1-6.
Moltaut a Osengem er a Meklou a Ultutelel el Tekoi
12 Me a Jehovah, ngkmal mle mekngit a tekingel el mo er a Job el ngii a chormang er a betok el ringel? Ngdiak leuaisei, a Job me ngdirrek el dimlak lomdasu el uaisei. Ngmle medengelii a klungel a ultutelel a uleklatk er a Jehovah, a uchul me ngdilu el kmo: “Ak merrengang er a ikel rokui el bla kdung, mak uuchela er a renguk mak ulat er a chebechab e mengab er ngak er a chab.” (Job 42:1-6) E a uchei, e a kekerei el chad el Elihu a dirrek el ngilsuir a Job el mo sumecheklii a uldesuel. (Job 32:5-10) Me a Job er a uriul er a lerengesii a melemalt el ulekrael er a Jehovah e lengedechii a uldesuel, e a Jehovah a mileketeklii el mo er a rebebil el kmo, ngkmal dmeu a rengul er a blakerreng er a Job.—Job 42:7, 8.
“Moumera el Ulsirs er a Jehovah”
17 A Job a di tang er tirke el mesiungel a Jehovah el millemolem loba kllourreng e mesisiich a rengrir er a chelsel a meringel el omelsemai. Ngar er a babilengel a apostol Paulus el mora rechad er a Hebru, e ngmilsaod el kirir a relmuut el betok el bebil e millekoi el kirir el kmo, te “klou el ildois er a re chad el mlo chemolt el mesisiich el oumerang.” (Heb. 12:1) Te rokui el mlo chobangel a meringel el omelsemai engdi te millemolem el oba blakerreng el mora Jehovah. (Heb. 11:36-40) Me ngmlo diak a ultutelel a ducherreng er tir? Ngkmal diak el uaisei! Alta te dimlak el ues otutel a telbilel a Jehovah er a klengar er tir, engdi te millemolem el oumera el ulsirs er ngii. Me tir el mle ulterekokl a rengrir el kmo te oba kengei er a Jehovah a uchul me ngulterekokl a rengrir el kmo te mo mes otutel a telbilel. (Heb. 11:4, 5) A kerebai er tir a kmal sebechel smisichid el mo melemolem el loumera el ulsirs er a Jehovah.
18 Kid er chelechang a kiei er a mekngit el beluulechad el ngii a di merael el mengal mo mekngit. (2 Ti. 3:13) Satan a dirkak bo lemerek el melasem er a rechedal a Dios. Me a ngii di el omelsemai el bo dechebangel er a ngar medad, derellii er a rengud el mo meringel loureor el kirel a Jehovah e lulterekokl a rengud er a “chomelatk er kid [el] ngara dingar el Dios.” (1 Ti. 4:10, BT) Lak mobes el kmo a omerellel a Dios el mora Job ochotii el kmo, “a Rubak a kmal bekokuii e chubechubchad.” (Jak. 5:11) Mada dirrek el dolemolem el oba blakerreng el mora Jehovah, e lulterekokl a rengud el kmo ngmo omekngeltengat er “tirkel osiik er ngii.”—Monguiu er a Hebru 11:6.
Morriter er a Tekingel a Dios
it-2 808
Oltuub
Job a mle melemalt el chad el millemolem loba blakerreng alta ngrirenges a kmal mekngit el otuub. Engdi ngmlo oba diak el melemalt el uldasu me ngrirellii a cheleuid e ngilai omesmechokl. A Elihu dilu er ngii el kmo: “Ngtecha el chad a ua Job, el sebechel melim a otuub el ua lralm?” (Job 34:7, NW) A Job a kmal di mlo melatk el kirel a llemeltel el ngaruchei er a Dios. (Job 35:1, 2; 36:24) Sera lengai a kmal mekngit el otuub er tirka el tedei el “sechelil” e ngulemes aika el tekingir el diak el bedul a Dios e ngbai bedul ngii. Me ngua chad el olechau otuub el mo er ngii e oldeu a rengul er otuub el di ua lolim a ralm. A uriul e a Dios a silodii el mora Job el kmo aika el diak el klemerang el tekoi el lullekoi tirka el tedei a mle bedul a Dios. (Job 42:7) Jehovah dilu osisiu el tekoi el mora profet Samuel er sel taem el rechad er a Israel a mlo sorir a lebo er ngii a king er tir el kmo: “Ng dimlak loltngakl er kau, te bai uleltngakl er ngak el king er tir.” (1Sa 8:7) Me a Jesus a dirrek el dilu er a redisaiplo er ngii el kmo: “Rokui el chad a mo ouketui er kemiu el [diak el kemiu a uchul e ngbai] ngak a uchul.” (Mt 24:9) A Kristiano sel lak lobes aika el tekoi e ngmo sebechel mtekangel a otuub el loba melemalt el uldasu e mo nguu omeksulel.—Lk 6:22, 23.
FEBRUARY 5-11
MEKREOS EL TEKOI EL NGAR ER A BIBLIA | PSALM 1-4
Mngiltii a Rengedel a Dios
“Ak Mo Melmesim a Rokui el Renged”
8 Ngera uldesuir a rechad el kirel tia el klumech er a Renged? Oumesingd el chad a diak el sorir. (Monguiu er a Psalm 2:1-3.) Tia mla ongasech a rengrir aika el renged er a beluulechad. Te kmal diak lekengei er a telutk el King er a Jehovah. Ngkmal diak lomes er a klumech el domerk er ngii el “ungil chais.” A bebil kabelment a merrob er a urered er a berkel a klumech! Alta betok er aika el renged a kmo te mesiou er a Dios engdi ngkmal diak el sorir el loriid a klisiich el lolab. Te di ua remengedereder er a taem er a Jesus el lomtok er a telutk el King er a Dios me tirke el loltirakl er ngii.—Rel. 4:25-28.
Lak Molab el Mo er a Ngii Di el Kabelment er Tia el Beluulechad
11 A tekoi er a kerruul. A lsekum ngdiak el tabesul a uldesued el kirel a kerruul me a udoud, e ngsebechel el mo uchul a omelsemai el me er kid. Telkib el taem er a uriul er a 1970 e a rebetok el Sioning el ngar er a Malawi a urriid a rokui el kloklir e le ngdimlak lekengei el mo chedal a cheldebechel er a balatiks. Engdi ngklengiterreng e le rebebil er tir a dimlak lekengei el chemoit a kloklir. A ta er a odos er kid el Ruth a kmo, “A rebebil a ki mdilak er sera ki modik er a belumam, engdi a uriul e te kilengei el mo chedal a cheldebechel er a balatiks e liluut el mo remei e le ngdimlak el sebechir el outekangel er a klengar el ngar er a refugee camp.” Me nguaisei, engdi a ruumesingd el chedal a Dios a diak leuaisei. Ngdiak lekengei el mo chelsechusem er a tekoi er a balatiks, alta e te mo obals me a lechub e te oriid a rokui el kloklir.—Heb. 10:34.
Morriter er a Tekingel a Dios
it-1 425
Merat el Chelechedal a Wheat me a lechub e Ng Barley
Sel meliliut el budel a grain, el ua barley me a wheat. Alta Biblia ousbech er a merat el chelechedal a wheat el okesiu, me nguaisei tia el okesiu a mesaod er a rolel e te mirrusech a grain er a irechar. Tia el budel a grain a mlo diak a ultutelel er a uriul er omeridm me ngmelemalt okesiul el mora chab, el diak a ultutelel el ngii a meakl er aike el ungil, e mo cheitel.
A kot e te remusech me ngmo meririau a rdechel. E a uriul e te oba sebel el lolab lolsebek er a eolt me a merat el budel a suebek er a eolt. Tia mera el ungil okesiul a rolel a Jehovah el Dios a meleakl er a rumtok a mera el osisechakl er a rechedal, me a rolel e ngmo olekngemed aika el renged lomtok er ngii me a dirrek a remekngit el chad. (Job 21:18; Psa 1:4; 35:5; Isa 17:13; 29:5; 41:15; Hos 13:3) A Rengedel a Dios a mo okngemedeterir a rokui el cherrouel el mo ua klsous el di beot el mosebek er a eolt el di ua chebechebul a chelechedal a dellomel wheat.—Dan 2:35.
Aika el chelechedal a wheat a lulengudel e meleseb me ngdiak el olsebesebek e le murachem er a grain. Ngdi osisiu a Johanes el Chad er a Techolb ulemlaoch el kirel okngemedir a remengeteklel a klsuul el klechelid el kmo, a Jesus Kristus a mo chemudel a wheat engdi a “budel a lolul er a kmal diak le mad el ngau.”—Mt 3:7-12; Lk3:17.
FEBRUARY 12-18
MEKREOS EL TEKOI EL NGAR ER A BIBLIA | PSALM 5-7
Molemolem el Loba Blakerreng e Lak Mesibas er Omerellir a Rebebil
Rolel a Dengai a Klisiich er a Bades
7 Ngar ngii a sechelim me a lechub e ngchedal a telungalek er kau el mla tomellii a rengum? A le uaisei, e a tekoi el sebechel ngosukau a mo mesuub el kmo ngmilekera King David er sel taem el ngelekel er a Absalom a tilemellii a rengul e mlo melasem el melai er a kleking.—2 Sa. 15:5-14, 31; 18:6-14.
8 (1) Moluluuch. Molatk er tia el cheldecheduch e moluluuch el louchais er a Jehovah er a uldesuem el kirel a dimlak lemelemalt el tekoi el dilubech el mo er kau. (Psa. 6:6-9) Di bleketakl louchais er ngii aike el ngar er a rengum. E molengit er ngii me lengesukau el mes a omellach er a Biblia el sebechel lomekrael er kau el mo medengei a tekoi el kirem el meruul.
Bo Lulterekokl a Rengum el Kmo Ke Oba Klemerang
3 Me a klaumerang er kid a diak di lultuil er a bltikerreng el desa er a delongelir a rechedal a Dios. E ngerang? E le a lsekum e ngdi ultuil er tia el bltikerreng, e ngbeot er kid el mo diak a klaumerang er kid. El ua tiang, ngsebeched el mo diak dosiou er a Jehovah a lsekum a kldemed, el ta er a remechuodel me a lechub e ng pioneer a ruebet er a oberaod el klengit. Me a lechub e ngmo diak dosiou er a Jehovah a lsekum a ta er a kldemed a soibesengid me a lechub e ngmo omtok a mera el osisechakl e melekoi el kmo aike el doumerang a klsuul. Me a desuubii el tekoi a kmo: A lsoad el mo mesisiich a klaumerang er kid, e ngkirel mengai a uchetemel er a mesisiich el deleuill er kid me a Jehovah. A uldesued el kirel a Jehovah me a rechedal a sebechel ngosukid el mekurulii a klaumerang er kid. Engdi ngdirrek el klou a ultutelel a dosuub er a Biblia, e bo dodengei aike el dosuub, e doruul a research me bo lulterekokl a rengud el kmo kede mesuub a klemerang el kirel a Jehovah.—Rom 12:2.
4 A Jesus a dilu el kmo a rebebil a mo “dmeu a rengrir” el kongei er a klemerang, engdi ngmo mechitechut a klaumerang er tir sel bo lechelebangel a omelsemai. (Monguiu er a Mateus 13:3-6, 20, 21.) Te locha dimlak lutebengii el kmo a doltirakl er a Jesus e ngmo uchul a omelsemai me a ringel. (Mt. 16:24) Me a lechub e te ulemdasu el kmo a de Kristiano e ngdiak a mondai er a klengar er kid, ngdi klengeltengat. Engdi ngar tia el mekngit el beluulechad, e ngmo er ngii a omelsemai. Ngsebechel mengodech a blekeradel, el uchul me ngmo diak el deu a rengud el telkib el taem.—Psa. 6:6; Oli. 9:11.
Morriter er a Tekingel a Dios
it-1 995
Debull
Ngar er a Rom 3:13 e a apostol Paulus omelekl a tekoi el ngar er a Psalm 5:9. Ngomekesiu er a omerekolir a remekngit e mengebirukel el chad el mora “teleu el debull.” Ngdi ua teleu el debull el bo lomekeek er ngii er a rulekoad me a chelebirukel, a chururir a mui er a kengaol e melemall el cheldecheduch.—Momekesiu er a Mt 15:18-20.
FEBRUARY 19-25
MEKREOS EL TEKOI EL NGAR ER A BIBLIA | PSALM 8-10
“Ak Mo Oldanges er Kau e Jehovah”!
Mongreos er a Basio er Kau er a Telungalek er a Jehovah
6 A Jehovah a kiltmeklii a ileakl el delengchekled. A uchei er a lebebii a kot el chad a Jehovah e ngkiltmeklii a chutem el kired a rechad. (Job 38:4-6; Jer. 10:12) Ngkmal millatk er kid e dirrek el kmal bekururau me ngmilskid a betok el ungil tekoi el uchul a deuil a rengud. (Psa. 104:14, 15, 24) Ngulemes a blebelel e milsa el kmo “ngkmal mle ungil.” (Gen. 1:10, 12, 31, NW) Ngdirrek el rirelleterir a rechad el mo chetengakl er a lerelleterir el mo “merreder” a rokui el blebelel er a chutem. (Psa. 8:6) Ngmoktek er ngii el remecherrungel el chad a bo loldeu a rengrir el omekerreu aika el blebelel el diak a ulebengelel. Kau, ke blechoel el mereng a sulel a Jehovah el kirel tia el telbilel?
Psalm 9:1, NW: Ak mo oldanges er kau e Jehovah el loba renguk el rokir. Ak mo ouchais a rokui el mengasireng el urerem.
Kau, Ke Mereng a Sulel a Dios er Aike el Lebeskau?
10 A ta er a rolel a dochotii a omereng el saul el kirel a duch er kid el mengedecheduch, a okiu sel douchais er a uchul me kede oumerang er a Dios el mo er tirke loumerang el kmo kede mla er a mongkii el mei. (Psa. 9:1; 1 Pe. 3:15) Tirke el melisiich er tia el uldasu, a mesaod el kmo tia el chutem me a klengar el ngar a chelsel a di mle ngii el duubech. Me a lsekum kede ousbech er a Biblia me a bebil tekoi el bla desaod er tia el suobel, e ngsebeched el mesebechakl er a Demad el ngar a eanged, e smodii el mo er tirke el kongei lorrenges er sel uchul me ngulterekokl a rengud el kmo a Jehovah a Ulemeob er a eanged me a chutem.—Psa. 102:25; Isa. 40:25, 26.
A Rechad Ngsebechir Loukerebai er a “Chomelekingem”?
13 Mongitakl loba rengum el rokir. Sel dongitakl a chelitakl er a Renged, e a kot el soad el meruul er ngii a mo oldanges er a Jehovah. A odos el Sara a diak lomdasu el kmo ngkmal meduch el mengitakl. Me nguaisei, engdi ngsoal loldanges er a Jehovah loeak a chelitakl. Me ngmla mesa el kmo ngngosuir sel losuub aike el chelitakl el bo dongitakl sel longetmokl er ngii el mora miting. Ngmengitakl aika el chelitakl e melasem el omes el kmo ngmekera ike el tekoi er ngii e mesaod er a suobel el mo soadel. Ngmelekoi el kmo, “Tia ngosukak el mo ultaut a osengek er aike el tekoi er a chelitakl er a bai di kulatk er a rolel a kungitakl.”
Morriter er a Tekingel a Dios
Msuub a Lmuut el Betok el Kirel a Jehovah Sel Momes a Blebelel
14 A David a mle dmolech el melatk a blebelel a Dios. Ngdilu er a Jehovah el kmo: “Sel kumes er a melidiul el mrirellii, e kisa buil ma btuch el mlilechang er olsechelel, e ng ngera belkul a chad me ke kmal melatk er ngii.” (Psa. 8:3 4) Chochoi, a David er a lomes el bedul a melidiul e ngdimlak di loldeu er a rengul lomes a btuch. Ngmillebedebek aike el losisecheklii a btuch el kirel a Dios. Ngsiluubii a klungiolel a Jehovah. Ngngar ngii aike el taem el lullebedebek er a omebelel er a omecherellel a delal. Sera lolebedebek er a mengasireng el rolel e ngulebeob e ngmlukeroul a omereng el saul er ngii el kirel a llomeserreng er a Jehovah.—Psa. 139:14-17.
FEBRUARY 26–MARCH 3
MEKREOS EL TEKOI EL NGAR ER A BIBLIA | PSALM 11-15
Molatk er Kau el Ngar er a Beches el Blekeradel er a Dios el Budech
w06 5/1 29 par. 4
A Omesodel a Kot el Babier er a Psalm
11:3—Ngera el omekedecheraol a metemall? Aikang a omekedecheraol el rechad er a beluu a urrekodel er ngii, el llach ma oketmeklel a tekoi ma llemalt. Aika el tekoi sel lak lemeketmokl e ngmo er ngii a uldikel er a beluu e mo diak a llemalt. Me ngngar er a eungel choua ika el blekeradel, e a ‘chad el melemalt’ a kirel mui el oumera er a Dios.—Psalm 11:4-7.
wp16.4 11
Ngsebechel a Beluulechad el Mo Diak a Delengerenger er Ngii?
A Biblia tibir el kmo a Dios a di kmedung e ngmo okngemedii a delengerenger er a beluulechad. Tia el beluulechad a mengiil er sel sils el “bo le mukerrekeriil er [a Dios] e lobals el nguemed tirkel chad el diak lomekerreu er a Dios.” (2 Petrus 3:5-7) Me te mo diak a remedengerenger el lomekcharm er a rechad. Ngmekera sebechel mo ulterekokl a rengud el kmo a Dios a soal lolekngemed er a delengerenger el ngar ngii?
Biblia a kmo, a Dios “ouketui er ngikel soal el meruul a delengerenger.” (Psalm 11:5) Me a Ulemeob a soal a budech me a llemalt. (Psalm 33:5; 37:28) Tia uchul me ngdiak bo lebechititerir a remedengerenger me lolemolem el diak a ulebengelel.
Kau Ke Kongei el Oba Kllourreng e Mengiil?
15 Ngera me a David a kilengei el mengiil? Ngmeskid a nger er tia el ker el ngar er a osisiu el psalm el mlo eua el taem el loker el kmo: “Ng mo ua ngera klteketel?” Ngdilu el kmo: “Ngak a oumeral ulsirs er a diak le mengodech el bltkil a rengum; ak mo oldeu er a renguk er olsobel er kau. Ak mo mengitakl el mor a RUBAK, ele ng kmal mle ungil er ngak.” (Psalm 13:5, 6) A David a mle ungil medengei el kmo a Jehovah a betik a rengul er ngii, e di mo blechoel el blak a rengul el mo er ngii. Ngmillatk aike el taem el Jehovah a ngilsuir er a uchei, e dirrek el ulemes el beduluchei el kirel sel taem el Jehovah a mo okngemed a rokui el ringel el ngii a chuarm er ngii. A David a dirrek el mle medengei el kmo, a klengeltengat er a Jehovah a uchul me ngkirel el outekangel e mengiil.
kr 236 par. 16
A Renged a Kutmeklii a Soal a Dios er Tia el Chutem
16 Osebechakl. A blekeradel el losaod er ngii a Isaia 11:6-9 a mo mecherrungel otutel. A ngii di el basio er a beluulechad el lebo er ngii a resechal, redil, me a rengalek e te selebechakl e diak el lemekesakl. Ngdiak a chad me a lechub e ngcharm el mo melemall er tir. Molatk er a taem el bo momes er tia el beluulechad el rokir el delengcheklem. Ngsebechem el mengedub omoachel me a daob e merael er a rois me a ked el diak omedakt sel bo milkolk. A tekoi el debetik er a Esekiel 34:25 a mo tmaut, me a rechedal a Dios a “le kiei el ngar a ked ma le mechiuaiu er a oreomel, e ng di ungilbesrir.”
Morriter er a Tekingel a Dios
Kau Ke Mla Melodech a Blekerdelem?
12 Ngklengiterreng, e le rebetok el chad er a beluulechad a omdasu a tekoi el ua lulsaod a Paulus. Te omdasu el kmo a otireklel a llach el kirel a tekoi er a kldung a kmal tekoi er a irechar, e dirrek el diak el kirel a ta er a chad el orrimel er a rebebil el mo kiei el oltirakl ngii el llach. A rebetok el sensei me a ruungalek el chad a di mechititerir a rengalek me te di meruul aike el sorir. Te dirrek el olisechakl er tir el kmo kede rokui el ngar er ngii a ilmekled el melilt el kmo ngera ungil me a mekngit. Chouaitirka el chad a oumerang el kmo ngdiak a rolel e bo dodengei el kmo ngera ungil me a ngera mekngit. Te dirrek el ngar er ngii a rebetok el melekoi el kmo te oumerang er a Dios engdi te omdasu el kmo ngdiak a ultutelel a loltirakl a llechul. (Psa. 14:1) E tia el uldasu a kmal kdekudel el kirir a Rekristiano. Me a lsekum e ngdiak dekerekikl e ngsebeched el mo diak doltirakl a ulekrael el lomeskid a cheldebechelel a Dios, e dirrek el di mo mengeremrum el kirel aike el tekoi el mo mekngit er a uldesued. Me a lechub e ngsebechel el mo mekngit a uldesued el kirel a uleklatk el dengai el okiu a Bades el kirel a tekoi er a ongelaod, usbechel a Internet, me a ngarbab el skuul.