“Chelechang e Ngkmal Soak el Omerk er a Klumech!”

A KURIDII A DEURRENG ER NGAK

Sera kbo ngeasek a bltkil a renguk el mora Jehovah a mlo mechitechut. Ngmle soak el mo ua rengalek el kim dilak el skuul el mla er ngii a ilmeklir el meruul a tekoi. Ak mlo omdasu el kmo a rechad er a blik a kmal meringel a tekingir e dirrek el meringel a de Kristiano. Me alta ngdimlak kuumededenger el kmo ngngar ngii a Jehovah, engdi ngmlo diak a kmes el deleuill er ngak me ngii.

Me alta ngdimlak bok inactive engdi ngdirrek el dimlak kblechoel loldingel. E sel bo kuldingel e ngdiak ketmeklak me ngmle blechoel el meringel er ngak a mengedecheduch er a rechad. Sei a uchul me ngdimlak a study me a return visit er ngak e dimlak el deu a renguk loldingel. Ak mlo melatk el kmo, ‘Ngmekera chad e kongei el meruul er tiang er a bek el sandei?’

Sera lebo el 17 a rekik e ngkmal mlo soak el mo ileakl el kiei. Me ak kiltmokl a kloklek e millukl el mora Australia. Ngkmal mle meringel er a rechad er a blik a omes er ngak el merael. Me alta ngmle suebek a rengrir engdi te ulemdasu el kmo ak bora Australia e ak mo melemolem er a omesiungek el mora Jehovah.

Engdi sera kbora Australia e ak liluut el kmal mo mechitechut er a tekoi er a klereng. Ngdimlak blechoel el ngar er a miting. E kmal mle soak lobengterir a rengeasek el mora miting er a ta el kesus e a ongingil e te mo melim e milil er aike el blil a omilil. Sel kulatk er tiakid el taem er a klengar er ngak, e ak mo mesa el kmo alta ak mlara klemerang e ngar er a beluulechad ngdi ngdimlak a basio er ngak er a ngii di el ker.

AK NGILUU A KLOU A ULTUTELEL SUOBEL

Eru el rak er uriul e ak mlo medengelii a odos el ngii a dimlak lolechesuar el kmo, ngrirellak el mo omdasu el kirel a klengar er ngak. Ngak me a reteim el mesobil el odos el kim dilak el kiei a mle invite er a odam el oldingel a ongdibel me a bechil er a Tamara el me kiei lobengkemam el ta el sandei. A Tamara milengoit a taem lobengkemam e ocherchur lobengkemam sel lemechesang a bechil el meruul a tekoi er a ongdibel. Ngika kmal beot er kid a obengkel e beot er kid a mengedecheduch er ngii. Ngkora kmal mle ileakl el tekoi er a renguk el kmo, ngkmal mle blak a rengul mesiou er a Jehovah engdi ngdirrek el mle fun a dobengkel.

Ngmle sebeched el mesa deuil a rengul me a bltkil a rengul el kirel a klemerang me a berkel a klumech. Tia el blekerdelel a rirelleterir a rebebil el mo sorir el mo uai ngii. A Tamara a kmal mle dmeu a rengul mesiou er a Jehovah el mo er sel tkurrebab el sebechel, engdi ngak a kmal dimlak a deuil a renguk le ngdimlak bsa Jehovah sel kot lungil er ngak. A blekerdelel me a deurreng lulebang a rirellak el mo soak el ngodechii a klengar er ngak. A ungil kerebai er ngii a milkltkak er tia el klou a ultutelel el klemerang: A Jehovah a soal tirke el mesiou er ngii a bo le “blekebek” e loba “deurreng” el mesiou er Ngii.​—Psa. 100:2.

LMUUT EL MEKURULII A BLTKIL A RENGUK ER A BERKEL A KLUMECH

Ngmle soak el mo oba deurreng el luleba Tamara, engdi ak mle medengei el kmo a bok nguu tia el deurreng e ngkirek el meruul a omelodech er a klengar er ngak. Tia uluusbech a taem. Ak mirruul a mekekerei el tekoi, el ua mengetmokl er ngak el mo omerk er a klumech. Ak dirrek el milengoit a taem el auxiliary pioneer er a bebil buil. Tia ngilsukak el mo diak el sal louedikel a renguk e mo oba blekeu el omerk er a klumech. Ak dirrek el mlo blechoel el ousbech er a Biblia e tia rirellak el kmal mo dmeu a renguk loldingel. Cherengel a taem e ak mlo auxiliary pioneer er a bek el buil.

Ak mlo omak a klausechelei er ngak lobengterir a remeklou me a remekekerei el tir a blak a rengrir el mesiou er a Jehovah. A ungil kerebai er tir a ngilsukak el mo omes el kmo ngera sel kot el klou a ultutelel er a klengar er ngak e mo menguiu er a Biblia er ngak er a bek el sils. Ngliluut el medechel a deurreng er ngak lomerk er a klumech e ulemuchel el mesiou el regular pioneer. Ak mlo melechesuar er a deurreng e mlo dmeu a renguk el teloi er a ongdibel.

METIK ER A PIONEER PARTNER ER NGAK EL MO CHERECHAR

A ta el rak er uriul e ak mlo medengelii a Alex, el kmal ungil a blekerdelel el odam, el kmal betik a rengul er a Jehovah me a berkel a klumech. Ngika mle ta er a mesiou er a ongdibel el mla pioneer el elolem el rak. Ngdirrek el mlo olengeseu er a beluu er a Malawi el telkib el taem. Ngar isei e nguluureor lobengterir a remissionari el kmal mle ungil kerebai el kirel e millisiich er ngii me lolemolem el nguu a omesiungel el mora Jehovah el mo kot er a klengar er ngii.

Sera 2003 e aki mlo bechiil e kemam tia er aki mosiou el mui el taem. Ngkmal betok aki bla msuub e a Jehovah a mla omekngeltengat er kemam er a betok el rolel.

A JEHOVAH A MESKEMAM A LMUUT EL BETOK EL KLENGELTENGAT

Sera 2009 e aki mlo missionari er a Timor-Leste el ta er aike el iungs er a Indonesia. Aki kmal mle dmeu a rengmam engdi aki dirrek el mle bekikl. Eim el buil er uriul e aki kilerd er a Dili el ngii a capital er tia el beluu.

Tia el omelukl a mlo uchul a klou el omelodech er a klengar er kemam. Ngmle kiram el mesuub a siukang, omelekoi, kall, me a klengar er tia el beluu. Aki milsa er sera ki momerk er a klumech el kmo a rechad a kmal mle chebuul, e dimlak a ungil skulir, e mle meringel a klengar er tir. Aki dirrek el milsa el kmo a rechad a mla er ngii a ringelel a uldesuir me a bedengir el delengerenger me a mekemad a uchul.a

Ngmeral mle ungil odingel! El ua tiang, ak mlo medengelii a 13 a rekil redil el ngklel a Maria.b Sesei el rak er a uchei e a delal a mlad e ngii a dimlak leblechoel el mesa demal. Ngika di mle ua rebetok el ngalek el ua klungel el dimlak lodengei el kmo ngmo mekerang el kirel a klengar er ngii. Ak mo mekltkii a ta el taem er a le langel louchais er ngak a ngar er a rengul. Me nguaisei, engdi ngdimlak kudengei a tekingel le ngdirkak bo kmeduch el melekoi er a omelekingel. Me ak milluluuch el mora Jehovah lolengit er ngii me lengesukak el melisiich er ngii, e mocha menguiu a bades el mengelaod er ngii. Ak milsa klemerang el ngodechii a blekerdelel, omerellel, me a klengar er a Maria. Ngmiltecholb e chelecha te ngar ngii a remesuub a Biblia el obengkel. Chelecha e a Maria a kmal klou a telungalek er ngii er a klereng e melechesuar el kmo te kmal betik a rengrir er ngii.

A Jehovah omekngeltengat er a ureor er a Timor-Leste. Alta ruumesingd el publisher a miltecholb er a chelsel a 10 el rak, engdi rebetok er tir a pioneer, mesiou er a ongdibel, me a remechuodel. Rebebil oureor er a obis er a ruliuid a babier. Ngkmal mle dmeu a renguk el meseterir el mengitakl er a blil a ongdibel, e mes a klikm er tir, e meseterir el mukeroul er a tekoi er a klereng.

NGDIAK A LMUUT EL UNGIL KLENGAR

Ngkmal mle ngodech a klengar er kemam er a Timor-Leste er a klengar er kemam er a Australia engdi ngkmal mle dmeu a rengmam. A lebebil e aki keseked er a kekerei el bus el ngar ngii a cheltuul ngikel me a iasai er a makit. E a kuk bebil sils e aki mesuub a Biblia er a obliil el mekeald e chutem a ulolel e a malk a mediderurt er a chelsel a blai. Me nguaisei engdi ak ulemdasu el kmo, ‘Tia mera el ungil!’

Sel kulatk er a klengar er ngak e ak mera el oba omereng el saul el kirir a rechad er a blik el mlora tkurrebab el sebechir lolisechakl er ngak el kirel a Jehovah e olengeseu er ngak, mo lmuut aike el meringel el sils er a kngeasek. A Osisechakl 22:6 a kmal tilaut el kirek. A demak me a delak a kmal chemat er ngak me a Alex e kmal dmeu a rengrir lomes er a Jehovah el ousbech er kemam. Sera 2016 el mei er chelechang e aki mesiou el oldingel a ongdibel er aike el beluu el ngar cheungel a branch er a Australasia.

Ngkora kmal meringel er ngak a oumerang el kmo ngdimlak el soak a berkel a klumech, e le chelechang e ngkmal soak el omerk er a klumech! Ak mla mo mtebengii el kmo a mera el deurreng a mo er ngii sel denguu a omesiunged el mora Jehovah el mo kot er a klengar er kid. Aika el 18 el rak er a klengar er ngak el kusiou er a Jehovah lobengkel a Alex a kot el ungil taem er a klengar er ngak. Ak mla mo medengelii a belkul a tekingel a milluches er a psalm el David er a ledu er a Jehovah el kmo: “Tirkel rokui el osiik osebechakl er kau [a dmeu, NW] a rengrir; [te] blechoel el mengitakl er a deurreng; . . . tirkel betik a rengrir er a ngklem [a dmeu] a rengrir er kau.”​—Psa. 5:11.