1921​—Dart el Rak er a Mla Me Mong

BEKEU EL OMERK ER A KLUMECH

A Remesuub er a Biblia a mle kirir el oba blekeu el mo meruul er tia el ureor. Ngmle kirir louchais er a “ungil chais” el mora remedemedemek e dirrek louchais el kirel a “sils er a ngesechel a rengul” el mora remekngit.

A odam el J. H. Hoskin el kiliei er a Canada a kmal uleba blekeu el omerk alta ngmlo chobangel a ultok. Sera 1921 e ngmiltik er a ta el mengeteklel a klechelid. A odam a ulemuchel er a cheldechedechal el kmo: “Ngungil a dungil chadecheduch el mesaod er a Biblia. E a lsekum e ngmo kebosech a uldesued el kirel a bebil tekoi, e ngsebeched el torebengii a cheldechedechad e kede mo kebii el budech a delongeled.” Engdi ngdimlak el bo leuaisei a blekeradel. A odam el Hoskin a melatk el kirel tia el taem e melekoi el kmo: “Ngdimlak ki bom kemanget el chadecheduch e ngii a tikir a chesimer me a renguk e ngdi mo obriid a karas er a chesmerel a blil.”

Ngika el mengeteklel a klechelid a uleldiu el klou a ngerel el kmo: “Bai morael el mo mengedecheduch er a rechad el diak el Kristiano!” A odam el Hoskin a kmal di liluk e merael engdi ngmlo melatk el kmo, ‘Ngbai rengud ak milengedecheduch er a chad el diak el Kristiano!’

Ngika el mengeteklel a klechelid er a longedecheduch er a ikelesia er ngii er a ongingil sils e ngmillemolem el melekoi a mekngit el kirel a odam. A odam a melekoi el kirel el kmo: “Ngdilu er a rechad el kmo ngdiak a cheblad el uai ngak el mla mei er tia el beluu e bai kirek el mo okodall.” Me nguaisei engdi odam el Hoskin a dimlak el meterob e millemolem el omerk er a klumech e milengedecheduch er a rebetok el chad. Ngdilu el kmo: “Ngkmal mle dmeu a renguk el omerk er a klumech. A rebebil er a rechad a dilu er ngak el kmo, ‘Ak medengei el kmo kau a mera el chedal a chelid!’ e dirrek el uleker el kmo ngngar ngii a sebechir el ngosukak er ngii.”

OMESUUB EL DI KID EL TANG ME A OMESUUB EL TELUNGALEK

A Remesuub er a Biblia ultebedii a prokuram er a omesuub el ngar er a The Golden Age el olengeseu er a resemeriar el mo olengeriakl.a Ngmla er ngii a ker el kirir a rengalek el sebechir a rechedam me a rechedil el mesaod el obengterir a rengelekir. A ruungalek a “uleker aika el ker er a rengelekir e olengeseu er tir el metik a nger er ngii er a Biblia.” A bebil er a ker el mla er ngii a “Ngtela babier er a Biblia?,” lolisechakl er tir el mo medengei a beot el klemedengei. A kuk bebil er ngii “A rokui el Kristiano te mo chuarm a odechelakl?,” el ngii a ullisechakl er a rengeasek el mo bekeu el omerk er a klumech.

Ngdirrek el mla er ngii a ker me a nger er a Biblia el kirir tirke el mle klou a klemedengei er tir er a Biblia. A nger er aika el ker a mle sebechir el metik er a volume 1 er a Studies in the Scriptures. A rebetok el telael er a remenguiu a ngilai a klubelir er aika el prokuram, me nguaisei ngtilobed a tekoi er a The Golden Age er a December 21, 1921 el kmo te mo diak loruul er tia el prokuram er a omesuub. E ngera uchul?

A BECHES EL BOOK!

A rudam el omekrael a mlo mtebengii el kmo a rebeches el Mesuub a Biblia a mle kirir el ouderta el mesuub a klemerang er a Biblia e kirel chelderoder a rolel a loruul uaisei. Sei a uchul me te ultebedii a book el The Harp of God er a November 1921. A resemeriar el kilengei el nguu tia el babier me te dirrek el mlo mesuub er tia el book el di tir el tang. Tia el omesubel a Biblia el di kid el tang a ngilsuterir a remenguiu el mo mtebengii a “moktek er a Dios el mo omekngeltengat er a rechad er a diak a ulebengelel klengar.” Me te milekera loruul er ngii?

A chad sel lenguu a copy er ngii er tia el book e ngnguu a kekerei el card el ouchais a llel tia el babier el kirel menguiu. A ongingil sandei e ngmo nguu a lmuut el ta er a card er a post el ngar ngii a ker er ngii el kirel a tekoi el lulenguiu. A ulebengelel tia el card a dirrek el uluuchais aike el kirel menguiu el kirel a next el card el bo lenguu.

Ngbek el sandei el lolai er a beches el card er a post e tia millemolem el 12 el sandei. Aika el card a luleldurokl a ongdibel el kmeed er tir. A oumesingd el taem e aika el card a luleldurokl a rechedal a ongdibel el mechudelang me a lechub e ngdiak el sebechir el oldingel a obliil. El ua tiang, a Anna K. Gardner, el chad er a Millvale, Pennsylvania, er a beluu er a Merikel a melekoi el kmo: “A The Harp of God a milsa sister er ngak er a Thayle el ngii a dimlak el sebechel merael a techellel el mo meruul a betok. Ngika uleldurokl aika el card er a bek el sandei.” Me a chad sel lecherrengelii tia el omesubel e ngngar ngii a chad er a ongdibel el mo omuchel el oldingel er ngii lolengeseu er ngii el mesuub a lmuut el betok el kirel a Biblia.

DIRK MERAEL EL MEI EL UREOR

A ulebengelel a rak e a odam el J. F. Rutherford a ultebedii a babier el mora rokui el ongdibel. Ngmillekoi el kmo a “sioning el mlo er ngii el kirel a Renged er chelecha el rak a mla oberk e ngosuterir a rekuk betok el chad er aike el uleak uchei el rak.” Ngmillemolem el melekoi el kmo: “Ngkmal betok a dirk kirel ruoll. Me molisiich er a rebebil el me teloi er tia el ureor.” Ngbleketakl el kmo a Remesuub er a Biblia a ultireklii a tekingel. Sera rak er a 1922 e te mle bekeu el omerk el kirel a Renged el kuk ngar uchei er aike el uleak uchei el rak.