Redirk Mlo Bechiil el Obekel, Mrellii a Klengar er Kemiu el Mo Iliuekl er a Omesiungiu el Mora Jehovah

1-2. (a) Ngera uchul me ngungil a redirk mlo bechiil el obekel a loturk a klaumerang er tir er a Jehovah? (Psalm 37:3, 4) (b) Ngera kede mo mesaod er tia el suobel?

KAU, ke di kmedu el mo bechiil me a lechub e ke dirk mlo bechiil? A leuaisei e ke locha kmal lomes el beduluchei el mo mengoit er a klengar er kau el obengkel a betik er a rengum. Me nguaisei, a chebechiil a diak lebeot el tekoi e ngar ngii a meklou a ultutelel omelilt el kirel meketmokl. A rolel a omosmechokl a omelsemai e molilt a tekoi, a ngar ngii a lebo lerellii er a deurreng er a klengar er kemiu el betok el rak. A lsekum e ko multuil er a Jehovah e ko mo meruul a ungil omelilt, me a chebechiieliu a mo mesisiich, e lmuut el mo klou a deurreng er a klengar er kemiu. A lsekum a Dios a diak luldimukl er a rolel omoruul a tekoi e ko mo chobangel a mondai el ngii a mo uchul a ringel el uchul e ngmo diak a deurreng er a chebechiieliu.​—Monguiu er a Psalm 37:3, 4.

² Me alta tia el suobel a mora redirk mlo bechiil el obekel engdi ngmo mesaod a omelsemai el rokui el bechiil el chad a locha mo chobangel. Kede mo merriter aike el sebeched el suub er a kerebai el lekiltmokl a reblak a rengrir el chad er a Biblia. Ngmo osisecheklid er a kakerous el suobel el sebechel ngosukid er a chelsel a kakerous el blekeradel el uldimukl er a chebechiil. Kede dirrek el mo omes aike el sebeched el suub er a rebebil el obekel er chelecha el taem er kid.

NGERA EL OMELSEMAI A LOCHA BO LECHEBANGEL A REDIRK MLO BECHIIL EL OBEKEL?

3-4. Ngera el omelsemai a locha bo lechebangel a redirk mlo bechiil lobekel?

³ A rebebil a locha mo melekoi er a redirk mlo bechiil el obekel me lebo leua ruumesingd el chad er chelecha el taem. El ua tiang, a rechad er a blirir me a rechederir a locha mo orrimel er tir el mo oungalek. Me a lechub a rekuk bebil chedal a telungalek me a resechelirir a locha mo oldubech er tir el mo omechar er a blai me a betok el klalo el omesiich er a blirir.

⁴ A lak lekerekikl a rubekel e te mo melilt a tekoi el mo uchul e ngkmal mo klou a belsir. Seikid e a bechiil redil me a sechal a mo kirir loureor el melai overtime me bo lsebechir el kokad a belsir. A ureor a mo melai er a temir el mesuub el di tir el tang, meruul er a omengull el telungalek, me a oldingel. Te locha dirrek el mo mengoit a miting me bo lsebechir el mesuk er a klou el udoud me a lechub e lak loridii a urerir. Me te mocha diak el sebechir el teloi a bebil rolel a omesiou el ngar omesiungir el mora Jehovah.

5. Ngera ke suub er a Klaus me a Marisa?

⁵ A betok el experience ochotii el kmo a klengar el losiik a klalo er tia el beluulechad a diak bo luchul a deurreng. Ka molatk a tekoi el lesiluub a Klaus me a Marisa.b Sera lekot el mo bechiil e te uluureor el full-time me bo lengar ngii a betok el ududir me a kloklir. Me nguaisei engdi ngdimlak a mera el deurreng er tir. A Klaus a melekoi el kmo: “Ngkuk mle betok a kloklam er aike el ki mousbech, engdi ngdimlak a turrekong er kemam er a klereng. A di debleketakl el melekoi, e a klengar er kemam a bai kmal mle cheliseksikt e di mui er a stress.” Kau me ke locha dirrek el mla mtebengii el kmo a klengar el losiik a betok el klalo er tia el beluulechad a diak lerellau el mo dmeu a rengum. A leuaisei a klengar er kau, e lak lebo el mechitechut a rengum. Molatk a ungil kerebai er a rebebil el sebechel ngosukau el kirel tiang. Engdi kot e me dosaod aike el sebechir a rebechiil el sechal el suub er a King Jehosafat.

BO MUA KING JEHOSAFAT EL ULUUMERA EL ULSIRS ER A JEHOVAH

6. A doltirakl er a omellach el ngar er a Osisechakl 3:5, 6, e ngmilekera Jehosafat er a leduubech a klou el mondai?

⁶ Rebechiil el sechal, kemiu a lebebil e ngkmal mo oberaod a uldesuiu er a ildisel a ngerachel el molab? A leuaisei e ngmo uchul a klungioliu sel molatk er a kerebil a King Jehosafat. A Jehosafat a mle king me ngmle ngerechelel lomekerreu er a renged el rokir. Ngmilekera e kutmeklii tia el ngerechelel? Ngmirruul aike el sebechel el mo omekerreu er a rechad er a rengedel. Ngsilsichii a cheotelel a Juda e kiltmeklii a cheldebechel er a resoldau el mle 1,160,000 a ildisir. (2 Kr. 17:12-19) A uriul e a Jehosafat a mlo chobengelii a klou el mondai. A klou el urrurt er a resoldau er a Amon, Moab, me a rechad er aike el rois er a Seir a mlo omtok er ngii me a telungalek er ngii me a rechedal. (2 Kr. 20:1, 2) Me ngmilekerang a Jehosafat? Ngulemes el bedul a Jehovah el kirel a ngeso me a klisiich. Tia oltirakl er a omellach el ngar er a Osisechakl 3:5, 6. (Monguiu.) A nglunguchel a Jehosafat el debetik er ngii er a 2 Kronika 20:5-12 ochotii el kmo ngmera el uluumera el ulsirs er a Jehovah. Ngmilekera Jehovah e onger er a nglunguchel?

7. Ngmilekera Jehovah e onger er a nglunguchel a Jehosafat?

⁷ A Jehovah milengedecheduch er a Jehosafat loeak a Levait el Jahasiel. A Jehovah dilu el kmo: “Di bo mobechobech e mongiil, e kom mo mesa klisiich el lomeskemiu a RUBAK.” (2 Kr. 20:13-17) Tia kora diak el rolel a doumekemad. Me nguaisei engdi aika el ulekrael a mlara Jehovah el dimlak el le mlara er a rechad. A Jehosafat a uluumera el ulsirs er a Jehovah e riruul aike el rokui el ledilung. Sera lebo lolsiuekl er a recherraro e ngdimlak el ngititerir a rekot el ungil soldau el mora medal e te bai rechad er a chelitakl a mlora medal a mekemad. Me a Jehovah ultutii a telbilel el mora Jehosafat e rirellii el mo mesisiich er a recherrouel.​—2 Kr. 20:18-23.

8. Ngera sebechir a rebechiil el sechal el suub er a Jehosafat?

⁸ Rebechiil el sechal, mngai a klubeliu er a Jehosafat. Ngngerecheliu el omekerreu er a telungalek er kemiu me a uchul e ko meringel loureor el mengetmokl er a telungalek er kemiu. Sel bo mchebangel a omelsemai e kom locha mo omdasu el kmo, ngsebechem el di kau el sumechokl. Me nguaisei lak multuil er a di klisichem e bai moluluuch el lolengit er a ngelsuil a Jehovah sel di lekau el tang. Mdirrek el mo blak a rengum el meluluuch lobengkel a bechim. Mosiik a ulekrael er a Jehovah loeak sel mosuub er a Biblia me aike el babier loltobed a cheldebechelel a Jehovah e moltaut a ulekrael el msuub. A rebebil a locha diak bo lekengei er a rolel omoruul a tekoi e locha mo subedau el kmo ngklebelung omelilt er kau. Te locha mo dmu el kmo a udoud me aike el klalo el momechar a kot lungil rolel e ke mekerreuii a telungalek er kau. Me nguaisei engdi lak mobes er a kerebil a Jehosafat. Ngika uluumera el ulsirs er a Jehovah e ulechotii tiang loeak a omerellel. A Jehovah dimlak lechitii ngika el blak a rengul mesiungel e kmal diak bo lechitau el dirrek. (Psa. 37:28, NW; Heb. 13:5) Me ngngera sebechir a rubekel el meruul me bo lengar ngii a deurreng er a klengar er tir?

MRELLII A KLENGAR ER KEMIU EL MO ILIUEKL ER A OMESIUNGIU EL MORA JEHOVAH EL UA PROFET ISAIA ME A BECHIL

9. Ngera sebeched el dmung el kirel a profet Isaia me a bechil?

⁹ A profet Isaia me a bechil a rirellii a omesiungir el mora Jehovah el mo kot er a klengar er tir. A Isaia mle profet me a bechil me ngdirrek el locha mla er ngii a ngerechelel el profet le bades omekedong er ngii el “redil profet.” (Isa. 8:1-4, NW) Tia ochotii el kmo a klengar er tir el obekel a mle iliuekl er a omengull er tir el mora Jehovah. Te kmal kutmeklii a ungil kerebai el kirir a rubekel er chelecha el taem!

10. Ngmekera omesubir a rubekel er a ulaoch er a Biblia e remuul a rengrir el mo osiik a rolel e ngsebechir el meruul a lmuut el betok el kirel Jehovah?

¹⁰ A rubekel er chelecha el taem a sebechir loukerebai er a Isaia me a bechil loeak sel loruul aike el rokui el sebechir el ngar er a omesiungir el mora Jehovah. Ngsebechir el smisichii a klaumerang er tir er a Jehovah sel ledak el mesuub a ulaoch er a Biblia me a rolel e ngblechoel el tmaut.c (Tit. 1:2) Ngsebechir el melatk er a rolel e ngsebechir el lolengeseu loltaut a bebil ulaoch er a Biblia. El ua tiang, molatk er a rolel e ngsebechiu lolengeseu loltaut er a ulaoch el kmo, a ungil chais a mo mosisechakl er a beluulechad el rokir e ngmochu ulebongel. (Mt. 24:14) Sel bo lulterekokl a rengrir a rubekel el kmo a ulaoch er a Biblia a toutang, e ngmo remuul a rengrir el mo osiik a rolel e ngsebechir el meruul a lmuut el betok el kirel Jehovah.

MNGUU A RENGED EL MO KOT EL UA PRISILA ME A AKUILA

11. Ngera mle sebechel a Prisila me a Akuila el meruul er ngii, e ngera uchul?

¹¹ A rubekel el dirk mekekerei el chad a sebechir el ngmai a klubelir er a Prisila me a Akuila, el obekel el chad er a Chijudea el kiliei er a Rom. Tirka rirengesii a ungil chais el kirel a Jesus e mlo Kristiano. Te locha kmal mle dmeu a rengrir er a klengar er tir. Me nguaisei engdi a blekeradel a di mle mereched el mengodech er sel taem el Kaiser el Klaudius a ultebedii a llach el kmo rokui el Chijudea kirir el tuobed er a Rom. Ka di molatk er a Akuila me a Prisila el mle kirir el choitii a klengar er tir e melukl el mora beches el beluu e lmuut lomuchel er a siobai er tir er omeruul el tento. Tia el tekoi ngmo rulleterir el mo diak loruul a betok er a omesiungir el ua ngar er a mong? Ke locha medengelii a nger tia el ker. Sera lolukl el mora Korinth e te di mle mereched el mo olengeseu er a ongdibel er isei e uluureor lobengkel a apostol Paulus el melisiich er a rudam me a rudos er isei. A uriul e te liluut el melukl el mo olengeseu aike el basio luluusbech er a rumerk er a klumech. (Rel. 18:18-21; Rom 16:3-5) Ngmera el mla er ngii a moktek me a deurreng er a klengar er tir!

12. Ngera uchul me a rubekel a kirir el meruul a turrekong er tir er a klereng?

¹² A rubekel er chelecha el taem a sebechir loukerebai er a Prisila me a Akuila loeak sel lenguu a Renged el mo kot er a klengar er tir. Sel lomuchel el kasisiik a rubekel seikid a kot lungil el taem el losaod a turrekong er tir. A rubekel sel leruul a turrekong er tir el ngar omesiungir el mora Jehovah e ledak el terung el oureor el kirel, e ngbetok a techall el bo lesa Jehovah el lolengeseu er tir. (Oli. 4:9, 12) Molatk er a experience er a Russell me a Elizabeth. A Russell a melekoi el kmo, “Uchei er a ki bo bechiil e aki dilak el mesaod a turrekong er kemam er a klereng.” A Elizabeth a kmo, “Aki di mla medal e mesaod a turrekong er kemam me sel bo le kiram el meruul a omelilt e a tekoi el ki molilt a diak bo lolekebai er kemam el oltaut a turrekong er kemam.” A klengar er a Russell me a Elizabeth a uchul me ngmle sebechir el melukl el mora Micronesia el mo olengeseu er a ureor er a berkel a klumech.

13. A doltirakl er a Psalm 28:7, e ngera mo duubech sel bo doumera el ulsirs er a Jehovah?

¹³ A rebetok lobekel er chelecha el taem a di ua Russell me a Elizabeth el mla omekbeot a klengar er tir me bo el sebechir el mengoit er a klou el taem el teloi er a ureor el omerk e olisechakl. A rubekel sel leruul a turrekong er tir er a klereng e ledak loureor el kirel e te mo ngmai a betok el ungil. Te mo mesa el kmo a Jehovah omekerreu er tir, me a klaumerang er tir er ngii a mukeroul, me tir a mo metik er a mera el deurreng.​—Monguiu er a Psalm 28:7.

MOUMERANG A TELBILEL A JEHOVAH EL UA APOSTOL PETRUS ME A BECHIL

14. Ngmilekera apostol Petrus me a bechil e ochotii el kmo te uluumerang er a telbiil el ngar er a Mateus 6:25, 31-34?

¹⁴ A rubekel a dirrek el sebechir el ngmai a klubelir er a apostol Petrus me a bechil. A apostol Petrus a mle kirel el mo meruul er a klou a ultutelel el omelilt er a bekord el 6 el buil el mo ta el rak er uriul er a bo lodengelii a Jesus. Ngika mla er ngii a siobai er ngii er omenged e tia mle rolel e ngmesiou er a telungalek er ngii. Me ngmle kirel melatk er a telungalek er ngii er sel taem el Jesus a ullengit er ngii el mo obengkel el mui el taem. (Lk. 5:1-11) Ngngileltii el mo obengkel a Jesus el lomerk er a klumech. Ngkmal mle ungil omelilt er ngii! E kmal sebeched el melekoi el kmo a bechil a mle support er tia el omelilt er ngii. A Biblia ochotii el kmo a bechil a Petrus a ulebengkel el ngar er omerael er a uriul er a okisel a Jesus. (1 Ko. 9:5) Ngulterekokl el kmal mle ungil bechiil el redil e le Petrus a mle sebechel mimokl el meluches a ulekrael el mora rebechiil el sechal me a rebechiil el redil Kristiano. (1 Pe. 3:1-7) Me a Petrus me a bechil a kmal uluumerang er a telbilel a Jehovah el kmo ngmo meskid aike el dousbech a lsekum a kede nguu a Renged el mo kot er a klengar er kid.​—Monguiu er a Mateus 6:25, 31-34.

15. Ngera ke suubii er a experience er a Tiago me a Esther?

¹⁵ A lsekum e ko mla mo bechiil el betok el rak e ngmekera sebechiu el melemolem el lomekeroul er a urunguliu el mo menglou er a omesiungiu? A ta er a rolel a sebechiu el omes a experience er a rekuk bebil obekel. Ngsebechiu el menguiu el kirel a “Chisel a Klengar er a Rechad” el ngar er a Ongkerongel. A chouaika el suobel a ngilsuir a Tiago me a Esther el obekel er a Brazil el mo omekeroul er a urungulir el mo mesiou er a beluu el ousbech a ngeso er a ruumerk er a klumech. A Tiago melekoi el kmo: “Sel ki monguiu er a rolel e a Jehovah a mla olengeseu er a remesiungel er chelecha el taem er kid e ngrullemam el mo somam el dirrek el chormii a ulekerreuil a Jehovah.” Cherengel a taem e te millukl el mora Paraguay e tirkaikid er a lolengeseu lomerk er a klumech el mora rechad el melekoi tekoi er a Portugal er a 2014 el mei er chelechang. A Esther a kmo: “A chimo el bades el kmal somam a Efesus 3:20. Ngkmal mla mo betok el taem el ki momes aika el tekoi el tmaut er a omesiungam el mora Jehovah.” Ngar tia el babilengel el mora rechad er a Efesus e a Paulus a tilbir el kmo a Jehovah mo meskid a kuk betok er aike el dolengit. Aika mera el klemerang el tekoi!

16. A remekekerei el obekel el melatk a turrekong er tir ngsebechir el olengit a ulekrael er a rua techang?

¹⁶ A rubekel el dirk mekekerei el chad a sebechir el ngmai a klungiolir er tirke el mla suubii el mo oumera el ultuil er a Jehovah. Te ngar ngii a rubekel el mla chemoit a betok el rak el mesiou el mui el taem. Molengit er tir el kirel a ulekrael a lsekum ke melatk a turrekong er kau. Tia dirrek el ta er a rolel e ke ochotii el kmo ke oumera el ulsirs er a Jehovah. (Osi. 22:17, 19) A remechuodel me ngdirrek el sebechir el olengeseu er a rubekel el dirk mekekerei el chad el mo meruul e oltaut a turrekong er tir er a klereng.

17. Ngera dilubech el mora Klaus me a Marisa, e ngera kede suub er a experience er tir?

¹⁷ A lebebil e a omelilt er kid el mo menglou er a omesiunged a diak bo leuai sel dulemdasu er ngii. Molatk er a Klaus me a Marisa el dulsaod er tir er a uchei. Ngmle edei el rak er uriul er a bo lebechiil e te millukl el mo kiei er cheroid er a belurir el mo olengeseu er a ureor el omekedechor er a branch er a Finland. Me nguaisei engdi te silubii el kmo ngdi sebechir el kiei er a Finland el elolem el buil. A kot e ngkora mlo moalech a rengrir. Engdi telkib el taem er uriul er tiang e te ngiluu a techall el mo melai er a course er omesuub el tekoi er a Arabic. Chelechang e ngkmal dmeu a rengrir el mesiou er a ta er a beluu el olengeseu er a ureor el omerk el mora rechad el melekoi a tekoi er a Arabic. A Marisa melatk el kirel tiang e melekoi el kmo: “Ak mle medakt el mo meruul er a tekoi el dirkak a ta el kuruul er ngii e mle kirek el mo mui el oumera el ulsirs er a Jehovah. Ak mla mesa Jehovah el olengeseu er kemam el ngar er a rolel el dimlak a ta el ki molatk. Kemam el kilengei el mo meruul aika el tekoi a mla smisichii a klaumerang er ngak er a Jehovah.” Tia el experience ochotii el kmo ngkmal sebechel mo ulterekokl a rengum el kmo a Jehovah mo omekngeltengat er kau a lsekum e ke mo mui loumera el ulsirs er ngii.

18. Ngera sebechir a rubekel el meruul lochotii el kmo te oumera el ulsirs er a Jehovah?

¹⁸ A chebechiil a sengk el mlara Jehovah. (Mt. 19:5, 6) Ngkmal soal a rubekel a bo el deu a rengrir er tia el sengk. (Osi. 5:18) Kemiu el mekekerei el chad el obekel, morriter er a rolel a klengar er kemiu. Kemiu ko meruul aike el rokui el sebechiu el lochotii el mora Jehovah el kmo ko moba omereng el saul el kirel aike el sengk el bla lebeskemiu? Moluluuch el mora Jehovah. Mosuub er a Tekingel e mosiik a omellach el melutk el kirel a blekeradel el omngar ngii. E moltaut a ulekrael el lebeskau a Jehovah. Ngkmal sebechel mo ulterekokl a rengmiu el kmo, a omrellii a chebechiieliu el mo iliuekl er a omesiungiu el mora Jehovah e ngmo er ngii a deurreng me a moktek er a klengar er kemiu!