Ke Medengei el Kmo Ngerang?

Ngera uchul me ngmle ungil er a Jehovah el kilengei el tenget a belochel er a ked me a ulekeroul el belochel?

NGAR cheungel a Llach e a Jehovah kilengei el tenget a belochel er a ked me a ulekeroul el belochel. Aike el teblo el bedengel a suebek el charm a mle blechoel el dmak er a sodel a llach el kirel a tenget e mle sebechel kaitutechei. (Lev. 1:14; 12:8; 14:30) Ngera uchul me tia mle klungiolir a rechad er a Israel? A ta er ngii a kmo a belochel er a ked a dimlak leblechoel el ngar ngii. Mekera el uaisei?

A belochel er a ked a suebek el charm el merorael a beluu e di mora beluu er a Israel sel blsechel a kleald. A bek el ongetruich el buil e te suebek el mora mekeald el beluu e sel bo lemerek a blsechel a kelekolt e te lmuut el mora Israel. (Sal. 2:11, 12; Jer. 8:7) Me tia belkul a kmo ngdimlak el sebechir a rechad er a Israel er a ngar er a mong el melenget a belochel er a ked er a blsechel a kelekolt.

Engdi a ulekeroul el belochel a diak lorerorael a beluu me ngblechoel el di ngar ngii er a beluu er a Israel. Me aika luluucharm a rechad. (Momekesiu er a Johanes 2:14, 16.) A doltirakl er a book el Bible Plants and Animals e “aike el rokui el beluu me a mats er a Palestine a ulemekeroul aikakid el bedengel a belochel. A derta el blai a mla er ngii a blsibs er a kbekbel el blil a ulekeroul el belochel.”​—Momekesiu er a Isaia 60:8.

Me a Jehovah ulecholt er a bltikerreng me a tabesul el uldasu er a lekengei el tenget aika el suebek el charm el mle blechoel el ngar ngii er a beluu.