Ke Medengei el Kmo Ngerang?

Ngera uchul me a rechad er a Israel er a ngar er a mong a mle kirir el harau er a bsengel a redil?

NGAR er a taem er a Biblia e a sechal me a lechub e ngtelungalek er ngii a mle kirir el harau er a bsengel a redil el bo lebechil. A bus a mle uldimukl er a meringelchad el klalo, charm, me a lechub e ngudoud. A lebebil e ngsebechel mekekad loeak a ureor el ua Jakob el uluureor el euid el rak el bsengel a Rahel. (Gen. 29:17, 18, 20) Ngera mle moktek er tia el omeruul?

A Carol Meyers el ta er a chellimosk er a Biblia a kmo: “A bus a mle kekedel a urerel a ngalek el redil el ngii a kmal mle usbechall a lsekum a telungalek er ngii a uluusers.” Tia el bus a locha dirrek el millisiich er a deleuill er aike el teblo el telungalek el mla mouak el loeak a chebechiil. Seikid e ngsebechir el kaingeseu sel leduubech a ringel. Me a lmuut kung tia el bus ulterekeklii el kmo ngdi kmedung e ngmelukl ngika el redil el mo diak el ngar cheungel a ulekerreuil a demal e mocha er cheungel a ulekerreuil a bechil.

Tia el bus a diak lebelkul a kmo a redil a kora ua klalo el sebechel mochar me a lechub e ngmoterau. A book el Ancient Israel​—Its Life and Institutions a melekoi el kmo: “A bsengel a redil a rullii el mo rengud e ngocheraol. Engdi a bus a diak el cheral a redil e ngbai udoud el olengeseu er a telungalek el mla mo diak a ngelekir lolengeseu er tir.”

Chelecha el taem e ngngar er a bebil beluu e te dirk meruul a bsengel a redil. A Rekristiano el chedam me a chedil sel lolai er a bsengel a ngelekir e ngkirir lochotii a ‘tabesul el uldasu’ e lak lolengit el engelakl er aike el sebechel a chad. (Fil. 4:5, NW; 1 Ko. 10:32, 33) Ngoeak tiakid el rolel e te ochotii el kmo ngdiak el di le “sorir a udoud” me a lechub e lemerechorech a rengrir. (2 Ti. 3:2) Me a lmuut kung sel lak longerechir er a klou el udoud el bsengel a redil e ngike el mo bechil a ngelekir a diak lemorimel el mo oureor el kemanget el taem el mo harau er a bsengel a ngelekir. Me a lechub e bo lak le pioneer e le ngmocha kirel mui el taem loureor me bo el sebechel harau er a bsengel a bechil.

Ngar er a bebil beluu e a cheral a bus a lolterekokl er ngii a llach. A lsekum e nguaisei e a Rekristiano el chedam me a chedil a kirir el oltirakl a llach. E ngera uchul? A Tekingel a Dios a mengerechir er a Rekristiano el mo “oltirakl er a re merreder er a beluu” e oltirakl a llach el ngii a diak lolemall a llechul a Dios.​—Rom 13:1; Rel. 5:29.