Rolel a De Plan a Wedding el Mo Uchul a Klebkall el Mora Jehovah

1-2. Ngera soal a Jehovah el kirel a sils er a wedding er kau?

KAU, ke engaged el mo bechiil? A leuaisei, congratulations! Ke ulterekokl el kmal mechesang el plan er a wedding er kau. A Jehovah a kmal soal a om enjoy er a sils er a weddinga er kau e bo lemui er a deurreng a klengar er kau er a ngar medad.—Osi. 5:18; Sal. 3:11.

² Ngkmal klou a ultutelel a lekebkelii a Jehovah a sils er a merengel a chebechiielem. Ngera uchul me ngkirel a wedding er kau el mengebkall er a Jehovah? E mekera sebechem el meruul er tiang? Alta tia el suobel a melutk el kirir a Rekristiano el plan er a wedding er tir, engdi a omellach el bo dosaod a sebechel ngosukid el rokui el mo mengebkall er a Jehovah a lsekum kede mora wedding me a lechub te olengit a advice er kid el kirel a wedding er tir.

NGERA UCHUL ME NGKIREL MENGEBKALL ER A JEHOVAH?

3. A Rekristiano el plan er a wedding er tir ngngera kirir el melatk er ngii, e ngerang?

³ A Rekristiano el plan er a wedding er tir a kirir el plan er ngii loltirakl a omellach el bla lluches a Jehovah er a Tekingel. E ngerang? E le ng Jehovah ngike el kiltmeklii a chebechiil. Ngii ngike el milekur a kot el chebechiil er a delongelel a Adam me a Eva. (Gen. 1:28; 2:24) Me a uldesuel a Jehovah a kirel sel kot el klou a ultutelel er a uldesuir tirke el plan er a wedding er tir.

4. Ngera lmuut el bebil er a uchul me a Rekristiano el plan er a wedding er tir a sorir el kobkellii a Jehovah er tiakid el sils?

⁴ Ngngar ngii a lmuut el bebil er a uchul me ngkirem el melatk er a uldesuel a Jehovah sel om plan er a wedding er kau: Ngii a Demam el ngar er a eanged e best Friend er kau. (Heb. 12:9) E ulterekokl el soam a lolemolem el kmes a deleuill er kemiu. Me ngkmal diak el soam a ngii di el ngerang a bo leduubech er a sils er a wedding er kau me a lechub ngngii di el sils el ngii a mo tomellii a rengul. (Psa. 25:14) Sel molatk a rokui el tekoi el bla lrruul a Jehovah el kirem me aike el bo loruul el kirem e ngmo soam lochotii omereng el saul er kau el mo er ngii loeak omoterekeklii el kmo a wedding er kau a mo kobkellii.—Psa. 116:12.

NGMEKERA SEBECHEM EL KOBKELLII A JEHOVAH?

5. Ngmekera Biblia e sebechel ngosuterir a Rekristiano el plan er a wedding er tir?

⁵ A Biblia diak el beskid a list er a rules el kirel a wedding er a Rekristiano me a lechub ng reception el mo okiuellel. Me ngsebechir a Rekristiano el plan er a wedding er tir loltirakl er aike el sorir, siukang er tir, me a lechub ng circumstance er tir. A remera el Kristiano a dirrek el kirir el lolengesenges a llach er a kabelment el kirel a chebechiil. (Mt. 22:21) Me nguaisei engdi om plan er a wedding el loltirakl a omellach er a Biblia e ke mo kobkellii a Jehovah e rullii el mo dmeu a rengul. Me ngngera el omellach a ungil molatk?

6. Ngera uchul me ngklou a ultutelel a Rekristiano a leruul aike el legal requirement er a beluu el kirel a chebechiil?

⁶ Molengesenges a llach er a beluu. (Rom 13:​1, 2) Ngar er a betok el beluu e a rechad el melib el mo bechiil a ngar ngii a bebil el legal requirement el kirir el remuul er a uchei er a bo lebechiil. Me a Rekristiano a kirir el mo medengei el kmo ngera legal requirement er a beluu el lekiei er ngii. A lsekum ko mousbech a ngeso el meruul er tiang e ngsebechiu el lolengit a ngeso er a remechuodel.b

7. Ngkirel mo uangerang a sils er a wedding, e mekera sebechel mo uaisei?

⁷ A sils er a wedding lochotii omengull e ledelodau. (1 Ko. 10:​31, 32) Ngsoam a merengel a chebechiielem a bo lolecholt aike el rodech er a chedaol reng er a Dios ngdiak el reng er a beluulechad. (Gal. 5:​19-26) Me ngoltirakl er a omellach er a blechebechel a dereder el ngar er a Biblia, e a bechiil el sechal el mo bdelul a delengchokl ingii a ngerechelel el mo make sure el kmo a sils er a wedding a taem er a deurreng engdi dirrek el lochotii a omengull e delodau. Ngmekera sebechel a sils er a wedding el mo uaisei? A cheldecheduch el mengai er a Biblia el motobed el ngar er a rolel e ngochotii omengull me a bltikerreng a mo ngosuterir a rokui el lorrenges el mo mesa el kmo, a chebechiil a sengk el mlara Jehovah. Ngdirrek el mo ngosuterir a rokui el lorrenges el mo mesa berredel a chebechiil. Tiakid a uchul me a rebetok el Kristiano a melilt el meruul er a wedding ceremony er tir er a Blil a Ongdibel a lsebechel. Me a lsekum ngsoam el ousbech er a Blil a Ongdibel e di luchei e mlechesii a babier el mora chelechad er a remechuodel el kirel tia el request er kemiu e di mereched el nguu el mesterir.

8. A lsekum ke melilt el mo ou reception e ngmekera sebechem el make sure el kmo ngmo kobkellii a Jehovah? (Rom 13:​13, BT)

⁸ Monguiu er a Rom 13:​13, (BT).c A lsekum ke melilt el mo ou reception e ngmekera sebechem el oterekeklii el kmo ngdiak bo loltirakl er a reng er tia el beluulechad? A tekoi er a Grik el moiuid el “tametereng el blengur” a mesaod el kirel a rechad el mo kldibel e ngngar ngii a imis el omelim el rrom me a ongngak a di merael el mo osoi. Me a lsekum ke melilt el mo serve a rrom e molatk aike el sebechem el remuul er a uchei me ngdiak a chad el melim el mo imis.d A lsekum ngngar ngii ongngak e lak lsal klou a ngerel me a rechad lak lekaiuediu sel chadecheduch. Mkerekikl el melilt a ongngak el bo morrael em check a lyrics er ngii me lak bo molibas er a ngii di el chad.

9. Ngera kirir a Rekristiano el melatk a lsekum ngngar ngii a chad el mo mengedecheduch me a lechub ngmo er ngii a entertainment er a temel a reception er tir?

⁹ Te ngar ngii a mo mengedecheduch er a temel a reception er kau, me a lechub ngmo er ngii a slideshow, video, me a lechub nglmuut el bebil er a entertainment? Aika sebechel rullii tia el sils el lmuut el kmal mo ileakl. Me nguaisei engdi em make sure el kmo aika mo uchul omelisiich. (Fil. 4:8) Di lekau el oker: ‘Tia ngmo ochotii omengull el mora rebebil? Ngmo kullii a chebechiil?’ A lmuut el kmal klou a ultutelel el ker el di kau loker er ngii a: ‘Ngmo mengebkall er a Jehovah?’ Alta bebil ngellakel el lolekoi a chad a di ungil me nguaisei ngkmal diak el kirel mo oungelakel el mesaod a tekoi el diak el delodau me a lechub ngngellakel el kirel a tekoi er a cheliuaiu. (Efe. 5:3) Moterekeklii el kmo a rechedam me a resechelim el mo mengedecheduch er a temel a reception er kau a medengei aike el tekoi el diak el soam a losaod.

10. Ngera uchul me a Rekristiano el plan er a wedding er tir a diak lungil a lolechau a ues el mo er tir? (1 Johanes 2:​15-17)

¹⁰ Lak molechau a ues lekor kau. (Monguiu er a 1 Johanes 2:​15-17.) Tirke el betik a rengrir er a Jehovah mora tkurrebab el sebechir el mengebkall er ngii e diak lolechau a diak el tabesul el ues el mo er tir. Sei a uchul me a Rekristiano a mengeroid er tir er a imis el omengoit el udoud me a meruul er tir el mo ongengael. Ngngera klungiolel a le simple a wedding er kau? Molatk er a Mike lodam er a Norway. Ngmelekoi el kmo: “Ngdimlak ki bo mchelsechusem er a blals e mle sebecham el melemolem el pioneer. A wedding er kemam a mle simple engdi ngdirrek el mle klebokel e diak ki bo mobes er ngii.” A Tabitha el odos er a India a kmo: “Ngmlo sebechemam el mengeroid er kemam er a betok el stress. A wedding er kemam el kmal mle simple a uchul me ngdimlak el betok a ki em plan el kirel e diak el betok a mle sebechel mo uchul a mondai.”

11. Ngmekera sebechir a Rekristiano el mo bechiil el diak lochau a mla mo diak el tabesul el ues el mo er tir? (Dirrek el momes a siasing.)

¹¹ Ke mla ngiltii obo moubail er ngii? Ngulterekokl el soam el mo ungil el kutmeklau. Mo lmuut er a taem er a Biblia me a remlo bechiil me te ulemesiich er tir. (Isa. 61:​10, NW) Nguaisei, aike el bo moubail el mo bechiil a ngodech er aike el moubail er aike el kuk bebil er a taem me nguaisei engdi ngdirk kirel ulengeasek. (1 Ti. 2:9) Lak obechei a bail me a lechub ngbesiich me lebo el sel kot el klou a ultutelel el part er a wedding er kau.—1 Pe. 3:​3, 4.

12. Ngera uchul me a Rekristiano kirir lotngakl a siukang er a merengel a chebechiil loruul er a basio el lekiei er ngii el lomtok er a Biblia?

¹² Motngakl a siukang lomtok er a Biblia. (Och. 18:4) Tia el beluulechad er a Satan a mla mekidekelii a merengel a chebechiil lolab a klsuul el osisechakl me a omeruul el chelsechusem er a remekngit el chelid me a tekoi er a lusech. (2 Ko. 6:​14-17) A lsekum ngngar ngii omeruul me a siukang er a basio el mkiei er ngii el diak em sure el kirel, e moruul a research el mo medengei el kmo ngmla er ker el mei e mosiik omellach er a Biblia el ngii a mo ngosukau el mo ungil melilt el kmo ngngera mo part er a wedding er kau.

13. Ngmekera sebechir a Rekristiano el mo bechiil loukerebai er a osengel a Jehovah el kirel omelai el gift?

¹³ Ngsiukang er a beluu el mngar er ngii el re guest er a wedding omsa gift er tirke el mo bechiil? A blekeradel er a klengar er a rebebil el guest a locha mo ngar ngii a lerellii er a gift el bo lomeskau. E uaisei el Rekristiano a lolisiich er tir el mo merous, me tir a dmeu a rengrir el meruul er tiang. (Osi. 11:25; Rel. 20:35) Me nguaisei engdi ngdiak el kired el rulleterir a re guest er kid el mo feel el kmo ngkirir lomeskid a gift me a lechub e derelleterir el mo mekngit a rengrir le tir el diak el sebechir el meskid a meringel a cheral el gift. Kede oukerebai er a Jehovah e melasem el mo oba uldesuel el kirel a gift e mechititerir a rebebil me te merous el ngar er a rengrir e oltirakl aike el sebechir.—2 Ko. 9:7.

MENGEROID ER KID ER A OMELSEMAI ME A ROLEL E NGSEBECHED EL SUMECHOKL OMELSEMAI EL DUUBECH

14. Ngera el omelsemai a bo lechebangel a Rekristiano el plan er a wedding er tir?

¹⁴ Sel molasem el plan er a wedding el ngii a mo kobkellii a Jehovah e ke locha mo chobangel a omelsemai. El ua tiang, ke locha mo metik el kmo ngmeringel a de plan er a simple el wedding. A Charlie el chad er a Solomon Islands a kmo: “Ngkmal mle meringel aki molilt er tirke el ki bo em invite er tir el mora reception. Ngbetok a resechelimam me a dirrek el ngar er a siukang er kemam e a rokui el chad a expect er kid el mo invite er tir!” A Tabitha el dulsaod er ngii er a uchei a kmo: “Ngblekeradel er a basio el kkiei er ngii el meruul er a klou el reception. A rechad er a blimam a uluusbech a taem el mo kongei er a omelilt er kemam el di mo invite er a rebekord el 100 el chad.” A Sarah er a India a kmo: “A rebebil a kmal klou a ultutelel er tir a osengel a buai el kirir. A re cousin er ngak a kmal mle meklou e meringel a cheral a wedding er tir me ak mle feel er a orimel el mo meruul er a wedding er ngak el lmuut el mo klou er a wedding er tir.” Ngera sebechel ngosukau sumechokl aika el omelsemai me a lmuut el bebil?

15. Ngera uchul me ngkmal klou a ultutelel omblechoel el meluluuch el kirel a wedding plans er kemiu?

¹⁵ Mblechoel el meluluuch el kirel aika el plan er a wedding er kau. Ngsebechem louchais er a Jehovah el kirel a ngii di el mondai el mchelebangel er ngii me a lechub kouchais er ngii aike el oberaod a rengum el kirel. (Fil. 4:​6, 7) Ngsebechem lolengit er ngii me lengesukau el mo ungil melilt e mo melemolem loba chelellakl el reng sel bo louedikel a rengum, e mo ochotii a blekeu sel lebo el kirem. (1 Pe. 5:7) A klaumerang er kau er a Jehovah mo mukeroul sel momes er ngii longer a nglunguchem. A Tabitha el dulsaod er ngii er a uchei a kmo: “Ngak me a fiancé er ngak a mle bekikl el kmo aki mo el mo kaumondai me a lechub aki mo kaumondai kemam me a rechad er a blimam. Me a bek el taem el ki bo mosaod a plan er a wedding er kemam e aki blechoel lomuchel loeak a nglunguuch. Aki kmal mle feel er a ngelsuil a Jehovah e dirrek mle feel er a budech er a delongelam.”

16-17. Ngmekera ungil communication e sebechel mo uchul a ungil planning er a wedding?

¹⁶ Le bleketakl a communication er kemiu e mdirrek el lochotii omengull. (Osi. 15:22) Ngkiriu el terung el dmak el meruul omelilt el kirel a wedding er kemiu. Tia uldimukl er a date, budget, list er a rechad el bo em invite er tir, me a lmuut el bebil. A uchei er a om decide em review a options er kemiu e mosaod omellach er a Biblia el apply er a situation er kemiu me a advice el bla mngai er a rudam me a rudos el loba llomeserreng e ungil el kerebai. Sel mosaod aike el kuk kau a soam e bo lungil omerellem, bo moba tabesul uldasu, e bom flexible. El ua tiang, a lsekum a rechad er a blimiu a ngar ngii ongterir el kirel a wedding er kau el tabesul e diak a kngtil e mkengei ongterir. Tia dirrek el ileakl el sils el kirir. A lsekum ngdiak el sebechel e msodii el mo er tir er a uchul el ngar er a ungil rolel. (Kol. 4:6) Mbeketeklii el mora rechedal a telungalek er kau el kmo sel kot el klou a ultutelel el tekoi el soam a lemeketmokl er a wedding er kau a lebo el taem er a deurreng e le kobkellii a Jehovah.

¹⁷ Nglocha tokubets el mo meringel el tekoi a omosaod omelilt er kemiu el mora rechad er a blim el diak el ngar er a klemerang, me nguaisei engdi ngsebechel meketmokl. A Santhosh lodam er a India a kmo: “A telungalek er kemam a mle sorir aki moruul a bebil el tekoi el mengai er a klechelid er a Hindu. Ngmlo chuib a kemanget el taem el ki molasem ngak me a fiancée er ngak el mesaod a omelilt er kemam el mo er tir. Aki kilengei el meruul a bebil omelodech el ki ble em feel el kmo ngdiak bo lekingtir a rengul a Jehovah. El ua tiang, aki mle change er a menu el mo kall el sorir e millilt el diak lebo er ngii omengitakl me a ngloik e le te dimlak el sau er aika el tekoi.”

18. Ngera sebechel ngosukau me a rokui el tekoi di bo lungil el merael er a sils er a wedding er kau? (1 Korinth 14:40) (Dirrek el momes er a siasing.)

¹⁸ Bo mkerekikl el plan. Sel bo mungil el organized e ngulterekokl el diak bo msal stress er a sils er a wedding er kau. (Monguiu er a 1 Korinth 14:40.) A Wayne er a Taiwan a kmo: “Sesei el klebesei er a uchei er a sils er a merengel a chebechiielam e ngmla er ngii a kekerei el miting er kemam lobengterir tirke el kilengei el me olengeseu er kemam er tiakid el sils. Aki milsaod a plan el kirel tiakid el sils e mle practice a bebil telengtengil a wedding me di bo lungil el merael a rokui el tekoi.” Mochotii omengull el mora re guest er kau loeak omoltirakl a taem.

19. Ngera sebechel ngosukau me a reception er kau a mo meketmokl loltirakl aike el soam?

¹⁹ Ngsebechem el mochib er a betok el mondai a lsekum ke melatk aike el sebechel duubech e plan el kirel. (Osi. 22:3) A lsekum ke kiei er a beluu el sebechir a rechad el dimlak em invite er tir el di kiul show up er a reception e molatk a sebechem el meruul me lak el duubech tia el tekoi. Em make sure el kmo a rechedam el diak el ngar er a klemerang a medengei aike el sebechir el expect e msodii el mo er tir a osengem el kirel a bebil tekoi leblechoel el meruul a rechad er a merengel a chebechiil. Ngsebechem el share er tir er a article el “What Happens at a Wedding of Jehovah’s Witnesses?” el ngar er a jw.org. Ngdirrek el sebechem lolengit er a odam el moumerang er ngii me lebo el in charge er a reception. (Jn. 2:​8, NW) A lsekum ke bleketakl el smodii el mo er ngii a soam el kirel a wedding er kau e ngsebechel ngosukau el make sure el kmo a wedding a mo meketmokl loltirakl er aike el soam.

20. Ngera kirir a Rekristiano el diak lobes er ngii el kirel a wedding er tir?

²⁰ Ke locha mo omelechesiu er a berraod sel molatk aika el rokui el tekoi el kirem el meruul el plan er a wedding er kau. Me nguaisei engdi lak mobes el kmo a wedding er kau a di ta el sils. Ngsel kot el sils er a uchelel a klengar er kemiu el dmak el mesiou er a Jehovah. Me bora tkurrebab el sebechem el rullii a wedding er kau el mo simple e mo ochotii a omengull e delodau. Moumerang er a Jehovah. Ngoeak a ulekrolel e ngsebechem el plan er a wedding el sel bo momes el bedul uriul e ngmui er a deurreng me a ungil el memory e diak omouuchel er a rengum el kirel.—Psa. 37:​3, 4.