Ongeua el Suobel
Ngtechang a Diabelong?
A Satan el Diabelong—ngmla er ker el mei? (1, 2)
A Satan ngmekerang a longeuid er a rechad? (3-7)
Ngera me ngkirem el lomtok er a Diabelong? (7)
1. A tekoi el “diabelong” a belkul a kmo ngchad el melekoi a mekngit el blulak el kirel a kuk ta er a chad. A “satan” a belkul a kmo ngcherraro ma lechub e ngchad el lomtok. Aikang a tekoi el lousbech el mesaod er ngke el kot el klou el cherrouel a Dios. A kot, e ngmle cherrungel el anghel el mla er a eanged el lobengkel a Dios. Engdi, uriul e ngkmal mlo chimis el lomdasu el di kirel e mlo soal a omengull el ngii a mle kloklel a Dios.—Matteus 4:8-10.
2. Ngika el anghel, el Satan, a milengedecheduch er a Eba el lousbech er a bersoech. Ngulemulak er ngii, e rirellii el mo diak lolengesenges er a Dios. Tiakid e a Satan a mlo omtok er a “klisichel a omengederederel” a Dios, ma lechub e sel deruchellel a Dios el Chimong el Kedidai. A Satan a milekdubech a ker el loumededenger er a omengederederel a Dios el kmo ngungil el kirel a klungiolir a Rechederdellel ma lechub e ngdiak. A Satan a dirrek el milekdubech a ker el kirel a blakerreng er a rechad el bedul a Dios. Me sera leuaisei, e a Satan a di mle ngii el rullii el mo cherrouel a Dios. Me seikid a uchul me ngmlo okedongall el Satan el Diabelong.—Genesis 3:1-5; Job 1:8-11; Chocholt 12:9.
3. A Satan a melasem el mengeblad er a rechad me bo longull er ngii. (2 Korinth 11:3, 14) A ta er a rolel e ngmengeuid er a rechad a oeak a klsuul el klechelid. Ma lsekum a klechelid a olisechakl a blulak el kirel a Dios, e ngolengeseu er a moktek er a Satan. (Johanes 8:44) A rechad el ngar er a klsuul el klechelid a mera el loumerang el kmo te mengull er a mera el Dios. Engdi lechub e te bai mera el mesiou er a Satan. Ngii a ‘chelid er tia el beluulechad.’—2 Korinth 4:4.
4. A oltuubladek a dirrek el ta er a rolel e a Satan a ngoititerir a rechad el mo er a cheungel a klisichel. Te locha mo omekedong er a rebladek el mo omekerreu er tir, e melemall er a rebebil, e ouchais a tekoi er a ngar er a medad, ma lechub e te meruul a ongasireng. A Satan ingii ngike el mekngit el klisiich el mengetmokl aika el rokui. Ma bo dodeuir a rengul a Dios, e ngkmal kired el mo klikiid er a ngii di el rolel a oltuubladek.—Duteronomi 18:10-12; Rellir 19:18, 19.
5. A Satan a dirrek el mengeuid er a rechad el loeak a kmal mesisiich el luldasu el chemat er a bliongel er a klechad er kid ma dirrek el omengull el mo er a cheldebechel er a politiks. Ngar er ngii a rebebil el mo omdasu el kmo a belurir ma bliongel er a klechad el lengar er ngii a kuk ungil er a belurir ma bliongel er a klechad el lengar er ngii a rebebil. Engdi tia diak el klemerang. (Rellir a Rechapostol 10:34, 35) A rebebil a omes el bedul a chelechad er a politiks el kirel a smecheklel a mondai er a klechad. Sel loruul el uaisei, e te oltngakl er a Rengedel a Dios. E a Rengedel a Dios ngii a di ta el mo sumechokl a mondai er kid.—Daniel 2:44.
6. A ta er a rolel e a Satan a mengeuid er a rechad a oeak sel longesuseu er tir el lolab a ngibes el mo er a klengit. A Jehovah a omeklatk er kid me dongeroid er kid er a mekngit el omeruul e le ngmedenge el kmo ngsebechel el tomellid. (Galatia 6:7, 8) Ngsebechel el mo er ngii a rebebil el mo sorir a omobengterir er a chouaise el lomeruul. Engdi alii, kele mobes el kmo, a mera er ngii ng Satan a soal obo moruul aika el tekoi.—1 Korinth 6:9, 10; 15:33.
7. A Satan a dirrek el sebechel el lousbech a odechelakl ma lechub e ngultok el melasem el mengeroid er kau er a Jehovah. A rebebil er a rebetik er a rengum a kmal mo kesib a rengrir er kau e le kau el mesuub a Biblia. A rebebil a mo melenguul er kau. Engdi klengar er kau ngtechang a milskau? A Satan a soal el lomekdakt er kau me meterob el mesuub el kirel a Jehovah. Lak becherei a Satan me lebo el mesisiich er kau! (Matteus 10:34-39; 1 Petrus 5:8, 9) Ma omomtok er a Diabelong, e ngsebechem el lodeuir a rengul a Jehovah e olecholt el kmo ke kongei er a ngar er a bab el Lomengederederel.—Osisechakl 27:11.
[Siasing el ngar er a 9 el llel]
A Klsuul el Klechelid, ma oltuubladek, ma mesisiich el luldasu el kirel a beluu a mengeuid er a rechad
[Siasing el ngar er a 9 el llel]
Momtok er a Satan el loeak a omolemolem el mesuub el kirel a Jehovah