Ongelolem el Suobel
Ngerang a Rengedel a Dios?
Ngar er ker a Rengedel a Dios? (1)
Ngtechang a King er ngii? (2)
Te mo er ngii a rengodech el chad el mengederedel el lobengkel a King? A lsekum me te mo er ngii, e te telang? (3)
Ngerang a chochotii el kmo kede kiei er a uriul el sils? (4)
Ngerang mo meruul er ngii a Rengedel a Dios er a ngar er a medad el kirir a rechad? (5-7)
1. A Jesus er sera lengar er a chutem, e ngullisechakl er a rulebengkel el mo meluluuch el kirel a Rengedel a Dios. A renged a melekoi el kirel a kabelment el longederedel er ngii a king. A Rengedel a Dios a ileakl el kabelment. Nguleketmokl el ngar er a eanged e mo mengederedel er tia el chutem. Ngmo mengikiid, ma lechub e ngmengedaol, er a ngklel a Dios. Ngmo remuul a soal a Dios er tia el chutem el ua omerellel er a eanged.—Matteus 6:9, 10.
2. A Dios a tilbir el kmo a Jesus a mo King er a Rengedel. (Lukas 1:30-33) Ma Jesus er sera lengar er tia el chutem, e ngulechotii el kmo ngulterekokl el mo bekokeuii, e melemalt, e cherrungel el Merredel. Sera lluut el mo er a eanged, e ngdimlak di el mereched el mo King er a Rengedel a Dios. (Hebru 10:12, 13) Sera rak er a 1914, e a Jehovah a milsa Jesus sel klisiich el Letilbir. Seikid el taem el mei, e a Jesus a mlengederedel el ngar er a eanged el ua telutk el King er a Jehovah.—Daniel 7:13, 14.
3. A Jehovah a dirrek el mla ngilteterir a rebebil er a reblak a rengrir el sechal ma redil er tia el beluulechad el mo er a eanged. Te mo mengederedel el lobengkel a Jesus el ua reking, e chad er a kerrekeriil, e priist er a rechad el ngar er a beluulechad. (Lukas 22:28-30; Chocholt 5:9, 10) A Jesus a ulemekedong er tirkakid el chad el mo obengkel el mengederedel el ngar er a Rengedel el kmo te “kekere el delebechel.” E a ildisir a 144,000.—Lukas 12:32; Chocholt 14:1-3.
4. Sera lomuchel el omengederedelel a Jesus el King, e ngdi mle mereched el mideklii a Satan ma remekngit el anghel er ngii er a eanged el mei er tia el chutem. Sei a uchul ma blekeradel er a chutem a kmal mlo mekngit er a rak er a 1914 el mei. (Chocholt 12:9, 12) A mekemad, ma klengerenger, ma bekoiueiuul el rakt, ma delengerenger el di merael el mo klou—aika rokui el luldimukl er a “olangch” el lolecholt el kmo a Jesus a mengederedel me kid a kiei er a chelsel a ullebongel er a chelecha el blekeradel er a beluulechad.—Matteus 24:3, 7, 8, 12; Lukas 21:10, 11; 2 Timoteus 3:1-5.
5. Ngdi kmedung e a Jesus a mo oukerrekeriil er a rechad, e omii er tir el ua klekerengel a sib a loleakl a sib er a kaming. Tirke el ua “sib” a tirke el lulechotii a blakerreng er tir el kirel a omengederederel. Tirka itirke el mo nguu a diak a ullebengelel el klengar el ngar er tia el chutem. A reua “kaming” a tirke el ultngeklii a Rengedel a Dios. (Matteus 25:31-34, 46) Me ngkesai el taem er a medad, e a Jesus a mo olekngemed er tirke el rokui el ua kaming. (2 Thesalonika 1:6-9) A lsekum me ngsoam el mo ta er a “sib” er a Jesus, e ngkmal kirem el lorrenges a klemechel a Renged e mo meruul aike el tekoi el msuub.—Matteus 24:14.
6. Chelecha el taem e a beluulechad a blii el betok el kakerous el beluu. Ngii el rokui el di chemur a kabelment er tir. Aika el beluu a blechoel el kaodechelakl. Engdi Rengedel a Dios a mo mtechei aika el rokui el kabelment er a klechad. E ngii a mo mengederedel el di ta el kabelment er a beluulechad el rokir. (Daniel 2:44) E seikid e ngmo diak a mekemad, ma delengerenger, ma uldikel. A rokui el chad a mo kiei el dmak el ngar er a budech ma kltarreng.—Mika 4:3, 4.
7. Chelsel sel Ta el Telael el Rak el Longederedel a Jesus, e a reblak a rengrir el chad a mo mecherrungel, ma beluulechad el rokir a mo paradis. Me ngngar er sel ullebengelel a ta el telael el rak, e a Jesus a mla kutmokl aike el rokui el luleldurech er ngii a Dios el mo meruul. E seikid e ngii a ngoderii a Renged el mo er a Demal. (1 Korinth 15:24) Ngera me ngdiak bo mouchais er a resechelim ma rebetik er a rengum el kirel aike el bo loruul a Rengedel a Dios?
[Siasing el ngar er a 13 el llel]
Ngar er a cheungel a omengederederel a Jesus, e ngmo diak a klauketui ma mekngit el luldasu el kirir a rechad