Moba Klemeriarreng er a Tekingel a Dios

1. Ngmekerang e sebechel el mo ungilbesul a klengar er kid?

¹ Ngike el milluches er a Psalm a millekoi el kirel a chad el menguiu er a Tekingel a Dios er a bek el sils el kmo: “Ng di mo ungil er a ikel bek el loruul.” (Psa. 1:⁠3) Me a leuaisei, alta e ngdiak demecherrungel, e kiei er a mekngit el beluulechad er a Satan, e ngii el Satan a melasem el mengitechut er kid, engdi a ulterekokl el omengiued me a otuted er a Tekingel a Dios, a sebechel el ngosukid el mo ungil er a ngii di el tekoi el ngar er ngii a lerellii er a delongeled kid me a Jehovah.

2. Ngera me ngkired el menguiu er a Biblia er a bek el sils?

² Kid el ngar er a cheungel a meringel el orimel er tia el mekngit el beluulechad a uchul me sel dolebedebek a uldesuel Ngike el Ulemeob er a bek el sils e ngsebechel el melisiich er kid. A rebebil el mlekelebus el kirel a klaumerang er tir a di mle sebechir el menguiu a bebil er a bades el lebiltik er a chelsel a simbung. Te ngilai el mei, e milsuub el mo medengei, e mle dmolech el melebedebek ngii el tekoi. A Jehovah a ulemekngeltengat aike el tekoi el lurruul e le tir el mirruul aike el sebechir el melai a klemedengei er tir er a Tekingel a Dios. (Mt. 5:⁠3) Me nguaisei engdi a oumesingd er kid a mimokl el menguiu er a Biblia. Ngdiak el soad el omdasu el kmo a dorreched el menguiu a bades er a bek el sils, e ngbelkul a kmo ngngar er ngii a ongasireng el tekoi el mo duubech. Engdi ngmo uchul a klengeltengat a lsekum e kede oterekokl a meklou a ultutelel el tekoi me bo el sebeched el menguiu er a Biblia er a bek el sils, e melebedebek er ngii, e oltaut er ngii er a chelsel a klengar er kid.

3. Ngkirel el mo ua ngerang a klungel a ultutelel a omengiued er a Biblia?

³ Ngmera el tekoi, a telbiled a sebechel el di mereched el mengodech. E sel bo leuaisei, e ngungil a domuchel el meruul aike el meklou a ultutelel el tekoi. El uai tiang, nglocha diak el telbilel a rengud el mo diak dolim a ralm el tang me a lechub e ngeru el klebesei. Me a leuaisei, e a ngii di el tekoi el duubech er a klengar er kid er a bek el sils, engdi kid a di kired el mengoit a taem el melai er tia el ralm er a klemerang me bo el ungil a rengud.−Rel. 17:⁠11.

4. Ngua ngera el prokuram er a omengiuel a Biblia a mla meketmokl el kired, e mekerang e sebeched el ngmai a klungioled er ngii?

⁴ A ta er a kot el klou a ultutelel el rolel a omesuub el denguu er a Skuul el kirel a Berkel a Klumech a prokuram er a omengiuel a Biblia. Aki olengit er kau el mo teloi er ngii. Ngmla meketmokl a telkael el bades er a bek el sandei el kirel a omengiued er a Biblia el sebeched el menguiu e mo mesaod er a miting. Tiang a mo ngosukau el mo sebechem el chiuii a Biblia el rokir.

5. Kede mekerang e mekurulii a blekerdeled el soad el menguiu er a Biblia er a bek el sils?

⁵ Me a lsoad el menguiu er a Biblia er a bek el sils, e ngkired el oterekokl a taem el kirel, el uai sel letutau, me a lesueleb, me a lekebesengei me a lechub e nguchei er a bo debechiuaiu. E le a lsekum e kede di menguiu er ngii er sel bo el techelled e ngbelkul a kmo ngdiak a ulterekokl el temel a omengiued.

6. Ngmekerang a bdelul a telungalek e ngosuir a telungalek er ngii?

⁶ A lsekum e ke bdelul a delengchokl, e ke olecholt a klemeriarreng el mo er a telungalek er kau sel sekum e ke ngosuterir el oterekokl a ungil el temir er a omengiuel a Biblia. Me sel omdak el telungalek el menguiu er a Biblia e ngmelisiich er a derta el chad er a telungalek el mo di tir el menguiu er a Biblia er tir er a bek el sils.

7. Ngera me a omengiuel a Biblia er a bek el sils a ousbech er a ducherreng?

⁷ A bo donguiu er a Biblia er a bek el sils e ngkirel el mo ultebechel a rengud, e le ngdiak di debechell e lengar er ngii a urunguled el soad el meruul er ngii. Me a leuaisei, e ngkired el mekurulii a urunguled el kirel a Tekingel a Dios. (1 Pe. 2:2) Me sel domekeroul er tia el blekeradel, e a klemeriarreng er kid el kirel a tekingel a Dios a mukeroul. Kede dirrek el mo semeriar el merriter a suobel el okiu a omengiuel a Biblia me a omesuub el sebechel el mekurulii a klemedengei me a omereng el saul er kid el kirel a ulekrael el lomeskid a Jehovah.

8. Me sel donguiu er a Biblia e ngera dirrek el sebeched el meruul er ngii?

⁸ Me sel donguiu er a Biblia, e ngkired el mengoit a taem el dmolech el melebedebek aike el donguiu, el ua ike el louchais er kid el kirel a Jehovah, e mekerang e mo uchul a klungioled, e mekerang a dousbech er ngii el ngosuterir a rebebil.