11 EL SUOBEL
Rolel e Ngsebechem el Mui el Ngmai a Klungiolem er a Omengiuem er a Biblia
Ngmla ta el kora soam el meruul er a klou el project engdi ngkmal meringel? Ke locha milingii el mo betok el mekekerei el tekoi me bo lsebechem el mekekokau el meruul er ngii. Tia osisiu er a omengiuel a Biblia. Ke locha melatk el kmo, ‘A kumuchel er ker?’ Ngar tia el suobel e kede mo mesaod a bebil er a beot el tekoi el sebechem el meruul el mo ngosukau el mo dmeu a rengum el menguiu e mesuub er a Biblia.
1. Ngera klungiolel a deblechoel el menguiu er a Biblia?
A chad el blechoel el menguiu er a Biblia, me a lechub e ng “llechul a RUBAK,” a mo metik er a deurreng e mo ungil er a bek el loruul. (Monguiu er a Psalm 1:1-3.) Momuchel er a omengiuem loeak sel omonguiu er ngii el sesei el bung er a bek el sils. Sel lemedechel a klemedengei er kau er a Tekingel a Dios me ngii a mo medechel a deurreng er kau el menguiu er ngii.
2. Ngera mo uchul e ke ngmai a klungiolem er a omengiuem er a Biblia?
A lsoad el mui el ngmai a klungioled er a omengiuel a Biblia, e ngkired el stob e melatk a tekoi el donguiu. Ngkired el menguiu e “melebedebek er ngii.” (Psalm 119:97) Sel monguiu e di lekau loker chouaika el ker: ‘Tiang ngera ngouchais er ngii er ngak el kirel a Jehovah el Dios? Ngmekera kultaut er tiang er a chelsel a klengar er ngak? Ngmekera sebechek lousbech aika el bades el olengeseu er a rebebil?’
3. Ngmekera sebechem el kutmeklii a taem el mo menguiu er a Biblia?
Ngmeringel er kau a metik er a temem el menguiu er a Biblia? Rebetok er kid a uaisei. Bo ‘mungil el ousbech a bek el techall.’ (Efesus 5:16) Sebechem el meruul er tiang loeak sel moterekeklii a ileakl el taem er a chelsel a ta el sils el menguiu er a Biblia. A rebebil er a rechad a kutmokl a temir a letutau el mo menguiu er a Biblia. A rekuk bebil a menguiu er a Biblia er a uriul, el ua temel a lunch break er tir. E ngar ngii a re kutmokl a temir er uchei er a bo lebechiuaiu el menguiu. Nglocha ngera ungil taem el kirem?
BOM DMOLECH EL MERRITER
Msuubii a rolel e ngsebechem el mo semeriar el menguiu er a Biblia. Mesa rolel e ngsebechem el mo ungil kutmeklau el kirel omesubem er a Biblia me bo mui el ngmai a klungiolem er ngii.
Ngdi uai kid el sebeched el mesuub el mo soad el mengang a kakerous el kall, me ngdirrek el sebeched el suubii el mo soad el menguiu er a Biblia
4. Mosuub el mo soam el menguiu er a Biblia
Nglocha diak bo lebeot er kau a mechelii omengiuem er a Biblia. Me nguaisei engdi ngsebechem el suubii el mo soam el menguiu er a Biblia el di ua el sebechem el suubii el mo soam el menga beches el kall. Monguiu er a 1 Petrus 2:2 e mosaod er tia el ker:
Omomdasu e a omonguiu er a Biblia er a bek el sils, e ngsebechel mo tekoi el soam el blechoel el meruul er ngii?
Momes er a VIDEO e mesa el kmo, te milekera rebebil e mo sorir el menguiu er a Biblia. E mosaod aika el ker.
Ngera el omelsemai a blo lemesisiich er ngii tirka el ngar er a video?
Ngera ngilsuterir el mo otutii a turrekong er tir er omengiuel a Biblia?
Te milekera remuul omengiuir er a Biblia el lmuut el mo ungil?
Ngeso er a uldasu el sebechel ngosukau el mechelii omengiuem:
Mngiltii a Biblia el melemalt oidel e beot er kau el menguiu er ngii. Mtames er a New World Translation a lsekum e ngbeot er kau a menguiu a tekoi er a Merikel.
A kot e monguiu er a tedebechel a Biblia el kora kmal soam. Momes er a “Bechelii Omengiuem er a Biblia” a lsoam a bebil er a ngeso er a uldasu.
Mluches aike el bla mchuiu. Mousbech er a chart el ngar tia el babier el “Em Track er a Omengiuem er a Biblia.”
Mousbech er a JW Library® app. Ngsebechem lousbech er tia el app el menguiu e orrenges er a omengiuel a Biblia el ngar er a dengua er kau me a lechub e ng electronic device er kau er a ngii di el ker.
Mousbech er a booklet el Ngeso el Kirel a Omesubel a Tekingel a Dios. Tia ngar ngii a map me a chart er ngii el sebechel rullau el mengal mo semeriar er a omengiuem.
5. Mketmeklau el kirel omesubem er a Biblia
Monguiu er a Psalm 119:34 e mosaod er tia el ker:
Ngera uchul me ngungil omoluluuch er uchei er a omonguiu er a Biblia me a lechub e nguchei er omongetmokl er kau el kirel omesubem er a Biblia?
Ngmekera e sebechem el mui el ngmai a klungiolem er a derta el omesubem? Sel mongetmokl er kau el kirel omesubem, e moltirakl er tia el rolel:
Monguiu aike el parakurab el ngar er a uchelel a suobel.
Monguiu aike el bades el llechukl, e molebedebek er a rolel e ngmesaod er a suobel.
Em highlight a nger er a derta el ker. Tia mo ngosukau sel bo mosuub lobengkel ngike el mesuub el obengkem.
Ke medengei el kmo ngerang?
A Resioning er a Jehovah mla ousbech a betok el kakerous el oidel a Biblia. Engdi ngkmal sorir a New World Translation of the Holy Scriptures e le ngmelemalt oidel, beot a donguiu er ngii, e ousbech er a ngklel a Dios.—Momes er a suobel el ngar er a Internet el “Do Jehovah’s Witnesses Have Their Own Bible?”
A REBEBIL A KMO: “Ngkmal klou el ureor a dosuub er a Biblia. Ngkmal diak a temek e kmal mesaul a bedengek.”
Ngera uldesuem?
SUMMARY
A rolel e ngsebechem el mui el ngmai a klungiolem er a omengiuel a Biblia a sel omrellii a schedule er kau el mo menguiu er ngii, omoluluuch lolengit er a llomeserreng el mo medengei omonguiu, e mongetmokl er kau el kirel omesubem er a Biblia.
Review
Ngera sebechel ngosukau el mui el ngmai a klungiolem er a omengiuem er a Biblia?
Oingerang el taem a sebechem el kutmeklii el mo menguiu e mesuub er a Biblia er kau?
Ngera uchul me ngungil omketmeklau el kirel omesubem er a Biblia?
A LSEBECHEM E MOMES
Momes a bebil er a rolel e ngsebechem el mui el ngmai a klungiolem er a omengiuem er a Biblia.
“Mngai a Klungiolem er a Omengiuel a Biblia” (A Ongkerongel No. 1 2017)
Monguiu a edei el rolel e ngsebechem el menguiu er a Biblia.
“How Can the Bible Help Me?—Part 1: Exploring Your Bible” (Suobel el ngar er a Internet)
Mesa rolel e ngsebechem el mo dmeu a rengum el menguiu er a Biblia.
“How Can the Bible Help Me?—Part 2: Make Bible Reading Enjoyable” (Suobel el ngar er a Internet)
Mngai a bebil ngeso er a uldasu er a rechad el mla menguiu er a Biblia el betok el rak.