“Ak Ulengit Me Bo Loukerrekeriil er Ngak a Merreder er a Rom”

1, 2. (a) A Paulus ngmetik er ngii er a chelsel a choua ngera el blekeradel? (b) Ngera el ker a duubech e le Paulus el lolengit el mo omes er a Kaiser?

A RESOLDAU a meringel el mengkar er a Paulus er a Sesarea. Eru el rak er uchei er sera lluut el mora Judea e ngdi mle chelsel a sesei el klebesei e a Rechijudea a mlo kesengil e ngedei el taem el lolasem el lomekoad er ngii. (Rel. 21:27-36; 23:10, 12-15, 27) Me alta recherrouel a dimlak el sebechir el mekodir engdi me lmuut er chelechang me te dirkak el meterob. A Paulus er a lutebengii el kmo ngsebechel lmuut el modurokl el mora recherrouel e ngdula er a Kabernor Festus er a Rom el kmo: “Ak ulengit me bo loukerrekeriil er ngak a Merreder er a Rom.”​—Rel. 25:11.

² A Jehovah ngmle support er a ongtil a Paulus el mo omes er a Emperor er a Rom? A nger er tiang a klou a ultutelel er kid e le kede omerk el kirel a Rengedel a Dios er chelecha el taem er a ulebongel. Ngkired el mo medengei el kmo a Paulus e ngkiltmeklii a kerebai el kired el loltirakl er ngii el “mesebechakl er a llemelted el omerk er a ungil chais.”​—Fil. 1:7, NW.

“Dechor ra Medal a Kingall ra Kerrekeriil” (Rellir 25:1-12)

3, 4. (a) Ngera uchul me a Rechijudea ullengit me lemengai a Paulus el mora Jerusalem, e milekera Paulus e mlo sebechel chemiis er a kodall? (b) Ngmekera Jehovah e melisiich er a remesiungel er chelechang el taem el ua lurruul er ngii el mora Paulus?

³ Edei el klebesei er uriul er a bo le kabernor er a Judea a Festus e ngmlora Jerusalem.a Ngar isei e ngulerrenges er a rebderrir a reprist me a remerreder er a Rechijudea el loltutakl er a Paulus el kirel a kmal oberaod el tekoi el melemall er a llach. Te mle medengei el kmo ngika el kabernor a ulemelechesiu orimel er a Rom el mo omudech er a delongelir me a Rechijudea. Me te ullengit er a Festus me lenguu a Paulus el mei er a Jerusalem e loukerrekeriil er ngii er tiang. Engdi tirka ullengit el uaisei e le ngmla er ngii a mekngit el telbilir. Te millib el mo omekoad er a Paulus er a rael er a Sesarea el mora Jerusalem. Me a Festus a mle kotouar er tir e kmo: “A re merrederiu bo lobengkek el mor a Sesarea e loltutakl er ngiil chad a lsekum ng ngar ngii a tellemall el le rirellii.” (Rel. 25:5) Me a Paulus a mlo sebechel lmuut el chemiis er a kodall.

⁴ Chelsel a rokui el ringelel a Paulus e a Jehovah uluusbech er a Rubak el Jesus Kristus el melisiich er ngii. Molatk el kmo a Jesus a dilu er a apostol er ngii el ngar er a ues el kmo: “Msisichau”! (Rel. 23:11, BT) A remesiungel a Dios er chelecha el taem me te dirrek el mo chobangel a ringel me a ulekdakt. Alta Jehovah a diak el bo lestob a rokui el ringel el bo dechebangel, ngmeskid a llomeserreng me a klisiich el loutekangel. Ngkmal sebeched lultuil er a “diak le metuk el klisiich” el Dios er kid er a bltikerreng omeskid.​—2 Ko. 4:7, BT.

5. Ngmle uangerang omerellel a Festus el mora Paulus?

⁵ Tela el klebesei er uriul e a Festus a “mlo dengchokl er a kingall er a kerrekeriil” er a Sesarea.b Me a Paulus me a rultelechakl er ngii a mlo dechor er medal. Me a Paulus a milsaod aika el ultelecheklir el dimlak el klemerang el kmo: “Ng dirkak a mekngit el krellii el omtok a Llach er a re chad er a Judea, ma lechub e ng mekngit el kirel a Templo, ma lechub e ng ngerang el omtok er a Merreder er a Rom.” Ngika el apostol a dimlak a telemellel me ngdiak el kirel melemolem el kelebus. Ngmo mekerang a Festus? A Festus a mle soal mereng a rengrir a Rechijudea me nguleker er a Paulus el kmo: “Ng soam el mor a Jerusalem el mor a kerrekeriil er medak el kirel a ikel ultutakl?” (Rel. 25:6-9) Tia mera el mekngit el uldasu! A Paulus a lluut el mora Jerusalem e tirka el oltelechakl er ngii a mo oukerrekeriil er ngii, me ngii a ulterekokl el lokodir. Ngar tia el blekeradel e a Festus a mle soal mereng a rengrir a rechad el ngaruchei er a meruul er a llemalt. Ngbetok el rak er uchei e a kabernor el Pontius Pilatus a mirruul er a osisiu el tekoi el mora lmuut el kmal klou a ultutelel el chad lengiluu el mo kelebus. (Jn. 19:12-16) A rechad er a kerrekeriil er chelecha el taem me te locha dirrek el mo oltirakl orimel el mo er tir e mo diak el melemalt el loukerrekeriil. Seikid a uchul me ngdiak lemechas a rengud a lsekum te ngmai a sioko e dirk diak lemelemalt a kerrekerilir el mora rechedal a Dios.

6, 7. Ngera uchul me a Paulus ullengit el mo omes er a Kaiser, e ngera el kerebai a leketmeklii el kirir a remera Kristiano er chelecha el taem?

⁶ A Festus el mle soal mereng a rengrir a Rechijudea a mle sebechel mo uchul a kodellel a Paulus. Seikid a uchul me a Paulus a uluusbech er a llemeltel el citizen er a Rom. Ngdilu er a Festus el kmo: “Chelecha e ak dechor ra medal a kingall ra kerrekeriil ra kaiser, el kirek el mukerrekeriil er ngii; me kau a ungil medengei el kmo, ngdimlak a ngerang el mekngit el krellii el morar chad ra Judea. . . . Ak ulengit me bo loukerrekeriil er ngak a Merreder er a Rom.” A chad sel lerellii chouaisei el ongit e ngdiak el sebechel lmuut el ngodechii ongtil. Me a Festus a mileketeklii el kmo: “Kolengit er a mor a Merreder er a Rom, me ko mor a Merreder er a Rom.” (Rel. 25:10-12, BT) A Paulus er a lolengit el mo omes er a Kaiser e ngkiltmeklii a kerebai el sebechir a remera Kristiano er chelecha el taem el loltirakl er ngii. A rumtok sel lolasem lousbech a llach el merrob er a urered, e kede mo osiik a ngeso er a kort el mesebechakl er a ungil chais.c​—Psa. 94:20.  

⁷ Me Paulus a mle kelebus el eru el rak alta ngdimlak a telemellel, engdi ngmlo er ngii a techellel el mo mesebechakl er ngii er a Rom. Me nguaisei engdi uchei er a lebora Rom e ngmla er ngii a lmuut el ta er a merreder el mle soal lomes er ngii.

“[Ng] Dimlak Kurrengesmengoit” (Rellir 25:13–26:23)

8, 9. Ngera uchul me a King Agripa a mlora Sesarea?

⁸ Ngmlo chuib a sesei el klebesei er uriul er a Paulus a lolengit er a Festus el mo omes er a Kaiser, e a King Agripa me a ochedal er a Bernis a mlo “omes e ouetkeu” er ngika el beches el kabernor.d Taem er a rechad er a Rom e ngmle siukang el rengarbab el merreder a mo oldingel er tirke el beches el metutk el mo kabernor. Me a lebong a Agripa el mo congratulate er a Festus e ngrirellii a klausechelei er ngii lobengkel, el ngii a mo ngosuir er a ngar medal.​—Rel. 25:13.

⁹ A Festus uluuchais er a king el kirel a Paulus me ngmlo melemlim a rengul. A bo lekuk e tirka el terung a mlo dengchokl er a kingall er a kerrekeriil. Me nguaisei engdi a klisichir me a omengebkall er tir a kmal diak bo lokesiu aike el tekoi el me tuobed er a ngerel ngika el kelebus el dechor er mederir.​—Rel. 25:22-27.

10, 11. Ngmilekera Paulus e ochotii omengull el mora Agripa, e ngera nguluuchais a Paulus el mora king el kirel a mle klengar er ngii er a uchei?

¹⁰ Me a Paulus ulechotii omengull el mora King Agripa e mirreng a sulel er a techall el sebechel mesaod er ngii er medal e dilu el kmo a king a kmal ungil medengei a siukang me a klaititekangel er a Rechijudea. A Paulus a mlo mesaod er a klengar er ngii er a uchei el kmo: “Ak mle chedal sel meringel a tekoi er ngii el cheldebechel er a klechelid er kemam el ngii a Klefarisi.” (Rel. 26:5) A Paulus er a le Farisi e nguleba omelatk el kirel a telbiil el Mesias. Chelecha el bla bo le Kristiano e ngbekeu louchais el kmo a Jesus Kristus ngika el Mesias. Tiakid el klaumerang el ngii me a rumtok er ngii a di diul lobang el telbilel a Dios el mora ruchelir el toutang, a uchul me ngngar er a kerrekeriil er chelechang. Tia rirellii a Agripa el lmuut el menga el mo soal lorrenges a lolekoi a Paulus.e

¹¹ A Paulus a dirrek el mlo mesaod el kmo ngkmal mle meringel loldechelakl er a Rekristiano. Ngkmo: “Ngak mak dirrek el ulemdasu el kmo ak mor a ikel sebechek el osiik a bek el cheldechuul el mo omtok a tekoi el kirel a Jesus er a Nasareth. . . . Ng mle imis el kesib a renguk er [a rultirakl er a Kristus] mak dirrek el tilobed el mor a bebil er a beluu el mo oldechelakl er tir.” (Rel. 26:9-11) A Paulus a dimlak el kora di menglou a tekingel. A rebetok el chad a mle medengei el kmo ngmle meringel loldechelakl er a Rekristiano. (Gal. 1:13, 23) A Agripa locha mlo melatk el kmo, ‘Ngmilekera chad el uaisei e mo Kristiano?’

12, 13. (a) Ngmilekera Paulus e smodii a rolel e ngmlo Kristiano? (b) Ngmilekera Paulus e ua “[losebek] er choutoched el chelebed”?

¹² A ongingil tekingel a Paulus a ulenger er tiang: “Mak mlor a Damaskus el oba klisiich ma meringel el oderuchel el kngiluu er a re bderir a re prist. Ma kim ngar a rael er a mocha sueleb, e king, e ak milsa tal kuk medidiich er a sils el llomes el mlar a eanged e dmiich el meliuekl er ngak me tirkel ulebengkek el ngar omerael. Ma ki rokui el mloubuu ra chutem, e ak urrenges ra ngor el melekoi er ngak el tekoi ra Hebru el kmo, ‘Saulus, Saulus, ngera me koldechelakl er ngak? Cho mosebek er choutoched el chelebed e ke di otour a chetechat.’ Mak uleker el kmo, ‘Kau ke techang e Rubang?’ Ma Rubak a dilu el kmo, ‘Ak Jesus el kau oldechelakl er ngii.’”f​—Rel. 26:12-15, BT.

¹³ Uchei er a leduubech tia el tekoi e a Paulus a ua ‘lulsebek er a outoched el chelebed.’ Ngdi ua charm el di ngii el melemall er ngii sel losebek er a kedorm el kerrekar lousbech er ngii lomekrael er ngii, a Paulus me ngdi ngii el melemall er ngii sel lomtok er a moktek er a Dios. Me a Jesus er a lebo duum er a Paulus er a rael er a Damaskus e ngngilsuir el ngodechii a uldesuel ngika el bliochel a rengul el chad el cheleuid.​—Jn. 16:1, 2.

14, 15. Ngera ngdilu Paulus el kirel a omelodech el bla leruul er a klengar er ngii?

¹⁴ A Paulus a mera el riruul a meklou el omelodech er a klengar er ngii. Ngdilu er a Agripa el kmo: “[Ng] dimlak kurrengesmengoit a ikel tekoi el mlar a eanged el mer ngak el sel kilsang el ua le berrous. Ma kot e ak mlar a Damaskus, e mor a Jerusalem, e sola e mor a beluu er a Israel el rokir, e dirrek el mor a delongelir a re Chisentael el olisechakl el kmo ng kirir el obult er a kngterir e mor a Dios e meruul a ikel tekoi el mo olecholt el kmo te mla obult.” (Rel. 26:19, 20) A Paulus a mle betok el rak loruul er a ureor el Jesus Kristus a milsang er a bo ledum er ngii er a rael el mora Damaskus. Me ngngera mla meketmokl? Tirke el kilengei er a ungil chais el lulemerk er ngii a Paulus a ulebult e mlo diak loruul a mekngit e mlo meruul er a soal a Dios. Tirkaikid el chad a mlo ungil citizen er a beluu; te ullengesenges a llach e melechel er a budech.

¹⁵ Me nguaisei engdi a Rechijudea lulemtok er a Paulus a dimlak lomekerreu el kirel aika el tekoi. A Paulus a dilu el kmo: “Ng tiaikid a mle uchul ma re chad er a Judea a urrekedak er a kngar a Templo el leko tomekoad er ngak. Ngdi Dios a ngilsukak el me lmuut er chelechang, mak dechor er tiang el olecholt aikang el di osisiu el mor a rokui el chad er ker me ker.”​—Rel. 26:21, 22.

16. Ngmekera sebeched loukerebai er a Paulus sel dosaod er a klaumerang er kid el mora re judge me a remerreder er a beluu?

¹⁶ A remera el Kristiano a kirir el “di kldmokl el [mesaod]” er a klaumerang er tir. (1 Pe. 3:15) Sel dosaod er a klaumerang er kid el mora re judge me a remerreder er a beluu e ngmo ngosukid sel doukerebai er a rolel e a Paulus a milengedecheduch er a Agripa me a Festus. Sel dochotii omengull e douchais er tir er a rolel e a klemerang er a Biblia mla ngodechii a klengar er kid e rullii el lmuut el mo ungil, me a dirrek el klengar tirke el kongei er a klumech el dobang, e nglocha sebechel el remutech a rengrir.

“Ke Mo Rullak el Mo Kristiano” (Rellir 26:24-32)

17. Ngmilekera Festus er a tekingel a Paulus, e mekera rebetok er chelechang e olecholt er a osisiu el blekeradel?

¹⁷ Tirka el teru el merreder a dimlak el sebechir el oibngeterir er a tekingel a Paulus. Mutebengii a dilubech: “Me tial losaod er ngii a Paulus el ua isei e a Festus a uleldiu er ngii el kmo, ‘Paulus, kau a kebelngong! A ngarbab el omesubem a mla rullau el mo kebelung!’” (Rel. 26:24) A blekerdelel a Festus a kmal di uai a blekerdelir a rebetok er chelecha el taem. A rebetok omes er tirke el olisechakl aike el mera el lolekoi a Biblia el kmo te kebelung. E tirke el ngarbab a skulir er tia el beluulechad a blechoel el meringel er tir oumerang er a osisechakl er a Biblia el kmo a rulekoad a mo mekiis.

18. Ngera ngdilu Paulus el mora Festus, luchul me a Agripa dilu el kmo ngerang?

¹⁸ Me nguaisei engdi a Paulus a dilu er a kabernor el kmo: “Ngak a diak kebelung e Kebkall el Festus, ak bai melekoi a klemerang el tekoi e medengelii a renguk. A king el kmimokl el mengedecheduch er ngii a ungil medengei aika el tekoi . . . King Agripa, kau koumerang er a reprofet? Ak medengei el kmo koumerang.” Me a King Agripa a dilu el kmo: “Ngdi chelsel a kedeb el taem e ke mo rullak el mo Kristiano.” (Rel. 26:25-28, NW) Me a lemera el millekoi a king me a lak, engdi kede medengei el kmo a tekingel a Paulus a mla er ngii a lerellii el mora king.

19. Ngera el omelilt a miltib er a Festus me a Agripa el kirel a Paulus?

¹⁹ Me a Agripa me a Festus a mlo dechor lolecholt el kmo a kerrekeriil a mla mo merek. “Ser a le tobed e te mle katekoi el kmo, ‘Ngikal chad a dirkak a ngeral le rellii el mo uchul e ng okodall ma lechub e ng ngar a kelebus.’ A Agripa a dilu er a Festus el kmo, ‘Ngikal chad a mle sebechel el mengubet chomko ng dimlak lolengit er a mor a Merreder er a Rom.’” (Rel. 26:31, 32) Te mle medengei el kmo a Paulus a dimlak a telemellel. Ngulterekokl el mla mo er ngii a telkib el klemedengei er tir el kirir a Rekristiano me nglocha mo ungil a omerellir el mo er tir.

20. Ngera uchul me ngmla er ngii a belkul a Paulus a bo losaod er ngii er mederir tirka el teru el merreder?

²⁰ Tirka el teru el mesisiich el merreder a dimlak el lekengei er a ungil chais er a Rengedel a Dios. Me ngmla er ngii a belkul a bo losaod er ngii er mederir a apostol Paulus? Chochoi. A Paulus er a lebo er “mederir a re king ma re merreder” er a Judea e ngmirrekii a klumech el mora rechad er a renged er a Rom el dimlak el sebeched el nguu a klumech el mo er tir. (Lk. 21:12, 13) Me a dirrek el experience me a blakerreng er a Paulus er a lechebangel a ringel a millisiich er a rudam me a rudos er ngii.​—Fil. 1:12-14.

21. Sel dolemolem el lomerk alta kede mo chobangel a ringel, e ngera lungil a sebechel meketmokl?

²¹ Tia me ngklemerang er chelecha el taem. Sel dolemolem el meruul er a ureor er a Renged alta kede mo chobangel a ringel me a ultok, e ngbetok a ungil el sebechel meketmokl. Kede locha mo sebeched el merkii a klumech el mora rulab a derreder el tir a diak lebeot a denguu a klumech el mo er tir. A blakerreng er kid a dirrek el mo melisiich er a rudam me a rudos er kid el Kristiano, e odbecheterir el mo olecholt er a lmuut el klou el blekeu er a ureor el lomerk er a klumech er a Rengedel a Dios.